Thuso e Atlehang Bakeng sa ho Imoloha Kelellong
“Tloong ho ’na, lōna bohle ba sehlang le ba imetsoeng, ’me ke tla le khatholla.”—MATHEU 11:28.
1, 2. (a) Bibele e bua ka eng e ka thusang ho imolla likelello tse imetsoeng ho tlōla? (b) Lithuto tsa Jesu li ne li thusa hakae?
MOHLOMONG u tla lumela hore ho imeloa haholo kelellong ho kotsi; ho tšoana le ho tšoenyeha. Bibele e bontša hore batho bohle ba imetsoe ke mathata hoo ba bangata ba nyoretsoeng ho lopoloha bophelong ba kajeno bo boima. (Baroma 8:20-22) Empa Mangolo a boetse a bontša kamoo re ka imolohang ka tekanyo e khōlō kateng matšoenyehong hona joale. Re ka imolloa ke ho latela keletso le mohlala tsa mohlankana e mong ea neng a phela lilemong tse fetileng tse likete tse peli. E ne e le ’metli, empa o ne a rata batho ho feta ho ba ’metli. O ne a ama lipelo tsa batho, a sebetsana le litlhoko tsa bona, a thusa ba fokolang ’me a tšelisa ba nyahameng. Ho feta moo, o ne a thusa ba bangata ho finyella bokhoni ba bona ba moea. Ka tsela eo, likelello tsa bona tse imetsoeng ho tlōla li ne li imoloha, feela joalokaha le uena u ka imoloha kelellong.—Luka 4:16-21; 19:47, 48; Johanne 7:46.
2 Monna enoa ea bitsoang Jesu oa Nazaretha, o ne a sa tataisoe ke thuto ea lefatše eo ba bang ba neng ba e batla Roma, Athene, kapa Alexandria tsa boholo-holo. Leha ho le joalo, lithuto tsa hae li tsebahala haholo. Sehlooho sa tsona e ne e le: puso eo Molimo a tla busa lefatše la rōna ka eona ka katleho. Hape, Jesu o ne a hlalosa melao-motheo ea bophelo—e leng melao-motheo ea bohlokoa e le kannete kajeno. Ba ithutang le ba sebelisang se neng se rutoa ke Jesu ba thabela melemo e tlang hang-hang, hammoho le ho imoloha ha likelello tse imetsoeng ho tlōla. Na u ke ke ua thabela seo?
3. Jesu o ile a etsa memo efe e hlollang?
3 Mohlomong ua belaela. ‘Na motho ea phetseng khale hakaalo a ka susumetsa bophelo ba ka hamolemo hona joale?’ Mamela mantsoe ana a ipiletsang a Jesu: “Tloong ho ’na, lōna bohle ba sehlang le ba imetsoeng, ’me ke tla le khatholla. Jarang joko ea ka ’me le ithute ho ’na, kaha ke na le maikutlo a bonolo ’me ke ikokobelitse pelong, ’me le tla fumanela meea ea lōna khatholoho. Etsoe joko ea ka e mosa le mojaro oa ka o bobebe.” (Matheu 11:28-30) O ne a bolela’ng? A re hlahlobisiseng mantsoe ana ’me re bone kamoo a ka re thusang kateng ho imoloha kelellong e hatellehileng.
4. Jesu o ile a bua le bo-mang, ’me ke hobane’ng ha bamameli ba hae ba ne ba ka thatafalloa ho etsa seo ho neng ho thoe ba se etse?
