Leseli la Molimo le Leleka Lefifi!

“Ke Jehova ea khantšang lefifi la ka.”—2 SAMUELE 22:29.

1. Leseli le amana joang le bophelo?

“MOLIMO a re: ‘Leseli le ke le be teng.’ Joale leseli la e-ba teng.” (Genese 1:3) Ka mantsoe ana a bohlokoa, tlaleho ea pōpo e ho Genese e tsebahatsa hore Jehova ke mohloli oa leseli, leo ntle ho lona ho neng ho ke ke ha e-ba le bophelo lefatšeng. Hape, Jehova ke mohloli oa leseli la moea, le hlokahalang bakeng sa ho re tataisa bophelong. (Pesaleme ea 43:3) Morena Davida o ile a bontša kamano e haufi pakeng tsa leseli la moea le bophelo ha a ngola: “Mohloli oa bophelo o ho uena; ka leseli le tsoang ho uena re ka bona leseli.”—Pesaleme ea 36:9.

2. Joalokaha Pauluse a bontšitse, leseli le amana haufi-ufi le eng?

² Lilemo tse ka bang 1 000 ka mor’a mehla ea Davida, moapostola Pauluse o ile a bua ka tlaleho ea pōpo. Ha a ngolla phutheho ea Bokreste e Korinthe, o ile a re: “Molimo ke eena ea ileng a re: ‘Leseli le ke le khanye lefifing.’” Joale Pauluse o ile a bontša hore leseli la moea le amana haufi-ufi le tsebo e tsoang ho Jehova ha a phaella: “O khantšelitse lipelo tsa rōna ho etsa hore li khanye ka tsebo e khanyang ea Molimo ka sefahleho sa Kreste.” (2 Bakorinthe 4:6) Leseli lee le fihla joang ho rōna?

Bibele ke Mocha oa Leseli

3. Ka Bibele, Jehova o fana ka leseli lefe?

³ Kofuto e khōlō eo Jehova a fanang ka leseli la moea ka eona ke Lentsoe la hae le bululetsoeng, Bibele. Kahoo ha re ithuta Bibele ’me re rua tsebo e tsoang ho Molimo, re lumella hore leseli la hae le re khanyetse. Ka Bibele, Jehova o chabisa merero ea hae ’me o re bolella kamoo re ka etsang thato ea hae kateng. Sena se etsa hore bophelo ba rōna bo be le morero ’me se re thusa ho finyella litlhoko tsa rōna tsa moea. (Moeklesia 12:1; Matheu 5:3) Nakong eo Jesu a neng a qotsa Molao oa Moshe ka eona, o ile a totobatsa hore re lokela ho hlokomela litlhoko tsa rōna tsa moea, a re: “Ho ngoliloe, ‘Motho a ke ke a phela ka bohobe feela, empa o tla phela ka polelo e ’ngoe le e ’ngoe e tsoang molomong oa Jehova.’”—Matheu 4:4; Deuteronoma 8:3.

4. Jesu ke “leseli la lefatše” ka tsela efe?

⁴ Jesu o amana haufi-ufi le leseli la moea. Ha e le hantle, o ile a ipitsa “leseli la lefatše” ’me a re: “Ea ntatelang ho hang a ke ke a tsamaea lefifing, empa o tla ba le leseli la bophelo.” (Johanne 8:12) Polelo ena e re thusa hore re utloisise karolo ea bohlokoa eo Jesu a e phethang ho fetisetseng ’nete ea Jehova ho batho. E le hore re qobe lefifi ’me re tsamaee leseling la Molimo, re lokela ho mamela sohle seo Jesu a se buang ’me re latele haufi-ufi mohlala oa hae le lithuto tsa hae tse tlalehiloeng ka Bibeleng.

