“Ke Tla Khotsofatsa Moea o Khathetseng”

1. Ke tlhohonolofatso efe e tla ba teng lefatšeng le lecha eo u e lebeletseng ka ho khetheha?

“LEFATŠE le lecha.” Ha u utloa mantsoe ao, na u nahana ka tse ling tsa litlhohonolofatso tse bonahalang tse boletsoeng esale pele? Mohlomong u nahana ka ’mele o phethahetseng, nala ea lijo tse matlafatsang, liphoofolo tse seng hlaha kapa matlo a sireletsehileng. Ho ka etsahala hore ebe u ka ba ua bolela litemana tsa Bibele tseo e leng motheo oa lintho tsena tseo u li lebeletseng. Leha ho le joalo, u se ke ua lebala tlhohonolofatso ena—e leng ea ho phela hantle moeeng le maikutlong. Ha batho ba se na eona, ho e-s’o ee kae lintho tse ling kaofela tse ba thabisang e ne e tla ba lefeela.

2, 3. Libuka tseo Jeremia a li ngotseng li re thusa hore re lebelle tlhohonolofatso efe e ikhethang?

² Ha a ne a re Jeremia a bolele esale pele ka ho khutla ha Bajuda Babylona, Molimo o ile a lebisa tlhokomelo tabeng ea hore na ba ne ba tla ikutloa joang: “U sa ntse u tla ikhabisa ka meropa ea hao e menyenyane ’me u tsoe ka motjeko oa ba tšehang.” (Bala Jeremia 30:18, 19; 31:4, 12-14.) Molimo o ile a phaella ka ntho e ka ’nang ea u ama maikutlo: “Ke tla khotsofatsa moea o khathetseng, ’me ke tla khorisa moea o mong le o mong o tepeletseng.” NET Bible e fetolela tšepiso ena ea Molimo ka tsela ena: “Ke tla fa ba khathetseng litlhoko tsa bona kaofela ’me ka botlalo ke tla khatholla meea ea ba tepeletseng.”—Jer. 31:25.

³ Ba ne ba ka lebella bokamoso bo babatsehang hakaakang! Jehova o boletse hore o ne a tla khotsofatsa ka botlalo ea khathetseng le ea nyahameng. Ka sebele, seo Molimo a tšepisang hore o tla se etsa, oa se etsa. Libuka tseo Jeremia a li ngotseng li re tiisetsa hore le rōna re tla khotsofatsoa. Ho feta moo, li re bolella hore le hona joale re ka khothala ra ba ra ba le tšepo. Ho phaella moo, li bontša mekhoa e molemo eo re ka khothatsang ba bang ka eona, re ba thuse hore ba khotsofatse meea ea bona e khathetseng.

4. Ke hobane’ng ha re ka utloisisa hore na Jeremia o ne a ikutloa joang?

⁴ Tšepiso eo e ile ea khothatsa Jeremia, ’me le rōna e ka re khothatsa. Hobane’ng? Hopola ntlha e boletsoeng Khaolong ea 1 ea buka ena—ea hore Jeremia e ne e le “motho ea nang le maikutlo a joaloka a rōna,” joalokaha ho ne ho le joalo le ka Elia. (Jak. 5:17) Nahana ka mabaka a seng makae a neng a ka ’na a etsa hore ka linako tse ling Jeremia a ikutloe a nyahame kapa a bile a tepe-tepeletse maikutlo. Ha u ntse u etsa joalo, nahana hore na u ne u tla ikutloa joang maemong a tšoanang le hore na ke hobane’ng ha maemo ao u thulanang le ’ona a ka ’na a u nyahamisa.—Bar. 15:4.

