Meneelo e Thabisang Pelo

LEBOKOSENG le ka tlaase ke mangolo a mabeli a sebele a qelang lichelete a romeloang ke malumeli a Bokreste-’mōtoana. Na u fumana a thabisa pelo? Le hanyenyane! Leha ho le joalo, lichelete lia hlokahala ka litsela tse ngata kajeno ho thusa ho ntšetsa pele borapeli boo Molimo o bo ananelang. E be joale mokhatlo o hlophisitsoeng oa Bokreste o fumana lichelete tse hlokahalang joang e le hore o ka etsa thato ea Molimo?

Karabelo e ka fumanoa ka ho hlahloba mekhoa ea phutheho ea Bokreste ea lekholong la pele la lilemo le mantsoeng a Mothei oa eona, Jesu Kreste. Keletso ea Jesu ho Luka 6:38 ke hore, “Fanang, ’me le tla fuoa; le tla feloa sefubeng ka tekanyo e kholo, e hlohliloeng, e katiloeng, e tšolohang; hobane tekanyo eo le lekanyang ka eona, le tla lekanngoa ka eona le lōna.” Papiso eo e ile ea tšoaneleha hakaakang litsebeng tsa bamameli ba Jesu ka nako eo. Liaparo tsa bona tsa Bochabela li ne li rokeletsoe pokotho e tšelang kapa e bolokang lintho. Lentsoe “sefuba,” kapa “sefubeng” (ka Segerike kolʹpos), le hlalosa sebaka se lephaka se entsoeng ke momeno oa seaparo ka holimo ho lebanta, ’me ka lipokothong tsa sona barekisi ba ne ba ee ba hlohlele liphahlo tse itseng tse rekiloeng.

Ke bahoebi ba bakae ba neng ba qala ka ho hlohla e be joale ba katella liphahlo e le hore ba ka kenya tse ngata kamoo ho ka khonehang sebakeng se feela sa seaparo sa moreki, hoo li neng li ka ba tsa tšoloha? Ke ba fokolang haholo ka palo, haeba ba ne ba le teng! Bakreste, leha ho le joalo, ka ho fana ka bolokolohi ka qenehelo ho ba hlokang ba ne ba tla buseletsoa haholo ka mohau. Hore na re tšoara batho ba bang joang, e-bang rea fana kapa re lekhonatha ho bona, ho sebelisetsoa ho lekanyetsa hore na re tla kotula eng hamorao—e seng feela ho batho empa, habohlokoa haholo, ho Jehova Molimo.—Bapisa 2 Ba-Korinthe 9:6; Ba-Galata 6:7.

Ka hore Jesu a inyehele ka bolokolohi a be a nyehele le seo a nang le sona, o ile a latsoa phethahalo ea molao-motheo ona. E ne e le mothofatso ea phano. O ile a bolella bafumanehi litaba tse molemo tsa ’Muso oa Molimo ka cheseho le ka boitelo. Ha a ka a lefisa bakeng sa litšebeletso tsa hae kapa hona ho lebella hore a lefuoe moputso o itseng. Leha ho le joalo ha ho mohla a kileng a hloka letho. Batho ka lipelo tse bulehileng, ba ile ba mo phelisa ka boithatelo, tšebeletsong ea hae.—Luka 7:22; 8:1-3.

Ho fana ha Jesu ho ile ha susumetsa ba bang—Simone Petrose, Jakobo, Johanne le ba bang bohle ba 12—hore ba bontše moea o tšoanang oa ho tela tsohle hore ba kopanele tšebeletsong. (Luka 5:10, 11; 9:1-6) Moneelo oa mofuta o joalo o bea litholoana tse tšoanang kajeno. Lipaki tsa Jehova li tela nako ea tsona, matla le seo li nang le sona hore ba bang ba utloe litaba tse molemo tsa ’Muso oa Molimo. Bao le bona, ha ba bontša ho fana ka ho bolela, ba bang hape ba susumeletsoa ho bontša ho fana ka ho kopanela le bona ho jaleng litaba tse molemo.—Liproverbia 11:25.

Leha ho le joalo, ntle ho moneelo oa rōna oa ho bolela, ho na le ho hong ho khathollang pelo. Karolo e ’ngoe ea borapeli ba ’nete ke ho neelana ka chelete ka sepheo se nepahetseng le ka mabaka a nepahetseng. (2 Ba-Korinthe 9:9-14) Bakreste ba lekholo la pele ba ne ba ho etsa joang?

Mokhoa oo Bakreste ba Pele ba Ho Entseng ka Oona

Ka letsatsi la pele leo phutheho ea Bokreste e tsoetsoeng ka lona ka selemo sa 33 C.E., ha e-ba le ‘kopano ea boena, ho ngoatha bohobe hammoho le ho rapela hammoho’ tse ileng tsa etsoa ke basokolohi ba kolobelitsoeng bocha ba 3 000. Ka lebaka lefe le utloahalang? Ho ba nolofaletsa ho tiisa tumelo ea bona e tetemang ka ‘ho tsoela pele ho ineela thutong ea baapostola.’—Liketso 2:41, 42.

