“Le Etsise Molimo” ha le Sebelisa Matla a Lona

1. Ke leraba lefe le poteletseng leo batho ba sa phethahalang ba atisang ho oela habonolo ho lona?

“MOTHO ea nang le matla o lula a laletsoe ke leraba.” Mantsoe ana a seroki sa lekholong la bo19 la lilemo a lebisa tlhokomelo kotsing e poteletseng, e leng tšebeliso e mpe ea matla. Ka masoabi, batho ba sa phethahalang ba atisa ho oela lerabeng lena habonolo. Ha e le hantle, ho theosa le histori “motho o busitse motho ho mo ntša kotsi.” (Moeklesia 8:9) Ho sebelisa matla kantle ho lerato ho baketse batho mathata a ke keng a boleloa.

2, 3. (a) Ke’ng e tsotehang ka tsela eo Jehova a sebelisang matla ka eona? (b) Matla a rona a ka ’na a akarelletsa eng, hona re lokela ho sebelisa matla ao joang?

² Empa, na ha se ho tsotehang hore ebe Jehova Molimo, ea nang le matla a sa lekanyetsoang, ha ho mohla a sebelisang matla ao hampe? Joalokaha re bone likhaolong tse fetileng, kamehla o sebelisa matla a hae, ebang ke a ho bopa, a ho timetsa, a ho sireletsa kapa a ho tsosolosa, tumellanong le merero ea hae e lerato. Ha re nahana ka tsela eo a sebelisang matla a hae ka eona, re susumelletseha ho atamela ho eena. Ka lehlakoreng le leng, seo se ka re susumelletsa ho ‘etsisa Molimo’ ha re sebelisa matla a rona. (Baefese 5:1) Empa rona batho ba fokolang re na le matla afe?

³ Hopola hore motho o bopiloe ‘a tšoana le Molimo.’ (Genese 1:26, 27) Kahoo, le rona re na le matla bonyane ka tekanyo e itseng. Matla a rona a ka ’na a akarelletsa ho khona ho finyella lintho tse itseng, ho sebetsa, ho tsamaisa kapa ho laola ba bang, ho ba le tšusumetso ho ba bang, haholo-holo ba re ratang, ho ba matla ’meleng (bonatla), kapa ho ba le lintho tse bonahalang. Mopesaleme o ile a re ka Jehova: “U mohloli oa bophelo.” (Pesaleme ea 36:9) Ka hona, ka tsela e tobileng kapa e sa tobang, Molimo ke Mohloli oa matla leha e le afe a loketseng ao re ka bang le ’ona. Ka hona re batla ho a sebelisa ka litsela tse mo khahlisang. Re ka etsa seo joang?

Lerato ke la Bohlokoa

4, 5. (a) Ntlha ea bohlokoa ho sebeliseng matla ka tsela e nepahetseng ke efe, hona mohlala oa Molimo o bontša see joang? (b) Lerato le tla re thusa ho sebelisa matla a rona ka tsela e nepahetseng joang?

⁴ Ntlha ea bohlokoa ho sebeliseng matla ka tsela e nepahetseng ke lerato. Na see ha se sona seo mohlala oa Molimo o se bontšang? Hopola litšobotsi tsa Molimo tse ’nè tse ka sehloohong, e leng matla, toka, bohlale le lerato, tse tšohliloeng Khaolong ea 1. Litšobotsing tseo tse ’nè, ke efe e hlaheletseng? Ke lerato. Johanne oa Pele 4:8 e re: “Molimo ke lerato.” Ka sebele, tšobotsi ea Jehova ea motheo ke lerato ’me le susumetsa ntho e ’ngoe le e ’ngoe eo a e etsang. Kahoo tsela eo Jehova a sebelisang matla a hae ka eona e susumetsoa ke lerato ’me qetellong e tsoela ba mo ratang molemo.

