Sephiri Seo Bakreste ba sa Lokelang ho se Boloka!
“Ke buile le lefatše phatlalatsa. . . . Ha kea ka ka bua letho sephiring.”—JOHANNE 18:20.
1, 2. Moelelo oa lentsoe la Segerike my·steʹri·on ke ofe joalokaha le sebelisitsoe ka Mangolong?
LENTSOE la Segerike my·steʹri·on, le fetoletsoe ka makhetlo a 25 e le “sephiri se halalelang” le ka makhetlo a 3 e le “sephiri” ho New World Translation of the Holy Scriptures. E tlameha ebe sephiri seo ho thoeng sea halalela ke sa bohlokoa ka sebele! Mang kapa mang ea nang le tokelo ea ho fumana tsebo ea sephiri se joalo o lokela ho ikutloa a fuoe tlotla e khōlō kaha ho lekantsoe hore o lokela ho kopanela sephiri le Molimo ea Phahameng ka ho Fetisisa oa bokahohle.
2 Expository Dictionary of Old and New Testament Words ea Vine e tiisa hore maemong a mangata “sephiri se halalelang” ke phetolelo e nepahetseng haholoanyane ho feta “sephiri.” E re ka my·steʹri·on: “Ka har’a [Mangolo a Segerike a Bakreste] e bolela, eseng ntho e phahametseng kutloisiso (joaloka lentsoeng [la Senyesemane]), empa ntho e ka nģ’ane ho matla a motho a tlhaho a kutloisiso, e ka tsebahatsoa feela ka tšenolo ea Bomolimo, ’me e tsebahatsoa ka mokhoa le ka nako e khethiloeng ke Molimo, le ho ba khantšelitsoeng leseli ke Moea oa Hae feela. Ka kutloisiso e tloaelehileng sephiri se bolela tsebo e patiloeng; ka Mangolong se bolela ’nete e senotsoeng. Kahoo mantsoe ao ka ho khetheha a amanang le taba ena ke ‘tsebahalitsoe,’ ‘bonahalitsoe,’ ‘senotsoe,’ ‘boletsoe,’ ‘utloisisa,’ ‘kabo.’”
3. Phutheho ea Bokreste ea lekholong la pele la lilemo e ne e fapane joang le lihlopha tse itseng tsa bolumeli tse inehetseng litšebeletsong tsa sephiri?
3 Tlhaloso ena e totobatsa phapang e ka sehloohong pakeng tsa lihlopha tsa bolumeli tse inehetseng litšebeletsong tsa sephiri tse neng li atile lekholong la pele la lilemo le phutheho ea Bokreste e neng e sa tsoa thehoa. Le hoja bao e neng e sa tsoa ba litho tsa lihlotšoana tsa borapeli tsa sephiri hangata ba ne ba tlangoa ke kano ea ho khutsa bakeng sa ho sireletsa lithuto tsa bolumeli, Bakreste le ka mohla ha baa ka ba behoa tlas’a thibelo e joalo. Ke ’nete hore moapostola Pauluse o ile a bua ka “bohlale ba Molimo sephiring se halalelang,” a bo bitsa “bohlale bo patiloeng,” ke hore, bo patetsoeng “babusi ba tsamaiso ena ea lintho.” Ha boa pateloa Bakreste ba neng ba bo senoletsoe ka moea oa Molimo e le hore ba ka bo phatlalatsa.—1 Bakorinthe 2:7-12; bapisa le Liproverbia 1:20.
“Sephiri se Halalelang” Sea Tsebahatsoa
4. “Sephiri se halalelang” se likoloha ho mang, hona joang?
