Le ’ne le Bontše Molemo
“Litholoana tsa leseli li entsoe ka molemo oa mofuta o mong le o mong le ho loka le ’nete.”—BAEFESE 5:9.
1. Hona joale ba limilione ba bontša joang hore ba lumellana le Pesaleme ea 31:19?
MOLEMO o moholo ka ho fetisisa oo motho leha e le ofe a ka o etsang, ke ho tlotlisa Jehova. Kajeno, ba limilione ba etsa sena ka ho rorisa Molimo ka lebaka la molemo oa hae. Kaha re Lipaki tsa Jehova tse tšepahalang, re lumellana ka pelo eohle le mopesaleme ea ileng a bina a re: “Molemo oa hao o mongata hakaakang, oo u o boloketseng ba u tšabang!”—Pesaleme ea 31:19.
2, 3. Ho ne ho ka etsahala’ng haeba mosebetsi oa rōna oa ho etsa barutuoa o ne o sa tšehetsoa ke boitšoaro bo botle?
2 Tlhompho ea rōna e tebileng ho Jehova e re susumelletsa ho mo rorisa ka lebaka la molemo oa hae. E boetse e re susumelletsa ho ‘roka Jehova, ho mo boka le ho bua ka khanya ea borena ba hae.’ (Pesaleme ea 145:10-13) Ke ka lebaka leo re kopanelang ka cheseho mosebetsing oa ho bolela ka ’Muso le ho etsa barutuoa. (Matheu 24:14; 28:19, 20) Ha e le hantle, mosebetsi oa rōna oa ho bolela o tlameha ho tšehetsoa ke boitšoaro bo botle. Ha ho se joalo re ka etsa hore lebitso le halalelang la Jehova le rohakoe.
3 Batho ba bangata ba bolela hore ba rapela Molimo empa boitšoaro ba bona ha bo lumellane le melao e ngotsoeng ka Lentsoeng la hae le bululetsoeng. Tabeng ea ba bang ba neng ba sa phelele lipolelo tsa bona tsa hore ba etsa molemo, moapostola Pauluse o ile a ngola a re: “Na uena ea rutang e mong, ha u ithute? Uena ea bolelang hore ‘U se ke ua utsoa,’ na ua utsoa? Uena ea reng ‘U se ke ua feba,’ na ua feba? . . . ‘Lebitso la Molimo le ntse le nyefoloa ka lebaka la lōna har’a lichaba’; feela joalokaha ho ngoliloe.”—Baroma 2:21, 22, 24.
4. Boitšoaro ba rōna bo botle bo na le phello efe?
4 Re loanela hore lebitso la Jehova le tlotlisoe ka boitšoaro ba rōna bo botle ho e-na le ho etsa hore le rohakoe. Sena se na le phello e molemo ho ba ka ntle ho phutheho ea Bokreste. Har’a tse ling, se re thusa ho khutsisa bahanyetsi ba rōna. (1 Petrose 2:15) Ntho ea bohlokoa haholo, boitšoaro ba rōna bo botle bo hohela batho hore ba tle mokhatlong o hlophisitsoeng oa Jehova, e leng ho ba bulelang tsela ea hore ba mo tlotlise le hore ba fumane bophelo bo sa feleng.—Liketso 13:48.
5. Joale re lokela ho hlahloba lipotso life?
5 Kaha ha rea phethahala, re ka qoba boitšoaro bo ka ’nang ba hlompholla Jehova le ho khopisa ba batlang ’nete joang? Ka sebele, re ka atleha ho bontša molemo joang?
