Boikarabelo bo Tsamaea le ho Tseba Bolumeli bo Nepahetseng

“Ho lehlohonolo ba utloang lentsoe la Molimo, ’me ba le boloka.”—LUKA 11:28.

1. Hang hoba ba khetholle bolumeli bo nepahetseng, ke batho ba mofuta ofe ba hahang bophelo ba bona ho bo potoloha?

HA HOA lekana feela ho khetholla bolumeli bo nepahetseng. Haeba re le barati ba se nepahetseng le ’nete, hang ha re bo fumane, re tla haha bophelo ba rōna ho bo potoloha. Bolumeli ba ’nete hase feela filosofi ea kelello; ke tsela ea bophelo.—Pesaleme ea 119:105; Esaia 2:3; bapisa le Liketso 9:2.

2, 3. (a) Jesu o ile a hatisa bohlokoa ba ho etsa thato ea Molimo joang? (b) E mong le e mong ea tsebang bolumeli bo nepahetseng o na le boikarabelo bofe?

² Jesu Kreste o ile a hatisa bohlokoa ba ho etsa seo Molimo a bontšitseng hore ke thato ea Hae. Ha a qetella se ileng sa tla tsejoa e le Thuto ea Thabeng, Jesu o ile a tsebahatsa hore hase bohle ba neng ba mo bitsa Morena (kahoo ba ipolela hore ke Bakreste) ba neng ba tla kena ’Musong; empa ho ne ho tla kena feela ba etsang thato ea Ntate oa hae. Ba bang, o itse, ba ne ba tla lahloa e le “basebetsi ba ho hloka molao.” Ho hloka molao hobane’ng? Hobane joalokaha Bibele e bolela, ho hlōleha ho etsa thato ea Molimo ke sebe, ’me sebe sohle ke ho hloka molao. (Mattheu 7:21-23, NW; 1 Johanne 3:4; bapisa le Ba-Roma 10:2, 3.) Motho a ka ’na a tseba bolumeli bo nepahetseng, a ka ’na a babatsa ba bo rutang, ’me a ka ’na a bua hantle ka ba bo sebelisang, empa le eena o na le boikarabelo ba ho bo sebelisa bophelong ba hae. (Jakobo 4:17) Haeba a amohela boikarabelo boo, o tla fumana hore bophelo ba hae bo tla matlafatsoa, ’me o tla latsoa thabo e ke keng ea tla ka tsela e ’ngoe.

³ Sehloohong se fetileng, re ile ra hlahloba matšoao a tšeletseng a khethollang bolumeli ba ’nete. Le leng le le leng la ’ona ha le re thuse feela ho khetholla bolumeli bo nepahetseng empa hape le re hlahisetsa liphephetso le menyetla. Joang?

U Arabela Joang Lentsoeng la Molimo?

4. (a) Ha ba bacha ba qala ho kopana le Lipaki tsa Jehova, ke eng eo ba e hlokomelang kapele mabapi le ho sebelisa ha Lipaki Bibele? (b) Ho feptjoa hantle moeeng ho ama bahlanka ba Jehova joang?

⁴ Ha Lipaki tsa Jehova li ntse li ithuta Bibele le ba thahasellang bocha, ba bangata ho bana ba bacha ba lemoha kapele hore se rutoang se tsoa Bibeleng. Ha ba arabeloa lipotso tsa bona, ha ba supisoe lithuto tsa motheo tsa kereke, lineano tsa batho, kapa maikutlo a batho ba hlahelletseng. Lentsoe la Molimo ke oona mohloli oa boitsebiso. Ha ba e-ea Holong ea ’Muso, baa hlokomela hore le moo Bibele ke eona buka e ka sehloohong e ithutoang. Ha ho nke batho ba batlang ’nete ka tieo nako e telele hore ba hlokomele hore ntho e ka sehloohong thabong eo ba e bonang har’a Lipaki tsa Jehova ke ’nete ea hore li feptjoa hantle moeeng ka Lentsoe la Molimo.—Esaia 65:13, 14.

5. (a) Ke phephetso efe e hlahisoang ho ba shebelletseng Lipaki tsa Jehova? (b) Ba ka kopanela thabong ea Lipaki joang?

