Ho Nka Litokelo Tsa Tšebeletso e Halalelang e le Tsa Bohlokoa
LIKABELO tsa tšebeletso e halalelang ha lia lokela ho nkoa habobebe. Ha baprista ba Juda ea boholo-holo ba ne ba bontša boikutlo ba ho se tsotelle litokelo tsa bona mabapi le tempele ea Jehova, o ile a ba khalemela ka matla. (Malakia 1:6-14) ’Me ha ba bang Iseraeleng ba phehella Banazari hore ba nke habobebe boikarabelo ba bona boo ba neng ba bo amohetse mabapi le tšebeletso ea bona e halalelang, Jehova o ile a khalemela Baiseraele bao ba baetsalibe ka matla. (Amose 2:11-16) Bakreste ba ’nete ba boetse ba kopanela tšebeletsong e halalelang, ’me ba e nka e le ea bohlokoa. (Baroma 12:1) Tšebeletso ena e halalelang e na le litšobotsi tse ngata tseo kaofela e leng tsa bohlokoa.
Ha Jesu a sa le lefatšeng le balateli ba hae, o ile a ba koetlisa hore ebe baboleli ba ’Muso oa Molimo. Ha nako e ntse e feta, molaetsa oa bona o ne o tla finyella lipheletsong tsa lefatše. (Matheu 28:19, 20; Liketso 1:8) Boboleli bona ke ba bohlokoa le ho feta mehleng ena ea ho qetela ea tsamaiso ea lintho.
Lipaki tsohle tsa Jehova li kopanela mosebetsing ona. Ba likete tse makholo ba fumana thabo ka ho etsa joalo e le bo-pula-maliboho. E le hore ba finyelle litlhoko tsa bohlokoa mosebetsing ona oa lefatše lohle, ba likete ba ikentse ba fumanehang bakeng sa tšebeletso e khethehileng ea nako e tletseng Bethele, mosebetsing oa ho tsamaea e le balebeli ba potoloho kapa ba setereke, kapa tšebeletsong ea boromuoa. See se ka ama eng ka lehlakoreng la bao ba batlang ho tsoela pele tšebeletsong e joalo e khethehileng?
Ha ho E-na le Litlhoko Tse Tlamang Tsa Lelapa
Pele motho a kenela tšebeletso e khethehileng ea nako e tletseng, hangata o lokela ho etsa liphetoho tse itseng maemong a hae. Hase bohle ba ka etsang sena. Tlamo ea Mangolo eo motho a seng a ntse a e-na le eona e ka ’na ea mo sitisa. Leha ho le joalo, ho etsahala’ng ha boemo bo potlakileng ba litlhoko tsa lelapa, mohlomong bo amang batsoali ba hōlileng, bo lebana le ba seng ba ntse ba le tšebeletsong e khethehileng? Melao-motheo ea Bibele le keletso tse kang tse latelang li fana ka tataiso e hlokahalang.
Bophelo bohle ba rōna bo lokela ho likoloha kamanong ea rōna le Jehova. (Moeklesia 12:13; Mareka 12:28-30) Lintho tse halalelang tse behiloeng tlhokomelong ea rōna li lokela ho nkoa e le tsa bohlokoa. (Luka 1:74, 75; Baheberu 12:16) Ketsahalong e ’ngoe, monna e mong ea neng a batla ho fetola lintho tseo a neng a li nka e le tsa bohlokoa o ile a bolelloa ke Jesu hore o lokela ho tšoareha ka ho feletseng ho boleleng ka ’Muso oa Molimo. Ka ho hlakileng, monna eo o ne a ikemiselitse ho chechisetsa mosebetsi oo morao ho fihlela ka mor’a lefu la ntate oa hae. (Luka 9:59, 60) Ka lehlakoreng le leng, Jesu o ile a pepesa ho fosahala ha monahano oa motho leha e le mang ea neng a bolela hore ntho e ’ngoe le e ’ngoe o e nehetse ho Molimo, ebe ha a sa “etsetsa ntate oa hae kapa ’mè oa hae ntho le e ’ngoe.” (Mareka 7:9-13) Moapostola Pauluse o ile a boela a bontša boikarabelo bo tebileng ba ho lokisetsa lintho tse hlokahalang bakeng sa ‘bao e leng ba motho,’ ho kopanyelletsa le batsoali le batsoali ba batsoali.—1 Timothea 5:3-8.