⁵ Hape lerato le tla re thusa ho sebelisa matla a rona ka tsela e nepahetseng. Etsoe, Bibele e re bolella hore motho ea lerato o “mosa” ’me “ha a ichebe boeena feela.” (1 Bakorinthe 13:4, 5) Ka hona, lerato ha le na ho re lumella ho hatella bao re nang le bolaoli bo itseng holim’a bona kapa ho ba tšoara ka sehloho. Ho e-na le hoo, re tla fa ba bang seriti ’me re eteletse litlhoko tsa bona le maikutlo a bona ka pele ho tsa rona.—Bafilipi 2:3, 4.

6, 7. (a) Ho tšaba Molimo ho bolela’ng, hona ke hobane’ng ha tšobotsi ee e tla re thusa ho qoba tšebeliso e mpe ea matla? (b) Fana ka mohlala o bontšang kamano e teng pakeng tsa ho tšaba ho khopisa Molimo le ho rata Molimo.

⁶ Lerato le amana le tšobotsi e ’ngoe e ka re thusang ho qoba ho sebelisa matla hampe e leng ho tšaba Molimo. Bohlokoa ba tšobotsi ee ke bofe? Liproverbia 16:6 e re: “Motho o furalla bobe ka ho tšaba Jehova.” Ka sebele tšebeliso e mpe ea matla ke e ’ngoe ea litsela tse mpe tseo re lokelang ho li furalla. Ho tšaba Molimo ho tla re thibela ho tšoara ba tlas’a rona hampe. Hobane’ng? Hobane re tseba hore re ikarabella ho Molimo ka tsela eo re ba tšoarang ka eona. (Nehemia 5:1-7, 15) Empa ho tšaba Molimo ho akarelletsa ho eketsehileng. Mantsoe a sebelisitsoeng puong ea qalong bakeng sa “ho tšaba” hangata a bontša ho ba le tlhompho e tebileng le tšabo e nang le tlhompho ho Molimo. Kahoo Bibele e amahanya tšabo le ho rata Molimo. (Deuteronoma 10:12, 13) Tšabo ena e nang le tlhompho e akarelletsa tšabo e loketseng ea ho khopisa Molimo, eseng feela hobane re tšaba liphello tsa seo empa hobane re hlile re mo rata.

⁷ Ka mohlala: Nahana ka kamano e mofuthu eo moshemane a nang le eona le ntat’ae. Moshemane oa lemoha hore ntat’ae o mo thahasella ka tsela e mofuthu le e lerato. Empa moshemane o boetse o tseba seo ntat’ae a se hlokang ho eena, ’me oa tseba hore o tla mo khalemela haeba a ka etsa se fosahetseng. Moshemane ha a lule a tlakasela ha a nahana ka ntat’ae. Ho e-na le hoo, o rata ntat’ae haholo. Moshemane enoa o thabela ho etsa se tla etsa hore ntat’ae a mo rate. Ho joalo le ka ho tšaba Molimo. Kaha re rata Jehova, Ntate oa rona oa leholimo, re tšaba ho etsa ntho leha e le efe e ka etsang hore ‘pelo ea hae e utloe bohloko.’ (Genese 6:6) Ho e-na le hoo, re lakatsa ho mo thabisa pelo. (Liproverbia 27:11) Ke kahoo re batlang ho sebelisa matla a rona ka tsela e nepahetseng. A re hlahlobeng hore na re ka etsa sena joang.

Ka Lapeng

8. (a) Banna ba na le bolaoli bofe ka lapeng, hona bo lokela ho sebelisoa joang? (b) Monna a ka bontša joang hore o hlompha mosali oa hae?