4 “Sephiri se halalelang” sa Jehova se likoloha ho Jesu Kreste. Pauluse o ngotse: “[Jehova] o ile a re tsebisa sephiri se halalelang sa thato ea hae. Ke ho ea ka ho khahloa ha hae hoo a ileng a ho rera ka ho eena bakeng sa tsamaiso tekanyong e feletseng ea linako tse behiloeng, e leng, ho bokella lintho tsohle hammoho hape ho Kreste, lintho tse maholimong le lintho tse lefatšeng. E, ho eena.” (Baefese 1:9, 10) Pauluse o ne a bile a toba taba haholoanyane mabapi le sebōpeho sa “sephiri se halalelang” ha a ne a supa tlhokahalong ea “tsebo e nepahetseng ea sephiri se halalelang sa Molimo, e leng, Kreste.”—Bakolose 2:2.
5. Ho ameha eng tabeng ea “sephiri se halalelang”?
5 Leha ho le joalo, ho ameha ho eketsehileng hobane “sephiri se halalelang” ke sephiri se nang le litšobotsi tse ngata. Hase feela ho tsebahatsa Jesu e le Peō e tšepisitsoeng kapa Mesia; se akarelletsa karolo eo a abetsoeng hore a e phethe morerong oa Molimo. Se akarelletsa ’muso oa leholimo, ’Muso oa Molimo oa Bomesia, joalokaha Jesu a ile a hlalosa ka ho hlaka ha a ne a bolella barutuoa ba hae: “Lōna le nehiloe ho utloisisa liphiri tse halalelang tsa ’muso oa maholimo, empa batho bao ha baa ho nehoa.”—Matheu 13:11.
6. (a) Ke hobane’ng ha ho nepahetse ho bolela hore ‘ho ile ha luloa ho khutsitsoe ka sephiri se halalelang ka linako tse tšoarellang halelele’? (b) Se ile sa senoloa joang mohato ka mohato?
6 Ho ne ho tšoanetse ho feta nako e telele lipakeng tsa ha ho buuoa ka lekhetlo la pele ka morero oa Molimo oa ho fana ka motheo bakeng sa ’Muso oa Bomesia leha ho ‘fihlisoa sephiri se halalelang qetellong.’ (Tšenolo 10:7; Genese 3:15) Ho fihlisoa qetellong ha sona ho ne ho tla etsahala nakong ea ho hlongoa ha ’Muso, joalokaha ho bapisa Tšenolo 10:7 le 11:15 ho tiisa. Ha e le hantle, lilemo tse ka bang 4000 li ile tsa feta ho tloha ha ho fanoa ka tšepiso ea ’Muso ka lekhetlo la pele Edene ho fihlela ha Morena ea Khethiloeng a hlaha ka 29 C.E. Lilemo tse ling tse 1885 li ile tsa feta pele ’Muso o hlongoa maholimong ka 1914. Kahoo “sephiri se halalelang” se ile sa senoloa mohato ka mohato ho pholletsa le nako ea lilemo tse ka bang 6000. (Bona leqephe la 16.) Ka sebele Pauluse o ne a nepile ha a bua ka “sephiri se halalelang seo ho lutsoeng ho khutsitsoe ka sona ka linako tse tšoarellang halelele empa joale se bonahalitsoe ’me se tsebahalitsoe.”—Baroma 16:25-27; Baefese 3:4-11.