5. Ke eng eo e ka ’nang eaba e ne e nyahamisa Jeremia?

⁵ E ka ’na eaba ntho e ’ngoe e neng e nyahamisa Jeremia e ne e tsoa motseng oa habo. O ne a hōletse Anathothe. E ne e le motse oa Balevi o lik’hilomithara tse ’maloa ka leboea-bochabela ho Jerusalema. Ho ka etsahala hore ebe Jeremia o ne a e-na le batho bao a neng a ba tloaetse mohlomong le bao a neng a amana le bona Anathothe. Jesu o ile a re moprofeta ha a hlomphuoe naheng ea habo, ’me sena ke se ileng sa etsahala ho Jeremia. (Joh. 4:44) Hase feela hore batho ba motseng oo ba ne ba sa thahaselle Jeremia kapa ba sa mo hlomphe. Ka lekhetlo le leng Molimo o ile a re “batho ba Anathothe” ba ne ba ‘batla moea oa Jeremia.’ Ka mabifi ba ile ba re: “U se ke ua profeta ka lebitso la Jehova, e le hore u se ke ua shoela matsohong a rōna.” Ruri o ile a sokeloa ke baahelani mohlomong le beng ka eena, bao ha e le hantle ba neng ba lokela hore ebe ba ne ba le ka lehlakoreng la hae!—Jer. 1:1; 11:21.

6. Haeba batho bao u sebetsang le bona kapa ba bang ba u hanyetsa, seo Jeremia a ileng a thulana le sona ka “batho ba Anathothe” se ka u tsoela molemo joang?

⁶ Haeba litho tse ling tsa lelapa, baahelani, bana bao u kenang sekolo le bona kapa mohlomong batho bao u sebetsang le bona ba u hanyetsa, u ka khothatsoa ke tsela eo Jehova a ileng a sebetsana le Jeremia ka eona. Nakong eo, Molimo o ile a re o ne a tla ‘lebisa tlhokomelo ea hae’ ho ba neng ba le Anathothe ba neng ba hanyetsa moprofeta oa hae. (Bala Jeremia 11:22, 23.) Ka sebele, tiisetso ena eo Molimo a ileng a e fa Jeremia, e ile ea mo thusa hore a hlōle ho nyahama ho neng ho bakoa ke batho ba sebakeng sa habo ba neng ba mo hanyetsa. Hamorao, Molimo o ne a tla tlisa “tlokotsi holim’a batho ba Anathothe” ’me o ile a fela a e tlisa. Le uena kholiseha hore Jehova o ntse a behile litaba leihlo kapa a li etse hloko. (Pes. 11:4; 66:7) Ha u “lula” lithutong tsa Bibele ’me u etsa se nepahetseng, seo se ka ’na sa thusa bahanyetsi ba bang hore ba qobe tlokotsi e neng e ka ’na ea ba oela.—1 Tim. 4:16.

LIKETSO TSE NENG LI KA NYAHAMISA

7, 8. Jeremia o ile a hlekefetsoa ka tsela efe, hona see se ile sa mo ama joang?

⁷ Jeremia ha aa ka a thulana feela le litšokelo tsa batho ba ha habo. Ketsahalo e ’ngoe e ama monna e mong ea neng a tsebahala haholo Jerusalema, e leng moprista ea neng a bitsoa Pashkure.a Ha a utloa boprofeta bo tsoang ho Molimo, “Pashkure [o ile] a otla moprofeta Jeremia ’me a mo kenya metšoasong.” (Jer. 20:1, 2) Ho ka etsahala hore ebe mantsoe ao ha a bolele feela hore o ile a mo jabela. Ba bang ba nahana hore Pashkure o ile a re Jeremia a fuoe lichapo tse ka bang 40. (Deut. 25:3) E ka ’na eaba nakong eo Jeremia a neng a ntse a utloa bohloko ’meleng, batho ba ne ba mo soma, ba mo rohaka kapa ba bile ba mo tšoela ka mathe. Ha hoa ka ha fella moo. Pashkure o ile a kenya Jeremia “metšoasong” bosiu kaofela. Lentsoe la Seheberu le sebelisitsoeng mona le fana ka maikutlo a hore ’mele oa hae o ne o kotlobantsoe. Ha ho pelaelo hore ka sehlōhō Jeremia o ile a tlameha ho utloa bohloko bosiu kaofela, mohlomong a kentsoe motšoasong oa lehong.