Tholoana ea Leseli
6. E meng ea ‘mesebetsi e sa beheng ea lefifi’ ke efe, empa ke litholoana life tse lokelang ho totobala har’a Bakreste?
6 Joaloka Bakreste ba inehetseng, re thabela ntho e ka re thusang ho qoba ‘mesebetsi e sa beheng ea lefifi.’ Mesebetsi ena e akarelletsa liketso tse hlomphollang Molimo tse kang ho qala leshano, ho utsoa, puo e nyefolang, puo e sa haheng mabapi le ho kopanela liphate, boitšoaro bo lihlong, mesoaso e nyonyehang le botahoa. (Baefese 4:25, 28, 31; 5:3, 4, 11, 12, 18) Ho e-na le ho kopanela mesebetsing e joalo, re ‘tsoela pele ho tsamaea joaloka bana ba leseli.’ Moapostola Pauluse o bolela hore “litholoana tsa leseli li entsoe ka molemo oa mofuta o mong le o mong le ho loka le ’nete.” (Baefese 5:8, 9) Kahoo, ntho e tla re thusa hore re tsoele pele ho bontša molemo ke ho tsamaea leseling. Empa leseli lee ke la mofuta ofe?
7. Re lokela ho etsa’ng e le hore re ’ne re bontše molemo?
7 Ho sa tsotellehe hore ha rea phethahala, re ka bontša molemo haeba re tsamaea leseling la moea. Mopesaleme o ile a bina a re: “Lentsoe la hao ke lebone la leoto la ka, ke leseli tseleng ea ka.” (Pesaleme ea 119:105) Haeba re batla hore re ’ne re bontše “litholoana tsa leseli” ka “molemo oa mofuta o mong le o mong,” re lokela hore re se phetse ho rua molemo leseling la moea le fumanoang Lentsoeng la Molimo le le hlahlojoang ka hloko ho lingoliloeng tsa Bakreste, ’me ho buisanoa ka lona kamehla libokeng tsa rōna tsa borapeli. (Luka 12:42; Baroma 15:4; Baheberu 10:24, 25) Ho boetse ho hlokahala hore re falimehele mohlala le lithuto tsa Jesu Kreste, “leseli la lefatše” le “ponahatso ea khanya ea [Jehova].”—Johanne 8:12; Baheberu 1:1-3.
Ke Tholoana ea Moea
8. Ke hobane’ng ha re ka khona ho bontša molemo?
8 Ha ho pelaelo hore leseli la moea le re thusa ho bontša molemo. Ho phaella moo, re khona ho bontša molemo hobane re tsamaisoa ke moea o halalelang oa Molimo, kapa matla a hae a sebetsang. Molemo ke karolo ea “litholoana tsa moea.” (Bagalata 5:22, 23) Haeba re ikokobeletsa tataiso ea moea o halalelang oa Jehova, o tla hlahisa ka ho rōna tholoana ea oona e babatsehang ea molemo.
9. Re ka sebetsa tumellanong le mantsoe a Jesu a tlalehiloeng ho Luka 11:9-13 joang?
9 Ha re e-na le takatso e matla ea ho khahlisa Jehova ka ho bontša tholoana ena ea moea ea molemo, hoo ho tla re susumelletsa ho sebetsa tumellanong le mantsoe a Jesu, a reng: “Le ’ne le kōpe, ’me le tla fuoa; le ’ne le batle, ’me le tla fumana; le ’ne le kokote, ’me le tla buleloa. Etsoe e mong le e mong ea kōpang oa amohela, ’me e mong le e mong ea batlang oa fumana, ’me e mong le e mong ea kokotang o tla buleloa. Ka sebele, ke ntate ofe har’a lōna eo, haeba mora oa hae a kōpa tlhapi, mohlomong a ka mo nehang noha ho e-na le tlhapi? Kapa haeba a boetse a kōpa lehe, a tla mo neha phepheng? Ka hona, haeba lōna, le hoja le [sa phethahala ’me ha ho bapisoa le] le khopo, le tseba ho fa bana ba lōna limpho tse ntle, Ntate ea leholimong o tla fana ka moea o halalelang hakaakang ho ba mo kōpang!” (Luka 11:9-13) A re lateleng keletso ea Jesu ka ho rapella moea oa Jehova e le hore re ka ’na ra tsoela pele ho bontša tholoana ea oona ea molemo.