7. Ke hobane’ng ha re ka tšepa ka ho feletseng sehlopha sa lekhoba le tšepahalang le le masene?
7 Ho fapana le batho, ba phelang nako e khutšoanyane, le ka mohla Jehova ha a ikutloe a hateletsoe ke nako hore a senole liphiri tsa hae pele ho nako e loketseng. ’Nete ena e lokela ho re thibela ho ba ba hlokang mamello ha lipotso tsa Bibele tse itseng li ke ke tsa hlalosoa ka tsela e re khotsofatsang hona joale. Boinyenyefatso ka lehlakoreng la sehlopha sa lekhoba le tšepahalang le le masene, le rometsoeng ho fa lelapa la Bakreste lijo ka nako e loketseng, bo se thibela hore ka ho itšepa ho tlōla se fetele ka pele ’me ka ho se laolehe se etse liqeto ka lintho tse ntseng li sa hlaka. Sehlopha sa lekhoba se leka ka matla ho qoba ho tsitlella maikutlong a itseng. Ha se ikhohomose hoo se ka hanang ho lumela hore hona joale ha se khone ho araba potso e ’ngoe le e ’ngoe, kaha se hopola Liproverbia 4:18 ka ho hlaka. Empa ho thabisa hakaakang ho tseba hore Jehova, ka nako ea hae e loketseng le ka tsela ea hae, o tla tsoela pele ho senola liphiri tsa hae mabapi le merero ea hae! Le ka mohla ha rea lokela ho ba ba hlokang mamello mabapi le tokisetso ea Jehova, ka ho hloka masene ra etella Ea Senolang liphiri pele. Ho kholisa hakaakang ho tseba hore mocha oo Jehova a o sebelisang kajeno ha o etse joalo! Oa tšepahala ebile o masene.—Matheu 24:45; 1 Bakorinthe 4:6.
Sephiri se Senotsoeng se Tlameha ho Boleloa!
8. Re tseba joang hore “sephiri se halalelang” se lokela ho tsebahatsoa?
8 Jehova ha aa senolela Bakreste “sephiri se halalelang” sa hae hore ba se boloke se patiloe. Se lokela ho tsebahatsoa, tumellanong le molao-motheo oo Jesu a ileng a o tlaleha molemong oa balateli bohle ba hae—eseng molemong oa baruti ba seng bakae feela: “Le leseli la lefatše. Motse o ke ke oa pateha ha o lutse holim’a thaba. Batho ba bonesa lebone ’me ba le beha, eseng ka tlas’a baskete ea ho lekanya, empa holim’a seluloana sa lebone, ’me le khanyetsa bohle ba ka tlung. Ka ho tšoanang leseli la lōna a le khanye ka pel’a batho, e le hore ba ka bona mesebetsi ea lōna e metle ’me ba tlotlisa Ntate oa lōna ea leng maholimong.”—Matheu 5:14-16; 28:19, 20.
9. Ke’ng se tiisang hore Jesu e ne e se mofetoheli oa ’muso, joalokaha ba bang ba bolela?
9 Jesu e ne e se mofetoheli oa ’muso ea neng a rerile ho etsa mokhatlo o hlophisitsoeng oa sekhukhu oa balateli ba phehellang merero ea sephiri. Bukeng ea Early Christianity and Society, Robert M. Grant o ile a ngola mabapi le lintlha tse sireletsang Bakreste ba pele tseo mosireletsi oa tumelo oa lekholong la bobeli la lilemo Justin Martyr a ileng a li ngola: “Haeba Bakreste e ne e le ba fetohelang ’muso ba ne ba tla lula ba ipatile e le hore ba ka finyella pakane ea bona.” Empa Bakreste ba ne ba ka “lula ba ipatile” joang ’me ka nako e tšoanang ba ba joaloka ‘motse o lutseng holim’a thaba’? Ba ne ba tlameha hore ba se ke ba pata leseli la bona ka tlas’a baskete ea ho lekanya! Ka lebaka leo, ’muso o ne o sa lokela ho tšosoa ke mosebetsi oa bona. Mongoli enoa o ile a tsoela pele ho ba hlalosa e le “metsoalle ea hlooho ea khomo ea moemphera tabeng ea khotso le taolo e molemo.”
10. Ke hobane’ng ha Bakreste ba sa lokela ho boloka seo ba leng sona e le sephiri?
10 Jesu o ne a sa batle hore barutuoa ba hae ba boloke seo ba leng sona e le sephiri joaloka litho tsa seo ho thoeng ke sehlopha sa bokhelohi. (Liketso 24:14; 28:22) Ho hlōleha ho etsa hore leseli la rōna le khanye kajeno ho ne ho tla khopisa Kreste le Ntate oa hae, Ea Senolang liphiri, ’me ho ne ho ke ke ha re thabisa.