5. Balateli ba Jesu ba ile ba e-ba le boikarabelo bofe ka mor’a lefu la hae?

⁵ Matsatsi a seng makae pele ho lefu la hae, Jesu o ile a boela a ipitsa leseli, ’me a re ho barutuoa ba hae: “Leseli le tla ba har’a lōna ka nakoana e eketsehileng. Tsamaeang ha le sa na le leseli, e le hore lefifi le se ke la le hlōla ka matla; ’me ea tsamaeang lefifing ha a tsebe moo a eang. Ha le sa na le leseli, le bontše tumelo leseling, e le hore le be bara ba leseli.” (Johanne 12:35, 36) Ba ileng ba fetoha bara ba leseli ba ile ba ithuta “mohlala oa mantsoe a phelisang hantle” a Bibele. (2 Timothea 1:13, 14) Joale ba ile ba sebelisa mantsoe ana a phelisang hantle ho ntša batho ba lipelo li tšepahalang lefifing ho ba hulela leseling la Molimo.

6. e fumana ’nete efe ea motheo ka leseli le lefifi ho 1 Johanne 1:5?

⁶ Moapostola Johanne o ile a ngola: “Molimo ke leseli ’me ha ho na lefifi ho hang bonngoeng le eena.” (1 Johanne 1:5) Hlokomela phapang e etsoang mona pakeng tsa leseli le lefifi. Leseli la moea le tsoa ho Jehova, ’me lefifi la moea le ke ke la amahanngoa le eena. Kahoo, mohloli oa lefifi ke mang?

Mohloli oa Lefifi la Moea

7. Ke mang ea susumetsang lefifi la moea la lefatše, hona o na le tšusumetso efe?

⁷ Moapostola Pauluse o ile a bua ka “molimo oa tsamaiso ena ea lintho.” Polelong ena o ne a bua ka Satane Diabolose. O ile a tsoela pele ho bolela hore enoa ‘o foufalitse likelello tsa ba sa lumelang, e le hore khanya ea litaba tse molemo tse khanyang tse mabapi le Kreste, eo e leng setšoantšo sa Molimo, e se ke ea khanya.’ (2 Bakorinthe 4:4) Ba bangata ba bolela hore ba lumela ho Molimo; leha ho le joalo, ba ntseng ba eketseha ka palo har’a bona ha ba lumele hore Diabolose o teng. Hobane’ng? Hobane ha baa ikemisetsa ho amohela hore ho ka ba teng matla a itseng a mabe, a phahametseng motho, le a ka susumetsang tsela eo ba nahanang ka eona. Leha ho le joalo, joalokaha Pauluse a bontša, ehlile Diabolose o teng, ’me o susumetsa batho e le hore ba se ke ba bona leseli la ’nete. Matla a Satane a ho susumetsa monahano oa batho a senoha boprofeteng bo mo hlalosang e le ea “khelosang lefatše lohle leo ho ahiloeng ho lona.” (Tšenolo 12:9) Ka lebaka la mesebetsi ea Satane, boemo boo moprofeta Esaia a ileng a bo bolela esale pele hona joale bo aparetse moloko oohle oa batho ntle ho ba sebeletsang Jehova: “Bona! lefifi le tla koahela lefatše, ’me botšo bo boholo bo koahele lichaba.”—Esaia 60:2.

8. Ba lefifing la moea ba bontša ka litsela life hore ba ferekane?

⁸ Ha ho letho leo motho a ka le bonang lefifing le letšo-letšo. O lahleha habonolo kapa a ferekane. Ka ho tšoanang, ba lefifing la moea ba haelloa ke kutloisiso ’me ka potlako baa ferekana moeeng. Ba ka lahleheloa ke ho khetholla pakeng tsa ’nete le leshano, botle le bobe. Moprofeta Esaia o ile a bua ka ba leng lefifing le joalo ha a ne a ngola: “Ho malimabe ba reng botle ke bobe le bobe ke botle, ba behang lefifi sebakeng sa khanya le khanya sebakeng sa lefifi, ba behang ho baba sebakeng sa monate le monate sebakeng sa ho baba!” (Esaia 5:20) Ba lulang lefifing ba susumetsoa ke molimo oa lefifi, Satane Diabolose, ka lebaka leo, ba arohile mohloling oa leseli le bophelo.—Baefese 4:17-19.