Bajode le basokolohi ba Sejode ba ne ba tlile Jerusalema ba rerile ho tla lula feela nakong ea Mokete oa Pentekonta. Empa ba ileng ba fetoha Bakreste ba lakatsa ho hlola nakoana le ho ithuta haholoanyane ho tiisa tumelo ea bona e ncha. Hona ha tsoala bothata ba tšohanyetso ba lijo le matlo. Ba bang ba baeti ba ne ba se na lichelete tse lekaneng, ha ba bang ba ne ba e-na le tse ngata haholo. Joale ka nakoana ha ntšoa meneelo le ho aba lintho tse bonahalang ho ba hlokang.—Liketso 2:43-47.

Ba ne ba laoleloa matlo le lijo joang? Baapostola, ba sebetsa joaloka sehlopha se busang, ba hlophisa pokello le kabo ea lintho tse fanoeng. Kahoo, litšobotsi tsa pele tsa phutheho ea Bokreste li supa litho li sa nke lintho tsa tsona tse bonahalang e le tsa tsona empa e le ntho e ka sebelisoang molemong oa phutheho eohle. (Liketso 2:44; 4:32) Ho phaella moo, “bohle ba neng ba e-na le masimo, leha e le matlo, ba ne ba rekisa ka ’ona, ba tlisa theko ea tse rekiloeng, ba e bea maotong a baapostola; ’me e mong le e mong o na a abeloa kamoo a hlokang kateng.”—Liketso 4:34, 35.

Thekiso ea masimo le matlo le ho abelana lintho tsohle e ne e le ntho ea boithaopo ka ho feletseng. Ho ne ho se ea tlamelloang ho rekisa kapa ho fana; leha e le hore hona e ne e le ho khothaletsa bofuma. Khopolo hase hore litho tse ruileng haholoanyane li ile tsa rekisa thepa eohle ea tsona ’me kahoo ea e-ba mafutsana. Ho e-na le hoo, ka lebaka la ho qenehela balumeli ba habo bona tlas’a maemo a nakong eo, ba ile ba rekisa thepa ’me ba fana ka sohle se fumanoeng e le hore ba ka fana ka se hlokahalang ho ntšetsa pele lithahasello tsa ’Muso.—Bapisa 2 Ba-Korinthe 8:12-15.

Ka ho tšoanang kajeno, batho ka bomong ba ’nile ba ngolisa thepa ka Mokhatlo oa Watch Tower kapa ba akarelletsa mokhatlo ona o hlophisitsoeng lengolong la bona la molao la kabo ea lefa, kahoo ba bea boithatelong ba Sehlopha se Busang sa Lipaki tsa Jehova lichelete tse tla sebelisoa moo tlhokahalo ea ’Muso e leng khōlō haholo. Ho fana hohle ho joalo ho thusa ho jaloeng ha leseli la moea joalokaha ho ile ha etsoa ka Pentekonta. Hona hohle hase tlamo.

Senotlolo ke Ho Ba Kamehla

Lilemo tse ka bang 20 kamorao ho Pentekonta ea 33 C.E., moapostola Pauluse o hopotsa phutheho ea Korinthe ka bohlokoa ba moneelo o itseng. Oa ngola, “Ha e le lithuso tse bokelleloang bahalaleli, le etse joale ka ha ke laetse likereke tsa Galatia,” oa ngola. ’Me a eketsa: “Ka tsatsi le qalang veke, e mong le e mong oa lōna a bee kathōko ha hae see a ka se bokellang, a lekanye ka see a sitsitsoeng ka sona, ho se ke ha lebelloa ho tla ha ka ho etsa likabelo. ’Me etlare ha ke fihla, ke tla roma ka mangolo bao le ba tšepileng, ba tle ba ise mpho ea lōna Jerusalema.” Ho rarolla hore na motho a ka fana hakae ho bonahala ho ne ho akaretsa lelapa lohle, e-bang ke la morui kapa la mofutsana, hobane ho ne ho lokela ho etsetsoe “ha hae.”—1 Ba-Korinthe 16:1-3.

Mokhoa oa ho fana o khothalelitsoeng ke Pauluse o ka sebelisoa ke litho tsa phutheho kajeno. Joang? Senotlolo ke ho ba kamehla. Haeba phutheho ea heno e tla lefa rente ea khoeli le khoeli le litšenyehelo tsa ho hlokomela sebaka seo u kopanelang ho sona kapa Holo ea ’Muso, ofisi ea lekala ea Peru e ngola hore ho tla hlokahala “moneelo, e seng hakaalo hore na ke bokae, empa ho bea ho hong kamehla beke le beke kapa khoeli le khoeli bakeng sa lithahasello tsa ’Muso.” Na maikutlo aa a ipiletsa ho uena? Le bana ba ka rutoa ho ananela kamoo ho ntša moneelo kamehla e leng karolo ea borapeli ba bona.