Na see se bolela hore haeba ho hlaha litlhoko tse potlakileng, ba tšebeletsong e khethehileng ba lokela ho tlohela likabelo tsa bona e le hore ba fane ka tlhokomelo? Karabo e itšetlehile ka mabaka a mangata. Qeto ke ea botho. (Bagalata 6:5) Ba bangata ba ’nile ba ikutloa hore le hoja ba rata kabelo ea bona, ho ka ba bohlale ho lula le batsoali ba bona bakeng sa ho ba fa thuso e hlokahalang. Hobane’ng? E ka ’na eaba tlhokahalo e bile matla haholo, mohlomong ho se setho sa lelapa se ka thusang, kapa phutheho e haufi e sa ka ea khona ho etsa se neng se hlokahala. Ba bang ba ’nile ba khona ho bula maliboho ba ntse ba fana ka thuso e joalo. Ba bang ba ’nile ba boela ba khona ho khutlela tšebeletsong e khethehileng ea nako e tletseng ka mor’a ho hlokomela boemo ba lelapa. Leha ho le joalo, mabakeng a mangata ho ile ha khoneha ho sebetsana le boemo ka litsela tse ling.
Ho Jara Boikarabelo ba Bona
Ha ho hlahile litlhoko tse tlamang, ba bang ba tšebeletsong e khethehileng ea nako e tletseng ba ’nile ba khona ho hlokomela litlhoko tseo ka ntle le hore ba tlohele likabelo tsa bona. Nahana ka mehlala e seng mekae har’a e mengata e teng.
Banyalani ba bang ba sebeletsang ntlo-khōlō ea lefatše ea Lipaki tsa Jehova ba ile ba kenela tšebeletso ea Bethele ka 1978, ka mor’a ho kopanela mosebetsing oa potoloho le oa setereke. Kabelo ea mor’abo rōna e ama boikarabelo bo boima mokhatlong o hlophisitsoeng oa puso ea Molimo. Empa batsoali ba hae le bona ba ne ba hloka thuso. Banyalani bana ba Bethele ba ’nile ba eta ka makhetlo a mararo kapa a mane ka selemo—lik’hilomithara tse ka bang 3500 ho ea le ho khutla—bakeng sa ho hlokomela batsoali ba bona. Ba hahile ntlo bakeng sa ho finyella litlhoko tsa batsoali ba bona. Ba ’nile ba nka maeto bakeng sa ho hlokomela maemo a tšohanyetso a bongaka. Ba sebelisitse hoo e ka bang nako eohle ea bona ea phomolo bakeng sa ho hlokomela boikarabelo bona ka lilemo tse 20. Ba rata batsoali ba bona le ho ba hlompha, empa ba boetse ba nka tokelo ea tšebeletso e halalelang ea bona e le ea bohlokoa.
Mora e mong oabo rōna o ne a bile mosebetsing o mo tsamaisang ka lilemo tse 36 ha a thulana le seo a se hlalosang e le boemo bo tsietsang ka ho fetisisa bophelong ba hae. ’Mè oa mosali oa hae ea lilemo li 85, eo e leng mohlanka ea tšepahalang oa Jehova, o ne a hloka ho lula le motho ea ka mo thusang. Nakong eo, boholo ba bana ba hae ba ne ba ikutloa hore ho ke ke ha khoneha hore ba lule le eena. E mong oa beng ka bona o ile a bolella molebeli eo ea tsamaeang hore eena le mosali oa hae ba lokela ho tlohela tšebeletso ena ’me ba hlokomele ’mè oa bona molemong oa lelapa. Empa banyalani bana ha baa ka ba tlohela tšebeletso ea bona ea bohlokoa, leha e le hore ba ile ba hlokomoloha litlhoko tsa ’mè oa bona. Ka lilemo tse latelang tse robong, boholo ba nako ’mè oa bona o ne a e-na le bona. Pele ba ne ba lula k’haraveneng, joale ba lula lifoleteng tse fapaneng tse neng li lokiselitsoe ke lipotoloho. Ka makhetlo a mangata, mor’abo rōna eo e neng e le molebeli oa setereke, o ne a lula a tsamaea bakeng sa ho hlokomela likabelo tsa hae ha mosali oa hae a setse le ’mè oa hae bakeng sa ho fana ka tlhokomelo e lerato ea kamehla. Beke e ’ngoe le e ’ngoe ka mor’a liboka ka Sontaha, monna o ne a nka leeto le le lelele ho khutlela ho bona ho ea ba thusa. Ba bangata ba neng ba hlokomela boemo boo ba ile ba bontša kananelo e tebileng ka seo banyalani bana ba neng ba se etsa. Ka mor’a nako, litho tse ling tsa lelapa le tsona li ile tsa susumelletseha hore li fane ka thuso. Batho ba likete ba Jehova ba ntse ba tsoela pele ho rua molemo tšebetsong ea banyalani bao ba itetseng hobane ba ile ba tšoarella tokelong ea bona ea tšebeletso e khethehileng ea nako e tletseng.
