Baahelani ba Molemo ke ba Bohlokoa
“Moahelani ea haufi o molemo ho feta mor’abo motho ea hōle.”—Liproverbia 27:10.
SETSEBI sa lekholong la pele la lilemo C.E. se ile sa botsa Jesu: “Ha e le hantle moahelani oa ka ke mang?” Jesu ha a araba ha aa ka a se bolella hore na moahelani oa sona ke mang, empa o ile a se bolella hore na ke eng e etsang hore motho e be moahelani oa ’nete. Mohlomong u tseba papiso ena ea Jesu. Ba bangata ba e tseba e le papiso ea Mosamaria ea molemo ’me e tlalehiloe Kosepeleng ea Luka. Jesu o ile a pheta pale ena tjena:
“Motho ea itseng o ne a theoha Jerusalema a ea Jeriko eaba o oela har’a masholu, a ileng a mo nkela tsohle ’me a mo otla, eaba aa tloha, a mo siea a le makhatheng a ho shoa. Joale, ha etsahala hore ebe moprista ea itseng o ne a theoha ka tsela eo, empa, ha a mo bona, a tsamaela ka lehlakoreng le leng. Ka ho tšoanang, Molevi le eena, ha a fihla sebakeng seo ’me a mo bona, a tsamaela ka lehlakoreng le leng le shebaneng le leo. Empa Mosamaria ea itseng ea neng a tsamaea ka tsela eo a fihla ho eena ’me, ha a mo bona, a susumetsoa ke khauho. Kahoo a mo atamela ’me a tlamisa maqeba a hae, a a tšela ka oli le veine. Joale a mo palamisa phoofolo ea hae ’me a mo tlisa ntlong ea baeti ’me a mo hlokomela. Letsatsing le hlahlamang a ntša lidenari tse peli, a li fa mohlokomeli oa ntlo eo ea baeti, eaba o re, ‘Mo hlokomele, ’me eng kapa eng eo u e sebelisang ntle ho sena, ke tla u buseletsa eona ha ke khutlela mona.’ Ke mang ho ba bararo baa eo ho uena a bonahalang eka o ikentse moahelani oa monna eo ea ileng a oela har’a masholu?”—Luka 10:29-36.
Ho hlakile hore setsebi sena se ile sa utloisisa moelelo oa papiso ena. Se sa qeaqee se ile sa bolela ka nepo hore na moahelani oa monna ea tsoileng likotsi ke mang, sa re: “Ea ileng a mo etsa ka mohau.” Eaba Jesu o re ho sona: “Tsamaea ’me u ’ne u etse ho tšoanang.” (Luka 10:37) Ke papiso e matla hakaakang e bontšang se boleloang ke ho ba moahelani oa ’nete! Papiso ea Jesu e ka ba ea etsa hore re ipotse: ‘’Na ke moahelani ea joang? Na morabe oa heso kapa bochaba bo susumetsa khetho ea ka ea baahelani? Na lintho tsee li lekanyetsa tlamo eo ke nang le eona ea ho thusa motho leha e le ofe ea bothateng? Na ke etsa boiteko bo eketsehileng ho ba moahelani ea molemo?’
Re Lokela ho Qala Hokae?
Haeba re bona hore ho hlokahala hore re ntlafatse tabeng ena, re lokela ho qala ka boikutlo ba rōna ba kelello. Re tlameha ho ameha ka ho ba baahelani ba molemo. Sena le sona se ka tlatsetsa hore re be le baahelani ba molemo. Hoo e ka bang lilemong tse likete tse peli tse fetileng, Jesu o ile a hatisa molao-motheo ona oa bohlokoa likamanong tsa batho Thutong ea hae e tummeng ea Thabeng. O ile a re: “Ka hona, lintho tsohle tseo le batlang hore batho ba le etse tsona, le lōna ka ho tšoanang le ba etse tsona.” (Matheu 7:12) Ho tšoara ba bang ka tlhompho, seriti le mosa ho ba khothalletsa hore le bona ba u tšoare ka tsela e tšoanang.
