Baboleli ba ’Muso baa TIaleha

Ho Apara Botho bo Bocha

BIBELE e-ea laela: “Le hlobole motho oa khale le liketso tsa hae; ’me le apare motho e mocha, ea nchafallang tsebong ka setšoantšo sa ea ’mōpileng,” (Ba-Kolosse 3:9, 10) Ba bangata bao e leng Lipaki tsa Jehova kajeno e kile ea e-ba karolo ea lefatše la Satane le sa tšepahaleng; ba bang e ne e le masholu ha ba bang ba ne ba sa tšepahale. Ka ho fumana tsebo e nepahetseng ea seo Molimo o se hlokang ho Bakreste, ba fetoha, ba ikapesa ka botho bo bocha. Liphihlelo tse latelang li bontša kamoo liphetoho tse joalo li ka etsuoang. Phihlelo e latelang e tsoang Spain e bontša phetoho ena.

◻ Lesholu le tsebahalang Spain le nang le litšekamelo tsa ho utsoa ntle ho tšusumetso ea moruo la qala ho ithuta Bibele le Lipaki tsa Jehova. Lelapa la lona le ne le tletse liphahlo tse utsoitsoeng. Ha le ntse le tsoela pele ka tsebo e nepahetseng ea melao-metheo ea Bibele, letsoalo la lona la qala ho le tšoenya ’me la etsa qeto ea ho khutlisetsa lintho tseo le li utsoitseng.

La atamela mohiri oa lona oa pele ’me la ipolela hore le utsoitse mochine o mocha o hlatsoang. Monna eona, a hlolletsoe ke mabaka a fetotseng boikutlo ba lona, a le lumella ho lefa chelete ea mochine ona o hlatsoang oo e neng e le lidolara tse 292, ’me a re a ke ke a tsebisa mapolesa.

Joale la chakela ’musi oa toropo, ’me la ipolela hore ke lona le bolaileng mabone a mabeli a theko e boima motseng ’me la ithaopela ho a lefa. Ka ho bona hore monna enoa o apere ‘botho bo bocha’ ka baka la ho ithuta Bibele, ’musi a le tšoarela ’me a se ke a amohela letho la tefo.

Monna enoa a boetse a chakela ba bang ba haufi le eena, a khutlisa lintho tse utsoitsoeng, ’me bohle ba bolela ho makalla boikutlo ba lona bo fetohileng haholo ka baka la ho sebelisa melao-metheo ea Bibele.

Empa o ne a sa tsebe beng ba lintho tse ngata tse ntseng li le ho eena. Kahoo hoba a rapele Jehova, a ea ntlo-khōlō ea sepolesa ’me a hlahisa liea-lemoea tse letsang licassette tsa “stereo” tse tšeletseng, tseo a li ntšitseng makoloing a pakiloeng. Mapolesa a ne a maketse hobane le ne le se na tlaleho e mpe le oona. A mo lefisa chelete le hore a sebeletse nako e khutšoaane teronkong.

Hona joale o na le letsoalo le hloekileng kapel’a Jehova. Tumellanong le Ba-Efese 4:28, “Ea neng a utsoa, a se ke a hlola a utsoa,” le ho ananela hore masholu a ke ke a “rua lefa la ’muso oa Molimo,” o khaolitse ho utsoa ’me o apere ‘botho bo bocha.’—1 Ba-Korinthe 6:9, 10.

◻ Botšepehi ba ba nang le botho bo kang ba Kreste hangata bo hlokomeloa ke ba ka ntle, kamoo ho bontšitseng phihlelo ea Italy. E mong oa Lipaki tsa Jehova a bona kotsi e tšabehang ea koloi. A atamela e ’ngoe ea likoloi tse amehileng kotsing ho bona hore na a ka thusa, ’me ka ho hlokomela monna ea tsoileng kotsi hampe ’me a e-tsoa mali, a bua le eena a bitsa lebitso la Jehova. Monna a phahamisa hlooho ’me a ’motsa hore na ke e mong oa Lipaki tsa Jehova na, ’me a arabela ka hore ke eona. A re: “Mofumahatsana, ke ikutloa ke le mobe. Ke na le mokotlana ka koloing o nang le limillione tsa chelete [chelete ea Italy e bitsoang “lira”]. Kea u kōpa e-ea le eona heno. Kea tseba e tla be e le matsohong a matle. Ho seng joalo chelete ena eohle e tla nyamela. Ha ke hlaphohetsoe u ka khutlisetsa chelete ho ’na!” Paki ea nka chelete ’me ea e khutlisetsa ho eena ha a hlaphohetsoe. O ile a e leboha haholo.

Jehova o hlohonolofatsa ba ‘hlobolang botho ba khale’ ’me ba ‘apara botho bo bocha.’—Ba-Efese 4:22-24, Phetolelo e Ncha ea Sesotho.

“Ea neng a utsoa, a se ke a hlola a utsoa, a mpe a ineele ho sebetsa lintho tse molemo ka matsoho a hae, a tle a tsebe ho nea ea hlokang.”—Ba-Efese 4:28