Ka Tšebelisano-’moho ea Lelapa
Haeba litho tse sa tšoaneng tsa lelapa li ananela bohlokoa ba tšebeletso e khethehileng ea nako e tletseng, li ka ’na tsa sebelisana-’moho e le hore bonyane tse ling tsa tsona li kopanele ho eona.
Moea o joalo oa tšebelisano ea lelapa o ’nile oa thusa banyalani ba bang ba Canada ba sebeletsang e le baromuoa Afrika Bophirimela. Ha baa ka ba emela hore bothata bo hlahe, mohlomong ba tšepile hore ha ho letho le tla hlaha. Pele ba e-ea Sekolong sa Bibele sa Gileade sa Watchtower, ha a ne a lokisetsa ho ea sebeletsa mafatšeng a sele, monna o ile a buisana le moena oa hae ka tlhokomelo ea ’mè oa bona boemong ba ha a ka kula kapa a ka holofala. Ha a bontša ho rata ’mè oa bona haesitana le ho ananela bohlokoa ba mosebetsi oa boromuoa, moena oa hae o ile a re: “Hona joale ke na le lelapa le bana. Nke ke ka ea hōle le ho etsa lintho tseo u ka li etsang. Kahoo, haeba ’Mè a hlaheloa ke ntho e itseng, ke tla mo hlokomela.”
Banyalani ba bang ba sebeletsang Amerika Boroa ba ile ba fumana tšebelisano e matla le lelapa labo mosali bakeng sa ho hlokomela ’mè oa hae ea hōlileng. E mong oa bo-ausi ba hae, hammoho le monna oa hae, ba ile ba hlokomela ’mè oa bona ho fihlela ha ausi eo oa hae a tšoaroa ke lefu le ileng la mo bolaea. Joale ho ile ha etsahala eng? E le ho kokobetsa ho ameha leha e le hofe hoo ba neng ba e-na le hona, monna oa ausi oa bona o ile a ba ngolla: “Hafeela ’na le bana re ntse re phela, ha ho mohla le tla tlameha ho tlohela tšebeletso ea lōna ea boromuoa.” Thuso e eketsehileng ea lelapa e ile ea hlaha ha ngoan’abo e mong, hammoho le monna oa hae, ba tela lehae la bona ’me ba falla ho tla lula le ’mè oa bona e le hore ba ka mo hlokomela, ’me ba ile ba etsa joalo ho fihlela a e-shoa. Ke moea o motle hakaakang oa tšebelisano! Kaofela ha bona ba ne ba thusa ho tšehetsa tšebeletso ea boromuoa.
Batsoali ba Fanang ka Bolokolohi ho Jehova
Hangata kananelo e ikhethang bakeng sa tšebeletso e halalelang e bontšoa ke batsoali. Har’a letlotlo la bona la bohlokoa ka ho fetisisa leo ba ka tlotlisang Jehova ka lona, ke bana ba bona. (Liproverbia 3:9) Batsoali ba bangata ba Bakreste ba khothalletsa bana ba bona hore ba kenele tšebeletso ea nako e tletseng. ’Me ba bang ba bona ba ikutloa joaloka Anna, ea ileng a fa Jehova mora oa hae Samuele bakeng sa tšebeletso ea hae “ka mehla,” ka mantsoe a mang, “ka litšiu tsohle tsee [a neng] a tla phela ka tsona.”—1 Samuele 1:22, 28.
Motsoali e mong ea tšoanang le eo o ile a ngolla morali oa hae ea Afrika: “Re leboha Jehova ka tokelo e babatsehang eo u nang le eona. U finyelletse seo re neng re se labalabela ka ho fetisisa.” ’Me lekhetlong le leng o ile a re: “Ke ’nete hore re lokela ho etsa boitelo bona ba ho arohana le uena, empa re thaba hakaakang ha re bona kamoo Jehova a u hlokomelang kateng!”