4 Jesu o ile a buisana le ba bangata ba neng ba leka ka matla ho etsa se lumellanang le molao empa ba ‘imetsoe’ kahobane baeta-pele ba Bajuda ba ne ba fetotse bolumeli moroalo. (Matheu 23:4) Taba e khōlō ho bona e ne e le litaelo tse sa feleng hoo e ka bang litšobotsing tsohle tsa bophelo. Na u ne u ke ke ua imeloa kelellong haeba kamehla u utloa ho thoe “u se ke ua” etsa sena kapa sane? Ho fapana le seo, Jesu o ne a memela batho ’neteng, ho lokeng le bophelong bo molemo ka ho mo mamela. Ha ho pelaelo hore tsela ea ho tseba Molimo oa ’nete e ne e ama ho ela Jesu Kreste hloko, hobane ka eena, batho ba ka bona seo Jehova a leng sona, ’me baa se bona. Jesu o ile a re: “Ea mponeng o bone le Ntate.”—Johanne 14:9.
Na U Phela Bophelo bo Imetsang Kelello ea Hao ho Tlōla?
5, 6. Ke ho tšoana hofe ho teng pakeng tsa maemo a mosebetsi le a meputso a mehleng ea Jesu le a rōna kajeno?
5 Mohlomong taba ena ea u ama hobane mosebetsi oa hao kapa boemo ba lelapa la hao li etsa hore u imeloe haholo kelellong. Kapa ho bonahala boikarabelo bo bong bo itseng bo u sita. Haeba ho joalo, u tšoana le batho ba tšepahalang bao Jesu a neng a teana le bona le bao a neng a ba thusa. Ka mohlala, nahana ka bothata ba ho fumana lintho tse hlokahalang bophelong. Ke bothata ba batho ba bangata kajeno, ’me ba bangata ba ne ba le boemong boo mehleng ea Jesu.
6 Nakong eo, motho feela tjee ea sebetsang o ne a sehla ka thata ka lihora tse 12 ka letsatsi, ka matsatsi a tšeletseng ka beke, hangata e le hore feela a fumane denari ka letsatsi leo lohle. (Matheu 20:2-10) U fumana eng ha u bapisa moputso oa hao kapa oa metsoalle ea hao le see? Ho thata ho bapisa meputso ea boholo-holo le ea kajeno. Mokhoa o mong e ka ba ho hlahloba matla a theko a chelete. Setsebi se seng se bolela hore mehleng ea Jesu lofo ea bohobe e entsoeng ka likopi tse ’nè tsa phofo ea koro e ne e rekoa ka seo e ka bang moputso oa hora e le ’ngoe. Setsebi se seng sona se bolela hore kopi ea veine e rathotsoeng hantle e ne e rekoa ka seo e ka bang moputso oa lihora tse peli. Ka makolopetso ana u ka bona hore ka nako eo batho ba ne ba sehla ka thata ka nako e telele e le hore ba tsebe ho phela. Ba ne ba hloka se ba lopollang le ho ba khatholla, ’me ho joalo le ka rōna. Haeba u hiriloe, u ka ’na ua ikutloa hore u hatelloa hore u tsoe tema mosebetsing oa hao. Hangata ha re fumane nako ea ho etsa liqeto tse nahannoeng ka hloko. U ka ’na ua lumela hore u labalabela ho imoloha.
7. Batho ba ile ba itšoara joang ka molaetsa oa Jesu?
7 Ho hlakile hore memo ea Jesu e neng e e-ea ho bohle ‘ba neng ba sehla le ba neng ba imetsoe’ e ne e ipiletsa haholo ho bamameli ba bangata ba nakong eo. (Matheu 4:25; Mareka 3:7, 8) Hape, u hopole hore Jesu o ile a eketsa ka tšepiso ena, “ke tla le khatholla.” Tšepiso eona eo ea sebetsa kajeno. E ka sebetsa ho rōna haeba rea ‘sehla ebile rea imeloa.’ E ka sebetsa le ho baratuoa ba rōna, bao mohlomong boemo ba bona e leng bo tšoanang.
8. Ho hōlisa bana le botsofali li eketsa ho imeloa kelellong joang?
8 Ho na le lintho tse ling tse imetseng batho. Ho hōlisa bana ke bothata bo boholo. Le ho ba ngoana e ka ba bothata. Batho ba lilemo tsohle ba thulanang le mathata a ho kula kelellong le ’meleng, ba ntse ba eketseha. Le hoja batho ba ka phela halelele, ba tsofetseng ba loana le mathata a khethehileng, ho sa tsotellehe tsoelo-pele ho tsa bongaka.—Moeklesia 12:1.
