Hlokomela Ho Itokafatsa!

LEKHOLONG la pele la lilemo, Bafarisi ba ne ba thabela botumo bo botle ba ho ba barapeli ba lokileng ba Molimo. E ne e le liithuti tse khothetseng tsa Mangolo ’me ba rapela khafetsa. Batho ba bang ba ne ba ba talima ba le mosa ebile ba e-na le kahlolo e molemo. Rahistori oa Mojode Josephus o ngotse: “Bafarisi ba na le kameho pakeng tsa bona ’me ba hlaolela likamano tsa kutloano sechabeng.” Hase ho makatsang ha mohlomong e ne e le batho ba hlomphehang le ba nkoang e le ba bohlokoa ka ho fetisisa sechabeng sa Bajode nakong eo!

Leha ho le joalo, kajeno lentsoe “Bofarisi” le mantsoe a amanang le lona ke a nyelisang, a kang boikaketsi, ho itokafatsa, boikutlo ba ho halalela haholo, ho halalela ka ho feteletseng le tšebeletso ea molomo feela. Ke hobane’ng ha Bafarisi ba ile ba lahleheloa ke botumo ba bona bo botle?

E ne e le hobane, ho fapana le Bajode ba bangata, Jesu Kreste ha aa ka a thetsoa ke ponahalo ea kantle ea Bafarisi. O ile a ba tšoantša le “mabitla a koetlisitsoeng, a nang le ponahalo e ntle kantle, kanthebo, kahare, a tletse masapo a bafu le ho bola hohle.”—Mattheu 23:27.

Ke ’nete hore ba ne ba etsa lithapelo tse telele ha ba eme mapatlelong, empa sena e ne e le feela hore ba bonoe ke ba bang, joalokaha Jesu a boletse. Borapeli ba bona e ne e mpa feela e le ketso ea boikaketsi. Ba ne ba rata libaka tse hlahelletseng lijong tsa mantsiboea le litulo tse ka pele lisynagogeng. Le hoja Bajode bohle ba ne ba tlamehile ho apara litjellane liaparong tsa bona, Bafarisi ba ne ba leka ho khahlisa batho ka ho apara litjellane tse telele ka ho feteletseng. Ba ne ba le motlotlo ho bontša lifilaktera tsa bona tse pharalalitsoeng tse roaloang e le lithatho. (Mattheu 6:5; 23:5-8) Qetellong, boikaketsi ba bona, meharo ea bona le boikhohomoso ba bona li ile tsa ba tlisetsa masoabi.

Jesu o ile a bolela hore Molimo o lahlile Bafarisi: “Baikaketsi, Esaia o na a profete tsa lōna hantle, ha a itse: Sechaba sena se ntlhonepha ka molomo feela; empa pelo tsa bona li hole le ’na. Ba nkhumamella lefeela, ha ba ruta lithuto tseo e leng melao ea batho.” (Mattheu 15:7-9) Ho loka ha bona ka sebele e ne e le ho itokafatsa. Ka ho utloahalang, Jesu o ile a lemosa barutuoa ba hae: “Hlokomelang litomoso tsa Bafarisi.” (Luka 12:1, NW) Kajeno, le rōna re tlameha ho ‘hlokomela’ ho itokafatsa kapa ho itebela khahlanong le ho ba baikaketsi ba bolumeli.

Ka ho etsa joalo, re lokela ho hlokomela hore motho ha a fetohe ea itokafatsang kapele-pele. Ho e-na le hoo, tšekamelo ena e kenella hanyane ka hanyane ka nako e telele. Esita leha a sa rera motho a ka ba le litšobotsi tse sa rateheng tsa Bafarisi.

Boikutlo ba ho Iphahamisa

Ke litšobotsi life tse ling tseo re tlamehang ho li ‘hlokomela’? Encyclopædia of Religion and Ethics e hlalosa hore ka tloaelo batho ba itokafatsang baa “bua, hape baa ema, ebile ba bonahala eka le ka mohla ha ba e-s’o etse phoso.” Batho ba itokafatsang ba boetse baa ithorisa ebile baa iphahamisa, e leng seo e neng e le bothata bo ka sehloohong ba Bafarisi.

Jesu o ile a hlalosa boikutlo bona ba Bofarisi ka papiso: “Batho ba babeli ba ne ba nyolohetse tempeleng ho ea rapela, e mong e le mofarisi, e mong e le mo-lekhetho. Mofarisi a ema, ’me a iketsetsa thapelo, a re: Molimo, kea u leboha ha ke se joalo ka batho ba bang, e leng masholu, le bakhopo, le bafebi, leha e le joalo ka mo-lekhetho enoa. Ke itima lijo habeli ka veke; ke ntša karolo ea leshome ea ntho tsohle tseo ke li ruang.” Ka ho fapaneng, ka boikokobetso ’mokelli oa lekhetho o ile a lumela melato ea hae ’me a ipaka a lokile ho feta Mofarisi ea ithorisang. Jesu o ile a bua papiso ena ho batho “ba itšepisang hore ba lokile, ’me ba nyelisa ba bang.”—Luka 18:9-14.

