Lebaka Leo ka Lona ba Bang ba Fetotseng Bolumeli ba Bona

HORE motho a nke bohato bo tebileng joaloka ho fetola bolumeli ba hae, ka sebele e tlameha e be o na le mabaka a matle. Melemo e ne e tla tlameha ho ba mengata ho feta mathata leha e le afe.

Na u ne u tla nka ho tseba ’Mōpi oa hao le ho haha kamano le eena e le lebaka le letle? E bile lebaka le letle ho ba bangata. Ho haha kamano le motho e mong, re tlameha hore re be re tseba motho eo hantle. Ka mohlala ngoana e monyenyane a ka tšaba ho tšoara letsoho la motho eo a qalang ho ’mona ho fihlela a mo tseba. Ho joalo le ka rōna, re tlameha ho tseba Molimo, pele re ka qala ho o tšepa. Ke ’nete hore malumeli a mangata a na le boleng ba bohlokoahali boo a bo rapelang e le Molimo. Empa hape, na hase ’nete hore ho batho ba bangata Molimo o tsebjoa ka mokhoa o lerootho le o hōle ’me ha o na botho bo hlalositsoeng ka ho hlaka? Kahoo re ka o tseba joang?

Ha re talima lintho tse re pota-potileng re hlolloa ke seo re se bonang. Re bona botle, bohlale le matla. Hore na sena sohle se simolohile hokae, ho emisa batho ba bangata lihlooho, empa ho na le buka e se hlalosang ka ho hlaka. Ke Bibele. Maqepheng a eona, re ithuta hore limakatso tsena li simolohile ho ’Mōpi ea nang le lebitso le botho. Ha re ithuta Bibele ka hloko, re hlakeloa haholoanyana ke botho ba Molimo. Re o bona e le Molimo o lerato le o tsotellang. Bibele e re, “Molimo ke lerato.” (1 Johanne 4:8, TLP) Re atametsoa ho botho bona bo babatsehang, bo nang le ho leka-lekana ho phethahetseng leratong, bohlaleng, tōkeng, le matleng. Ho latela kamano e haufi-ufi.

Misae o ile a ba le phihlelo e joalo ea ho atametsoa haufi le Jehova. O hlalositse: ‘Ha ke le ngoana, ke ile ka rutoa hore ho na le melimo e mengata. Ho ne ho e-na le molimo oa metsi, molimo oa lifate, le molimo oa ntlo. Le hoja ke ne ke e-na le pelaelo ea hore na e hlile e teng, ke ne ke lumela hore e tlameha e be ho na le Molimo o le mong oa ’nete. Khōlo ea ka e thata-thata ea Bobuddha le Boshinto e ile ea nketsa hore ke nahane ka Molimo e le ea lokelang ho tšabjoa, motho ea neng a fana ka kotlo bakeng sa liketso tse fosahetseng. Le hoja ke ne ke lakatsa ho ea kerekeng le ho ithuta ka Molimo oa Bakreste, semelo sa ka sa Bobuddha se ne se nthibela. Joale mofumahali e mong a tla ntlong ea ka ’me a ithaopela ho ithuta Bibele le ’na. Ka thuto eo, ka ithuta hore Molimo o na le lebitso, Jehova. Ke ne ke thabile ka ho fetisisa ho tseba hore hase Molimo o tšabehang empa ke o lerato, o re talimileng kamehla, e seng ho re otla, empa ho re thusa. Ke ne ke batla ho sebeletsa Molimo oo, eaba ke fetola bolumeli ba ka.’ O thabetse kamano e khotsofatsang le Molimo ka lilemo tse ka bang 29.

Kamano e Fanang ka Tokoloho le Tšepo

Ho na le molemo o mong oo ba bangata ba o fumaneng ka ho haha kamano le Molimo. Ha ba qala ho nka likamano tse ling bophelong ba bona e le tsa bohlokoa bo fokolang, ba bangata ba fumane tokoloho boikutlong ba ho tšaba batho ho etsang motho lekhoba le ho lokoloha mekhoeng e hatellang e sa boleleng letho le e se nang molemo oa letho. Kahoo, ba lokolotsoe litšenyehelong tse boima tsa ho khahlisa batho le tsa meetlo, tse kenyang malapa a mangata melatong e sa feleng. Bibele ea lemosa, “Ho tšaba batho ho isa sefing,” e phaella ka tiisetso ena, “empa ea tšepang Jehova o beiloe phahameng.”—Liproverbia 29:25.