Sehloohong se reng “Ho Rata Baahelani ba Hao,” se ileng sa hlaha makasineng ea The Nation Since 1865, moqolotsi oa litaba eo e bileng e leng mongoli, Lise Funderburg, o ile a bolela tse ling tsa lintho tse bonolo tse ka etsoang ho etsa hore batho e be baahelani ba molemo. O ile a ngola: “Ke batla . . . lintho tse bontšang kameho liketsong tse ngata tse nyenyane tsa mosa tseo baahelani ba li etsetsanang—tse kang ho isetsana likoranta, ho sala le bana ba e mong, ho ela e mong mabenkeleng. Ke batla kamano ena lefatšeng leo ho lona batho ba ntseng ba eketsa ho itšehla thajana, leo ho lona baahi ba motse ba fokolisoang ke tšabo le tlōlo ea molao.” Joale o phaella ka ho re: “Ho na le moo u lokelang ho qala teng. ’Me ho ka etsahala hore ke ho moahelani ea haufi le uena.”
Makasine ea Canadian Geographic le eona e ile ea bolela ntlha e molemo e ka thusang baahelani hore ba utloane. Mongoli Marni Jackson o ile a re: “Baahelani, joaloka litho tsa lelapa, ke batho ba amang bophelo ba hao bao e seng kamehla u ikhethelang bona. Kamano ena e hloka masene, mekhoa e metle le mamello.”
Baahelani ba Molemo—Bafani ba Molemo
Ke ’nete hore ba bangata ba rōna ha ba lokolohe ho atamela baahelani. Ho ka bonahala ho le bobebe haholoanyane ho ba qoba le ho itšehla thajana. Leha ho le joalo, Bibele e bolela hore “ho fana ho tlisa thabo e khōlō ho feta ho amohela.” (Liketso 20:35) Ka lebaka leo, moahelani ea molemo o leka ho etsa boiteko ba ho tseba batho ba mo potolohileng. Le hoja a sa batle botsoalle bo haufi-ufi, o etsa boiteko ba hore nako le nako a qale moqoqo o monate, mohlomong a qale ka ho bososela ka tsela e nang le botsoalle kapa ho etsa ketso e bontšang botsoalle joaloka ho phahamisa letsoho kapa ho ōma ka hlooho.
Joalokaha ho boletsoe ka holimo, ke ‘liketso tse ngata tse nyenyane tse mosa’ tseo baahelani ba li etsetsanang tseo ka sebele e leng tsa bohlokoa ho theheng le ho ntšetseng pele likamano tse ntle pakeng tsa baahelani. Kahoo, ho hotle ho batla lintho tse nyenyane tse bontšang mosa tseo u ka li etsetsang moahelani, kaha sena hangata se tla matlafatsa moea oa tšebelisano-’moho le tlhomphano. Ho feta moo, ka ho etsa sena, re tla latela keletso ea Bibele: “U se ke ua hana ka se molemo ho bao se ba lokelang, ha ho le matleng a letsoho la hao ho se etsa.”—Liproverbia 3:27; Jakobo 2:14-17.
Baahelani ba Molemo—Baamoheli ba Lebohang
Ho ne ho ka ba hotle haeba re ne re ka re e mong le e mong oa leboha ha a fuoa thuso le limpho. Ka bomalimabe, ha ho be tjena kamehla. Lithuso tse ngata le limpho tse fanoang ka sepheo se setle li ’nile tsa amoheloa ka tsela e hlokang teboho hoo mofani ea tiileng a ka ’nang a nahana, ‘Ha ke sa tla pheta!’ Ka linako tse ling, boiteko bohle ba hao ba ho lumelisa ka botsoalle le ho phahamisetsa moahelani oa hao letsoho bo ka ’na ba arabeloa ka ho ōma ka hlooho ka tsela e monyebe.
Leha ho le joalo, hangata hase hore ea lumelisoang ha a na teboho, le hoja ho ka bonahala eka ho joalo. Mohlomong setso sa hae se etsa hore a be lesisitheho kapa a ikutloe a sa lokoloha ’me a etse lintho ka tsela e sa tsotelleng, e bonahalang e hloka botsoalle. Ka lehlakoreng le leng, lefatšeng lena le hlokang teboho, ho ka etsahala hore batho ba bang ba makatsoe ke ho ba ha hao le botsoalle, kapa ba belaelle sepheo sa hao. Ho ka ’na ha hlokahala hore u ba kholise. Kahoo, ho theha likamano tse tletseng botsoalle ho ka ’na ha hloka nako le mamello. Leha ho le joalo, baahelani ba ithutang mokhoa oa ho ba bafani ba molemo le baamoheli ba nang le teboho ba tlatsetsa ho etseng hore ho be le khotso le thabo har’a baahelani.