⁸ A re qaleng ka ho hlahloba ka lelapeng. Baefese 5:23 e re: “Monna ke hlooho ea mosali oa hae.” Monna o lokela ho sebelisa bolaoli boo a bo filoeng ke Molimo joang? Bibele e re banna ba ‘phelisane le basali ba bona ka tsela e bontšang hore baa ba tseba’ le hore ‘ba ba tšoare ka tlhompho le ka tsela eo ba neng ba tla tšoara sejana se pshatlehang habonolo.’ (1 Petrose 3:7) Lereho la Segerike le fetoletsoeng e le “tlhompho” le bolela “theko, ho ananela, . . . ho hlompha.” Maemong a mang lentsoe lena li fetoletsoe e le “limpho” le “bohlokoa.” (Liketso 28:10; 1 Petrose 2:7) Monna ea hlomphang mosali oa hae le ka mohla a ke ke a mo otla. Hape a ke ke a mo theola seriti kapa a mo nyenyefatsa, a etsa hore a ikutloe e le ea se nang thuso. Ho e-na le hoo, oa hlokomela hore ke oa bohlokoa ’me o mo tšoara ka tlhompho. O bontša hore o mo nka e le oa bohlokoa ka mantsoe le liketso ha ba le bang le ha ba le har’a batho. (Liproverbia 31:28) Monna ea joalo a ke ke a hapa lerato le tlhompho tsa mosali oa hae feela, empa habohlokoa le ho feta, o tla amoheloa ke Molimo.

9. (a) Basali ba na le matla afe ka lapeng? (b) Ke eng e ka thusang mosali ho sebelisa bokhoni ba hae ho tšehetsa monna oa hae, hona ka phello efe?

⁹ Basali le bona ba na le matla a itseng ka lapeng. Bibele e bua ka basali ba tšabang Molimo, ba ileng ba susumelletsa banna ba bona ho etsa se molemo kapa ba ba thusa ho qoba ho etsa liqeto tse fosahetseng, empa ba ntse ba hlompha meeli e loketseng ea bohlooho. (Genese 21:9-12; 27:46–28:2) Mosali a ka ’na a ba bohlale ho feta monna oa hae, kapa a ka ’na a khona ho etsa lintho tse itseng tseo monna a sa li khoneng. Leha ho le joalo, o lokela ho “hlompha monna oa hae haholo” ’me a “ikokobeletse” eena “joalokaha [a] ikokobeletsa Morena.” (Baefese 5:22, 33) Ho nahana ka ho khahlisa Molimo ho ka thusa mosali ho sebelisa bokhoni ba hae ho tšehetsa monna oa hae ho e-na le ho mo nyenyefatsa kapa ho leka ho mo laola. “Mosali [ea joalo] ea bohlale e le kannete” o tšoarisana le monna oa hae ho haheng lelapa. Ka tsela eo o boloka khotso le Molimo.—Liproverbia 14:1.

10. (a) Molimo o file batsoali bolaoli bofe? (b) Lentsoe “ho khalemela” le bolela’ng, hona khalemelo e lokela ho fanoa joang? (Bona le naletsana.)

¹⁰ Batsoali le bona ba na le bolaoli boo ba bo filoeng ke Molimo. Bibele ea eletsa: “Bo-ntate, le se ke la halefisa bana ba lona empa le tsoele pele ho ba holisa ka ho ba khalemela le ho ba tataisa ka tsela eo Jehova a e batlang.” (Baefese 6:4) Ka Bibeleng, lentsoe “ho khalemela” le ka bolela “ho holisa, ho koetlisa, ho rupela.” Bana ba hloka ho khalemeloa. E ba ba thabileng le ba atlehileng ha ba fuoa tataiso e hlakileng, ba beheloa meeli le litekanyetso tse tobileng. Bibele e amahanya khalemelo, kapa thupelo e joalo le lerato. (Liproverbia 13:24) Ka hona, le ka mohla ‘thupa e khalemelang’ ha ea lokela ho hlekefetsa maikutlong kapa ’meleng.a (Liproverbia 22:15; 29:15) Ho khalemela ka tsela e sa tenyetseheng kapa e khahlapetsang e se nang boikutlo ba lerato ke ho sebelisa bolaoli ba botsoali hampe ’me ho ka sithabetsa ngoana moeeng. (Bakolose 3:21) Ka lehlakoreng le leng, ho khalemela ka tsela e itekanetseng le e loketseng ho bontša bana hore batsoali ba bona baa ba rata le hore baa tsotella hore na e tla ba batho ba mofuta ofe.

