Bacha—Na le Tsoela Pele Moeeng?
HIDEO o hopola ha a sa kena sekolo se phahameng, ’me o re: “Le hoja ke ne ke e-ba teng libokeng tsa Bokreste, ke ne ke se na takatso e matla ea ho sebeletsa Jehova. Hangata ke ne ke ipona ke se ke ratoa ke bao ke leng sehlopheng se le seng le bona ’me ke hata koekoe le kharebe ea ka ha re theosa le seterata. Ke ne ke sa tsebe hantle hore na ke batla’ng bophelong, ’me ke ne ke sa lakatse ho tsoela pele moeeng.” Joaloka Hideo, ho bonahala bacha ba bangata ba se na morero bophelong, ho se lipakane tsa bohlokoa tseo ba lakatsang ho li finyella kapa ba sa lakatse ho tsoela pele.
Haeba u mocha, mohlomong hlathe e lelekisa tsebe ha ho buuoa ka lipapali kapa mesebetsi ea ho itlosa bolutu. Leha ho le joalo, e ka ’na eaba ha ho joalo linthong tsa moea. Na ho ka etsahala hore u thabele lipakane tsa moea? Nahana ka mantsoe ana a mopesaleme a reng: “Khopotso ea Jehova ea tšepahala, e hlalefisa ea se nang phihlelo. . . . Taelo ea Jehova e hloekile, e etsa hore mahlo a khanye.” (Pesaleme ea 19:7, 8) Lentsoe la Molimo le ka tataisa “ea se nang phihlelo” hore a hlalefe, la “etsa hore mahlo [a hae] a khanye.” E, ho ka etsahala hore u thabele lintho tsa moea. Empa ho hlokahala eng hore u ikutloe ka tsela eo? U ka qala hokae?
Ikemisetse ho Sebeletsa Molimo
Ntho ea pele, u lokela ho ba le boikemisetso. Nahana ka Morena Josiase e monyenyane oa Juda. Ha ho fumanoa buka ea Molao oa Jehova ka tempeleng, Josiase o ile a re e baloe ’me o ile a angoa ka matla ke seo a ileng a se utloa. Ka lebaka leo, “Josiase a tlosa lintho tsohle tse manyala linaheng tsohle tseo e neng e le tsa bara ba Iseraele.” (2 Likronike 34:14-21, 33) Ho bala Lentsoe la Molimo ho ile ha susumelletsa Josiase ho etsa ho eketsehileng hore a ntšetse pele borapeli bo hloekileng.
Ho bala Bibele kamehla le ho thuisa ka seo u se balang ho ka etsa hore le uena u be le takatso ea ho sebeletsa Jehova. Ke sona se ileng sa susumetsa Hideo. O ile a qala ho tloaelana le pula-maliboho e mong oa kamehla, e leng mosebeletsi oa nako e tletseng oa Lipaki Tsa Jehova, ea seng a hōlile. Pula-maliboho enoa e ne e le seithuti se khothetseng sa Bibele ’me a leka ho sebelisa lithuto tsa eona bophelong ba hae. Hideo o ile a khothatsoa haholo ke mohlala oa pula-maliboho enoa, ’me a qala ho mo etsisa le ho ba le takatso e matla ea ho sebeletsa Molimo le batho ba bang. Ho tsoela pele moeeng ho ile ha fella ka hore a be le morero bophelong.
Ho bala Bibele letsatsi le leng le le leng ho ka susumetsa bacha. Takahiro o re: “E ne e re ha ke robala ’me ke hlokomela hore ha kea bala Bibele letsatsing leo, ke ne ke tsoha ebe kea e bala. Ka lebaka leo, ke ne ke e-ba le boikutlo ba hore Jehova oa ntataisa. Ho bala Bibele letsatsi le leng le le leng ho ile ha nthusa haholo hore ke tsoele pele moeeng. Kaha ke ne ke ikemiselitse ho etsa ho eketsehileng tšebeletsong ea Jehova, ke ile ka ba pula-maliboho ea kamehla nakoana ka mor’a hore ke qete sekolong se phahameng. Ke bo thabela haholo.”