‘Le ’ne le Etse Molemo’
10. Ho Exoda 34:6, 7 ho boletsoe litšobotsi life tsa molemo oa Jehova?
10 Ka leseli la moea le tsoang Lentsoeng la Molimo le ka thuso ea moea o halalelang oa Molimo, re ka tsoela pele ‘ho ’na re etsa molemo.’ (Baroma 13:3) Ka thuto ea kamehla ea Bibele, re ithuta ka ho eketsehileng kamoo re ka etsisang molemo oa Jehova kateng. Sehloohong se fetileng re hlahlobile litšobotsi tsa molemo oa Molimo tse boletsoeng polelong e neng e lebisitsoe ho Moshe e tlalehiloeng ho Exoda 34:6, 7, moo re balang: “Jehova, Jehova, Molimo ea mohau le ea mosa, ea liehang ho halefa le ea tletseng mosa o lerato le ’nete, ea bolokelang ba likete mosa o lerato, ea tšoarelang phoso le tlōlo le sebe, empa ho hang a ke ke a lokolla kotlong.” Ha re shebisisa litšobotsi tsena tsa molemo oa Jehova re tla thusoa ho ‘’na re etsa molemo.’
11. Ho tseba hore Jehova o mohau ebile o mosa ho lokela ho re ama joang?
11 Polelo ena ea Molimo e re lemosa hore ho hlokahala hore re etsise Jehova ka ho ba mohau le ho ba mosa. Jesu o itse: “Ho thaba ba mohau, kaha ba tla bontšoa mohau.” (Matheu 5:7; Luka 6:36) Kaha rea hlokomela hore Jehova o mohau, re susumelletseha ho ba mohau le ho ba mosa litšebelisanong tsa rōna le ba bang, ho akarelletsa bao re ba rutang. Sena se lumellana le keletso ea Pauluse, e reng: “Seo le se buang kamehla e ke e be se nang le mosa, se nōkiloeng ka letsoai, e le hore le tsebe kamoo le tšoanelang ho fana ka karabo ho e mong le e mong.”—Bakolose 4:6.
12. (a) Kaha Molimo o lieha ho halefa, re lokela ho tšoara ba bang joang? (b) Mosa o lerato oa Jehova o re susumelletsa ho etsa’ng?
12 Kaha Molimo o lieha ho halefa, takatso ea hore re ‘’ne re etse molemo’ e re susumelletsa hore re mamelle liphoso tse nyenyane tsa balumeli-’moho le rōna le hore re shebe haholo litšoaneleho tsa bona tse ntle. (Matheu 7:5; Jakobo 1:19) Mosa o lerato oa Jehova o re susumelletsa ho bontša lerato le tšepahalang leha re le tlas’a maemo a lekang ka ho fetisisa. Sena se rateha ka ho fetisisa.—Liproverbia 19:22.
13. Re lokela ho bontša joang hore Jehova o ‘tletse ’nete’?
13 Kaha Ntat’a rōna oa leholimo o ‘tletse ’nete,’ re batla ‘ho ipuella hore re basebeletsi ba hae ka puo ea ’nete.’ (2 Bakorinthe 6:3-7) Har’a lintho tse supileng tseo Jehova a li nyonyang ke “leleme la bohata” le “paki ea bohata e phatlalatsang mashano.” (Liproverbia 6:16-19) Kahoo, takatso ea rōna ea ho khahlisa Molimo e re susumelletsa ho ‘lahla leshano, ’me re bue ’nete.’ (Baefese 4:25) E se eka re ke ke ra hlōleha ho bontša molemo ka tsela ena ea bohlokoa.
14. Ke hobane’ng ha re lokela ho tšoarela?
14 Hape, polelo ea Molimo ho Moshe e lokela ho re susumelletsa ho tšoarela, hobane Jehova o itokiselitse ho tšoarela. (Matheu 6:14, 15) Ha e le hantle, Jehova o hlile o otla baetsalibe ba sa bakeng. Kahoo, tabeng ea ho boloka phutheho e hloekile moeeng, re lokela ho boloka melao ea hae ea molemo.—Levitike 5:1; 1 Bakorinthe 5:11, 12; 1 Timothea 5:22.