11. Bana ba ka sebelisa matla a bona ka tsela e nepahetseng joang?

¹¹ Ho thoe’ng ka bana? Ba ka sebelisa matla a bona ka tsela e nepahetseng joang? Liproverbia 20:29 e re: “Botle ba bahlankana ke matla a bona.” Ka sebele ha ho tsela e ’ngoe e molemo eo bacha ba ka sebelisang matla a bona le mahlahahlaha a bona ka eona ho feta ho sebeletsa “’Mopi oa [rona] e Moholo.” (Moeklesia 12:1) Bana ba lokela ho hopola hore liketso tsa bona li ka ama tsela eo batsoali ba bona ba ikutloang ka eona. (Liproverbia 23:24, 25) Ha bana ba mamela batsoali ba bona ba tšabang Molimo ’me ba tsoela pele tseleng e lokileng, ba thabisa lipelo tsa batsoali ba bona. (Baefese 6:1) Boitšoaro bo joalo bo “thabisa Morena.”—Bakolose 3:20.

Ka Phuthehong

12, 13. (a) Baholo ba lokela ho talima bolaoli boo ba nang le bona ka phuthehong joang? (b) Bontša hore na ke hobane’ng ha baholo ba lokela ho tšoara mohlape ka bonolo.

¹² Jehova o behile balebeli ho etella pele ka phuthehong ea Bokreste. (Baheberu 13:17) Banna bana ba tšoanelehang ba lokela ho sebelisa bolaoli boo ba bo filoeng ke Molimo ho fana ka thuso e hlokahalang le ho tlatsetsa boiketlong ba mohlape. Na boemo ba bona bo fa baholo tokelo ea ho rena ka thata holim’a balumeli-’moho le bona? Le hanyenyane! Baholo ba lokela ho ba le pono e leka-lekaneng le e bontšang boikokobetso ka karolo eo ba e phethang ka phuthehong. (1 Petrose 5:2, 3) Bibele e re ho balebeli: “Le lise phutheho ea Molimo eo a e rekileng ka mali a Mora oa hae.” (Liketso 20:28) Lena ke lona lebaka le ka sehloohong la ho tšoara setho ka seng sa mohlape ka bonolo.

¹³ Re ka ’na ra bapisa sena ka tsela ena: Motsoalle oa hlooho ea khomo o u kopa hore u hlokomele thepa eo a tšabanang le eona. Oa tseba hore motsoalle oa hao o lefeletse thepa eo chelete e ngata. Na u ne u sa tl’o e tšoara ka hlokolosi le ka kelo-hloko e kholo? Ka ho tšoanang, Molimo o file baholo boikarabelo ba ho hlokomela letlotlo la bohlokoa haholo e leng phutheho, eo litho tsa eona li tšoantšoang le linku. (Johanne 21:16, 17) Linku tsa Jehova ke tsa bohlokoa ho eena. Ha e le hantle, ke tsa bohlokoa hoo a li rekileng ka mali a bohlokoa a Mora oa hae ea tsoetsoeng a ’notši, Jesu Kreste. Jehova o lefeletse linku tsa hae tefo e phahameng ka ho fetisisa. Baholo ba ikokobelitseng ba lula ba hopola sena ’me ba tšoara linku tsa Jehova tumellanong le seo.

‘Matla a Leleme’

14. Leleme le na le matla afe?

¹⁴ Bibele e re: “Lefu le bophelo li matleng a leleme.” (Liproverbia 18:21) Ke ’nete hore leleme le ka baka tšenyo e kholo. Ke mang ho rona ea e-s’o ka a utloa bohloko bo hlabang ba polelo e sa nahaneleng kapa e bileng e nyenyefatsang? Empa leleme le boetse le na le matla a ho lokisa. Liproverbia 12:18 e re: “Lipuo tsa ba bohlale lia folisa.” E, mantsoe a khothatsang le a hahang a ka tšoana le ho silila pelo ka setlolo se thobang, se folisang. Nahana ka mehlala e seng mekae.