Ntle le ho bala Bibele, ke eng hape e ka u thusang ho matlafatsa boikemisetso ba hore u rorise Jehova? Tomohiro o ile a rutoa ’nete ea Bibele ke ’mè oa hae. O re: “Ka mor’a ho ithuta ka hloko buka ea Life Does Have a Purpose ha ke le lilemo li 19, lerato la Jehova le sehlabelo sa thekollo sa Jesu li ile tsa nkama maikutlo haholo. Ho ananela lerato la Molimo ho ile ha ntšusumelletsa hore ke etse ho eketsehileng mosebetsing oa Jehova.” (2 Bakorinthe 5:14, 15) Joaloka Tomohiro, ntho e khothalletsang bacha ba bangata ho tsoela pele moeeng ke ho phehella ho ithuta Bibele ka hloko.
Leha ho le joalo, ho thoe’ng haeba le ka mor’a sena u ntse u ikutloa u sa rate ho sebeletsa Jehova? Na ho na le eo u ka kōpang thuso ho eena? Moapostola Pauluse o ile a ngola a re: “Etsoe Molimo ke eena . . . [ea] sebetsang ho lōna e le hore le rate le be le sebetse.” (Bafilipi 2:13) Ha u rapela hore Jehova a u thuse, ka bolokolohi o tla u fa moea oa hae o halalelang, o tla u matlafatsa hore ‘u sebetse’ le hore u “rate.” Sena se bolela hore moea o halalelang oa Molimo o tla totisa takatso ea hao ea hore u etse sohle se matleng a hao mosebetsing oa Jehova ’me o tla u thusa hore u hōle moeeng. Tšepa matla a Jehova ka hohle ’me u matlafatse pelo ea hao!
Ipehele Lipakane
Ha u se u ikemiselitse ho sebeletsa Jehova ka ho eketsehileng, ho hlokahala hore u ipehele lipakane e le hore u tsoele pele moeeng. Ngoananyana e mong oa Mokreste ea bitsoang Mana o ile a re: “Ho ipehela lipakane ho ile ha nthusa haholo. Ho e-na le ho khutlela morao, ke ne ke tsoela pele ka sebete. Kamehla ke ne ke hopola lipakane tsa ka, ’me ke ne ke rapela Jehova ka tieo hore a ntataise, ’me ke ile ka tsoela pele ntle ho tšitiso.”
Lipakane tsa hao e lokela ho ba tse nahannoeng hantle le tseo u ka khonang ho li finyella. Ho bala khaolo e le ’ngoe ea Bibele ka letsatsi e ka ba pakane e bontšang hore motho o nahanne hantle. Hape u ka qala ho etsa lipatlisiso. E le ho etsa mohlala ka se leng teng ka Senyesemane, u ka ’na ua ithuta litšobotsi tsa Jehova tse thathamisitsoeng tlas’a sehloohoana se reng “Qualities by Name” tlas’a “Jehovah” ho Watch Tower Publications Index. Ho thathamisitsoe lihloohoana tse ka bang 40 tseo u ka li shebang, ’me ha ho pelaelo hore patlisiso ea hao e tla u atametsa ho Jehova le ho u susumelletsa ho mo etsetsa ho eketsehileng. (Boitsebiso bo tšoanang bo ka fumanoa bukeng e ncha ea Atamela ho Jehova.) Lipakane tse ling tse finyellehang li akarelletsa hore bonyane sebokeng se seng le se seng sa Bokreste, u arabe ka lekhetlo le le leng ha ho hlokahala likarabo tsa bamameli, u iphe nako ea ho tseba setho se le seng sa phutheho haholoanyane le hore letsatsi le se ke la feta u sa rapela Jehova le ho bua le ba bang ka eena.
Haeba ha u e-s’o ngolise Sekolong sa Tšebeletso sa Puso ea Molimo, e ka ba pakane e ntle ho uena. Na u kopanela tšebeletsong ea tšimo? Haeba ha ho joalo, u ka ’na ua sebeletsa ho ba mohoeletsi ea sa kolobetsoang. Ho nahana ka botebo ka kamano ea hao le Jehova le ho inehela ho eena e ka ba bohato bo latelang. Bacha ba bangata ba leka ho phelela boinehelo ba bona ka ho hahamalla tšebeletso ea nako e tletseng.
Ke ’nete hore ho hotle ho iketsetsa lipakane bophelong, empa u hlokomele hore u se ke ua ba le moea oa tlhōlisano. Seo u se etsang se tla u thabisa haholo haeba u sa ipapise le ba bang.—Bagalata 5:26; 6:4.