⁸ Ho tšoaroa ka tsela e joalo ho ile ha ama Jeremia joang? O ile a re ho Molimo: “Ke fetohile ntho e tšehisang letsatsi lohle.” (Jer. 20:3-7) O ile a ba a nahana hore a khaotse ho bua ka lebitso la Molimo. Leha ho le joalo, ua tseba hore Jeremia o ne a ke ke a etsa joalo ebile ha aa ka a etsa joalo. Ho e-na le hoo, molaetsa o tsoang ho Molimo oo a neng a laetsoe hore a o phatlalatse o ne o le “joaloka mollo o tukang o koaletsoeng masapong a [Jeremia],” ’me o ne a lokela ho buella Jehova.—Bala Jeremia 20:8, 9.

9. Ke hobane’ng ha e le habohlokoa hore re nahane ka se etsahaletseng Jeremia?

⁹ Tlaleho eo e ka re thusa haeba batho bao re ba tsebang, ebang ke beng ka rōna, baahelani, batho bao re sebetsang le bona kapa bao re kenang sekolo le bona, ba re soma ka lonya. Ha rea lokela ho makala haeba ka linako tse ling ho hanyetsoa ho joalo ho ka re nyahamisa. Seo se ka boela sa etsahala haeba re hlekefetsoa hobane re phehella borapeli ba ’nete. Jeremia ea sa phethahalang o ile a angoa ke lintho tse joalo, ’me le rōna re batho ’me re ntse re na le maikutlo a joaloka a hae. Leha ho le joalo, ha rea lokela ho lebala hore ka thuso ea Molimo, Jeremia o ile a boela a thaba a ba a ba sebete. Ha aa ka a nyahamela ruri ’me le rōna ha rea lokela ho nyahamela ruri.—2 Bakor. 4:16-18.

10. Bibele e re thusa joang hore re utloisise hore na Jeremia o ne a ikutloa joang?

¹⁰ Ka linako tse ling tsela eo Jeremia a neng a ikutloa ka eona e ne e fetoha, ka linako tse ling e ne e hlile e fetoha haholo. Na le uena u kile ua thulana le boemo bo joalo—mohlomong u ikutloe u e-na le tšepo ebile u e-na le maikutlo a matle empa ebe u se u ikutloa u nyahame ebile u feletsoe ke tšepo? Mabapi le maikutlo a pele, hlokomela mantsoe a ho Jeremia 20:12, 13. (E bale.) Ka mor’a seo Pashkure a ileng a mo etsa sona, Jeremia o ile a thabela hore ebe o ne a tšoana le mafutsana a lopolotsoeng “matsohong a baetsi ba bobe.” Mohlomong ka linako tse ling u ile ua ikutloa eka u ka nyakalla, ua utloa u batla ho binela Jehova, ebang seo se etsahetse ka mor’a hore u lopolloe ka tsela e itseng kapa hobane u thabetse ntho e itseng e monate e etsahetseng bophelong ba hao kapa tšebeletsong ea hao ea Bokreste. Ho ikutloa ka tsela eo ke ntho e monate haholo!—Lik. 16:25, 26.

11. Haeba tsela eo re ikutloang ka eona e lula e fetoha, re lokela ho hopola eng ka Jeremia?

¹¹ Leha ho le joalo, kaha ha rea phethahala, tsela eo re ikutloang ka eona e ka fetoha joalokaha ho ile ha etsahala ho Jeremia. Ka mor’a hore a hooe a re, “binelang Jehova,” o ile a ikutloa a nyahame haholo, mohlomong likeleli li ne li bile li keleketla. (Bala Jeremia 20:14-16.) O ne a nyahame hoo a ileng a ipotsa hore na o ne a tsoalloang! A nyahame joalo o ile a re motho ea ileng a phatlalatsa tsoalo ea hae o ne a haula joaloka Sodoma le Gomora. Empa taba ea bohlokoa ke ena: Na Jeremia o ile a lula a nyahame? Na o ile a tela, eaba o inehella ho nyahama? Che. Ho e-na le hoo, e tlameha ebe o ile a sebetsa ka thata hore a hlōle ho nyahama hoo, ’me o ile a atleha. Nahana ka seo buka ea Jeremia e buang ka sona ka mor’a moo. Pashkure e mong eo e neng e le khosana, o ile a tla ho Jeremia a tlil’o botsetsa Morena Tsedekia ka Bababylona ba neng ba thibeletse Jerusalema. Jeremia ha aa ka a cha ntši, ka sebete o ile a phatlalatsa kahlolo ea Jehova le hore na litholoana tsa eona e ne e tla ba life. (Jer. 21:1-7) Ho hlakile hore Jeremia o ile a tsoela pele e le moprofeta ea mafolofolo!