15, 16. Re ka sebelisa leleme ho khothatsa ba bang ka litsela life?

¹⁵ Bathesalonika ba Pele 5:14 ea phehella: “Le tšelise ba nyahameng.” Ke ’nete hore ka linako tse ling esita le bahlanka ba tšepahalang ba Jehova ba ka ’na ba loantšana le ho nyahama. Re ka thusa batho ba joalo joang? Ba babatse ka tieo ka tsela e tobileng ho ba thusa hore ba bone hore ke ba bohlokoa mahlong a Jehova. Tšohla hammoho le bona litemana tse ipiletsang tsa Bibele tse bontšang hore Jehova o fela a tsotella le ho rata “bao lipelo tsa bona li utloileng bohloko” le “ba nyahameng.” (Pesaleme ea 34:18, nal.) Ha re sebelisa matla a rona a leleme ho tšelisa ba bang, re bontša hore re etsisa Molimo oa rona ea nang le kutloelo-bohloko, “ea tšelisang batho ba nyahameng.”—2 Bakorinthe 7:6.

¹⁶ Re ka boela ra sebelisa matla a rona a leleme ho fa ba bang khothatso eo ba hlileng ba e hlokang. Na molumeli-’moho le rona o hlokahaletsoe ke moratuoa? Mantsoe a kutloelo-bohloko a bontšang hore rea tsotella le hore re amehile a ka tšelisa motho ea saretsoeng. Na mora kapa morali oa bo rona ea seng a holile o ikutloa eka ha a hlokoe? Motho ea buang ka tsela e nahanelang a ka tiisetsa ba holileng hore ke ba bohlokoa le hore baa ananeloa. Na e mong o loantšana le bokuli bo itseng bo sa foleng? Ho mo bolella mantsoe a mosa ka fono, ka ho mo ngolla kapa ka ho toba ho ka tlatsetsa haholo ho hlasimolleng mokuli eo. E tlameha ebe ’Mopi oa rona o thaba hakaakang ha re sebelisa matla a rona a puo ho bua lintho tse “molemo tse tla haha”!—Baefese 4:29.

17. Re ka sebelisa maleme a rona ka tsela efe ea bohlokoa ho thusa ba bang, hona ke hobane’ng ha re lokela ho etsa seo?

¹⁷ Ha ho tsela e ’ngoe ea bohlokoa eo re ka sebelisang matla a leleme ka eona ho feta ho bolella ba bang litaba tse monate tsa ’Muso oa Molimo. Liproverbia 3:27 e re: “Fana ka se molemo ho ba hlokang, ha ho le matleng a hao ho ba thusa.” Re tlameha ho bolella ba bang litaba tse monate tse pholosang bophelo. E ne e ke ke ea e-ba ho loketseng hore re ipolokele molaetsa o potlakileng oo Jehova a re fileng oona ka seatla se bulehileng hakana. (1 Bakorinthe 9:16, 22) Empa Jehova o lebeletse hore re kopanele mosebetsing oo ho isa boholeng bofe?

Ho Sebeletsa Jehova ka ‘Matla a Rona ’Ohle’

18. Jehova o lebeletse eng ho rona?

¹⁸ Lerato la rona ho Jehova le re susumelletsa ho kopanela ka botlalo tšebeletsong ea Bokreste. Jehova o lebeletse’ng ho rona ntlheng ee? O lebeletse ho hong hoo e mong le e mong oa rona a ka fanang ka hona, ho sa tsotellehe hore na boemo ba rona ke bofe bophelong: “Ntho leha e le efe eo le e etsang, le e etse ka pelo eohle joalokaha eka le e etsetsa Jehova eseng batho.” (Bakolose 3:23) Ha a bolela taelo e kholo ka ho fetisisa, Jesu o ile a re: “U rate Jehova Molimo oa hao ka pelo ea hao eohle, ka moea oa hao oohle, ka kelello ea hao eohle le ka matla a hao ’ohle.” (Mareka 12:30) E, Jehova o lebeletse hore e mong le e mong oa rona a mo rate le ho mo sebeletsa ka moea oohle.