“Le Lule le Lebetse ka Tieo”
15, 16. Keletso ea Pauluse e tlalehiloeng ho Baefese 5:15-19 e ka re thusa hore re ’ne re etse molemo joang?
15 E le hore re phehelle ho bontša molemo ho sa tsotellehe bobe bo re potolohileng, ho hlokahala hore re tlale moea oa Molimo le hore re lise metsamao ea rōna. Kahoo, Pauluse o ile a phehella Bakreste ba Efese a re: “Le lule le lebetse ka tieo hore kamoo le tsamaeang kateng hase joaloka batho ba seng bohlale empa ke joaloka ba bohlale, le ithekele nako e loketseng, hobane matsatsi a khopo. Ka lebaka lena khaotsang ho ba ba se nang kahlolo e molemo, empa le tsoele pele ho lemoha seo thato ea Jehova e leng sona. Hape, le se ke la tahoa ke veine, eo ho eona ho nang le ho inehella litakatso tsa nama, empa le ’ne le tlale moea, le buisane ka lipesaleme le lithoriso ho Molimo le lipina tsa moea, le binele Jehova ’me le tsamaisane le ’mino ka lipelong tsa lōna.” (Baefese 5:15-19) Ha ho pelaelo hore keletso ena e re loketse matsatsing ana a ho qetela ao ho leng thata ho sebetsana le ’ona.—2 Timothea 3:1.
16 E le hore re ’ne re etse molemo, re tlameha ho lebela ka tieo hore re tsamaea joaloka ba bontšang bohlale ba bomolimo. (Jakobo 3:17) Re lokela ho qoba libe tse feteletseng ’me re lokela ho tlala moea o halalelang, re o lumelle hore o re tataise. (Bagalata 5:19-25) Ka ho sebelisa taeo ea moea e fanoang libokeng, likopanong tse khōlō le tse nyenyane tsa Bokreste, re ka tsoela pele re etsa se molemo. Mantsoe a Pauluse ho Baefese a ka re hopotsa hore libokeng tsa rōna tse ngata tsa borapeli re rua molemo ha re bina ho tloha pelong “lipina tsa moea”—tseo tse ngata tsa tsona li buang haholo ka litšoaneleho tsa moea, tse kang molemo.
17. Haeba maemo a bona a ba thibela ho ba teng libokeng kamehla, Bakreste ba kulang haholo ba ka kholiseha ka eng?
17 Ho thoe’ng ka balumeli-’moho le rōna ba sitoang ho ba teng kamehla libokeng tsa Bokreste ka lebaka la ho tšoaroa ke maloetse a tebileng a sa foleng? Ba ka ’na ba ikutloa ba feletsoe ke matla hobane ba sitoa ho rapela Jehova kamehla ka ho toba ba e-na le bara le barali babo bona ba moea. Empa ba ka kholiseha hore Jehova o utloisisa maemo a bona, ’me o tla ba boloka leseling, a ba fe moea oa hae o halalelang le ho ba thusa hore ba ’ne ba etse se molemo.—Esaia 57:15.
18. Ke eng e tla re thusa ho phehella tsela ea molemo?
18 Ha re phehella molemo ho hlokahala hore re lise hore na metsoalle ea rōna ke bo-mang le hore re furalle e “hlokang lerato la se molemo.” (2 Timothea 3:2-5; 1 Bakorinthe 15:33) Ho sebelisa keletso eo ho re thusa ho qoba ho “soabisa moea o halalelang oa Molimo” ka ho etsa lintho tse khahlanong le ketello-pele ea oona. (Baefese 4:30) Ho feta moo, re thusoa ho etsa se molemo haeba re le metsoalle ea bao bophelo ba bona bo bontšang hore ba rata molemo le hore ba tsamaisoa ke moea o halalelang oa Jehova.—Amose 5:15; Baroma 8:14; Bagalata 5:18.