12, 13. Ke sefe seo re ka ’nang ra se etsa ha tsela eo re ikutloang ka eona e fetoha ka tsela e sa tloaelehang?

¹² Tsela eo ba bang ba bahlanka ba Molimo ba ikutloang ka eona kajeno, e lula e fetoha. Sena se ka ’na sa bakoa ke se etsahalang ’meleng—mohlomong ho phahama ha li-hormone kapa ho se leka-lekane ha lik’hemik’hale—’me ngaka e nang le mangolo e ka ’na ea fana ka boeletsi ba hore na ho feto-fetoha hoo ho ka fokotsoa joang. (Luka 5:31) Leha ho le joalo, ho thaba kapa ho tepella maikutlo hoo boholo ba rōna re bang le hona ka linako tse ling, hase ho feteletseng kapa ho sa tloaelehang. Ho ka etsahala hore ebe boholo ba ho nyahama hoo re bang le hona ho bakoa ke hore re batho ba sa phethahalang. Ho ka ’na ha bakoa ke mokhathala kapa ho shoeloa ke motho eo re mo ratang. Haeba re thulana le maemo a joalo, re lokela ho hopola hore tsela eo Jeremia a neng a ikutloa ka eona e ne e lula e fetoha, empa o ile a ’na a lula a amoheloa ke Molimo. E le hore re hlōle bothata bona, ho ka ’na ha hlokahala hore re fetole kemiso ea rōna e le hore re fumane nako e ngatanyana ea ho phomola. Kapa mohlomong ho ka ’na ha hlokahala hore re iphe nako ea hore re tšelisehe ka mor’a ho utloa bohloko ka lebaka la ho shoeloa. Leha ho le joalo, ke habohlokoa haholo hore re ’ne re tsoele pele ho ea libokeng tsa Bokreste ’me re etse mesebetsi ea rōna ea puso ea Molimo kamehla. Tseo ke tsona lintho tse ka re thusang hore re lule re tsitsitse re bile re thabile ha re ntse re sebeletsa Molimo.—Mat. 5:3; Bar. 12:10-12.

¹³ Ho sa tsotellehe hore na ho nyahama ha hao ho etsahala seoelo kapa ke ntho ea kamehla, se etsahetseng ho Jeremia se ka u khothatsa. Joalokaha ho se ho boletsoe, ka linako tse ling o ne a hle a nyahame haholo. Leha ho le joalo, ha aa ka a lumella ho nyahama hore ho etse hore a furalle Molimo eo a neng a mo rata a bile a mo sebeletsa ka botšepehi. Ha bahanyetsi ba hae ba ne ba etsa bobe ha eena a ba tšoara hantle o ne a kōpa thuso ho Jehova ’me o ne a tšepile eena. (Jer. 18:19, 20, 23) Ikemisetse ho etsisa Jeremia.—Lillo 3:55-57.

NA U TLA KHATHOLLA MEEA E KHATHETSENG?

14. Jeremia o ile a khothatsoa joang ka ho khetheha?

¹⁴ Re lokela ho ela hloko hore na Jeremia o ile a khothatsoa joang le hore na eena o ile a khothatsa ba bang joang bao e neng e le ‘meea e khathetseng.’ (Jer. 31:25) Jeremia o ile a khothatsoa haholo-holo ke Jehova. Nahana hore na u ne u tla khothala hakaakang ha u utloa Jehova a re ho uena: “Ha e le ’na, bona! kajeno ke u entse motse o etselitsoeng qhobosheane . . . Ka sebele ba tla u loantša, empa ba ke ke ba u hlōla, etsoe ‘ke na le uena ho u lopolla,’ ho bolela Jehova.” (Jer. 1:18, 19) Ka lebaka le utloahalang ha a ne a bua ka Jehova, Jeremia o ile a re ke “matla a ka le qhobosheane ea ka, le sebaka seo ke balehelang ho sona letsatsing la mahlomola.”—Jer. 16:19.