Re Kene Jokong
9, 10. Mehleng ea boholo-holo, joko e ne e tšoantšetsa eng, hona ke hobane’ng ha Jesu a ile a memela batho ho jara joko ea hae?
9 Na u hlokometse hore mantsoeng a qotsitsoeng ho Matheu 11:28, 29, Jesu o itse: “Jarang joko ea ka ’me le ithute ho ’na”? Ka nako eo, ho ne ho ka etsahala hore motho feela tjee a ikutloe eka o kene jokong. Ho tloha khale, joko e ne e tšoantšetsa bokhoba kapa bohlanka. (Genese 27:40; Levitike 26:13; Deuteronoma 28:48) Basebetsi feela tjee ba bangata ba mosebetsi oa letsatsi le letsatsi bao Jesu a neng a kopana le bona ba ne ba sebetsa ba jere joko ea sebele, ba jara meroalo e boima. Ho itšetlehile ka hore na joko eo ke ea moetso ofe, e ne e ke ke ea utloisa bohloko kapa e ne e ka sehla molaleng le mahetleng. Kaha Jesu e ne e le ’metli, mohlomong o ne a etsa lijoko, ’me o ne a ka tseba hore na e “mosa” e etsoa joang. Mohlomong o ne a e aletsa ka letlalo kapa lesela moo e tla lula teng molaleng le mahetleng e le hore e se ke ea utloisa bohloko ka hohle kamoo ho khonehang.
10 Ha Jesu a ne a re, “Jarang joko ea ka,” mohlomong o ne a itšoantša le ea fang batho lijoko tse tla ba “mosa” molaleng le mahetleng a mosebetsi. Kahoo, Jesu o ile a phaella ka ho re: “Mojaro oa ka o bobebe.” Sena se ne se bontša hore ho ne ho se bohloko ho sebelisa joko eo, le hore mosebetsi e ne e se oa bokhoba. Ke ’nete hore ha Jesu a memela bamameli ba hae ho jara joko ea hae, o ne a sa ba lopolle hona hoo maemong ’ohle a hatellang a nakong eo. Leha ho le joalo, pono e fapaneng eo a neng a ba fa eona e ne e tla ba khatholla haholo. Ntho e ’ngoe e neng e tla ba lopolla e ne e tla ba ho fetola tsela eo ba phelang ka eona le eo ba etsang lintho ka eona. Ntho ea bohlokoa haholo, tšepo e hlakileng le e tiileng e ne e tla ba thusa hore ba se ke ba imeloa ke bophelo haholo.
U ka Khatholoha
11. Ke hobane’ng ha taba ea Jesu e ne e se feela ho khothalletsa ho nka joko esele?
11 Hlokomela Jesu o ne a sa re batho ba nke joko esele. Roma e ne e tla ’ne e buse naha, feela joalokaha mebuso ea kajeno e busa moo Bakreste ba lulang teng. Lekhetho le neng le lefisoa ke Roma lekholong la pele la lilemo le ne le sa tl’o felisoa. Mathata a bophelo le a moruo a ne a tla ’ne a tsoele pele. Ho se phethahale le sebe li ne li tla ’ne li ame batho. Leha ho le joalo, ba ne ba ka khatholoha ka ho amohela thuto ea Jesu, feela joalokaha le rōna re ka khatholoha kajeno.
12, 13. Jesu o ile a totobatsa eng e neng e tla khatholla, ’me ba bang ba ile ba nka khato efe?
