Setsebi sa Likhalase Tsa Mahlo se Jala Peō

Boiteko ba setsebi se seng sa likhalase tsa mahlo sa Lviv, Ukraine, bo amana kae le ho thehoa ha phutheho ea Lipaki tsa Jehova ea ba buang Serussia, Haifa, Iseraele e bohōle ba lik’hilomithara tse ka bang 2000 eo pele u fihla ho eona u fetang linaha tse ngata? Pale ena e bontša bonnete ba polelo ea Bibele e ho Moeklesia 11:6, e reng: “Jala peō ea hao hoseng ’me u se ke ua lumella letsoho la hao hore le phomole ho fihlela ka shoalane; etsoe ha u tsebe moo sena se tlang ho ba le katleho.”

PALE ena ea rōna e qala ka 1990 ha Ella, mosali e mocha oa Mojuda, a ne a lula Lviv. Ella le lelapa labo ba ne ba lokisetsa ho fallela Iseraele. Nakoana pele ba tloha, Ella o ne a tšoanetse ho ea ho setsebi sa likhalase tsa mahlo seo e leng e mong oa Lipaki tsa Jehova. Ka nako eo, mosebetsi oa Lipaki tsa Jehova o ne o thibetsoe Ukraine. Ho sa tsotellehe seo, setsebi sena sa likhalase tsa mahlo se ile sa nka bohato ba ho buisana le Ella ka tumelo ea sona e thehiloeng Bibeleng. Se ile sa mo makatsa ha se bolela hore Molimo o na le lebitso. Seo se ile sa khahla Ella, ’me ho ile ha latela puisano e ntle ea Bibele.

Ella o ile a thabela puisano ena hoo a ileng a kōpa hore ho be le e ’ngoe bekeng e latelang le e ’ngoe hape bekeng e ka mor’a eo. Thahasello ea hae e ne e hōla, empa ho ne ho e-na le bothata. Nako ea hore lelapa le fallele Iseraele e ne e atamela ka potlako. Ho ne ho ntse ho e-na le ho hongata hoo Ella a neng a tlameha ho ithuta hona! E le hore a sebelise nako e setseng hamolemo, o ile a kōpa hore thuto ea Bibele e tšoaroe letsatsi le leng le le leng ho fihlela a tloha. Le hoja Ella a sa ka a tsoela pele ho ithuta ha a qala ho fihla Iseraele, peō ea ’nete e ne e metse pelong ea hae. Ha selemo se fela, o ne a boetse a ithuta Bibele ka tieo.

Ntoa e ile ea qhoma Koung ea Persia, ’me Iraq e ile ea hlasela Iseraele ka limisaele. Ho ne ho qoqoa ka taba ena kamehla. Ka letsatsi le leng ha a le suphamaketeng, Ella o ile a utloa lelapa le leng le buang Serussia la bafalli ba bacha le ntse le qoqa. Le hoja Ella e ne e le hona a ntseng a ithuta Bibele, o ile a atamela lelapa lena ’me a le bolella ka tšepiso ea Bibele ea lefatše la khotso. Ka lebaka leo, lelapeng lena nkhono, Galina; ’mè, Natasha; mora, Sasha (Ariel) le morali, Ilana, kaofela ba ile ba kopanela thutong ea Bibele ea Ella.

Lelapeng lena Sasha ke eena ea ileng a kolobetsoa pele—ho sa tsotellehe liteko tse ngata. Le hoja e ne e le seithuti se fetang litlhahlobo ka linaleli, o ile a lelekoa sekolong kahobane letsoalo la hae la Bokreste le ne le sa mo lumelle ho kopanela koetlisong ea selelekela ea sesole, e etsoang e le karolo e hlokahalang ea lithuto tsa sekolo. (Esaia 2:2-4) Nyeoe ea Sasha e ile ea ea Lekhotleng le Phahameng la Iseraele le Jerusalema, leo ho babatsehang hore ebe le ile la laela hore Sasha a khutlisetsoe sekolong ho fihlela selemo se fela. Taba ena e ile ea tsebahala hohle naheng eo. Ka lebaka leo, Baiseraele ba bangata ba ile ba tseba litumelo tsa Lipaki tsa Jehova.a

Hoba a qete sekolong se phahameng, Sasha o ile a kenela tšebeletso ea nako e tletseng ea Lipaki tsa Jehova. Kajeno o sebeletsa e le pula-maliboho ea khethehileng le moholo phuthehong. Khaitseli’e, e leng Ilana, o na le eena tšebeletsong ea nako e tletseng. ’M’a bona le nkhono’a bona, ke Lipaki tse kolobelitsoeng bobeli ba bona. Peō eo setsebi sa likhalase tsa mahlo se e jetseng e ne e ntse e beha litholoana!