15, 16. Tsela eo Jehova a ileng a khothatsa Jeremia ka eona e re fa mohlala ofe mabapi le hore na ke sefe seo re ka se etsang ho khothatsa ba bang?

¹⁵ Ke habohlokoa hore ebe Jehova o ile a re ho Jeremia: “Ke na le uena.” Na seo ha se u fe mohlala oa hore na ke sefe seo u ka se etsang haeba motho eo u mo tsebang a hloka ho khothatsoa? Ke habohlokoa ho hlokomela hore mora kapa morali oeno oa Mokreste kapa mohlomong mong ka uena o hloka ho khothatsoa; empa habohlokoa le ho feta ke hore u hle u mo khothatse. Maemong a mangata, tsela e atlehang ka ho fetisisa ke hore u etse seo Molimo a ileng a se etsetsa Jeremia—u be le ea mahlomoleng. Joale, ha nako e ntse e e-ea, mo khothatse, empa u se ke ua bua lolololo. Ho ka etsahala hore ho bua mantsoe a seng makae ho tsoele motho molemo haholo, haeba mantsoe ao e le a khothatsang le a hahang. Ha ho hlokahale hore u be kheleke. Sebelisa mantsoe a bonolo a bontšang hore ua tsotella ebile u na le lerato la Bokreste. Mantsoe a mofuta oo a ka tsoela batho molemo haholo.—Bala Liproverbia 25:11.

¹⁶ Jeremia o ile a re: “Jehova, nkhopole ’me u lebise tlhokomelo ea hao ho ’na.” Eaba ho etsahala’ng? Jeremia o re: “Mantsoe a hao a ile a fumanoa, eaba kea a ja; ’me lentsoe la hao ho ’na e ba thabo e khaphatsehang le ho nyakalla ha pelo ea ka.” (Jer. 15:15, 16) Ka tsela e tšoanang, motho eo u batlang ho mo khothatsa le eena a ka ’na a hloka hore ka mosa a bontšoe hore oa tsotelloa. Ke ’nete hore mantsoe a hao a ke ke a tšoana le a Jehova. Leha ho le joalo, u ka ’na ua akarelletsa a mang a mantsoe a Molimo ho seo u se buang. Mantsoe a tsoang Bibeleng a buuoang ka tieo joalo ebile e le a tsoang botebong ba pelo, ka sebele a ka thabisa pelo ea motho ea nyahameng.—Bala Jeremia 17:7, 8.

17. Ke ntho efe ea bohlokoa eo re ka ithutang eona tseleng eo Jeremia a ileng a sebetsana le Tsedekia le Johanane ka eona?

¹⁷ Hlokomela hore Jeremia ha aa ka a khotsofalla feela hore Molimo o ile a mo khothatsa, empa le eena o ile a khothatsa ba bang. Joang? Ka lekhetlo le leng, Morena Tsedekia o ile a bolella Jeremia hore o ne a tšaba Bajuda ba neng ba le ka lehlakoreng la Bababylona. Jeremia o ile a bua mantsoe a khothatsang, a khothalletsa morena hore a mamele Jehova e le hore litaba li tle li mo tsamaele hantle. (Jer. 38:19, 20) Ka mor’a hore Jerusalema e hlōloe ’me ho sale masala a seng makae a Bajuda ka har’a naha, molaoli oa bona oa lebotho la sesole Johanane o ile a nahana ho isa sechaba Egepeta. Empa o ile a botsa Jeremia pele. Jeremia o ile a mamela ha Johanane a bua eaba ka mor’a moo o rapela Jehova. Hamorao o ile a ba bolella karabo ea Jehova e khothatsang, a ba bolella hore haeba ba ne ba ka mamela tataiso ea Molimo ea hore ba lule ka har’a naha, lintho li ne li tla ba tsamaela hantle. (Jer. 42:1-12) Maemong ana ka bobeli, Jeremia o ile a theha tsebe—o ile a mamela pele a bua. Ho mamela ke habohlokoa haholo ha motho a khothatsa ba bang. Fa motho ea nyahameng monyetla oa hore a tšolle se ka pelong ea hae. Mamela hore na ke lintho life tseo a khathatsehileng ka tsona le tse mo tšoenyang. Ha ho loketse, bua mantsoe a khothatsang. Molimo a ke ke a u senolela seo u lokelang ho se bua ho motho ea hlokang ho khothatsoa, leha ho le joalo, u ka kenyelletsa mehopolo e khothatsang e tsoang Lentsoeng la Molimo, mehopolo e buang haholo ka hore na bokamoso bo tla ba joang.—Jer. 31:7-14.