Joaloka batho ba sa phethahalang, ka linako tse ling re ka ’na ra ikutloa hore re molemonyana ho feta ba bang ka lebaka la bokhoni ba rōna ba tlhaho kapa menyetla e itseng. Empa Bakreste ba lokela hore kapele-pele ba leleke menahano e joalo. E ka ’na eaba u na le phihlelo ea lilemo tse ngata bophelong ba Bokreste. E ka ’na eaba u tichere e bohlale ea Bibele. Kapa mohlomong u ipolela hore u tlotselitsoe ho ea busa le Kreste leholimong. Ba bang ka phuthehong ba thabela litokelo tse khethehileng e le basebeletsi ba nako e tletseng, baholo kapa bahlanka ba sebeletsang. Ak’u ipotse, ‘Jehova o ne a tla ikutloa joang haeba ke ne nka sebelisa seo a mphileng sona e le motheo oa ho ikutloa ke phahametse ba bang?’ Ka sebele sena se ne se tla mo utloisa bohloko.—Ba-Filippi 2:3, 4.

Ha Mokreste a bontša boikutlo ba ho phahamela ba bang ka lebaka la bokhoni ba hae, litokelo kapa matla a ho laela tseo a li filoeng ke Molimo, ha e le hantle o utsoetsa Molimo khanya le tlhompho tse loketseng Eena feela. Ka ho hlakileng Bibele e eletsa Mokreste hore ‘a se ke a itekanya boholo bo tlōlisang moo a tšoanetseng.’ E-ea re phehella: “Khomarelanang hammoho ka pelo e le ’ngoe; le se ke la lakatsa tse phahameng, le mpe le ipapise le tse nyenyane. Le se ke la ipona bohlale.”—Ba-Roma 12:3, 16.

“Khaotsa ho Ahlola”

Ho ea ka encyclopedia e ’ngoe ea Bibele, motho ea itokafatsang o “italima a lokile boitšoarong kapa a lokile ho Molimo ka lebaka la ho khomarela ha hae litlhokahalong tse thata tsa molao a sa nahane letho ka moelelo oa tsona oa sebele.” Buka e ’ngoe e hlalosa ba itokafatsang e le “batho ba chesehelang bolumeli ka ho feteletseng ba qetang nako eohle ea bona ba batla bokhopo ho ba bang.”

Bafarisi ba ne ba le molato oa sena. Qetellong melao ea bona e entsoeng ke batho e ile ea bonahala e le bohlokoa ho feta melao le melao-motheo ea Molimo. (Mattheu 23:23; Luka 11:41-44) Ba ne ba ipehile hore e be baahloli ’me ba na le tloaelo ea ho nyatsa motho leha e le mang ea neng a sa finyelle litekanyetso tsa bona tsa ho itokafatsa. Boikutlo ba bona ba ho phahamela ba bang le boitlhompho bo feteletseng li ne li fehla tlhokahalo ea hore ba laole batho ba bang. Ho hlōleha ha bona ho laola Jesu ho ile ha ba halefisa, kahoo ba rera ho mo bolaea.—Johanne 11:47-53.

Ke ho sa thabiseng hakaakang ho ba moo ho nang le motho ea iphahamisang joaloka moahloli, kamehla a batla liphoso, a hlahlobisisa le ho laola e mong le e mong ea nang le eena. Ka sebele, ha ho le ea mong ka phuthehong ea nang le matla a ho imetsa ba bang ka maikutlo a hae le melao e iketselitsoeng ke eena. (Ba-Roma 14:10-13) Bakreste ba leka-lekaneng baa hlokomela hore litšobotsi tse ngata bophelong ba letsatsi le letsatsi li lokela ho etsetsoa qeto ke motho ka boeena. Haholo-holo ba nang le tšekamelo ea ho iketsa ba phethahetseng le ba batlang se fetang se lebeletsoeng ba tlameha ho qoba ho ahlola ba bang.

Ke ’nete hore phutheho ea Bokreste e lumelletsoe ho ba le melao e tataisang e tlatsetsang tšebetsong e bonolo ea mokhatlo o hlophisitsoeng oa Jehova oa lefatšeng. (Ba-Heberu 13:17) Empa ba bang ba sothile melao ena e tataisang kapa ba ekelitse ka melao ea bona. Sebakeng se seng liithuti tsohle Sekolong sa Tšebeletso sa Puso ea Molimo li ne li tlameha ho apara lisutu le ho qhoaela libaki tsa tsona ha li fana ka puo. Seithuti se neng se hlōleha ho etsa joalo se ne se amohuoa tokelo ea ho fana ka lipuo nakong e tlang. Ho e-na le ho etsa melao e thata-thata joalo, na e ne e ke ke ea e-ba ho utloahalang haholoanyane le ho tumellanong le moea oa Lentsoe la Molimo ho fana ka keletso e mosa, ea botho ha e hlokahala?—Jakobo 3:17.