Molemo o Beha Litholoana Tse Ntle
19-21. Pheta liketsahalo tse bontšang phello ea ho bontša molemo.
19 Ho tsamaea leseling la moea, ho ikokobeletsa ho tsamaisoa ke moea oa Molimo le ho lisa metsamao ea rōna, li tla re thusa ho qoba se sebe le ho re thusa hore ‘’re ’ne re etse molemo.’ Ka lehlakoreng le leng, sena se ka hlahisa litholoana tse ntle. Nahana ka mohlala oa Zongezile, e mong oa Lipaki tsa Jehova tsa Afrika Boroa. Hoseng ho hong ha a e-ea sekolong, o ile a hlahloba cheletana ea hae bankeng hore na ke bokae. Setlankana sa mochine oa chelete ka phoso se ile sa bontša hore o na le R42 000 ka holimo ho chelete eo a nang le eona. Molebeli e mong oa banka le ba bang ba ile ba mo phehella hore a ntše chelete eo ’me a e’o ikenyetsa eona bankeng e ’ngoe. Banyalani ba Lipaki bao a neng a lula le bona ke bona feela ba ileng ba mo babatsa ka hore ebe ha aa ka a ntša chelete eo.
20 Letsatsing le latelang la har’a beke, Zongezile o ile a tlaleha phoso ena bankeng. Ho ile ha fumanoa hore nomoro ea hae ea banka e tšoana le ea mohoebi e mong ea ruileng eo ka phoso a neng a kentse chelete eo ak’haonteng esele. Mohoebi enoa ha a makaletse hore Zongezile ha aa sebelisa chelete ena ho hang, o ile a mo botsa: “U kena kereke efe?” Zongezile o ile a hlalosa hore ke e mong oa Lipaki tsa Jehova. O ile a babatsoa ke baokameli ba banka, ba ileng ba re: “Ekare batho bohle ba ka be ba tšepahala joaloka Lipaki tsa Jehova.” Ke ’nete hore liketso tsa botšepehi le molemo li ka etsa hore ba bang ba tlotlise Jehova.—Baheberu 13:18.
21 Ha ho hlokahale hore liketso tse molemo e be tse hlahelletseng e le hore li be le phello e ntle. Ha re etsa mohlala: Mocha e mong oa Paki ea sebetsang e le moevangeli oa nako e tletseng sehlekehlekeng se seng sa Samoa, o ne a tlameha ho ea sepetleleng sa moo. Batho ba ne ba letetse ho bona ngaka, ’me Paki ena e ile ea hlokomela hore mosali-moholo ea pel’a eona o kula haholo. E ile ea lokisetsa hore mofumahali eo a nke sebaka sa eona e le hore a ka hlokomeloa kapele. Ketsahalong e ’ngoe hamorao, Paki ena e ile ea kopana le mosali-moholo eo ’marakeng. O ile a e hopola le ketso ea eona e molemo sepetlele. O ile a re: “Joale kea tseba hore Lipaki tsa Jehova kannete li rata baahelani ba tsona.” Le hoja pele ho mona a ne a sa mamele molaetsa oa ’Muso, molemo oo a ileng a o bontšoa ke Paki ena o bile le phello e molemo. O ile a amohela tlhahiso ea hore a ka rutoa Bibele lapeng ’me a qala ho fumana tsebo ea Lentsoe la Molimo.
22. Tsela e ’ngoe e khethehileng haholo ea hore ‘re ’ne re etse molemo’ ke efe?
22 Mohlomong u ka pheta liketsahalo tse bontšang bohlokoa ba ho bontša molemo. Tsela e ’ngoe e khethehileng haholo ea hore ‘re ’ne re etse molemo,’ ke ho kopanela kamehla ho boleleng litaba tse molemo tsa ’Muso oa Molimo. (Matheu 24:14) E se eka ka cheseho re ka ’na ra tsoela pele ho kopanela mosebetsing ona oa bohlokoa, re hlokomela hore ke tsela e ’ngoe ea ho etsa molemo, haholo-holo ho ba arabelang hamolemo. Ntho ea bohlokoa ka ho fetisisa, tšebeletso eo re e etsang hammoho le boitšoaro bo botle li tlotlisa Jehova, e leng eena mohloli oa molemo.—Matheu 19:16, 17.