Phephetso ea ho Tloha Lefifing ho ea Leseling

9. Hlalosa kamoo bafosi ba hoheloang ke lefifi kateng ka kutloisiso ea sebele le ea moea.

⁹ Jobo ea tšepahalang o ile a bontša seo lefifi la sebele le hohelang bafosi ka sona ha a re: “Ha e le leihlo la mofebi, le lebeletse lefifi la shoalane, le re, ‘Ha ho leihlo le tla mpona!’ O ikoahela sefahleho ka lesira.” (Jobo 24:15) Bafosi ba boetse ba lefifing la moea, ’me lefifi le joalo le ka ba matla haholo. Moapostola Pauluse o ile a re boitšoaro bo bobe ba botona le botšehali, bosholu, meharo, botahoa, mahlapa le boqhekelli ke lintho tse tloaelehileng har’a ba tšoasitsoeng lefifing leo. Empa bohle ba tlang leseling la Lentsoe la Molimo ba ka fetoha. Lengolong la hae le eang ho Bakorinthe, Pauluse o hlakisa hore ho ka khoneha hore ho etsoe phetoho e joalo. Bakreste ba bangata ba Korinthe ba ne ba tloaetse ho etsa mesebetsi ea lefifi, leha ho le joalo, Pauluse o ile a re ho bona: “Empa le hlatsoitsoe hore le hloeke, empa le halalelitsoe, empa ho boletsoe hore le lokile ka lebitso la Morena oa rōna Jesu Kreste le ka moea oa Molimo oa rōna.”—1 Bakorinthe 6:9-11.

10, 11. (a) Jesu o ile a nahanela monna eo a ileng a mo thusa hore a bone joang? (b) Ke hobane’ng haese ba bangata ba khethang leseli?

¹⁰ Ha motho a tsoa lefifing le letšo-letšo ’me a kena leseling, ho ka etsahala hore mahlo a hae a nke nako e itseng hore a tloaele khanya. Ha Jesu a le Bethsaida, o ile a folisa monna oa sefofu empa ka mosa o ile a etsa joalo butle-butle. “A tšoara monna ea foufetseng ka letsoho, a mo isa ka ntle ho motsana, ’me, ha a mo tšoetse ka mathe mahlong, a beha matsoho holim’a hae ’me a qala ho mo botsa: ‘Na ho na le seo u se bonang?’ Eaba monna eo o phahamisa mahlo ’me o qala ho re: ‘Ke bona batho, hobane ke hlokomela se bonahalang eka ke lifate, empa lia tsamaea.’ Joale a boela a beha matsoho mahlong a monna eo, ’me monna eo a bona ka ho hlaka, ’me a tsosolosoa, ’me o ne a bona ntho e ’ngoe le e ’ngoe ka mokhoa o hlakileng.” (Mareka 8:23-25) Ho ka etsahala hore ebe Jesu o ile a etsa hore monna enoa a bone butle-butle e le hore a ka tloaela khanya e fahlang ea letsatsi. Re ka inahanela hore na monna eo o ile a thaba hakaakang ha a se a khona ho bona.