Ho itokafatsa ho ka boetse ha hōlisa maikutlo a hore haeba Mokreste a thulana le mathata a mangata a botho, e tlameha e be o-oa fokola moeeng. Seo ke sona hantle seo Elifase, Bildade le Tsofare ba itokafatsang ba ileng ba se nahana ka Jobo ea tšepahalang. Ba ne ba sa tsebe boemo ba litaba ka ho feletseng, kahoo e ne e le boikhohomoso ho bona hore ba qose Jobo ka ho etsa phoso e itseng. Jehova o ile a ba khalemella kahlolo ea bona e sothehileng ka liteko tsa Jobo.—Bona Jobo, likhaolo tsa 4, 5, 8, 11, 18, 20.

Cheseho e Khelohileng

Hangata ho itokafatsa ho amana le cheseho. Moapostola Pauluse o ile a bua ka Bajode ba sekametseng bolumeling e le ba nang “le cheseho ho Molimo, empa e seng ka kelello. Hobane ka baka la ho se tsebe ho loka ha Molimo, le ka baka la ho hloma ho loka hoo e leng ha bona, ha ba ka ba ipea tlas’a ho loka ha Molimo.” (Ba-Roma 10:2, 3) E le Mofarisi, Pauluse ka boeena o ne a kile a cheseha ka ho feteletseng, le hoja cheseho ea hae e ne e khelohile, e sa thehoa ho lokeng ha Jehova.—Ba-Galata 1:13, 14; Ba-Filippi 3:6.

Ka ho loketseng Bibele e-ea eletsa: “U se ke ua iketsa ea lokileng ka ho fetisisa, u se ke ua ipea ea hlalefileng ka ho tlōlisa; hobane ke ha u no u tla itimeletsa’ng na?” (Moeklesia 7:16) Ka phuthehong Mokreste a ka ’na a qala a le hlokolosi, empa ho ba hlokolosi le cheseho ea hae li ka senyeha ’me tsa fetoha ho itokafatsa. Cheseho ea bolumeli e ka utloisa ba bang bohloko ha e tataisoa ke bohlale ba motho ho e-na le ho loka ha Jehova. Joang?

Ka mohlala, batsoali ba ka ’na ba tšoareha ka ho feteletseng ba hlokomela litlhoko tsa moea tsa ba bang, ’me ketsahalong eo ba ka ’na ba hlokomoloha litlhoko tsa malapa a bona. Kapa batsoali ba ka ’na ba cheseha ka ho feteletseng, ba batla ho hongata haholo ho bana ba bona ho feta seo ba ka khonang ho se etsa. (Ba-Efese 6:4; Ba-Kolosse 3:21) Bana ba bang, ha ba sitoa ho finyella litlhoko tse joalo tse sa nahaneleng maemo, ba arabela ka ho phela bophelo bo habeli. Motsoali ea nahanelang maemo o tla nahanela mefokolo ea lelapa la hae ’me a etse liphetoho tse loketseng.—Bapisa le Genese 33:12-14.

Cheseho e feteletseng e ka boetse ea re amoha masene, kutloelo-bohloko le mosa, tseo e leng tsa bohlokoa haholo litšebelisanong tsa rōna le ba bang. Motho a ka ’na a sebetsa ka thata haholo ho ntšetsa pele lithahasello tsa ’Muso. Leha ho le joalo, ho bontša ha hae cheseho e feteletseng ho ka ’na ha utloisa batho bohloko. Pauluse o itse: “Leha nka ba le neo ea boporofeta, kapa leha nka tseba liphiri tsohle le bohlale bohle, leha nka ba le tumelo eohle, ka ba ka falatsa le lithaba, ha ke se na lerato, ha ke letho. ’Me leha nka aba maruo a ka ’ohle, ka fana ka ’ona, kapa leha nka tela ’mele oa ka hore o chesoe, ha ke se na lerato, tseo ha li nthuse letho.”—1 Ba-Korinthe 13:2, 3.

Molimo o Amohela ba Ikokobelitseng

Joaloka Bakreste ho hlokahala re khetholle kotsi ea ho itokafatsa pele e hlasela. Re tlameha ho qoba boikutlo ba bophahamo, tloaelo ea ho ahlola ba bang le cheseho e se nang mabaka e thehiloeng bohlaleng ba motho.

Ha re ntse re ‘hlokomela’ boikutlo ba Bofarisi, ho e-na le ho ahlola ba bang e le ba itokafatsang, ho ka ba molemo ho lebisa tlhokomelo litloaelong le litšekamelong tsa rōna. Ke ’nete hore Jesu o ile a ahlola Bafarisi ’me a ba nyatsa ka hore ke “malinyane a marabe” a loketseng timetso ea ka ho sa feleng. Empa Jesu o ne a khona ho hlahloba lipelo tsa batho. Re ke ke ra ho etsa.—Mattheu 23:33.

Ha re batleng ho loka ha Molimo e seng ha rōna. (Mattheu 6:33) Ke feela ha re etsa joalo re ka amoheloang ke Jehova, hobane Bibele e-ea re eletsa kaofela ha rōna: “Le ntse le ipea e mong ka tlase ho e mong; hobane Molimo o hanela ba ikhohomosang, empa o hauhela ba ikokobetsang.”—1 Petrose 5:5.