Khaolo ea 19
O Ruta Mosali oa Mosamaria
HA BA le tseleng e tlohang Judea ho ea Galilea, Jesu le barutuoa ba hae ba haola seterekeng sa Samaria. Ba khathetse ke leeto, hoo e ka bang motšehare o moholo baa emisa ’me ba phomola selibeng se haufi le motse oa Sikare. Seliba sena se ne se fatoe ke Jakobo makholo a lilemo a fetileng, ’me se ntse se le teng ho fihlela kajeno, haufi le motse oa kajeno oa Nablus.
Ha Jesu a ntse a phomotse mona, barutuoa ba hae ba ea motseng bakeng sa ho reka lijo. Ha mosali e mong oa Mosamaria a tlil’o kha metsi, oa kōpa: “Mphe, ke noe.”
Ka kakaretso Bajode le Basamaria ha ba sebelisane ka baka la bora ba bona bo tebileng. Ka hona, ka ho makala, mosali eo oa botsa: “Ere u le mo-Jode, u qela joang metsi ho ’na, ke le mosali oa Samaria?”
Jesu oa araba: “Hoja u tsebile . . . ea reng ho uena: Mphe ke noe, ke uena u ka beng u qetse ho eena, ’me a ka be a u file metsi a kollang.”
Mosali eo oa arabela, “Morena, ha u na sekhello sa ho kha, le seliba se sekoti; metsi ao a kollang u a nkile kae na? Na u moholo ho Ntat’a rōna Jakobo, ea re neileng seliba sena, a ba a noa ho sona ka sebele sa hae, le bara ba hae, le likhomo tsa hae?”
Jesu o re: “E mong le e mong ea noang metsi ana, o tla boela a nyoroe. Empa e mong le e mong ea noang metsi ao ke mo neang ’ona, a ke ke a hlola a nyoroa le ka mohla le o mong, metsi ao ke mo neang ’ona, e tla ba ka ho eena seliba sa metsi a phallelang bophelong bo sa feleng.”
Mosali eo oa arabela: “Morena, mphe metsi ao, ke tle ke se hlole ke nyoroa, ’me ke se hlole ke tla kha mona.”
Joale Jesu o re ho eena: “Ea bitsa monna oa hao, ’me le tle koano.”
Oa arabela: “Ha ke na monna.”
Jesu o tiisa polelo ea hae. “U boletse hantle, ha u itse: Ha ke na monna. Hobane u kile ua ba le banna ba bahlano, ’me eo u nang le eena joale hase monna oa hao.”
Ka ho makala mosali eo o re: “Morena, kea bona hobane u moprofeta.” A senola thahasello ea hae ea moea, o mo hlokomelisa hore Basamaria “ba ne ba rapela thabeng eo [ea Gerizime, e leng haufi le moo]; ’me lōna le re, nģalo eo ho tšoanetseng ho rapeloa teng, e Jerusalema.”
Leha ho le joalo, Jesu o bontša hore sebaka sa borapeli hase eona ntho ea bohlokoa. O re: “Empa nako ea tla, . . . eo barapeli ba ’nete ba tla rapela Ntate ka moea le ka ’nete; hobane Ntate o batla ba mo rapelang joalo. Molimo ke Moea: ba o rapelang e ka khona ba rapele ka moea le ka ’nete.”
Mosali eo o hlolletsoe ka ho tebileng. O re: “Kea tseba hobane Messia, ea bitsoang Kreste, o tla tla; mohla eo a tlileng, o tla re tsebisa tsohle.”
Jesu o re: “Ke ’na, ea buang le uena.” Nahana ka seo! Mosali enoa ea tlang ho kha metsi motšehare o moholo, mohlomong e le hore a ka qoba ho kopana le basali ba motse ba neng ba khesa tsela eo a phelang ka eona, o amoheloa ka tsela e babatsehang ke Jesu. O bolella mosali eo sefahla-mahlo, seo ho seng mohla a kileng a se bua ho mang kapa mang. Liphello ea e-ba life?