Ka mor’a ho hlahloba maemo a fapa-fapaneng a ileng a hlaha ha a fana ka tlhokomelo e hlokahalang ho batsoali ba hae ba hōlileng, moromuoa e mong ea Ecuador o ile a ngola: “Ke nahana hore tšehetso e khōlō ka ho fetisisa eo ’na le mosali oa ka re ileng ra e fumana e ne e le lithapelo tsa ntate oa ka. Ka mor’a lefu la hae, ’Mè o ile a re bolella: ‘Ho ne ho se mohla letsatsi le fetang ntate oa lōna a sa rapela Jehova hore a le lumelle ho lula kabelong ea lōna.’”
Banyalani ba bang ba hōlileng ba California, U.S.A., ba ile ba thaba haholo ka hore e mong oa bara ba bona a be tšebeletsong ea nako e tletseng. Mora eo oa bona le mosali oa hae ba ne ba le Spain ha ’mè oa bona a hlokahala. Litho tse ling tsa lelapa li ile tsa ikutloa hore ho hlokahala litokisetso tse itseng bakeng sa ho hlokomela ntate oa tsona. Kaha li ne li phathahane ka mesebetsi ea boipheliso le ho hōlisa bana ba tsona, li ne li ikutloa hore li ke ke tsa nka boikarabelo boo. Ho e-na le hoo, li ile tsa phehella ka matla hore banyalani bao ba tšebeletsong e khethehileng ea nako e tletseng ba khutlele hae ho tla hlokomela ntate oa bona. Leha ho le joalo, le hoja ntate oa bona a ne a le lilemo li 79, o ne a ntse a phela hantle ’me a bile a e-na le pono e hlakileng ea moea. Sebokeng se neng se entsoe sa lelapa, ka mor’a hore litho tse fapaneng li hlahise maikutlo a tsona, ntate oa bona o ile a ema ’me ka matla a re: “Ke batla hore ba khutlele Spain ’me ba tsoele pele ba sebetsa.” Ba ile ba khutlela, empa ba ile ba boela ba mo thusa ka litsela tse ling tse bonahalang. Kabelo ea bona hona joale ke mosebetsi oa potoloho Spain. Ka mor’a seboka seo sa lelapa se ileng sa tšoaroa, litho tse ling tsa lelapa li bontšitse kananelo ka seo banyalani bao ba tšebeletsong linaheng lisele ba e etsang. Ka mor’a lilemo tse ’maloa, e mong oa bara o ile a nka ntate oa hae ho tla lula le eena ha hae le ho mo hlokomela ho fihlela a e-shoa.
Mora e mong oabo rōna ea tlotsitsoeng oa Pennsylvania, U.S.A., ea neng a ’nile a bula maliboho ka lilemo tse ka bang 40, o ne a le ka holimo ho lilemo tse 90 ha mosali oa hae a qala ho kula hampe-mpe a ba a hlokahala. O ne a e-na le mora le barali ba bararo, ntle ho bana ba hae ba bangata ba moea. E mong oa barali ba hae o ne a bile tšebeletsong ea nako e tletseng ka lilemo tse ka holimo ho 40, a sebelitse le monna oa hae e le baromuoa, mosebetsing oa ho tsamaea le Bethele. O ile a thusa ho etsa litokisetso tsa hore ho ka fanoa ka tlhokomelo e hlokahalang ho ntate oa hae. Barab’abo rōna ba sebakeng seo ntate oa hae a leng ho sona ba ile ba thusa ka ho mo isa libokeng Holong ea ’Muso. Hamorao, ka mor’a hore monna oa hae a hlokahale, o ile a botsa ntate oa hae hore na o batla a tlohele Bethele a tl’o mo hlokomela. Ntate eo oa hae o ne a nka lintho tse halalelang e le tsa bohlokoa haholo, ’me o ile a ikutloa hore litlhoko tsa hae li ka hlokomeloa ka litsela tse ling. Kahoo, o ile a arabela: “Eo ke ntho e mpe ka ho fetisisa eo u ka e etsang, ’me e tla ba mpe le ho feta haeba nka u lumella hore u e etse.”
Liphutheho Tse Tšehetsang
Liphutheho tse ling e ’nile ea e-ba tse thusang haholo ho hlokomeleng batsoali ba hōlang ba batho ba tšebeletsong e khethehileng ea nako e tletseng. Ba ananela haholo bao ba inehetseng tšebeletsong e joalo ka lilemo tse ngata. Le hoja li ke ke tsa ba lokolla boikarabelong ba bona ba Mangolo, liphutheho tsena li etsa ho hongata ho etsa hore moroalo o be bobebe ka ho lekaneng e le hore ho se ke ha hlokahala hore bana ba tlohele likabelo tsa bona tse khethehileng.
