Marako a Jerusalema

A re bueng hanyane ka se ileng sa etsahala Jerusalema. Nehemia ea neng a sebeletsa Morena Artaseksese, e ne e le Moiseraele ea lulang motseng oa Persia o bitsoang Shushane. Ngoan’abo Nehemia ea tsoang Juda o ile a mo tlisetsa litaba tse bohloko, a re: ‘Baiseraele ba Jerusalema ha baa sireletseha. Likeiti le marako a motse ao Bababilona ba a sentseng a ntse a e-s’o tsosolosoe.’ Taba ena e ile ea utloisa Nehemia bohloko. Kahoo, a rera ho khutlela Jerusalema ho ea thusa. O ile a kopa Jehova hore a etse hore morena a mo lokolle.

Ka mor’a matsatsi a seng makae, morena o ile a hlokomela hore Nehemia ha aa thaba. Eaba o re: ‘Ke qala ho u bona u le tjena. Bothata ke’ng?’ Nehemia a re: ‘Nka tlohela ho utloa bohloko joang empa marako a motse oa heso oa Jerusalema a oele?’ Kahoo, morena a re: ‘U batla ke u thuse ka eng?’ Hang-hang Nehemia a rapella ka pelong. Eaba o re ho morena: ‘Ke kopa u ntumelle hore ke khutlele Jerusalema ho ea tsosolosa marako.’ Morena Artaseksese a re Nehemia a tsamaee ’me a etsa bonnete ba hore o tla sireletseha ha a le tseleng. A boela a beha Nehemia e le ’musisi oa Juda ’me a mo fa mapolanka a ho etsa likeiti tsa motse.

Ha Nehemia a fihla Jerusalema, o ile a hlahloba marako a motse. Ka mor’a moo, a bokella baprista le baeta-pele ’me a re ho bona: ‘Taba ena ha e hantle. Re lokela ho tsosolosa marako.’ Ba lumellana le eena ’me ba qala ho a tsosolosa.

Empa lira tsa Baiseraele tsa qala ho ba soma, tsa re: ‘Le phokojoe e ka liha lerako lena leo le le hahang.’ Baiseraele ba iphapanyetsa lira tsa bona ha li ntse li ba soma ’me ba tsoela pele ba haha. Lerako la ’na la nyoloha.

Eaba lira tsa Baiseraele li rera ho hlasela Jerusalema ka tšohanyetso. Ha Bajuda ba utloa seo, ba tšoha. Empa Nehemia a re: ‘Le se ke la tšoha. Jehova o na le rona.’ Kahoo, a beha balebeli ho kata basebetsi ’me lira tsa sitoa ho ba hlasela.

Ba ile ba nka matsatsi a 52 feela hore ba qete marako le likeiti tsa motse. Ka mor’a moo, Nehemia a bitsa Balevi bohle hore ba tle Jerusalema ha marako a buloa ka molao. A ba hlophisa hore e be lihlopha tse peli tsa libini. Ba hloella lerakong ka litepisi tse Keiting ea Seliba, eaba ba pota motse ba o hlaha ka mahlakoreng a sa tšoaneng. Ba binela Jehova ’me ba letsa literompeta, lisimbala le liharepa. Esdrase a tsamaea le sehlopha se seng ’me Nehemia a tsamaea le se seng, ho fihlela ba kopana tempeleng. Batho bohle e leng banna, basali le bana, ba etsetsa Jehova mahlabelo ’me ba keteka. Motho o ne a utloa a le hole hore ba thabile.