12 Papiso ea Jesu ea joko e ile ea bonahala e sebetsa haholo tabeng ea mosebetsi oa ho etsa barutuoa. Ha ho pelaelo hore mosebetsi o moholo oa Jesu e ne e le oa ho ruta ba bang, a ba ruta haholo ka ’Muso oa Molimo. (Matheu 4:23) Kahoo ha a ne a re, “Jarang joko ea ka,” hona ka sebele ho ne ho tla akarelletsa ho mo latela mosebetsing oo. Tlaleho ea Kosepele e bontša hore Jesu o ne a susumelletsa batho ba tšepahalang ho fetola mesebetsi ea bona, e leng seo ba bangata ba neng ba amehile haholo ka sona bophelong. Hopola ha a bitsa Petrose, Andrease, Jakobo le Johanne a re: “Ntšaleng morao, ’me ke tla le etsa batšoasi ba batho.” (Mareka 1:16-20) O ile a bontša batšoasi bao ba litlhapi hore na e ne e tla ba ho khotsofatsang hakaakang ha ba ne ba ka etsa mosebetsi o neng o tla pele bophelong ba hae, ba etsa joalo ka tataiso ea hae le ka thuso ea hae.
13 Bamameli ba bang ba hae ba Bajuda ba ile ba utloisisa seo a se buang ’me ba se sebelisa. Bona ka mahlo a kelello seo re se balang ho Luka 5:1-11 se etsahetseng lebōpong la leoatle. Batšoasi ba bane ba litlhapi ba ne ba sehlile ka thata bosiu bohle empa ba sa tšoasa letho. Ka ho panya ha leihlo feela matlooa a bona a ne a tletse! Ho ne ho sa etsahala ka tsietsi feela tjee; ho ne ho etsahetse ka thuso ea Jesu. Ha ba talima lebōpong la leoatle, ba ile ba bona batho ba bangata ba thahasellang lithuto tsa Jesu. Sena se ile sa thusa ho hlalosa seo Jesu a ileng a se bolella batšoasi bana ba bane ba litlhapi: “Ho tloha joale ho ea pele [le] tla tšoasa batho ba phela.” Ba ile ba nka khato efe? “Ba khutlisetsa likepe tseo moo ho omileng, ’me ba tlohela ntho e ’ngoe le e ’ngoe eaba baa mo latela.”
14. (a) Re ka khatholoha joang kajeno? (b) Ke litaba life tse molemo tse khathollang tse neng li boleloa ke Jesu?
14 Ha e le hantle, le uena u ka nka khato e tšoanang. Mosebetsi oa ho ruta batho ’nete ea Bibele o sa ntsane o tsoela pele. Lefatšeng ka bophara Lipaki tsa Jehova tse ka bang limilione tse tšeletseng li amohetse memo ea Jesu ea ho “jara joko ea [hae]”; ke “batšoasi ba batho.” (Matheu 4:19) Tse ling li ho etsa mosebetsi oa nako eohle; tse ling li etsa hoo li ka ho khonang ka nako e itseng. Lia khatholoha kaofela, ’me kahoo bophelo ba tsona ha bo be boima haholo. Ho akarelletsa ho etsa seo li se thabelang, e leng ho bolella ba bang litaba tse molemo—“litaba tse molemo tsa ’muso.” (Matheu 4:23) Hoa thabisa kamehla ho bua ka litaba tse molemo empa haholo-holo ho bua ka litaba tsena tse molemo. Bibele e na le taba ea sehlooho eo re e hlokang ho kholisa ba bangata hore ba ka phela bophelo bo seng boima haholo.—2 Timothea 3:16, 17.
15. U ka rua molemo joang lithutong tsa Jesu mabapi le bophelo?
15 Esita le batho ba sa tsoa qala ho ithuta ka ’Muso oa Molimo ba se ba ruile molemo o itseng lithutong tsa Jesu tsa hore na batho ba phele joang. Batho ba bangata ba ka bolela kannete hore lithuto tsa Jesu li ba khatholotse le ho ba thusa ho fetola bophelo ba bona ka ho feletseng. U ka inetefaletsa seo ka ho hlahloba melao-motheo e meng ea bophelo e boletsoeng litlalehong tsa bophelo ba Jesu le tsa tšebeletso ea hae, haholo-holo Likosepele tse ngotsoeng ke Matheu, Mareka le Luka.