11, 12. (a) Ke hobane’ng ha Jehova a lakatsa hore Bokreste bo tsebahatsoe? (b) Jesu o ile a beha mohlala o loketseng joang?
11 Jehova “ha a lakatse hore leha e le mang a timetsoe empa o lakatsa hore bohle ba fihle pakong.” (2 Petrose 3:9; Ezekiele 18:23; 33:11; Liketso 17:30) Motheo oa tšoarelo ea libe tsa batho ba bakileng ke tumelo sehlabelong sa thekollo sa Jesu Kreste, ea ithaopetseng ho ba thekollo bakeng sa bohle—eseng bakeng sa ba seng bakae feela—e le hore “e mong le e mong ea sebelisang tumelo ho eena a se ke a timetsoa empa a be le bophelo bo sa feleng.” (Johanne 3:16) Ke habohlokoa hore batho ba thusoe ho nka mehato e hlokahalang e tla etsa hore ba tšoanelehele ho behoa boemong ba linku, eseng lipōli, kahlolong e tlang.—Matheu 25:31-46.
12 Bokreste ba ’nete ha boa lokela ho patoa; bo lokela ho tsebahatsoa ka tsela e ’ngoe le e ’ngoe e loketseng e ka khonehang. Jesu ka boeena o ile a beha mohlala o loketseng. Ha a ne a botsoa ke moprista ea ka sehloohong mabapi le barutuoa ba hae le thuto ea hae, o ile a re: “Ke buile le lefatše phatlalatsa. Ka mehla ke ile ka ruta ka synagogeng le ka tempeleng, moo Bajuda kaofela ba phuthehang; ’me ha kea ka ka bua letho sephiring.” (Johanne 18:19, 20) Ha ho talingoa mohlala ona, ke motho ofe ea tšabang Molimo ea neng a ka nahana hore seo Molimo a boletseng hore se phatlalatsoe a se boloke e le sephiri? Ke mang ea neng a ka nahana ho pata “senotlolo sa tsebo” e isang bophelong bo sa feleng? Ho etsa joalo, ho ne ho tla etsa hore a be joaloka baikaketsi ba bolumeli ba lekholong la pele la lilemo.—Luka 11:52; Johanne 17:3.
13. Ke hobane’ng ha re lokela ho bolela ha monyetla o mong le o mong o hlaha?
13 E se eka ho ke ke ha e-ba le ea khonang ho bolela hore rōna joaloka Lipaki tsa Jehova re bolokile molaetsa oa ’Muso oa Molimo e le sephiri! Ebang molaetsa ona oa amoheloa kapa oa hanoa, batho ba tlameha ho tseba hore o boletsoe. (Bapisa le Ezekiele 2:5; 33:33.) Ka lebaka leo, a re sebeliseng hamolemo monyetla o mong le o mong ho bolella bohle molaetsa oa ’nete, hohle moo re ka kopanang le bona.
Ho Kenya Mautlana Mehlahareng ea Satane
14. Ke hobane’ng ha re sa lokela ho ba lesisitheho ka ho se pate letho borapeling ba rōna?
14 Libakeng tse ngata mecha ea litaba e ntse e lebisa tlhokomelo e eketsehileng ho Lipaki tsa Jehova. Ho tšoana le se ileng sa etsahalla Bakreste ba pele, hangata li senngoa lebitso ’me li behoa sehlopheng se le seng le lihlotšoana tsa borapeli tse belaetsang le mekhatlo ea sephiri. (Liketso 28:22) Na ho ka etsahala hore ho se pate letho ha rōna boboleling ho etse hore re hlaseloe haholoanyane? Ka sebele e ne e tla ba ho hloka bohlale, ’me e ne e sa tl’o ba ho etsa lintho tumellanong le keletso ea Jesu haeba re ikakhela ka har’a khang ho sa hlokahale. (Liproverbia 26:17; Matheu 10:16) Leha ho le joalo, mosebetsi o molemo oa boboleli ba ’Muso le ho thusa batho ho ntlafatsa bophelo ba bona ha oa lokela ho patoa. O tlotlisa Jehova, oa mo phahamisa, o lebisa tlhokomelo ho eena le ’Musong oa hae o hlonngoeng. Karabelo e khotsofatsang e bileng teng haufinyane ’neteng ea Bibele Europe Bochabela le likarolong tsa Afrika ho ea bohōleng bo itseng e bile teng ka lebaka la hore hona joale ’nete e ka boleloa ntle le ho pata letho libakeng tseo.