⁵ Haeba u hlokomela sena, u nka bohato bofe ka sona? Haeba u se utloisisa hantle, ka nepo u ke ke oa ba moshebelli feela ea sa etseng letho, leha e le hore u ka rata ho ba eena. Bibele e bontša hore bao e leng “bautloi feela” empa e se “baetsi ba lentsoe” ke “ba ithetsang.” (Jakobo 1:22) Baa ithetsa hobane ba hlōleha ho hlokomela hore ho sa tsotellehe seo e ka ’nang eaba baa se bua, ho hlōleha ha bona ho utloa Molimo ho bontša hore ha ba hlile ha ba mo rate. Boipolelo ba tumelo e sa tšehetsoeng ke mesebetsi ke tumelo e shoeleng. (Jakobo 2:18-26; 1 Johanne 5:3) Ha ho bapisoa, ea susumetsoang ke ho rata Jehova hore e be “moetsi ea sebetsang” o tla ‘thaba ha a o etsa.’ (NW) E, joalokaha Jesu Kreste a hlalositse, “ho lehlohonolo ba utloang lentsoe la Molimo, ’me ba le boloka.”—Jakobo 1:25; Luka 11:28; Johanne 13:17.

6. Haeba kannete re ananela Lentsoe la Molimo, ke menyetla efe eo ka borōna re tlang ho ikemisetsa ho tšoarella ho eona?

⁶ Thabo eo e tla teba ha u ntse u hōla tsebong ea thato ea Molimo ’me u sebelisa lintho tseo u tsoelang pele ho ithuta tsona. U tla etsa boiteko bo bokae ho ithuta Lentsoe la Molimo? Batho ba mashome a likete ba neng ba sa tsebe ho bala le ho ngola ba ile ba sebetsa ka thata ho ithuta ho bala, ba etsa sena ka ho khetheha e le hore ba ka bala Mangolo le ho a ruta batho ba bang. Ba bang ba tsoha hoseng haholo kamehla e le hore ba ka qeta nako e itseng letsatsi le leng le le leng ba bala Bibele le lithuso tsa ho ithuta Bibele, tse kang Molula-Qhooa. Ha uena ka bouena u bala Bibele ka ho latellana kapa u sheba mangolo a boletsoeng tabeng e ’ngoe e ithutoang, ela hloko melao ea Jehova le litaelo tsa hae, ’me u batle ho lemoha melao-motheo e mengata e teng moo bakeng sa ho re tataisa. Thuisa ka seo karolo e ’ngoe le e ’ngoe e se senolang ka Molimo, morero oa hae, le litšebelisano tsa hae le moloko oa batho. Lumella nako ea hore sena se bōpe pelo ea hao. Hlahloba hore na ho na le litsela tseo u ka sebelisang keletso ea Bibele ka botlalo haholoanyane bophelong ba hao.—Pesaleme ea 1:1, 2; 19:7-11; 1 Ba-Thessalonika 4:1.

Na Boinehelo ba Hao ho Jehova bo Feletse?

7. (a) Thuto ea Boraro-bo-bong e susumelitse boiteko ba batho ba ho rapela Molimo joang? (b) Ke eng se ka ’nang sa etsahala ha motho a ithuta ’nete ka Jehova?