Le ’ne le ‘Sebetse se Molemo’
23. Ke hobane’ng ha tšebeletso ea Bokreste e le mosebetsi o molemo?
23 Ha ho pelaelo hore tšebeletso eo re e etsang ke mosebetsi o molemo. E ka fella ka poloko ea rōna le ea ba mamelang molaetsa oa Bibele ’me ka hoo ba kena tseleng e isang bophelong bo sa feleng. (Matheu 7:13, 14; 1 Timothea 4:16) Joale, ha re tobane le ho etsa liqeto, takatso ea ho etsa se molemo e ka ’na ea re etsa hore re ipotse: ‘Qeto ee e tla ama mosebetsi oa ka oa ho bolela ka ’Muso joang? Na tsela eo ke e nahanang e hlile e molemo? Na e tla nthusa hore ke thuse ba bang ho amohela “litaba tse molemo tse sa feleng” le hore ba be le kamano e haufi le Jehova Molimo?’ (Tšenolo 14:6) Thabo e khōlō e tla hlahisoa ke qeto ea ho ntšetsa pele lithahasello tsa ’Muso.—Matheu 6:33; Liketso 20:35.
24, 25. Litsela tse ling tseo re ka etsang molemo ka tsona ka phuthehong ke life, ’me re ka kholiseha ka eng ha re ntse re bontša molemo?
24 E se eka re ke ke ra halala liphello tse ntle tsa molemo. Re ka tsoela pele ho bontša molemo ka ho tšehetsa phutheho ea Bokreste le ka ho etsa se matleng a rōna ho hlokomela lithahasello tsa eona le boiketlo ba eona. Ha ho pelaelo hore re etsa se molemo ha re e-ba teng kamehla libokeng tsa Bokreste le ha re nka karolo ho tsona. Boteng ba rōna feela ke khothatso ho barapeli-’moho le rōna, ’me litlhaloso tsa rōna tse lokiselitsoeng hantle li ba matlafatsa moeeng. Re boetse re etsa molemo ha re sebelisa matlotlo a rōna ho hlokomela Holo ea ’Muso le ha re thusa ho e boloka e hloekile. (2 Marena 22:3-7; 2 Bakorinthe 9:6, 7) Ka sebele, “hafeela re sa na le nako e loketseng, a re sebetseng se molemo ho bohle, empa haholo-holo ho ba amanang le rōna tumelong.”—Bagalata 6:10.
25 Re ke ke ra tseba esale pele boemo bo bong le bo bong bo ka hlokang hore re bontše molemo. Ha re ntse re thulana le mathata a macha, a re batleng tsebo ka Mangolong, re rapelle moea o halalelang oa Jehova, ’me re ikitlaelletse ho phetha thato ea hae e molemo le e phethahetseng. (Baroma 2:9, 10; 12:2) Re ka kholiseha hore Jehova o tla re hlohonolofatsa haholo ha re ntse re bontša molemo.
U ka Araba Joang?
• Re ka finyella molemo o moholo ka ho fetisisa joang?
• Ke hobane’ng ha molemo o bitsoa ‘tholoana ea leseli’?
• Ke hobane’ng ha molemo o bitsoa ‘tholoana ea moea’?
• Boitšoaro ba rōna bo botle bo na le phello efe?
[Setšoantšo se leqepheng la 17]
Lentsoe la Molimo le moea oa hae o halalelang li re thusa ho bontša molemo
[Setšoantšo se leqepheng la 18]
Ho bontša molemo ho hlahisa litholoana tse ntle