Na Ruri Litaba Tse Molemo li Tsoa ho Molimo?

1. Mongoli oa Bibele ke mang?

Litaba tse molemo tse reng batho ba tla phela ka ho sa feleng lefatšeng, li ngotsoe ka Bibeleng. (Pesaleme ea 37:29) Bibele e entsoe ka libuka tse 66. Molimo o ile a sebelisa banna ba ka bang 40 ba tšepahalang hore ba li ngole. Libuka tse hlano tse qalang li ngotsoe ke Moshe hoo e ka bang lilemo tse 3 500 tse fetileng. Buka ea ho qetela e ngotsoe ke moapostola Johanne lilemong tse fetang 1 900 tse fetileng. Bangoli ba Bibele ba ne ba ngola maikutlo a mang? Molimo o ile a sebelisa moea o halalelang hore a fetisetse litaba tsa hae ho bangoli ba Bibele. (2 Samuele 23:2) Ba ile ba ngola mehopolo ea Molimo, eseng ea bona. Kahoo, Jehova ke eena Mongoli oa Bibele.​—Bala 2 Timothea 3:16; 2 Petrose 1:20, 21.

Shebella video ea Mongoli oa Bibele ke Mang?

2. Re ka kholiseha joang hore Bibele e nepahetse?

Rea tseba hore Bibele e tsoa ho Molimo hobane e profeta lintho tse nepahetseng ka bokamoso. Ha ho motho ea ka etsang joalo. (Joshua 23:14) Ke Molimo ea Matla ’Ohle feela eo ka nepo a ka bonang esale pele bokamoso ba batho.​—Bala Esaia 42:9; 46:10.

Re ne re ka lebella hore buka e tsoang ho Molimo e be e ikhethang, ’me ka sebele e joalo feela. Ho ’nile ha ajoa Libibele tse libilione ka lipuo tse makholo. Le hoja e le buka ea khale, Bibele e lumellana le saense e netefalitsoeng. Hape, bangoli ba eona ba 40 ha ba hanyetsane.a Ho feta moo, Bibele e re senolela botho bo lerato ba Molimo, ’me e ntse e e-na le matla a ho fetola bophelo ba batho hore ba phele ka tsela e tla ba ruisa molemo. Lintlha tsena li kholisa batho ba bangata hore Bibele ke Lentsoe la Molimo.​—Bala 1 Bathesalonika 2:13.

Shebella video ea Re ka Tseba Joang hore Bibele e Nepahetse?

3. Bibele e bua ka eng?

Ntho e ka sehloohong eo Bibele e buang ka eona ke litaba tse molemo tsa hore Molimo o na le morero o bontšang hore o rata batho. Mangolo a hlalosa kamoo batho ba ileng ba lahleheloa ke monyetla oa ho lula lefatšeng la paradeise kateng qalong ea histori ea batho le kamoo paradeise e tla tsosolosoa kateng.​—Bala Tšenolo 21:4, 5.

Lentsoe la Molimo le boetse le fupere melao, melao-motheo le likeletso. Ho phaella moo, Bibele e re tlalehela tsela eo Molimo a neng a sebelisana le batho ka eona​—e leng histori e senolang botho ba Molimo. Kahoo, Bibele e ka u thusa hore u tsebe Molimo. E hlalosa kamoo u ka bang motsoalle oa hae kateng.​—Bala Pesaleme ea 19:7, 11; Jakobo 2:23; 4:8.

4. U ka utloisisa Bibele joang?

Bukana ena e tla u thusa hore u utloisise Bibele e sebelisa mokhoa o tšoanang le oo Jesu a neng a o sebelisa. O ne a qotsa litemana tsa Bibele ka makhetlo a mangata ’me a hlalosa “se boleloang ke Mangolo.”​—Bala Luka 24:27, 45.

Hase lintho tse ngata tse thabisang joaloka litaba tse molemo tse tsoang ho Molimo. Empa batho ba bang ha ba li rate, ’me ba bang lia ba tena. U se ke ua nyahama. Monyetla oa hore u thabele bophelo bo sa feleng o itšetlehile ka hore u tsebe Molimo.​—Bala Johanne 17:3.