15, 16. (a) Ho se pate letho ha rōna le ho atleha moeeng ho sebeletsa merero efe, empa na lee ke lebaka la ho ameha? (b) Ke hobane’ng ha Jehova a kenya mautlana mehlahareng ea Satane?
15 Ke ’nete hore ho bolela ha Lipaki tsa Jehova li sa pate letho, paradeise ea moea eo li e thabelang le katleho ea tsona—mesebetsing e etsoang ke batho le thepeng ea lintho tse bonahalang—ha lia pateha. Le hoja li hula ba lipelo li tšepahalang, lintlha tsena li ka ’na tsa leleka bahanyetsi. (2 Bakorinthe 2:14-17) Ha e le hantle, qetellong sena se ka sebeletsa ho hohela makhotla a Satane hore a hlasele batho ba Molimo.
16 Na see e lokela ho ba sesosa sa ho ameha? Eseng ho latela boprofeta ba Jehova bo fumanoang ho Ezekiele khaolo ea 38. E bolela esale pele hore Gogo oa Magogo, e leng ho bolelang Satane Diabolose esale a theoleloa boemong bo tlaase lefatšeng ka mor’a ho thehoa ha ’Muso ka 1914, e tla ba moeta-pele oa tlhaselo ea batho ba Molimo. (Tšenolo 12:7-9) Jehova o bolella Gogo: “U re: Ke tla futuhela lefatše leno le ahlameng, ke nehelle bathong bano ba phelang ka khotso, ba ahileng ba iketlile, ba lutseng ho se marako, ho se mekoallo le mamati. Ke tla ea ho hapa khapo, ho tlatlapa thepa, ho loantša lithako tse tsositsoeng, sechaba se phuthiloeng lichabeng, se ruileng mehlape le mesebetsi, se ahileng nģalong tse phahameng tsa naha.” (Ezekiele 38:11, 12) Leha ho le joalo, temana ea 4 e bontša hore ha ho hlokahale hore batho ba Molimo ba tšosoe ke tlhaselo ena hobane e susumetsoa ke Jehova. Empa ke hobane’ng ha Molimo a ne a ka lumella—e, esita le ho hlohlelletsa—tlhaselo ea khohola-koqo ea batho ba hae? Temaneng ea 23 re bala karabo ea Jehova: “Ke tla itlotlisa, ke be ke ikhalaletse, ke itsebahatse mahlong a lichaba tse ngata; ’me ba tla tseba hoba ke ’na Jehova.”
17. Re lokela ho talima tlhaselo ea Gogo e haufi joang?
17 Kahoo, ho e-na le ho phela ka tšabo ea tlhaselo ea Gogo, batho ba Jehova ba lebeletse ka thabo phethahatso ena e tsoelang pele ea boprofeta ba Bibele. Ho thabisa hakaakang ho tseba hore ka ho atlehisa le ho hlohonolofatsa mokhatlo oa hae o hlophisitsoeng o bonahalang, Jehova o kenya mautlana mehlahareng ea Satane ’me o mo hula le lebotho la hae la ntoa o ba isa tlhōlong ea bona!—Ezekiele 38:4.
Hona Joale ho Feta Leha e le Neng!
18. (a) Hona joale batho ba bangata ba ntse ba hlokomela eng, hona hobane’ng? (b) Karabelo boboleling ba ’Muso e sebeletsa e le khothatso e matla joang?