19, 20. (a) Kaha moea o akarelletsa pelo, kelello le matla, ke hobane’ng ha ho boletsoe likarolo tsee tse ling ho Mareka 12:30? (b) Ho sebeletsa Jehova ka moea oohle ho bolela’ng?

¹⁹ Ho sebeletsa Molimo ka moea oohle ho bolela’ng? Moea o bolela motho ea feletseng, matla ’ohle a hae a ’mele le a kelello. Kaha moea o akarelletsa pelo, kelello le matla, ke hobane’ng ha likarolo tsee tse ling li boletsoe ho Mareka 12:30? Nahana ka mohlala ona: Mehleng ea Bibele, motho o ne a ka ’na a ithekisa (a rekisa moea oa hae) bokhobeng. Leha ho le joalo, lekhoba le ne le ka ’na la se ke la sebeletsa mong’a lona ka pelo eohle; le ne le ka ’na la se ke la sebelisa matla ’ohle a lona kapa kelello ea lona ka ho feletseng ho ntšetsa pele lithahasello tsa mong’a lona. (Bakolose 3:22) Kahoo, ho bonahala eka hore Jesu o ne a bua ka likarolo tsena tse ling ho hatisa hore ha rea lokela ho itšiela letho ha re sebeletsa Molimo. Ho sebeletsa Molimo ka moea oohle ho bolela ho itela, ho sebelisa matla a rona le bonatla ba rona tšebeletsong ea hae kahohle kamoo re ka khonang kateng.

²⁰ Na ho sebeletsa ka moea oohle ho bolela hore kaofela re tlameha ho sebelisa nako le matla a lekanang tšebeletsong? Eo ke ntho e ke keng ea khoneha, kaha maemo a batho le matla a bona aa fapana. Ka mohlala, mocha ea phelang hantle ’meleng le ea nang le mokoka a ka ’na a khona ho qeta nako e eketsehileng boboleling ho feta motho ea fokolloang ke matla ka lebaka la botsofali. Lesoha le se nang boikarabelo ba lelapa le ka ’na la khona ho etsa ho eketsehileng ho feta motho ea lokelang ho hlokomela lelapa. Haeba matla le maemo a rona a re lumella ho etsa ho eketsehileng tšebeletsong, re lokela ho leboha seo hakaakang! Ke ’nete hore ha re batle hore le ka mohla re be le boikutlo ba ho tšoaea-tšoaea liphoso, ka ho ipapisa le ba bang ntlheng ena. (Baroma 14:10-12) Ho e-na le hoo, re batla ho sebelisa matla a rona ho khothatsa ba bang.

21. Tsela e molemo le eo e leng ea bohlokoa ka ho fetisisa ea ho sebelisa matla a rona ke efe?

²¹ Jehova o behile mohlala o phethahetseng ka ho sebelisa matla a hae ka tsela e nepahetseng. Re batla ho mo etsisa kahohle kamoo re ka khonang kateng re le batho ba sa phethahalang. Re ka sebelisa matla a rona ka tsela e nepahetseng ka hore re tšoare ba tlas’a bolaoli ba rona ka tsela e nang le seriti. Ho feta moo, re batla ho etsa ka moea oohle mosebetsi oa boboleli o pholosang bophelo oo Jehova a re fileng oona. (Baroma 10:13, 14) Hopola hore Jehova oa thaba ha u fana ka sohle seo u ka khonang ho fana ka sona. Na pelo ea hao ha e u susumelletse ho batla ho etsa sohle seo u ka se khonang ho sebeletsa Molimo ea nang le kutloisiso le ea lerato joalo? Ha ho tsela e ’ngoe e molemo kapa eo e leng ea bohlokoa ho feta ena eo u ka sebelisang matla a hao ka eona.