⁷ Batho ba limilione ba ile ba imoloha ha ba ithuta hore Molimo oa ’nete hase Boraro-bo-bong. Tlhaloso ea hore “ke sephiri” ha ho mohla e kileng ea ba khotsofatsa. Ba ne ba ka atamela joang haufi le Molimo ea neng a sa utloisisoe? Ka lebaka la thuto eo, ba bile le tšekamelo ea ho hlokomoloha Ntate (eo ho seng mohla ba kileng ba utloa lebitso la hae ka kerekeng) le ho rapela Jesu e le Molimo kapa ba lebisa borapeli ba bona ho Maria (eo ba neng ba rutiloe hore ke “’Mè oa Molimo”). Empa lipelo tsa bona li ile tsa arabela ka thabo ha e mong oa Lipaki tsa Jehova a phetla Bibele ’me a ba bontša lebitso la botho la Molimo, Jehova. (Pesaleme ea 83:18) Mosali e mong oa Venezuela o ile a thaba haholo ha a ne a bontšoa lebitso la bomolimo hoo a bileng a kopa Paki e nyenyane e ileng ea arolelana le eena ’nete eo ea bohlokoa ’me o ile a lumela ho ba le thuto ea lehae ea Bibele. Ha batho ba joalo ba ithuta hore Jesu o ile a bua ka Ntate oa hae e le “Molimo oa ka, e leng le Molimo oa lōna” le hore Jesu o ile a bitsa Ntate oa hae “Molimo o ’notši oa ’nete,” baa hlokomela hore seo Bibele e se rutang ka Molimo se ka utloisisoa. (Johanne 17:3; 20:17) Ha ba ntse ba ithuta ka litšoaneleho tsa Jehova, ba ikutloa ba hulehela ho eena, ba qala ho mo rapela, ’me ba batla ho mo khahlisa. Phello ke efe?

8. (a) Ka lebaka la ho rata ha bona Jehova le takatso ea bona ea ho mo khahlisa, batho ba limilione ba entse eng? (b) Ke hobane’ng ha kolobetso ea Bokreste e le ea bohlokoahali?

⁸ Nakong ea lilemo tse leshome tse fetileng, batho ba 2 528 524 lik’honthinenteng tse tšeletseng le lihleke-hlekeng tse ngata ba nehetse bophelo ba bona ho Jehova ’me eaba ba tšoantšetsa boinehelo bona ka kolobetso ea metsing. Na u ne u le e mong oa bona, kapa na hona joale u lokisetsa ho kolobetsoa? Kolobetso ke bohato ba bohlokoa bophelong ba Mokreste e mong le e mong oa ’nete. Jesu o ile a laela balateli ba hae ho etsa barutuoa ba batho ba lichaba tsohle le ho ba kolobetsa. (Mattheu 28:19, 20) Ho boetse hoa hlokomeleha hore e bile hang ka mor’a hore Jesu a kolobetsoe moo Jehova ka boeena a ileng a bua a le maholimong, a re: “U Mor’a ka ea ratoang; ke khahlisoa ke uena.”—Luka 3:21, 22.

9. E le ho boloka kamano e amohelehang le Jehova, ho hlokahala eng ka lehlakoreng la rōna?

⁹ Kamano e amohelehang ho Jehova ke ntho e lokelang ho baballoa. Haeba u kene kamanong e joalo ka boinehelo le kolobetso, qoba ntho e ’ngoe le e ’ngoe e tlang ho e silafatsa. U se ke ua lumella matšoenyeho a bophelo le ho ameha ka lintho tse bonahalang ho e sutumelletsa boemong ba bobeli. (1 Timothea 6:8-12) Phela kannete tumellanong le keletso ea Liproverbia 3:6: “U mo [Jehova] kenye mererong ea hao eohle, ’me o tla u tsamaisa litseleng tsohle tsa hao.”

Lerato la Kreste le U Ama ka ho Teba Hakae?

10. Ke hobane’ng ha ho rapela ha rōna Jehova ho sa re etse hore re hlokomolohe Jesu?

¹⁰ Ho ananela Jehova ka ho loketseng joaloka Molimo ea ’notši oa ’nete, ha e le hantle, ha ho etse hore motho a hlokomolohe Jesu Kreste. Ho fapana le hoo, Tšenolo 19:10 (NW) e re: “Ho beha bopaki ho Jesu ke hona ho susumetsang ho profeta.” Ho tloha ho Genese ho ea ho Tšenolo, boprofeta bo bululetsoeng bo fana ka makolopetso mabapi le karolo ea Jesu Kreste morerong oa Jehova. Ha motho a ntse a tloaelana le makolopetso ao, ho hlaha setšoantšo se hlollang se lokolohileng linthong tse sothehileng le maikutlong a fosahetseng a bakiloeng ke lithuto tsa bohata tsa Bokreste-’mōtoana.