Tsela ea ho Khatholoha
16, 17. (a) Ke hokae moo u ka fumanang lithuto tsa Jesu tsa sehlooho? (b) Ho hlokahala’ng e le hore motho a khatholloe ke ho sebelisa lithuto tsa Jesu?
16 Nakong ea selemo ka 31 C.E., Jesu o ile a fana ka puo e tsebahalang lefatšeng ho fihlela kajeno. E tloaelehile ka ho re ke Thuto ea Thabeng. E tlalehiloe ho Matheu khaolo ea 5 ho ea ho ea 7 le ho Luka khaolo ea 6, ’me e akaretsa lithuto tsa hae tse ngata. U ka fumana lithuto tse ling tsa Jesu likarolong tse ling tsa Likosepele. Boholo ba seo a ileng a se bolela sea itlhalosa, le hoja ho se sebelisa e ka ba bothata. Ke hobane’ng ha u sa bale likhaolo tseo ka hloko le ka monahano o tebileng? Lumella matla a likhopolo tsa hae a susumetse monahano oa hao le boikutlo ba hao.
17 Ho hlakile hore lithuto tsa Jesu li ka hlophisoa ka litsela tse sa tšoaneng. A re hlophiseng lithuto tsa sehlooho ka tsela eo ho tla ba le thuto e le ’ngoe bakeng sa letsatsi ka leng la khoeli, ka morero oa hore u li sebelise bophelong ba hao. Joang? U se ke ua li feta mohoalotso feela. Hopola ’musi oa morui ea ileng a botsa Jesu Kreste, a re: “Ke tla rua bophelo bo sa feleng ka ho etsa’ng?” Ha Jesu a pheta lintho tsa bohlokoa tse hlokoang ke Molao oa Molimo, monna enoa o ile a arabela ka hore o se a ntse a li phethahatsa. Leha ho le joalo, o ile a hlokomela hore ho hlokahala hore a etse ho eketsehileng. Jesu o ile a mo kōpa hore a etse boiteko bo boholo hore a sebelise melao-motheo ea Molimo ka litsela tse molemo, e le hore e be morutuoa ea mafolofolo. Ho totobetse hore monna enoa o ne a e-s’o lokele ho etsa ho eketsehileng joalo. (Luka 18:18-23) Kahoo, motho ea batlang ho ithuta lithuto tsa Jesu kajeno ho hlokahala hore a hopole hore ho na le phapang pakeng tsa ho lumellana le tsona le ho li amohela ka mafolofolo, kahoo a fokotsa ho imeloa kelellong.
18. Bontša kamoo u ka sebelisang lebokose le mona hamolemo kateng.
18 E le hore u qale ho hlahloba le ho sebelisa lithuto tsa Jesu, bona ntlha ea 1 ka lebokoseng. E u supisa Matheu 5:3-9. Ka sebele, bohle re ka qeta nako e ngata re nahanisisa ka keletso e babatsehang e fanoeng litemaneng tseo. Leha ho le joalo, ha u li talima kaofela, u fihlela qeto efe ka boikutlo? Haeba kannete u batla ho hlōla liphello tsa ho imeloa haholo kelellong bophelong, u tla thusoa ke eng? U ka ntlafatsa boemo ba hao joang ha u eketsa seo u se etsang ho ela hloko litaba tsa moea, u li lumella hore e be tsona tse tlalang mohopolong oa hao? Na ho na le ntho e ’ngoe eo u e thahasellang bophelong eo ho hlokahalang hore u fokotse thahasello ea hao ho eona, e le hore u ele hloko litaba tsa moea haholoanyane? Ha u etsa joalo, thabo ea hao e tla eketseha hona joale.