Ho sa le joalo, Ella o ile a ’na a tsoela pele moeeng ’me kapele feela o ne a bolela ka ntlo le ntlo. Ntlong ea pele feela, Ella o ile a teana le Faina, ea neng a sa tsoa fihla a e-tsoa Ukraine. Faina o ne a imetsoe kelellong. Hamorao Ella o ile a bolelloa hore nakoana pele a kokota ha Faina, mosali enoa ea imetsoeng kelellong o ne a rapetse Molimo, a re: “Ha ke tsebe hore na u mang, empa haeba ua nkutloa, nthuse.” Eena le Ella ba ile ba ba le puisano e hlasimollang. Faina o ile a botsa lipotso tse ngata ’me a nahana ka hloko ka likarabo tseo a neng a li fuoa. Ka mor’a nako, o ile a kholiseha hore Lipaki tsa Jehova li ruta ’nete e tsoang ka Bibeleng. O ile a fetola lenaneo la hae la lithuto tsa univesithi e le hore a ka ba le nako e eketsehileng phuthehong le mosebetsing oa ho bolela. Ka May 1994, Faina o ile a kolobetsoa. Le eena o ile a kena tšebeletsong ea bopula-maliboho, a iphelisa ka mosebetsi oa lik’homphieutha oo ho oona a sa sebetseng nako eohle.

Ka November 1994, ka tšohanyetso feela Ella o ile a ikutloa a tepella a ntse a le mosebetsing oa boboleli. O ile a ea sepetlele moo litlhahlobo li ileng tsa bontša hore o na le seso sa ka maleng se tsoang mali. Mantsiboea tekanyo ea lisele tsa hae tsa mali e ne e theohetse ho 7,2. Moholo e mong oa phutheho ea habo Ella eo e leng molula-setulo oa Komiti ea Bohokahanyi le Lipetlele (HLC [Hospital Liaison Committee]), o ile a fa lingaka boitsebiso bo mabapi le mekhoa e mengata ea bongaka e sa hlokeng hore ho sebelisoe mali.b Ella o ile a buuoa ka katleho ntle ho mali, ’me a fola ka ho feletseng.—Liketso 15:28, 29.

Ngaka ea mafu a basali ea Ella, e bitsoang Karl eo e leng Mojuda ea hlahetseng Jeremane, e ile a khahloa haholo. Karl o ile a hopola hore batsoali ba hae, ba neng ba pholohile polao e sehlōhō eo Bajuda ba neng ba e bolaoa ke Manazi, ba ne ba ile ba tseba Lipaki tsa Jehova likampong tsa mahloriso. O ile a botsa lipotso tse ngata. Le hoja a ne a phathahane ke mosebetsi oa hae oa bongaka, o ile a ipha nako ea ho ithuta Bibele kamehla. Selemong se latelang, o ne a e-ba teng libokeng tsa Bokreste tsa beke le beke.

Phello ea peō e jetsoeng ke setsebi sa likhalase tsa mahlo ke efe? Re se re bone se etsahetseng ka Sasha le lelapa labo. Ella eena o sebetsa e le pula-maliboho ea khethehileng. Morali oa hae, Eina, o sa tsoa qeta lithuto tsa hae sekolong se phahameng, o kenetse mosebetsi oa bopula-maliboho ka boeena. Faina le eena o sebetsa e le pula-maliboho ea khethehileng. Ngaka ea mafu a basali ea Ella, e leng Karl, hona joale ke Paki e kolobelitsoeng le mohlanka ea sebeletsang, ’me o bolella bakuli ba hae le ba bang ka matla a folisang a ’nete ea Bibele.

Sehlopha se senyenyane sa bafalli ba buang Serussia se qalileng e le karolo ea Phutheho ea Seheberu ea Haifa hona joale ke phutheho ea Serussia e chesehang e nang le bahoeletsi ba ’Muso ba fetang 120. Se ileng sa tlatsetsa keketsehong ena ke hore ebe setsebi se seng sa likhalase tsa mahlo sa Lviv se ile sa sebelisa monyetla oa ho jala peō!

[Mongolo o botlaaseng ba leqephe]

[’Mapa o leqepheng la 29]

(Ha u batla ho bona boitsebiso bo hlophisitsoeng hantle, sheba sengoliloeng)

UKRAINE

ISERAELE

[Tlhaloso ea Moo Setšoantšo se Nkiloeng Teng]

Mountain High Maps® Copyright © 1997 Digital Wisdom, Inc.

[Litšoantšo tse leqepheng la 30]

Ella le morali oa hae, Eina

[Setšoantšo se leqepheng la 31]

Sehlopha se thabileng sa Lipaki tsa Haifa tse buang Serussia. Ho tloha ho le letšehali ho ea ho le letona: Sasha, Ilana, Natasha, Galina, Faina, Ella, Eina le Karl