Mohlomong u nahana hore ha u na tsebo ’me u thatafalloa ho ipehela lipakane tse nahannoeng hantle. Ha ho le joalo, latela keletso ena ea Bibele: “Sekeha tsebe ’me u utloe mantsoe a ba bohlale.” (Liproverbia 22:17) Kōpa thuso ea batsoali ba hao kapa Bakreste ba bang ba hōlileng tsebong. Ha e le hantle, ho hlokahala hore batsoali le ba bang ba be le kahlolo e molemo ’me ba fane ka khothatso litabeng tsena. Bacha ba ka ’na ba felloa ke thabo ha ba ikutloa ba imetsoe ke ho phehella pakane eo ba e behetsoeng ke batho ba bang hape sena se ka senya morero oa ho beha lipakane. Sena se ile sa etsahalla ngoananyana e mong, ea ileng a re: “Batsoali ba ka ba ne ba mphaella ka lipakane tse kang ho ngolisa Sekolong sa Tšebeletso sa Puso ea Molimo, ho kopanela tšimong, ho kolobetsoa le ho ba pula-maliboho. Ke ne ke sehla ka thata hore ke finyelle e ’ngoe le e ’ngoe. Ha ke finyella pakane, batsoali ba ka ba ne ba sa mpabatse, ho e-na le hoo, ba ne ba mpehela pakane e ’ngoe hape. Ka lebaka leo, kamehla ke ne ke qobelloa ho finyella lipakane. Ke ne ke khathetse ’me ke se na thabo ea hore ho na le seo ke se finyellang.” Phoso e ne e le hokae? Lipakane tsena kaofela e ne e le tsa bohlokoa, empa e ne e se tsa hae. E le hore u atlehe, u lokela hore u ikemisetse ho ipehela lipakane ka bouena!
Nahana ka Jesu Kreste. Ha a e-tla lefatšeng, o ne a tseba seo Ntat’ae, Jehova, a neng a se lebeletse ho eena. Ho etsa thato ea Jehova e ne e se pakane feela tjee ho Jesu, e ne e le thōmo. Jesu o ile a nka mosebetsi oo oa hae joang? O ile a re: “Lijo tsa ka ke hore ke etse thato ea ea nthomileng le hore ke qete mosebetsi oa hae.” (Johanne 4:34) Jesu o ne a thabela ho etsa thato ea Jehova ’me o ile a phelela seo Ntat’ae a neng a se lebeletse ho eena. Ho etsa thato ea Jehova ho ne ho tšoana le lijo ho Jesu—o ne a thabisoa le ho khotsofatsoa ke ho qeta mosebetsi oo a neng a lebeletsoe hore a o etse. (Baheberu 10:5-10) Le uena u ka thaba ha u ikemiselitse ho etsa seo batsoali ba hao ba u khothalletsang hore u se etse.
U se ke Ua Tela ho Etsa se Setle
Ha u se u e-na le pakane, ikitlaelletse ho e finyella. Bagalata 6:9 e re: “A re se keng ra tela ho etsa se setle, kaha ka nako e loketseng re tla kotula haeba re sa khathale.” U se ke ua tšepa matla a hao kapa bohlale ba hao. U ka ’na ua kopana le litšitiso ’me ka nako e ’ngoe ua nahana hore ua hlōleha. Empa Bibele ea re tiisetsa e re: “U . . . ele [Molimo] hloko litseleng tsohle tsa hao, ’me o tla otlolla litsela tsa hao.” (Liproverbia 3:6) Jehova o tla u matlafatsa ha u ntse u ikitlaelletsa ho finyella lipakane tsa hao tsa moea.
E, ha u hlaolela takatso ea ho sebeletsa Jehova le ha u hahamalla lipakane tsa moea, u tla etsa hore ‘tsoelo-pele ea hao e bonahale ho batho bohle.’ (1 Timothea 4:15) Ka hona u tla thabela bophelo bo nang le morero ba ho sebeletsa Molimo.
[Setšoantšo se leqepheng la 9]
Ho bala Bibele le ho thuisa ka seo u se balileng ho tla u susumelletsa ho sebeletsa Jehova
[Setšoantšo se leqepheng la 10]
Jesu o ile a phelela seo Ntat’ae a neng a se lebeletse ho eena