Banyalani ba bang ba Jeremane ba ne ba bile kabelong ea bona e naheng esele ka lilemo tse ka bang 17, boholo ba nako ba le mosebetsing o ba tsamaisang, ha litlhoko tsa ’mè ea hōlileng oa monna li eketseha. Ba ile ba sebelisa nako ea bona ea phomolo selemo se seng le se seng bakeng sa ho mo thusa. Baahisani ba hae ba Lipaki le bona ba ile ba tšehetsa ka lerato. Nakong e ’ngoe ha banyalani bao ba tšebeletsong ea nako e tletseng ba ne ba e-na le ’mè oa bona nakong eo maemo a neng a le boima haholo, baholo ba phutheho ea sebaka seo ba ile ba etsa litokisetso tsa ho kopana le bona. Ba ne ba lemoha seo banyalani bana ba neng ba se etsetsa ’mè oa bona kamehla. Ba ne ba boetse ba ananela bohlokoa ba tšebeletso ea nako e tletseng eo banyalani bao ba neng ba e etsa. Kahoo, baholo ba ile ba hlahisa lenaneo la kemiso e lokiselitsoeng ho hlokomela ’mè oa bona ’me joale ba re: “Le ke ke la khona ho mo hlokomela ho feta kamoo le etsang kateng hona joale; re tla le thusa e le hore le ka lula kabelong ea lōna Spain.” Ka lilemo tse supileng tse fetileng, baholo bana ba ile ba tsoela pele ba etsa sena.
Ka tsela e tšoanang, mora e mong oabo rōna ea ’nileng a sebeletsa Senegal ho tloha ka 1967, o ile a fumana tšehetso e lerato phuthehong eo ntate oa hae a neng a le ho eona. Nakong eo ho neng ho hlahile bothata, monna enoa o ile a ea United States a le mong ho ea thusa batsoali ba hae, ’me e le tlas’a boikemisetso ba mosali oa hae ea lerato ba ho sebelisana le eena. O ile a fumana hore o ne a lokela ho lula moo likhoeli tse ’maloa. Boemo bo ne bo le boima, empa ha a se a entse seo a neng a ka se khona, phutheho e ile ea kenella ’me ea mo thusa e le hore a ka khutlela mosebetsing oa hae oa boromuoa. Ka lilemo tse ka holimo ho 18, phutheho eo e ile ea fana ka thuso e lerato ka litsela tse ngata haholo, pele e bile ho ntate oa hae (le hoja a ne a se a sa tsebe ba bangata ba bona), ’me hamorao ea e-ba ho ’mè oa hae. Na seo se ile sa lokolla mora oa bona boikarabelong boo a nang le bona? Che; nako le nako o ne a nka leeto ho tloha Senegal ’me a sebelisa matsatsi a hae a phomolo bakeng sa ho ea fana ka thuso eohle eo a ka bang le eona. Empa ba bangata phuthehong eo ba bile le thabo ea ho tseba hore ba kentse letsoho ho bolokeng banyalani bao ba sebetsang ka thata ba le tšebeletsong e khethehileng ea nako e tletseng Senegal.
Jesu o itse ba telang lintho tsohle molemong oa litaba tse molemo ba tla ba le bara babo bona, barali babo bona, bo-’mè le bana halekholo. (Mareka 10:29, 30) Ruri sena ke ’nete har’a bahlanka ba Jehova. Banyalani ba bang bao hona joale ba sebeletsang Benin, Afrika Bophirimela, ba ile ba e-ba le phihlelo ena ka tsela e khethehileng ha Lipaki tse ling tse peli tsa phuthehong eo batsoali ba bona ba leng ho eona li ba bolella hore ba se ke ba khathatseha ka batsoali ba bona. Li ile tsa phaella: “Batsoali ba lōna ke batsoali ba rōna.”
E, ho na le litsela tse ngata tseo re ka bontšang ka tsona hore re nka litokelo tsa tšebeletso e halalelang e le tsa bohlokoa. Na ho na le litsela tseo u ka etsang see ka ho feletseng haholoanyane?
[Litšoantšo tse leqepheng la 26]
Ba ikentse ba fumanehang bakeng sa tšebeletso e khethehileng ea nako e tletseng