¹¹ Leha ho le joalo, thabo ea monna eo e fetoa ke thabo ea ba thusoang ho tsoa butle-butle lefifing la moea ho kena leseling la ’nete. Ha re bona thabo ea bona, re ka ’na ra ipotsa hore na ke hobane’ng haese ba bangata ba hoheloang ke leseli. Jesu o fana ka lebaka: “Joale ona ke motheo bakeng sa kahlolo, hore leseli le tlile lefatšeng empa batho ba ratile lefifi ho e-na le leseli, kaha mesebetsi ea bona e ne e le khopo. Etsoe ea tloaetseng ho etsa lintho tse mpe o hloile leseli ’me ha a tle leseling, e le hore mesebetsi ea hae e se ke ea khalemeloa.” (Johanne 3:19, 20) E, ba bangata ba rata ho etsa “lintho tse mpe”—tse kang boitšoaro bo bobe, khatello, ho bua leshano, ho qhekella le ho utsoa—’me lefifi la moea la Satane ke tikoloho e phethahetseng bakeng sa hore ba etse seo ba se ratang.

Ho Hatela Pele Leseling

12. Re ruile molemo ka litsela life ka ho tla leseling?

¹² Kaha re tsebile leseli, re bone liphetoho life ho rōna? Ka linako tse ling ho molemo ho hetla le ho hlahloba khatelo-pele ea moea eo re e entseng. Re lahlile mekhoa efe e mebe? Re lokisitse mathata afe bophelong ba rōna? Merero ea rōna bakeng sa bokamoso e fetohile joang? Ka matla a Jehova le ka thuso ea moea oa hae o halalelang, re ka tsoela pele ho etsa liphetoho bothong ba rōna le mokhoeng oa rōna oa ho nahana tse tla bontša hore re arabela leseling. (Baefese 4:23, 24) Pauluse o beha taba ka tsela ena: “Le kile la ba lefifi, empa joale le leseli mabapi le Morena. Tsoelang pele ho tsamaea joaloka bana ba leseli, kaha litholoana tsa leseli li entsoe ka molemo oa mofuta o mong le o mong le ho loka le ’nete.” (Baefese 5:8, 9) Ha re lumela ho tataisoa ke leseli la Jehova, re ba le tšepo le morero esita le ho thabisa bophelo ba ba re potolohileng. ’Me ho etsa liphetoho tse joalo ho thabisa pelo ea Jehova hakaakang!—Liproverbia 27:11.

13. Re ka bontša teboho ea rōna joang bakeng sa leseli la Jehova, hona ho hlokahala eng ho etsa joalo?

¹³ Ha re bonahatsa leseli la Jehova—re bolella litho tsa malapa a rōna, metsoalle le baahelani seo re ithutileng sona Bibeleng—re bontša teboho bakeng sa bophelo ba rōna bo thabileng. (Matheu 5:12-16; 24:14) Ba hanang ho mamela, ba khalemeloa ke boboleli ba rōna hammoho le tsela ea Bokreste eo re phelang ka eona e behang mohlala. Pauluse oa hlalosa: “Le ’ne le nepisise hore na ke sefe se amohelehang ho Morena; ’me le khaotse ho kopanela le bona mesebetsing e sa beheng ea lefifi, empa, ho e-na le hoo, le be le ba khalemele.” (Baefese 5:10, 11) Ho thusa ba bang hore ba tlohele lefifi ’me ba khethe leseli ho hloka hore re be sebete. Habohlokoa le ho feta, ho hlokahala kutloelo-bohloko le ho ameha ka ba bang le takatso e tlohang pelong ea ho abela ba bang leseli la ’nete molemong oa bona oa ka ho sa feleng.—Matheu 28:19, 20.

Hlokomela Maseli a Bohata!

