Thuto ea 14
Kamoo Lipaki Tsa Jehova li Hlophisitsoeng Kateng
Lipaki tsa Jehova li ile tsa qaleha neng mehleng ea kajeno? (1)
Liboka tsa Lipaki tsa Jehova li tsamaisoa joang? (2)
Litšenyehelo li hlokomeloa joang? (3)
Ke mang ea etellang pele phuthehong ka ’ngoe? (4)
Ke liboka life tse khōloanyane tse tšoaroang selemo ka seng? (5)
Ho etsoa mosebetsi ofe ntlo-khōlōng ea tsona le liofising tsa makala? (6)
1. Lipaki tsa Jehova li ile tsa qaleha mehleng ea kajeno lilemong tsa bo-1870. Qalong, li ne li bitsoa Liithuti tsa Bibele. Empa ka 1931 li ile tsa amohela lebitso le tumellanong le Mangolo, Lipaki tsa Jehova. (Esaia 43:10) Ho tloha qalong e nyenyane, mokhatlo o hlophisitsoeng o se o hōlile ho fihla ho Lipaki tse limilione, tse tšoarehileng ka ho bolela linaheng tse fetang 230.
2. Liphutheho tse ngata tsa Lipaki tsa Jehova li ba le liboka ka makhetlo a mararo beke e ’ngoe le e ’ngoe. U memeloa ho ba teng ho leha e le sefe sa tsena. (Baheberu 10:24, 25) Bibele ke motheo oa se rutoang. Liboka li buloa le ho koaloa ka thapelo. Hape ho binoa “lipina tsa moea” ho tloha botebong ba pelo libokeng tse ngata. (Baefese 5:18, 19) Ho kenoa ntle ho tefo, ’me ha ho nkuoe likoleke tsa letho.—Matheu 10:8.
3. Liphutheho tse ngata li tšoarela liboka Holong ea ’Muso. Hangata ena ke mehaho e itekanetseng e hahiloeng ke baithaopi ba Lipaki. U ke ke ua bona litšoantšo leha e le life, litšoantšo tsa Kreste sefapanong kapa lintho tse kang tsena Holong ea ’Muso. Litšenyehelo li lefelloa ka menehelo ea boithatelo. Bakeng sa ba lakatsang ho fana ka monehelo, ho na le lebokose la monehelo.—2 Bakorinthe 9:7.
4. Phuthehong ka ’ngoe, ho na le baholo, kapa balebeli. Ba etella pele ho ruteng ka phuthehong. (1 Timothea 3:1-7; 5:17) Ba thusoa ke bahlanka ba sebeletsang. (1 Timothea 3:8-10, 12, 13) Banna bana hase ba phahametseng ba bang kaofela ka phuthehong. (2 Bakorinthe 1:24) Ha ba fuoe litlotla tse khethehileng tsa mabitso. (Matheu 23:8-10) Ha ba apare ka mokhoa o fapaneng le oa ba bang. Leha e le hore baa lefshoa bakeng sa mosebetsi oa bona. Ka ho ithatela baholo ba hlokomela litlhoko tsa moea tsa phutheho. Ba ka fana ka matšeliso le tataiso linakong tsa khathatso.—Jakobo 5:14-16; 1 Petrose 5:2, 3.
5. Lipaki tsa Jehova li boetse li tšoara liboka tse khōlō kapa likopano selemo ka seng. Linakong tsena liphutheho tse ngata li tla ’moho bakeng sa lenaneo le khethehileng la thupelo ea Bibele. Ho kolobetsoa ha barutuoa ba bacha ke karolo ea kamehla ea lenaneo la kopano ka ’ngoe e nyenyane kapa e khōlō.—Matheu 3:13-17; 28:19, 20.
6. Ntlo-khōlō ea lefatše ea Lipaki tsa Jehova e New York. Sebakeng seo, ho fumaneha Sehlopha se Busang, sehlopha sa bolaoli sa baholo ba nang le phihlelo ba lebetseng phutheho ea lefatše ka bophara. Hape ho na le liofisi tsa makala tse fetang 100 ho pota lefatše. Libakeng tsena, baithaopi ba thusa ka ho hatisa le ho romela lingoliloeng tsa Bibele. Ho boetse ho fanoa ka tataiso bakeng sa ho hlophisa mosebetsi oa boboleli. Ke hobane’ng ha u sa rere ho etela ofising ea lekala e haufi le uena?