11. Ho ithuta seo Bibele e hlileng e se rutang ka Mora oa Molimo ho ile ha ama mosali e mong joang Poland?

¹¹ Ho utloisisa ’nete ka Mora oa Molimo ho ka ba le phello e tebileng ho motho. Ho bile joalo ka Danuta, mosali e mong Poland. O ne a ntse a kopana le Lipaki tsa Jehova ka lilemo tse robeli, a thabela seo li se rutang, empa o ne a sa etse hore borapeli ba ’nete e be tsela ea hae ea bophelo. Eaba o amohela kopi ea buka Motho e Moholo ka ho Fetisisa ea Kileng a Phela, e behang bophelo ba Kreste ka mokhoa o utloisisehang habonolo.a Bosiu bo boholo, a phetla buka eo, a rerile ho bala khaolo e le ’ngoe feela. Leha ho le joalo, ha a ka a beha buka eo fatše ho fihlela ka meso ha a e qetile. A bokolla. A kōpa ka thapeli, “Jehova, ntšoarele.” Ka lebaka la seo a neng a se balile, o ile a bona ka mokhoa o hlakileng ho feta leha e le neng pele lerato leo Jehova le Mora oa hae ba le bontšitseng. O ile a hlokomela hore ka lilemo tse robeli o ne a ntse a hana ka ho hloka teboho thuso eo Molimo a neng a ntse a e atolosetsa ho eena ka mamello. Ka 1993 o ile a kolobetsoa tšoantšetsong ea boinehelo ba hae ho Jehova motheong oa tumelo ho Jesu Kreste.

12. Ho tseba Jesu Kreste ka ho nepahetseng ho ama bophelo ba rōna joang?

¹² “Tsebo e nepahetseng ea Morena oa rōna Jesu Kreste” e amahanngoa le ho ba Mokreste ea mafolo-folo le ea behang litholoana. (2 Petrose 1:8, NW) U tla kopanela tšebetsong e joalo ho isa bohōleng bofe, e leng ho arolelana molaetsa oa ’Muso le ba bang? Boholo ba seo batho ka bomong ba khonang ho se etsa se angoa ke maemo a mangata. (Mattheu 13:18-23) Maemo a mang re ke ke ra a fetola; a mang re ka khona. Ke eng se tla re susumelletsa ho a khetholla le ho etsa liphetoho tse ka etsoang? Moapostola Pauluse o ile a ngola: “Lerato la Kreste lea re susumetsa”; ka mantsoe a mang, lerato leo a le bontšitseng ka ho nehelana ka bophelo ba hae molemong oa rōna le ikhethile hoo ha kananelo ea rōna bakeng sa lona e hōla, lipelo tsa rōna li tla susumelletseha ka ho tebileng. Ka lebaka leo, re hlokomela hore e ne e tla ba ho sa lokelang ho rōna ho tsoela pele re phehella lipakane tsa boithati le ho phela haholo-holo ka ho ikhotsofatsa. Ho e-na le hoo, re lokisa litaba tsa rōna hore re fe mosebetsi oo Kreste a rutileng barutuoa ba hae hore ba o etse sebaka sa pele.—2 Ba-Korinthe 5:14, 15, NW.

Ho Aroha Lefatšeng—Ho Isa Bohōleng Bofe?

13. Ke hobane’ng ha re lokela ho batla ho se be karolo ea bolumeli bo ikentseng karolo ea lefatše lee?

¹³ Ha ho thata ho bona tlaleho e entsoeng ke Bokreste-’mōtoana le malumeli a mang hobane a batla ho ba karolo ea lefatše. Lichelete tsa kereke li ’nile tsa sebelisetsoa ho tšehetsa tšebetso ea phetohelo. Baprista ba fetohile baloaneli ba likhukhuni. Letsatsi le letsatsi, likoranta li hlahisa litlaleho tse buang ka lihlopha tsa bolumeli tse loantšanang likarolong tse sa tšoaneng tsa lefatše. Matsoho a bona a rotha mali. (Esaia 1:15) ’Me lefatšeng ka bophara baruti ba ntse ba tsoela pele ho leka ho tsamaisa pono ea lipolotiki. Barapeli ba ’nete ha ba na karolo ho sena.—Jakobo 4:1-4.