14. Mabapi le leseli, re lokela ho ela hloko temoso efe?

¹⁴ Bosiu, batho ba leoatleng ba thabela ho bona leseli lefe kapa lefe. Linakong tse fetileng, ho ne ho besoa mollo mafikeng a maholo a Engelane ho bontša moo ho ka ipateloang lifefo teng. Basebetsi ba likepeng ba ne ba thabela hore maseli ana a ba tataisetse likoung tse sireletsehileng. Leha ho le joalo, mello e meng e ne e le ea bohata. Ho e-na le ho fihla koung, likepe tse ngata li ne li khelosoa ’me li soahlamana lebōpong le majoe, moo li neng li utsoetsoa thepa. Lefatšeng lena le tletseng thetso, re lokela ho ela hloko hore re se ke ra hoheloa ke maseli a bohata a ka re ekang hore bomoea ba rōna bo senyehe. Re bolelloa hore “Satane o ntse a iphetola lengeloi la leseli.” Ka ho tšoanang, bahlanka ba hae, ho kopanyelletsa le bakoenehi, ke “basebeletsi ba thetsang” ’me “le bona ba [ntse] ba iphetola basebeletsi ba ho loka.” Haeba re bulela mabaka a bohata a ba joalo sebaka, tšepo ea rōna Lentsoeng la Jehova la ’nete, Bibele, e ka fokola ’me tumelo ea rōna e ka fela.—2 Bakorinthe 11:13-15; 1 Timothea 1:19.

15. Re tla thusoa ke eng ho lula tseleng e isang bophelong?

¹⁵ Mopesaleme o ile a ngola: “Lentsoe la hao ke lebone la leoto la ka, ke leseli tseleng ea ka.” (Pesaleme ea 119:105) E, ho hlakile hore ‘tsela e patisaneng e isang bophelong’ e khantšoa ke Molimo oa rōna ea lerato, Jehova, “eo thato ea hae e leng hore batho ba mefuta eohle ba pholohe ’me ba fihle tsebong e nepahetseng ea ’nete.” (Matheu 7:14; 1 Timothea 2:4) Ho sebelisa melao ea Bibele ho tla re sireletsa hore re se ke ra hlahlathela tseleng eo e patisaneng ra ea litseleng tsa lefifi. Pauluse o ile a ngola: “Lengolo lohle le bululetsoe ke Molimo ’me le molemo bakeng sa ho ruta, bakeng sa ho khalemela, bakeng sa ho otlolla lintho, bakeng sa ho laea ka ho loka.” (2 Timothea 3:16) Ha re ntse re hōla moeeng, re rutoa ke Lentsoe la Molimo. Ka leseli la Lentsoe la Molimo re ka ikhalemela kapa ha ho hlokahala, ra khalemeloa ke balisa ba lerato ka phuthehong. Ka ho tšoanang, re ka otlolla lintho ’me ka boikokobetso ra amohela taeo ka ho loka e le hore re boloke mehato ea rōna tseleng e eang bophelong.

Tsamaea Leseling ka Kananelo

16. Re ka bontša kananelo joang bakeng sa tokisetso e hlollang ea Jehova ea leseli?

¹⁶ Re ka bontša kananelo joang bakeng sa tokisetso e hlollang ea Jehova ea leseli? Johanne khaolo ea 9 e re bolella hore ha Jesu a folisa monna ea tsoetsoeng a foufetse, monna eo o ile a susumelletseha hore a bontše kananelo ea hae. O ile a e bontša joang? O ile a lumela ho Jesu joalokaha e le Mora oa Molimo ’me a mo tsebahatsa phatlalatsa hore ke “moprofeta.” Ho feta moo, ka sebete o ile a bua pepenene khahlanong le ba neng ba leka ho nyenyefatsa mohlolo oa Jesu. (Johanne 9:17, 30-34) Moapostola Petrose o re litho tse tlotsitsoeng tsa phutheho ea Bokreste ke “batho bakeng sa letlotlo le khethehileng.” Hobane’ng? Hobane ba na le teboho e tšoanang le ea monna ea neng a tsoetsoe e le sefofu ’me a folisoa. Ba bontša hore ba ananela Jehova, Mothusi oa bona, ka ‘ho bolela hohle makhabane a hlomphehang a ea ba bitsitseng ho ba ntša lefifing ho ba kenya leseling la hae le hlollang.’ (1 Petrose 2:9; Bakolose 1:13) Ba nang le tšepo ea ho phela lefatšeng ba na le moea o joalo oa teboho, ’me ba tšehetsa barab’abo bona ba tlotsitsoeng ha ba bolela phatlalatsa “makhabane” a Jehova. Molimo o fa batho ba sa phethahalang tokelo e ke keng ea lekanngoa hakaakang!