Tokoloho e ’ngoe e ka fumanoang ke tokoloho tšabong ea lefu. Misae ea qotsitsoeng kaholimo o re: “Ha ke le lilemo li 22, ke ile ka tšoaroa ke feberu ea mala. Ha ke ntse ke tjapaletse moo, ka utloa metsoalle le litho tsa lelapa ba bua ka ’na joalokaha e ka ba ne ba lebeletse hore ke shoe. Empa ke ne ke tšaba lefu. Khopolo eo ke neng ke e-na le eona feela e ne e le hore ke ne ke batla ho phela, ’me ka lehlohonolo ke ile ka hlaphoheloa. Ka thuto ea Bibele eo ke bileng le eona hamorao, ke ile ka lokolloa tšabong eo ea lefu. Ke ile ka ithuta hore lefu e mpa feela e le ho se be teng.” Bibele e re: “Bafu ha ba tsebe letho leha le le leng.” (Moeklesia 9:5, 10) Haeba motho e mong a e-shoa, ho na le tšepo e hlollang ea tsoho hobane Molimo o boloka bafu ba ntse ba phela mohopolong oa oona.—Johanne 5:28, 29, NW.

Batho ba bang ba bangata ba ithutang Bibele ka ho tšoanang ba fumane hore lintho tseo ba ithutileng tsona li neile bophelo ba bona morero oa sebele le tšepo. Lena ke lebaka le leng leo ka lona Bibele e ngoletsoeng, ka ho khetheha, hore “re tle re be le tšepo.” (Ba-Roma 15:4) Bolumeli ba Buddha ha bo rute letho ka ’Mōpi kapa Molimo. Bo bolela hore bokhopo le bohloko esale li ntse li le teng le hore li tla tsoela pele ka ho sa feleng ka lipotoloho tse sa khaotseng tsa ho tsoaloa hape. Malumeli a mangata a Bophirimela a ruta hore batho ba molemo ba tla ea leholimong, sebaka sa ka ho sa feleng, empa ha e le hore na ba il’o etsa eng moo, ha ba tsebe hantle. Ho fapana le lifilosofi tsena tsa bolumeli tse fanang ka tšepo e nyenyane haholo kapa moelelo bophelong ba bona, Bibele e ruta hore motho o ne a etselitsoe ho thabela bophelo ka ho sa feleng lefatšeng e le mohlokomeli oa lona. (Genese 2:15-17; Esaia 45:18) Kahona re ka hlokomela hore bophelo bo lokela ho sebelisoa e seng feela ho bokella maruo le ho itšebeletsa empa ho sebeletsa Molimo le ba bang ka tsela e hlokang boithati.—Moeklesia 12:13; Mattheu 22:37-39.

Ho Fumana ’Nete le Metsoalle ea ’Nete

Ba bang ba qobelehile ho fetola bolumeli ba bona ka mabaka a mang. Har’a ’ona ke takatso ea ho fumana ’nete ea bolumeli. Ke ’nete hore batho ba bangata ba ikutloa hore ha ho na ntho e joaloka ’nete e phethahetseng ’me, joalokaha Bibele e bolela, ‘ha ba botsisise.’—Pesaleme ea 10:4.

Empa ho na le ba botsisisang ka mokhoa o joalo. Sakae, ea phelang Japane bohareng, o ile a ea le lihlotšoana tsa Bobuddha kaofela ka lilemo tse 25 e le hore a ka fumana ’nete. Ha ho mohla a kileng a khotsofala. Ha a ntse a phahama ho ba libakeng tsa boikarabelo mokhatlong ka mong, kamehla o ne a bona lintho tse neng li mo khopisa, tse kang khoebo, boitšoaro bo bobe, le tlatlapo. O bile a leba India ho ea batla metso ea Bolumeli ba Buddha libakeng tsa histori tseo Buddha a neng a phela ho tsona le tseo a neng a ruta ho tsona. O ile a nyahama haholo ha a fumana thahasello e fokolang haholo Bolumeling ba Buddha naheng eo ea Bohindu. Joale lipuisanong tsa hae le Lipaki tsa Jehova, o ile a bolelloa hore hase malumeli ’ohle a tsoang ho Molimo empa hore a tsoa ho sera sa oona, Satane Diabolose.—1 Ba-Korinthe 10:20.

Sena se ile sa nyarosa Sakae, empa sa mo etsa hore a nahane ’me a batlisise. O ile a bala buka What Has Religion Done for Mankind?a le likhatiso tse ling tsa Bibele. O ile a qala ho bona hore, le hoja bolumeli ba Buddha, bo sebelisoang Japane, bo fetohile haholo ho theosa le lilemo, Bibele e lutse e sa fetoha ka likete tsa lilemo. Qetellong ho batlisisa ha hae ha mo putsa. A fumana ’nete eo a neng a ntse a e batla. Thabo ea hae ea tšoana le thabo ea monna oa papisong ea Jesu ea ileng a fumana letlotlo le patiloeng tšimong: “’Me ka baka la ho le thabela, o rekisa ka ntho tsohle tseo a nang le tsona, o ithekela tšimo eo.”—Mattheu 13:44.