14. (a) Ke eng eo re tlamehang ho e qoba hore re tle re lule re arohile lefatšeng lee? (b) Re ka thusoa ke eng ho qoba ho tšoasoa ke maikutlo le mekhoa ea lefatše?

¹⁴ Empa ho aroha lefatšeng ho akarelletsa ho fetang hoo. Lefatše le khetholloa ka lerato la chelete le seo chelete e ka se rekang, takatso bakeng sa bophahamo ba botho, le telekiso e sa khaotseng ea menyaka, hammoho le lintho tse kang khaello ea ho ameha ha ’nete ka ba bang, ho bua leshano le ho sebelisa puo hampe, ho fetohela matla a bolaoli, le ho hlōleha ho itšoara. (2 Timothea 3:2-5; 1 Johanne 2:15, 16) Ka lebaka la ho se phethahale ha rōna, ka linako tse ling re ka ’na ra bontša tse ling tsa litšobotsi tseo. Ke eng se ka re thusang ntoeng ea rōna ho qoba maraba a joalo? Ho hlokahala re ikhopotse hore na ke mang ea ikarabellang ho sena sohle. “Lefatše lohle le rapaletse ka tlase ho e mobe.” (1 Johanne 5:19) Ho sa tsotellehe hore na tsela e itseng e bonahala e hohela hakae, ho sa tsotellehe hore na ke batho ba bangata hakae ba phelang ka tsela eo, ha re bona sera se ka sehloohong sa Jehova, Satane Diabolose, se e tšehelitse, re hlokomela kamoo e hlileng e leng mpe kateng.—Pesaleme ea 97:10.

Lerato la Hao le Fihla Hōle Hakae?

15. Lerato le se nang boithati leo u le hlokometseng le u thusitse joang ho khetholla bolumeli bo nepahetseng?

¹⁵ Ha u qala ho kopanela le Lipaki tsa Jehova, lerato le bonahalang har’a tsona ha ho pelaelo hore le ile la ipiletsa ho uena ka lebaka la ho fapana ha lona le moea oa lefatše. Ho hatelloa ha lerato le se nang boithati ho etsa hore borapeli ba Jehova bo arohe mefuteng eohle e meng ea borapeli. E ka ’na eaba sena ke sona se u kholisitseng hore Lipaki tsa Jehova ka sebele li sebelisa bolumeli bo nepahetseng. Jesu Kreste ka boeena o ile a re: “Seo bohle ba tla tseba hobane le barutuoa ba ka ka sona, ke ha le ratana.”—Johanne 13:35.

16. Ho na le menyetla efe bakeng sa rōna ka bomong hore re atolohe leratong la rōna?

¹⁶ Na tšoaneleho eo le uena e u khetholla u le e mong oa barutuoa ba Kreste? Na ho na le litsela tseo u ka atolohang ka tsona ha u bontša lerato? Ka ntle ho pelaelo kaofela ha rōna re ka ho etsa. Ke taba e fetang feela ho ba le botsoalle ho ba bang Holong ea ’Muso. Hobane haeba re atolosetsa lerato ho ba re ratang feela, re tla be re fapane kae le lefatše? Bibele ea phehella: “Haholo-holo, le ratane ka phehello.” (1 Petrose 4:8) Re lokela ho bontša lerato le leholoanyane ho bo-mang? Na ke moena kapa khaitseli oa Mokreste eo semelo sa hae se fapaneng le sa rōna le eo tsela ea hae ea ho etsa lintho tse itseng e re khopisang? Na ke eo, ka lebaka la bokuli kapa botsofali, a sa khoneng ho ba teng libokeng kamehla? Na ke molekane oa rōna oa lenyalo? Kapa mohlomong ke batsoali ba rōna ba tsofalang? Ba bang ba ileng ba etsa hantle ho bonahatseng litholoana tsa moea, ho akarelletsa lerato, ba ile ba ikutloa eka ba ne ba ithuta lintho tsena bocha ha ba tobana le maemo a thata haholo a ka hlahang bakeng sa ho fana ka tlhokomelo ka ho feletseng ho setho se seng sa lelapa se ileng sa holofala haholo. Esita leha re tobane le maemo ana, ho hlakile hore lerato la rōna le lokela ho fetela ka ’nģane ho lelapa la rōna.