17, 18. (a) Boikarabelo ba motho ka mong ke bofe? (b) Mokreste ka mong o khothalletsoa ho qoba eng ha a etsisa Timothea?

¹⁷ Kananelo e tlohang pelong bakeng sa leseli la ’nete ke ea bohlokoa. U hopole hore ha ho le ea mong oa rōna ea tsoaloang a tseba ’nete. Ba bang ba ithuta eona e se e le batho ba baholo, ’me ka potlako ba bona kamoo leseli le phahametseng lefifi kateng. Ba bang ba na le tokelo e khōlō ea ho hōlisoa ke batsoali ba tšabang Molimo. Ba joalo, ho ka ’na ha e-ba bonolo hore ba nkele leseli tlaase. Paki e ’ngoe eo batsoali ba eona ba neng ba sebeletsa Jehova pele e hlaha, ea lumela hore ho ile ha hlokahala hore e sebelise nako e ngata le boiteko hore e utloisise moelelo o feletseng le bohlokoa ba linnete tseo esale e li rutoa ho tloha bonyenyaneng. (2 Timothea 3:15) Ebang re banyenyane kapa re baholo, e mong le e mong oa rōna o tlameha ho hlaolela kananelo e tebileng bakeng sa ’nete eo Jehova a e senotseng.

¹⁸ Mohlankana Timothea o ne a rutiloe “lingoliloeng tse halalelang” ho tloha bonyenyaneng, empa e bile Mokreste ea hōlileng ka ho ikitlaetsa tšebeletsong. (2 Timothea 3:15) Sena se ile sa etsa hore a be boemong ba ho thusa moapostola Pauluse, ea ileng a mo khothatsa: “Etsa sohle se matleng a hao ho itlhahisa u amoheleha ho Molimo, mosebetsi eo ho seng letho leo a ka hlajoang ke lihlong ka lona, ea tšoarang lentsoe la ’nete ka nepo.” E se eka joaloka Timothea, bohle re ka qoba ho etsa ntho leha e le efe e ka re hlabisang lihlong—kapa ea etsa hore Jehova a hlajoe ke lihlong ka rōna!—2 Timothea 2:15.

19. (a) Joaloka Davida, bohle re lokela ho re’ng? (b) Ho tla tšohloa eng sehloohong se latelang?

¹⁹ Re na le mabaka a utloahalang a ho rorisa Jehova, ea re fileng leseli la ’nete ea hae. Joaloka Morena Davida, re re: “U lebone la ka, Jehova, ke Jehova ea khantšang lefifi la ka.” (2 Samuele 22:29) Leha ho le joalo, re ke ke ra ba monyebe, kaha sena se ka re khutlisetsa lefifing leo re lopolotsoeng ho lona. Ka lebaka leo, sehlooho se latelang se tla re thusa ho hlahlobisisa hore na ’nete ea Molimo ke ea bohlokoa hakae bophelong ba rōna.

U Ithutile Eng?

• Jehova o fana ka leseli la moea joang?

• Lefifi la moea le re potolohileng le fana ka phephetso efe?

• Re lokela ho qoba likotsi life?

• Re ka bontša kananelo ea rōna bakeng sa leseli la ’nete joang?

[Setšoantšo se leqepheng la 8]

Jehova ke mohloli oa leseli la sebele le la moea

[Setšoantšo se leqepheng la 10]

Joalokaha butle-butle Jesu a ile a folisa monna oa sefofu, ka tsela e tšoanang o re thusa hore re tsoe lefifing la moea

[Setšoantšo se leqepheng la 11]

Ho khelosoa ke maseli a bohata a Satane ho lebisa tšenyehong ea bomoea