Ha ho Hlaha Tsietsi
Moahelani ea molemo ke oa bohlokoa ka ho khethehileng ha ho hlaha tlokotsi. Nakong ea tsietsi, moea oa ’nete oa boahelani oa totobala. Ho na le litlaleho tse ngata tsa liketso tse se nang boithati tsa baahelani linakong tse joalo. Ho bonahala tlokotsi e tšoanang e etsa hore baahelani ba sebelisane habonolo feela ’me ba ikitlaelletse ho thusana. Hangata esita le ba fapaneng ka maikutlo ba sebetsa ’moho.
Ka mohlala, The New York Times e ile ea tlaleha hore ha tšisinyeho e senyang ea lefatše e hlasela Turkey ka 1999, batho bao ka ho tloaelehileng e leng lira ba ile ba ema e le ngatana-’ngoe ka moea o bontšang boahelani. Mongoli oa koranta ea Greece, Anna Stergiou o ile a ngola koranteng ea Athene a re: “Ka lilemo-lemo esale re rutoa ho hloea baahi ba Turkey. Empa bohloko ba bona bo ikhethang ha bo re thabise. Re ile ra utloa bohloko, ra lla ha lehloeo la nako e telele le felisoa ke ho bona masea a shoeleng.” Ha ka molao pholoso e emisoa, lihlopha tsa pholoso tsa Greece ha lia ka tsa lumela ho khaotsa ho batla baphonyohi.
Ka sebele ho etsa mosebetsi oa pholoso ka mor’a likoluoa ke ketso e khabane le e sebete e bontšang moea oa boahelani. Leha ho le joalo, ka sebele ho ka boleloa hore ho pholosa moahelani ka ho mo lemosa pele kotsi e hlaha ke ketso ea bohlokoa ka ho fetisisa e bontšang moea oa boahelani. Ka bomalimabe, histori e senola hore hangata ba lemosang baahelani ba bona ka tlokotsi e tlang ha ba thabeloe, kaha ka nako eo ba ntšang temoso ka eona, tlokotsi e tlang e ee be e sa lemohuoe. Hangata ba ntšang temoso baa belaelloa. Ho hlokahala mamello e ngata le boitelo ho ba lekang ho thusa ba sa lemoheng boemo bo kotsi boo ba leng ho bona.
Ketso e Khōlōhali e Bontšang Moea oa Boahelani
Kajeno, batho ba tleloa ke ntho e khōlō ho feta koluoa ea tlhaho. Ke ketso e boletsoeng esale pele ea Molimo ea Matla ’Ohle e tla felisa tlōlo ea molao, bokhopo le mathata a kang ana lefatšeng. (Tšenolo 16:16; 21:3, 4) Ketso ena e khōlō hase khopolo-taba feela, empa ke ntho ea sebele! Lipaki tsa Jehova li lakatsa ho fa batho ba bangata ka hohle kamoo ho ka khonehang, tsebo e hlokahalang bakeng sa ho pholoha ketsahalo ena e tlang e tla sisinya lefatše. Ke ka lebaka leo li kopanelang ka ho phehella mosebetsing oa tsona o tsebahalang oa boboleli lefatšeng lohle. (Matheu 24:14) Li etsa sena ka ho rata, ka lebaka la ho rata Molimo le moahelani.
Kahoo, u se ke ua lumella leeme kapa ho khopeha hore li u sitise ho mamela ha Lipaki li kokota monyakong oa hao kapa li u atamela kae kapa kae. Li leka ho ba baahelani ba molemo. Kahoo, amohela ha li ithaopela ho ithuta Bibele le uena. Ithute kamoo Lentsoe la Molimo le re tiisetsang kateng hore haufinyane nakong e tlang baahelani ba tla phelisana ka khotso. Ka nako eo, ha ho sa tla hlola ho e-ba le khethollo ea morabe, ea bolumeli kapa ea maemo, e tlang ho senya kamano ea khotso eo bongata ba rōna re e labalabelang ka sebele.
[Litšoantšo tse leqepheng la 6, 7]
Ho molemo ho etsa lintho tse bontšang mosa motseng oa heno
[Tlhaloso ea Moo Setšoantšo se Nkiloeng Teng]
Globe: Mountain High Maps® Copyright © 1997 Digital Wisdom, Inc.