19. U ka etsa’ng ho rua temohisiso le kutloisiso e eketsehileng?
19 Ho na le ho hong hape hoo u ka ho etsang. Ke hobane’ng ha u sa buisane ka litemana tsee le mohlanka e mong oa Molimo, mohlomong molekane oa hao oa lenyalo, mong ka uena ea haufi, kapa motsoalle ea haufi? (Liproverbia 18:24; 20:5) U hopole hore ’musi oa morui o ile a botsa motho e mong—e leng Jesu—taba e loketseng. Karabo e ka be e ile ea eketsa tebello ea hae ea thabo le bophelo bo sa feleng. Molumeli-’moho le uena eo u tšohlang litemana tsena le eena a ke ke a tšoana le Jesu; ho sa tsotellehe seo, moqoqo oa lithuto tsa Jesu o tla le ruisa molemo bobeli ba lōna. Leka ho ho etsa hang-hang.
20, 21. U ka latela lenaneo lefe e le hore u ithute lithuto tsa Jesu, ’me u ka lekanyetsa tsoelo-pele ea hao joang?
20 Sheba hape lebokoseng lena la sehlooho se reng, “Lithuto Tse Tla U Thusa.” Lithuto tsena li hlophisitsoe hore bonyane u be le thuto e le ’ngoe eo u nahanang ka eona ka letsatsi. U ka qala ka ho bala seo Jesu a se boletseng litemaneng tse bontšitsoeng. Ka mor’a moo u nahane ka mantsoe a hae. Nahanisisa kamoo u ka a sebelisang kateng bophelong ba hao. Haeba u nahana hore u se u ntse u etsa joalo, nahanisisa ho bona hore na ke eng e eketsehileng eo u ka e etsang hore u phele ka thuto eo ea Molimo. Leka ho e sebelisa letsatsing leo. Haeba u thatafalloa ho e utloisisa kapa hore na u ka e sebelisa joang, eketsa letsatsi le leng bakeng sa hore u sebetsane le eona. Leha ho le joalo, u hopole hore hase tlamo hore u e tsebe ka ho feletseng pele u fetela ho e latelang. Ka letsatsi le latelang, u ka hlahloba thuto e ’ngoe. Ha beke e fela, u ka hlahloba hore na u atlehile hakae ha u sebelisa lithuto tsa Jesu tse ’nè kapa tse hlano. Bekeng ea bobeli u li eketse, letsatsi le leng le le leng. Haeba u hlokomela hore u khoehlisitse ho sebeliseng thuto e itseng, u se ke ua nyahama. Hona ho tla etsahalla Mokreste e mong le e mong. (2 Likronike 6:36; Pesaleme ea 130:3; Moeklesia 7:20; Jakobo 3:8) Tsoela pele bekeng ea boraro le ea bone.
21 Ka mor’a nako e ka etsang khoeli, mohlomong u tla be u akarelitse lintlha tsohle tse 31. Ho sa tsotellehe hore na boemo ke bofe, u tla ikutloa joang ka seo? Na ha u na ho thaba haholoanyane, mohlomong u se u phutholohile haholoanyane? Le haeba u tsoela pele butle, ho ka etsahala hore u utloe u sa imeloa haholo kelellong, kapa bonyane u tla sebetsana hamolemo haholoanyane le ho imeloa kelellong, ’me u tla ba le mokhoa oa ho tsoela pele. U se ke ua lebala hore ho na le lintlha tse ling tse ngata tse molemo lithutong tsa Jesu tse sieo lethathamong lena. Ke hobane’ng ha u sa batle tse ling tsa tsona ’me u leke ho li sebelisa?—Bafilipi 3:16.