Ka baka leo, ha meneelo e etsoa ka sepheo se nepahetseng le ka lebaka le nepahetseng, e thabisa pelo ea Molimo le ea motho. Ba-Korinthe ba Bobeli 9:7 e re: “E mong le e mong a ntše kamoo a seng a lekantse pele pelong ea hae; e seng ka ho soaba, leha e le ka ho khannoa; hobane Molimo o rata ea fanang a thabile.”

[Lebokose le leqepheng la 28]

Mekhoa e Sebelisoang ke Bokreste-’mōtoana

“Morena o buile le ’na hore ke u ngolle lengolo lena . . . Ha ho lebaka leo ka lona ke neng nka u ngolla lengolo lena hoja Molimo oa se ke oa bua le ’na hore ke u ngolle lengolo lena le ho u bolella hore haeba u ka potlakisetsa $20,00 [R50] ho nthusa hona joale o tla u hlohonolofatsa ho feta pele.”—Lengolo-foromo le tsoang ho moruti oa Canada le tekennoeng, “Moruti le Molekane oa Hao.”

“Koaholla Oli ena e Halalelang ea Tlotso, (le lerotholi feela le se ke la qhalana). Jesu o ka oling ena ea tumelo. Itake sefapano ka eona phatleng, joale ka tumelo u kene ka kamoreng u le mong e be u nka chelete leha e le efe eo u nang le eona ’me u take sefapano cheleteng e ’ngoe le e ’ngoe ea pampiri eo u nang le eona hore Molimo o phekole mathata a hao a chelete, le ho atisa chelete ea hao joaloka ho Luka 6:38 . . . Ha u tlotsa chelete eo u nang le eona ka oli ena e halalelang ea tlotso, tlotsa chelete e ’ngoe le e ’ngoe ea pampiri eo u nang le eona. Taka sefapano cheleteng e ’ngoe le e ’ngoe ea pampiri, joale chelete e ngata haholo ea pampiri eo u nang le eona, haeba e le $20,00, $10,00 kapa $5,00, taka sefapano sa oli ea tlotso ho eona ’me u e romele mosebetsing oa Molimo.”—Lengolo-foromo le tsoang ho “referente” oa United States le tekennoe, “Moprofeta oa Molimo ka Lilemo tse 30.”

[Lebokose le leqepheng la 30]

Kamoo ba Bang ba Ntšang Meneelo ea Mosebetsi oa ’Muso

◆ LIMPHO: Limpho tsa chelete li ka’na tsa romeloa ka ho toba ho Watch Tower Bible and Tract Society, Private Bag 2067, Krugersdorp, 1740. Le thepa ho ka fanoa ka eona. Meneelo e joalo e lokela ho romeloa le lengolo le lekhutšoaane le e hlalosang hore ke mpho ea boithatelo.

◆ TOKISETSO EA MENEELO E HOKELETSOENG MAEMO: Chelete, litumellano, le thepa li ka ’na tsa neoa Mokhatlo oa Watch Tower ka tumellano ea hore haeba ho hlokahala, li ka busetsoa ho mofani. Mokhoa ona o qoba tšenyehelo le ho fana ka bopaki ba bonnete ba lengolo la molao la kabo ea lefa, empa o ntse o tiisa hore Mokhatlo o amohela thepa haeba motho eo a e-shoa.

◆ INSURANCE: Mokhatlo oa Watch Tower o ka ’na oa boleloa e le oona mojalefa oa policy ea insurance ea bophelo. Bukana ea polokelo ea banka le eona e ka beoa Mokhatlo o tla rua molemo ho eona. Mokhatlo o lokela ho tsebisoa mabakeng ka bobeli.

◆ MANGOLO A MOLAO A KABO EA LEFA: Thepa kapa chelete e ka abeloa Mokhatlo oa Watch Tower ka lengolo la kabo ea lefa le ngotsoeng hantle ka molao. Kopi e romeloe ho Mokhatlo.

Boitsebiso bo eketsehileng kapa keletso mabapi le litaba tse joalo bo ka fumanoa ka ho ngolla Watch Tower Bible and Tract Society, Private Bag 2067, Krugersdorp, 1740.

[Litšoantšo tse leqepheng la 31]

Litsela tseo ka tsona Sehlopha se Busang sa Lipaki tsa Jehova se abileng meneelo ea lōna ka tsona ho ntšetsa pele lithahasello tsa ’Muso lilemong tse peli tse fetileng:

Ho baballa baromuoa le bo-pula-maliboho ba fetang 12 700

Ho haha kapa ho atolosa lisebelisoa tsa makala a 40

Ho hlokomela balebeli ba tsamaeang ba fetang 5 000 le basali ba bona

Theko ea mechine e robeli e mecha e hatisang ka lebelo le leholo

Ho lokisetsa ho hlokomela basebetsi ba Bethele ba fetang 8 400

Ho thusa ba oetsoeng ke likoluoa