18, 19. Ke mohlala ofe oa ho khothatsa ba bang o totobalang tlalehong e buang ka Barekabe le Ebede-meleke?

¹⁸ Tsedekia le Johanane ha baa ka ba amohela keletso e khothatsang eo Jeremia a ileng a ba fa eona, ’me kajeno ba bang ba ka ’na ba se ke ba mamela keletso ea hao. U se ke ua lumella seo hore se u nyahamise. Batho ba bang ba ile ba mamela khothatso ea Jeremia ’me ho ka etsahala hore ba bangata ba tla mamela khothatso ea hao. Nahana ka Barekabe, e leng sehlopha sa Bakene ba bileng le kamano le Bajuda ka lilemo tse ngata. Tse ling tsa litaelo tse neng li tsoa ho moholo-holo oa bona Jonadabe e ne e le hore kaha e ne e le bajaki, ba se ke ba noa veine. Ha Bababylona ba ne ba hlasela, Jeremia o ile a tlisa Barekabe ka ntlong ea ho jela ea tempele. Ka taelo ea Molimo, Jeremia o ile a ba fa veine. Kaha ba ne ba hlompha moholo-holo oa bona, ba sa tšoane le Baiseraele ba neng ba sa mamele, Barekabe ba ne ba mamela ’me ha baa ka ba noa veine. (Jer. 35:3-10) Jeremia o ile a ba bolella pabatso e neng e tsoa ho Jehova a ba a ba bolella le tšepiso ea Hae mabapi le bokamoso ba bona. (Bala Jeremia 35:14, 17-19.) U ka latela mohlala oo ha u khothatsa ba bang: Ba babatse ka botšepehi ha ho khoneha.

¹⁹ Jeremia le eena o ile a etsa seo ho Ebede-meleke oa Moethiopia, eo e ka ’nang eaba o ne a sebeletsa e le molaoli lekhotleng la Morena Tsedekia. Ka ho hloka toka, likhosana tsa Bajuda li ile tsa lahlela Jeremia ka lemeneng le seretse ’me tsa mo siea moo hore a shoelle teng. Ebede-meleke o ile a kōpa thuso ho Morena Tsedekia, ’me eena o ile a mo lumella hore a pholose moprofeta Jeremia. Monna enoa ea neng a e-tsoa naheng e ’ngoe o ile a etsa seo le hoja a ne a ka ’na a sitisoa ka mabifi. (Jer. 38:7-13) Kaha ho ka ’na ha etsahala hore ebe sena se ile sa baka bora pakeng tsa hae le likhosana tseo tsa Bajuda, e ka ’na eaba Ebede-meleke o ne a khathatsehile ka bokamoso ba hae. Jeremia ha aa ka a thōla feela a tšepile hore Ebede-meleke o ne a tla lebala ka taba ena. O ile a bua, a mo bolella mantsoe a khothatsang a hore na Molimo o ne a tla hlohonolofatsa Ebede-meleke joang nakong e tlang.—Jer. 39:15-18.

20. Ke sefe seo re lokelang ho batla ho se etsetsa barab’abo rōna ba baholo kapa ba banyenyane?

²⁰ Ka sebele, ha re ntse re bala buka ea Jeremia, re fumana mehlala e tsotehang ea kamoo rōna ka borōna re ka etsang seo moapostola Pauluse a ileng a khothalletsa barab’abo rōna ba Thesalonika hore ba se etse, ha a ne a re: “Le ’ne le tšelisane le ho hahana . . . Mosa o sa tšoanelang oa Morena oa rōna Jesu Kreste o be le lōna.”—1 Bathes. 5:11, 28.