18 Mehleng ea kajeno Lipaki tsa Jehova e ’nile ea e-ba tse sa pateng letho ha li hlalosa pono ea tsona e thehiloeng Bibeleng, le hoja sena e ’nile ea e-ba se sa rateheng. Ka lilemo tse mashome li ’nile tsa lemosa ka likotsi tsa ho tsuba le tšebeliso e mpe ea lithethefatsi, bothoto ba ho lumella ntho e ’ngoe le e ’ngoe khōlisong ea ngoana, liphello tse mpe tsa boithabiso bo tletseng likamano tsa botona le botšehali tse sa lokelang hammoho le pefo, le likotsi tsa tšelo ea mali. Li bile li bontšitse le ho ikhanyetsa ha khopolo ea ho iphetola ha lintho. Hona joale batho ba eketsehileng ba re, “Lipaki tsa Jehova ehlile ha lia fosa.” Hoja ebe re pata lintho tse itseng ha re phatlalatsa pono ea rōna, ba ne ba ke ke ba arabela ka tsela ena. ’Me u se ke ua hlokomoloha ’nete ea hore ka ho bua polelo e joalo, ba nka bohato bo lebisang polelong e reng, “Satane, u leshano; ha e le hantle Jehova o nepile.” Ke khothatso e matla hakaakang ho rōna hore re tsoele pele ho latela mohlala oa Jesu, ka ho bolela lentsoe la ’nete phatlalatsa!—Liproverbia 27:11.
19, 20. (a) Batho ba Jehova ba ile ba bontša boikemisetso bofe ka 1922, ’me na mantsoe aa a ntse a sebetsa? (b) Re lokela ho talima “sephiri se halalelang” sa Jehova joang?
19 Ke khale batho ba Jehova ba utloisisitse boikarabelo ba bona tabeng ena. Kopanong e hlaheletseng ea 1922, J. F. Rutherford, eo ka nako eo e neng e le mopresidente oa Mokhatlo oa Watch Tower, o ile a thabisa bamameli ba hae ka ho re: “Hlaphoheloang, falimehang, le be mafolofolo, le be sebete. Le be lipaki tsa Morena tse tšepahalang le tsa ’nete. Tsoelang pele ntoeng ho fihlela moneketsela o mong le o mong oa Babylona e e-ba lesupi. Phatlalatsang molaetsa hōle le haufi. Lefatše le tlameha ho tseba hore Jehova ke Molimo le hore Jesu Kreste ke Morena oa marena le Khosi ea likhosi. Lena ke letsatsi har’a matsatsi ’ohle. Bonang, Morena oa busa! Le babuelli ba hae ba phatlalatsa. Ka lebaka leo phatlalatsang, phatlalatsang, phatlalatsang, Morena le ’muso oa hae.”
20 Joalokaha mantsoe ana e ne e le a bohlokoa ka 1922, ke a bohlokoa haholoanyane hakaakang lilemong tse 75 hamorao, ha ho senoloa ha Kreste e le Moahloli le Mophetetsi ho le haufi haholoanyane! Molaetsa oa ’Muso oa Jehova o hlonngoeng le oa paradeise ea moea e thabeloang ke batho ba Molimo ke “sephiri se halalelang” seo ha e le hantle se phahameng haholo hoo ho leng thata ho se boloka. Joalokaha Jesu ka boeena a boletse ka ho hlaka, balateli ba hae ba tlameha hore, ka thuso ea moea o halalelang, e be lipaki “ho isa karolong e hōle-hōle ea lefatše” mabapi le sebaka sa hae se ka sehloohong morerong oa Jehova oa ka ho sa feleng. (Liketso 1:8; Baefese 3:8-12) Ha e le hantle, joaloka bahlanka ba Jehova, Molimo ea senolang liphiri, re tlameha hore re se ke ra ipolokela sephiri sena!
