Molebeli oa Teronko o Ithuta Lentsoe la Molimo

Motseng o bitsoang Filipi ho ne ho e-na le ngoanana oa lekhoba ea khathatsoang ke modemona. Modemona o ne a etsa hore ngoanana eo a khone ho bolela lintho pele li etsahala ’me a etsetsa beng ba hae chelete e ngata. Ha Pauluse le Silase ba le Filipi, ngoanana eo o ne a lula a ba setse morao hohle moo ba eang. Modemona o ile a re ngoanana a hoeletse a re: “Banna bana ke makhoba a Molimo ea Phahameng ka ho Fetisisa.” Qetellong Pauluse a re ho modemona: ‘Ka lebitso la Jesu, tsoa ho eena!’ Eaba modemona oa tsoa ho eena.

Ha beng ba ngoanana eo ba hlokomela hore ha ba sa tla khona ho etsa chelete, ba ile ba koata. Ba hulela Pauluse le Silase ho bo-’maseterata ba re: ‘Banna bana ba tlola molao ’me ba ferekanya motse oa rona!’ Bo-’maseterata ba ile ba laela hore Pauluse le Silase ba otloe ’me ba isoe teronkong. Molebeli oa teronko o ile a ba kenya teronkong e lefifi ka ho fetisisa eaba oa ba fasa.

Batšoaruoa ba ne ba mametse ha Pauluse le Silase ba binela Jehova lithoriso. Eaba ka tšohanyetso, har’a mp’a bosiu ho ba le tšisinyeho e kholo ea lefatše. Mamati a teronko a buleha eaba lintho tse ba fasitseng lia fasoloha. Molebeli oa teronko o ile a mathela ka teronkong e lefifi, a fumana mamati a bulehile. Kaha o ne a nahana hore batšoaruoa ba balehile, a leka ho ipolaea ka sabole.

Ka nako eo, Pauluse a hoeletsa a re: ‘U se ke oa intša kotsi! Re ntse re le teng kaofela!’ Molebeli a mathela ho Pauluse le Silase eaba o re: “Ke etse’ng hore ke pholohe?” Ba re ho eena: ‘Uena le ba lelapa la hao le lokela ho lumela ho Jesu.’ Eaba Pauluse le Silase ba mo ruta lentsoe la Jehova ’me molebeli le ba lelapa la hae ba kolobetsoa.