22. Ho latela lithuto tsa Jesu ho ka fella ka’ng, empa ke karolo efe e eketsehileng e hlokang ho ithutoa?
22 U ka bona hore joko ea Jesu, le hoja e e-na le boima bo itseng, e mosa e le kannete. Mojaro oa lithuto tsa hae le oa borutuoa o bobebe. Ka mor’a phihlelo ea hae ea lilemo tse fetang 60, moapostola Johanne, e leng motsoalle ea ratoang oa Jesu, o ile a lumellana le sena, a re: “Se boleloang ke lerato la Molimo ke sena, hore re boloke litaelo tsa hae; leha ho le joalo litaelo tsa hae ha li boima.” (1 Johanne 5:3) U ka kholiseha ka tsela e tšoanang. Ha u sebelisa lithuto tsa Jesu halelele, u tla fumana ka ho eketsehileng hore lintho tse imetsang likelello tsa batho ba bangata bophelong ha li na ho u tšoenya haholo. U tla bona hore u imolohile haholo. (Pesaleme ea 34:8) Leha ho le joalo, ho na le karolo e ’ngoe ea joko e mosa ea Jesu eo ho hlokahalang hore u e hlahlobe. Jesu o ile a bolela hore o boetse o “na le maikutlo a bonolo ’me [o] ikokobelitse pelong.” Seo se kena kae tabeng ea ho ithuta ho Jesu le ea ho mo etsisa? Ke seo re tla buisana ka sona sehloohong se latelang.—Matheu 11:29.
U ka Araba Joang?
•Ke hobane’ng ha re lokela ho lebella thuso ho Jesu ha re batla hore re se ke ra imeloa haholo likelellong?
•Joko e ne e tšoantšetsa eng, hona hobane’ng?
•Ke hobane’ng ha Jesu a ile a memela batho ho jara joko ea hae?
•U ka khatholoha moeeng joang?
[Ntlha e Qolotsoeng e leqepheng la 14]
Temana ea selemo ea Lipaki tsa Jehova selemong sa 2002 e tla ba e reng: “Tloong ho ’na, . . . ’me ke tla le khatholla.”—Matheu 11:28.
[Lebokose/Setšoantšo se leqepheng la 12, 13]
Lithuto Tse Tla U Thusa
Ke lintho life tse molemo tseo u ka li fumanang ho Matheu khaolo ea 5 ho ea ho ea 7? Likhaolo tsena li na le lithuto tse fanoeng leralleng le leng la Galilea ke Mosuoe e Moholo, Jesu. Re kōpa hore u bale litemana tse bontšitsoeng ka tlaase, u sebelisa Bibele ea hao, ’me u ipotse lipotso tse loketseng.
1. 5:3-9 Litemana tsee li nthuta eng ka boikutlo ba ka ka kakaretso? Nka sebeletsa ho ba le thabo e eketsehileng joang? Nka ela hloko litlhoko tsa ka tsa moea haholoanyane joang?
2. 5:25, 26 Ke eng e molemo ho feta ho etsisa moea oa ho tsekisana oo ba bangata ba nang le oona?—Luka 12:58, 59.
3. 5:27-30 Mantsoe a Jesu a totobatsa eng tabeng ea ho lora u shebile litabeng tsa lerato? Ho qoba see ho ka eketsa thabo ea ka le khotso ea ka ea kelello joang?
4. 5:38-42 Ke hobane’ng ha ke lokela ho leka ho qoba bohale bo feteletseng bo khothalletsoang ke mokhatlo oa batho oa kajeno?
5. 5:43-48 Nka rua molemo joang ka ho tloaelana hamolemo le batho bao ke nang le litšebelisano le bona bao e ka ’nang eaba ke ne ke nka hore ke lira? See se ka ’na sa fokotsa khohlano joang?
6. 6:14, 15 Haeba ka linako tse ling ke sa tšoarele, na ebe mohlomong see se bakoa ke mohono kapa ho boloka sekhopi? Nka fetola boemo joang?
7. 6:16-18 Na ke rata ho ameha haholo ka ponahalo ho feta seo ke leng sona botebong ba pelo ea ka? Ke eng eo ke lokelang ho e ela hloko haholo?
8. 6:19-32 Phello e ka ba efe haeba ke ameha haholo ka chelete le maruo? Ho nthusa hore ke bontše teka-tekano ntlheng ee, ke lokela ho nahana ka eng?