Ba fumaneng ’nete ea bolumeli ba bontša ‘ho hauhela’ ba bang ba e batlang. (1 Petrose 3:8) Ha e le hantle, mofuthu oa bona le lerato la bona la ’nete ke tsona tseo qalong li hapang ba bangata hore ba ithute Bibele. Jesu o itse: “Seo bohle ba tla tseba hobane le barutuoa ba ka ka sona, ke ha le ratana.” (Johanne 13:35) Re ka fumana tikoloho e joalo ea lerato hokae kajeno? Kazuhiko Nagoya, ha a ngola karolong eo a ngolang litaba ho eona koranteng ea Tokyo Daily Yomiuri, o hlalositse ka tsela e mofuthu eo a ileng a tšoaroa ka eona ha a ne a etetse sebaka seo Lipaki tsa Jehova li kopanelang ho sona. Nagoya o re: “Tsela eo ba neng ba bososela ka eona, e ne e ka hoja ba ntsebella lekhetlong la pele leo ba ileng ba kopana le ’na ka lona ’me ba ne ba thabetse ho mpona hape.” Empa ho ne ho se joalo. “Ke ile ka ba shebisisa hantle lifahlehong ’me ka fumana hore e ne e le batho bao ke qalang ho ba bona ho hang.” Ha batho ba bang ba babeli ba ile ba bososela, Nagoya o hopola hore, “Ka ikutloa ke thabile haholo. Eo ke tsela eo batho bao ba bososellang motho eo ba qalang ho ’mona ka eona, ha ba ’mona sebokeng sefe kapa sefe sa bona.”

Mofuthu le lerato leo ha li hlahisoe feela ke ho tsebana ha batho hantle hobane ba kopana kamehla sebakeng seo. Ho e-na le hoo, tsena li hlahisoa ke thuto ea kamehla ea Bibele le ho sebelisoa ha melao-motheo ea eona bophelong ba bona. Batho ba bangata ba neng ba memetsoe Likopano tsa Setereke tsa Lipaki tsa Jehova tsa “Baboloki ba Botšepehi” ka 1985-86 mafatšeng a sele ba ile ba angoa ka ho teba ke lerato le kamohelo e mofuthu tse ileng tsa bontšoa ke ba neng ba ba amohetse. Banyalani ba bang ba tsoang Japane ba neng ba le kopanong ea Philippines ba hlalositse: “Ha re kopana kaofela bakeng sa pina ea ho qetela, motho ka mong a bina ka puo ea habo, re ile ra ameha ka ho teba. Ka lekhetlo la pele re ile ra utloa hore na ho ba karolo ea mokhatlo oa machaba oa baena kannete ho bolela eng.”

Qetellong, ba bangata ba tla u bolella ka liphetoho tse khōlō tseo ba li entseng bophelong ba bona ka baka la ho ithuta Bibele le ho e sebelisa. Batho bao pele ba neng ba e-na le botho bo fapaneng joaloka ha linku li fapane le liphiri joale ba sebelisana ’moho ka khotso kopanong ea Bokreste. (Esaia 11:6) Ba bang e ne e le ba feto-fetohang ’me ba se na botsoalle, e le lifela-peloana e bile e le ba lutseng ba tšohile. Ba bang ba ne ba khathatsoa ke ho tepella maikutlo. Ho feta moo ba bang e ne e le ba sa rateng ho hlahisa maikutlo a bona e bile e le ba ichebileng bobona. Ba bangata ba ne ba e-na le mekhoa e mebe eo ba neng ba lokela ho e hlōla. Empa ka boiteko bo matla, bo kopaneng le takatso ea ho khahlisa Molimo, ba ile ba khona ho etsa liphetoho tse tebileng.

Ho thoe’ng ka uena? Na ho na le lebaka leha e le lefe ho a kaholimo a buang ka ho etsa liphetoho le hapang thahasello ea hao? Haeba ho joalo, re u khothaletsa hore u ithute Bibele ka ho teba. Bibele e bontša hore malumeli ’ohle a bohata a tseleng eo ho eona a tlang ho thula Molimo le Bibele. Joaloka moqhobi oa sefofane ea boletsoeng sehloohong se kapele, u ka ’na ua lokela ho nka bohato bo potlakileng ho pholosa bophelo ba hao le ba baratuoa ba hao. Jesu o itse: “Monyako oa timelo o hebe-hebe, le tsela e eang teng e phatlaletse, ’me ba kenang teng ba bangata. Hobane monyako oa bophelo o patisane, le tsela e eang teng e tšesane.” (Mattheu 7:13, 14) E, haeba u tsamaea tseleng ‘e hebe-hebe le e phatlaletseng,’ ho na le lebaka le molemo la hore u fetole bolumeli ba hao!

[Mongolo o botlaaseng ba leqephe]

[Setšoantšo se leqepheng la 5]

Khōlo ea ka e thata-thata ea Bobuddha le Boshinto e ile ea etsa hore ke nahane ka Molimo e le ea tšabehang

[Setšoantšo se leqepheng la 7]

‘Tsela e isang bophelong e patisane’