Basamaria ba Bangata Baa Lumela
Ha ba khutla Sikare ka lijo, barutuoa ba fumana Jesu a ntse a le selibeng sa Jakobo moo ba mo siileng teng, empa joale o buisana le mosali oa Mosamaria. Ha barutuoa ba fihla, mosali eo oa tsamaea o siea nkho ea hae ea metsi, ’me o leba motseng.
A thahaselletse lintho tseo Jesu a ’molelletseng tsona ka ho tebileng, o bolella batho ba motse: “Tlong, le bone motho ea mpoleletseng tsohle tseo ke li entseng.” Joale, e le ka tsela ea ho tsosa khahleho, oa botsa: “Na e ke se be ke eena Kreste?” Potso eo e finyella morero oa eona—batho ba ea ho ea inoesa ka nkho.
Ho sa le joalo, barutuoa ba phehella Jesu hore a je lijo tseo ba tsoa li lata motseng. Empa oa arabela: “’Na ke na le sejo seo ke se jang, seo lōna le sa se tsebeng.”
Barutuoa baa botsana: “Hleka e mong o kile a mo tlisetsa lijo na?” Jesu oa hlalosa: “Sejo sa ka ke ho etsa thato ea ea nthomileng, le ho phetha mosebetsi oa hae. Ana ha le re, khoeli li sa le ’ne, ’me etlaba e se e le kotulo?” Leha ho le joalo, ha a supa kotulo ea moea, Jesu o re: “Emisang mahlo a lōna, le talime masimo, hobane a se a soeufaletse ho kotuloa. Ea kotulang o nka moputso, ’me o bokella bophelo bo sa feleng lijo, hore ea jalang a thabe hammoho le ea kotulang.”
Mohlomong Jesu o ne a se a ntse a bona phello e khōlō ea ho paka ha mosali oa Mosamaria—hore ba bangata ba ne ba lumela ho eena ka baka la bopaki ba mosali eo. Mosali eo o pakela batho ba motse, o re: “O mpolelletse tsohle tsee ke li entseng.” Kahoo ha batho ba Sikare ba e-tla ho eena selibeng, ba mo kōpa hore a lule le bona le ho buisana le bona ka ho eketsehileng. Jesu o amohela memo eo ’me o lula moo matsatsi a mabeli.
Ha Basamaria ba ntse ba mametse Jesu, ba bang ba eketsehileng baa lumela. Joale ba re ho mosali: “Ha re sa lumela ka baka la polelo ea hao; hobane re ikutloetse, ’me rea tseba hobane enoa ke Kreste ruri, ’Moloki oa lefatše.” Ka sebele mosali oa Mosamaria o fana ka mohlala o motle oa kamoo re ka pakang ka Kreste ka ho tsosa khahleho e le hore bamameli ba ka fuputsa ka ho eketsehileng!
Hopola hore ke likhoeli tse ’nè pele ho kotulo—ka ho hlakileng ho bonahala e le kotulo ea harese, e etsoang nakong ea selemo Palestina. Ka hona, hona joale mohlomong ke November kapa December. Hona ho bolela hore ka mor’a Paseka ea 30 C.E., Jesu le barutuoa ba hae ba qetile hoo e ka bang likhoeli tse robeli ba le Judea ba ruta le ho kolobetsa. Joale ba tloha ba ea naheng ea habo bona ea Galilea. Ke eng se ba letetseng moo? Johanne 4:3-43.
▪ Ke hobane’ng ha mosali oa Mosamaria a ne a maketse ha Jesu a bua le eena?
▪ Jesu o mo ruta eng ka metsi a bophelo le sebaka sa borapeli?
▪ Jesu o itšenola ho eena hore na ke mang joang, hona ke hobane’ng ha ho itšenola hoo ho makatsa hakaale?
▪ Ke bopaki bofe bo etsoang ke mosali oa Mosamaria hona ka phello efe?
▪ Sejo sa Jesu se amana joang le kotulo?
▪ Re ka lekanyetsa bolelele ba tšebeletso ea Jesu Judea joang ka mor’a Paseka ea 30 C.E.?