9. 7:1-5 Ke ikutloa joang ha ke le har’a batho ba nyatsa-nyatsang le ba tšoaeang liphoso ba bonang ba bang molato kamehla? Ke hobane’ng ha e le habohlokoa hore ke qobe ho ba joalo?
10. 7:7-11 Haeba ho hotle hore ke phehelle ha ke kōpa Molimo, na nka phehella le linthong tse ling bophelong?—Luka 11:5-13.
11. 7:12 Le hoja ke tseba molao oa ho etsa ba bang kamoo ke lakatsang ho etsoa kateng, ke sebelisa keletso ee hangata hakae litšebelisanong tsa ka le ba bang?
12. 7:24-27 Kaha ke ikarabella tseleng eo ke phelang ka eona, nka itokisetsa mathata le likhathatso tse boima hamolemo joang? Ke hobane’ng ha ke lokela ho nahana ka see hona joale?—Luka 6:46-49.
Lithuto tse eketsehileng tseo nka li hlahlobang:
13. 8:2, 3 Nka bontša qenehelo joang ho ba hlokang, joalokaha Jesu a ne a etsa khafetsa?
14. 9:9-38 Ho bontša mohau ho na le karolo efe bophelong ba ka, ’me nka o bontša haholoanyane joang?
15. 12:19 Ha ke ithuta boprofeta bo buang ka Jesu, na ke loanela ho qoba likhang tsa litlhōlisano?
16. 12:20, 21 Nka etsa molemo ofe ka hore ke se ke ka khahlapetsa ba bang ka mantsoe kapa ka liketso?
17. 12:34-37 Ke bua ka eng boholo ba nako? Kea tseba hore ha ke pepeta lamunu, ho tsoa lero la lamunu, kahoo ke hobane’ng ha ke lokela ho nahana ka se botebong ba ka, se ka pelong ea ka?—Mareka 7:20-23.
18. 15:4-6 Tlhalosong ea Jesu, ke eng seo ke se bonang mabapi le ho hlokomela ka lerato batho ba tsofetseng?
19. 19:13-15 Ho hlokahala hore ke iphe nako ea ho etsa’ng?
20. 20:25-28 Ke hobane’ng ha ho se na thuso ho sebelisa matla feela hobane u e-na le ’ona? Nka etsisa Jesu joang ntlheng ee?
Likhopolo tse eketsehileng, tse tlalehiloeng ke Mareka:
21. 4:24, 25 Ho na le bohlokoa bofe mokhoeng oo ke tšoarang ba bang ka oona?
22. 9:50 Haeba seo ke se buang le ho se etsa se le molemo, ebe ho ka hlaha liphello life tse molemo?
Qetellong, Luka o tlalehile lithuto tse latelang tse ’maloa:
23. 8:11, 14 Ha ke lumella matšoenyeho, maruo, le menyaka hore li laole bophelo ba ka, phello e ka ba eng?
24. 9:1-6 Le hoja Jesu a ne a e-na le matla a ho folisa ba kulang, o ne a etelletsa’ng pele?
25. 9:52-56 Na ke khopeha feela? Na ke qoba moea oa boiphetetso?
26. 9:62 Ke lokela ho nka boikarabelo ba ka ba ho bua ka ’Muso oa Molimo joang?
27. 10:29-37 Nka bontša joang hore ke moahelani, ha ke motho ea iphapanyang?
28. 11:33-36 Nka etsa liphetoho life e le hore nka phela ka mokhoa o bonolo?
29. 12:15 Ho na le kamano efe pakeng tsa bophelo le maruo?
30. 14:28-30 Ha ke ipha nako ea ho etsa liqeto ka hloko, nka qoba eng, ’me e le ka molemo ofe?
31. 16:10-12 Nka fumana melemo efe ka ho phela ka botšepehi?
[Litšoantšo tse leqepheng la 10]
Mosebetsi o bolokang bophelo tlas’a joko ea Jesu oa khatholla