Ho Paka ka ’Muso—Ke Habohlokoa Hakae ho Uena?

17. Haeba re ruile molemo liketelong tsa Lipaki tsa Jehova, hona joale re lokela ho ikutloa re susumelletseha ho etsa eng?

¹⁷ Tsela ea bohlokoa eo ka eona re bontšang lerato ho batho-’moho le rōna ke ka ho ba pakela ka ’Muso oa Molimo. Ke sehlopha se le seng feela sa batho se etsang mosebetsi ona oo Jesu a o boletseng esale pele. (Mareka 13:10) Bana ke Lipaki tsa Jehova. Ka borōna re ruile molemo ka oona. Joale ke tokelo ea rōna ho thusa ba bang. Haeba re e-na le pono ea Molimo ka taba ena, mosebetsi ona e tla ba o ka sehloohong bophelong ba rōna.

18. Ho bala ha rōna buka Lipaki tsa Jehova—Baboleli ba ’Muso oa Molimo ho lokela ho re susumelletsa joang ho kopaneleng ha rōna ho pakeng ka ’Muso?

¹⁸ Tlaleho e hlollang ea kamoo molaetsa oa ’Muso o ’nileng oa isoa likarolong tse hōle tsa lefatše nakong ea mehla ena ea qetello e boletsoe bukeng Lipaki tsa Jehova—Baboleli ba ’Muso oa Molimo. Haeba e fumaneha ka puo ea heno, u se ke oa ba oa tlohela ho e bala. ’Me ha u ntse u etsa joalo, hlokomela ka ho khethehileng litsela tsohle tseo batho ka bomong ba kopanetseng ho faneng ka bopaki ka ’Muso kateng. Na ho na le ba bang bao u ka etsisang mohlala oa bona? Kaofela ha rōna re bulehetsoe ke menyetla e mengata. E se eka lerato la rōna ho Jehova le ka re susumelletsa ho e sebelisa hamolemo.

19. Re rua molemo joang ha re amohela boikarabelo bo tsamaeang le ho tseba bolumeli bo nepahetseng?

¹⁹ Kahoo ha re ikitlaelletsa ho etsa thato ea Jehova, re fumana karabelo potsong ena, Bophelo bo bolela eng? (Tšenolo 4:11) Ha re sa phopholetsa, re siiloe le boikutlo ba lefeela. Ha ho mosebetsi oo u ka inehelang ho oona o tla u tlisetsa khotsofalo e kholoanyane ho feta ho ikitlaetsa ka pelo eohle tšebeletsong ea Jehova Molimo. ’Me e fupere bokamoso bo boholo hakaakang! Nako e sa feleng ea ho khotsofatsa bophelo lefatšeng la hae le lecha, moo re tla khona ho sebelisa matla a likelello tsa rōna ka botlalo tumellanong le morero o lerato oo Molimo a ileng a o bōpela moloko oa motho.

[Mongolo o botlaaseng ba leqephe]

U ne U Tla Arabela Joang?

◻ Ke hobane’ng ha e le habohlokoa hore bolumeli bo amohele Bibele e le Lentsoe la Molimo ’me bo hlomphe Jehova e le Molimo oa ’nete?

◻ Bolumeli ba ’nete bo ruta eng mabapi le karolo eo Jesu a e phethang e le Morekolli?

◻ Ke hobane’ng ha Bakreste ba lokela ho ipoloka ba arohile lefatšeng le ho bontša lerato le se nang boithati?

◻ Ho paka ka ’Muso ho phetha karolo efe bolumeling bo nepahetseng?

[Litšoantšo tse leqepheng la 16]

Kolobetso ke bohato ba bohlokoa ho amoheleng boikarabelo ba borapeli ba ’nete. Khoeli e ’ngoe le e ’ngoe, ba ka bang 25 000 lefatšeng ka bophara ba nka bohato boo

Russia

Senegal

Papua New Guinea

U.S.A.

[Litšoantšo tse leqepheng la 17]

Ho arolelana ’nete ea Bibele le ba bang ke karolo ea borapeli ba ’nete

U.S.A.

U.S.A.

Brazil

Hong Kong