U ne U Tla Araba Joang?
◻ “Sephiri se halalelang” ke eng?
◻ Re tseba joang hore se lokela ho phatlalatsoa?
◻ Ke’ng se tlisetsang batho ba Jehova tlhaselo ea Gogo, hona re lokela ho talima see joang?
◻ E mong le e mong oa rōna o lokela ho ikemisetsa ho etsa eng?
[Lebokose le leqepheng la 16]
“SEPHIRI SE HALALELANG” SE SENOLOA MOHATO KA MOHATO
◻ Ka Mor’a 4026 B.C.E.: Molimo o etsa tšepiso ea ho hlahisa Peō e tla timetsa Satane.—Genese 3:15
◻ 1943 B.C.E.: Selekane sa Abrahama sea tiisoa, e leng se tšepisang hore Peō e tla tla ka Abrahama.—Genese 12:1-7
◻ 1918 B.C.E.: Tsoalo ea Isaka e le mojalefa oa selekane.—Genese 17:19; 21:1-5
◻ Hoo e ka bang ka 1761 B.C.E.: Jehova o tiisa hore Peō e tla tla ka mora oa Isaka Jakobo.—Genese 28:10-15
◻ 1711 B.C.E.: Jakobo o bontša hore Peō e tla tla ka mora oa hae Juda.—Genese 49:10
◻ 1070-1038 B.C.E.: Morena Davida o hlokomela hore Peō e tla ba setloholo sa hae ’me e tla busa ka ho sa feleng e le Morena.—2 Samuele 7:13-16; Pesaleme ea 89:35, 36
◻ 29-33 C.E.: Jesu o tsebahatsoa e le Peō, Mesia, moahloli oa nakong e tlang le Morena ea Khethiloeng.—Johanne 1:17; 4:25, 26; Liketso 10:42, 43; 2 Bakorinthe 1:20; 1 Timothea 3:16
◻ Jesu o senola hore o tla ba le babusi-’moho le baahloli-’moho le eena, hore ’Muso oa leholimo o tla ba le bafo ba lefatšeng, le hore balateli ba hae kaofela e lokela ho ba baboleli ba ’Muso.—Matheu 5:3-5; 6:10; 28:19, 20; Luka 10:1-9; 12:32; 22:29, 30; Johanne 10:16; 14:2, 3
◻ Jesu o senola hore ’Muso o tla hlongoa ka nako e tobileng, joalokaha liketsahalo tsa lefatše li tiisa.—Matheu 24:3-22; Luka 21:24
◻ 36 C.E.: Petrose o hlokomela hore bao e seng Bajuda le bona e tla ba majalefa a ’Muso hammoho le bona.—Liketso 10:30-48
◻ 55 C.E.: Pauluse o hlalosa hore majalefa a ’Muso hammoho le bona a tla tsosetsoa ho se shoeng le ho se boleng nakong ea ho ba teng ha Kreste.—1 Bakorinthe 15:51-54
◻ 96 C.E.: Jesu, ea seng a ntse a busa balateli ba hae ba tlotsitsoeng, o senola hore palo ea bona e feletseng e tla ba 144 000.—Baefese 5:32; Bakolose 1:13-20; Tšenolo 1:1; 14:1-3
◻ 1879 C.E.: Zion’s Watch Tower e supa 1914 e le selemo se bolelang ho hongata mabapi le ho phethahala ha “sephiri se halalelang” sa Molimo
◻ 1925 C.E.: Molula-Qhooa (oa Senyesemane) o hlalosa hore ’Muso o tsoetsoe ka 1914; “sephiri se halalelang” mabapi le ’Muso se tlameha ho phatlalatsoa.—Tšenolo 12:1-5, 10, 17
[Setšoantšo se leqepheng la 15]
Joaloka Moeta-pele oa tsona, Jesu, Lipaki tsa Jehova li bolela ’Muso oa Jehova phatlalatsa