Ha Thato ea Molimo e Etsoa Lefatšeng

HA Jesu a ne a ruta barutuoa ba hae hore ba rapele ba re, “Thato ea hao e ke e etsahale lefatšeng, joalokaha e etsahala leholimong,” o ne a bua seo a se tsebang kaha o ne a phetse leholimong a e-na le Ntat’ae. (Matheu 6:10; Johanne 1:18; 3:13; 8:42) Pele Jesu e e-ba motho, o ne a ile a bona ha ntho e ’ngoe le e ’ngoe e neng e etsahala leholimo le lefatšeng e ne e lumellana le thato ea Molimo. Tseo e ne e le linako tse thabisang tsa ho phetha mosebetsi le tsa ho khotsofala.—Liproverbia 8:27-31.

Pōpo ea pele ea Molimo e bile libōpuoa tsa moea, “mangeloi a hae, a matla ka bonatla, a phethang lentsoe la hae.” E ne e le “basebeletsi ba hae, ba etsang thato ea hae,” ’me e sa ntse e le bona. (Pesaleme ea 103:20, 21) Na lengeloi ka leng le ne le ka khona ho iketsetsa qeto ea hore na le batla ho etsa’ng? E, eitse ha lefatše le bōptjoa, “bara [bana] . . . ba Molimo ba qala ho hlaba litlatse.” (Jobo 38:7) Ho hlaba litlatse ha bona ho ile ha bontša hore ba ne ba thabisitsoe ke seo Molimo a neng a ratile ho se etsa, ’me ba lumellana le thato ea hae.

Ka mor’a ho bōpa lefatše, Molimo o ile a le lokisetsa batho hore ba lule ho lona eaba qetellong o bōpa monna oa pele le mosali oa pele. (Genese, khaolo ea 1) Na see le sona se ne se tšoanela ho hlabeloa litlatse? Tlaleho e bululetsoeng e re: “Ka mor’a moo Molimo a bona ntho e ’ngoe le e ’ngoe eo a e entseng ’me, bonang! e ne e le molemo haholo,” ha e le hantle, e ne e se na sekoli, e phethahetse.—Genese 1:31.

Thato ea Molimo e ne e le efe ka batsoali ba rōna ba pele le ka bana ba bona? Ho latela Genese 1:28, e ne e ntse e le molemo haholo: “Molimo [o ile] a ba hlohonolofatsa ’me Molimo a re ho bona: ‘Atang le ngatafale le tlale lefatše ’me le le buse, ’me le laole litlhapi tsa leoatle le libōpuoa tse fofang tsa maholimo le sebōpuoa se seng le se seng se phelang se hahabang lefatšeng.’” Hore ba phethahatse taelo eo e babatsehang, ho ne ho tla hlokahala hore batsoali ba rōna ba pele ba tsoele pele ba phela—ka ho sa feleng—le bana ba bona ba ne ba tla phela ka ho sa feleng. Ha ho letho le fanang ka maikutlo a mahlomola, ho hloka toka, masisa-pelo, kapa lefu.

Nakong ena thato ea Molimo e ne e etsoa leholimong le lefatšeng. Bohle ba neng ba phela ho latela thato ea hae ba ne ba tla thaba haholo ka lebaka la ho etsa joalo. Ho ile ha senyeha hokae?

Ka tšohanyetso, thato ea Molimo e ile ea phephetsoa. Empa e ne e se pharela e neng e ke ke ea rarolloa. Ho ntse ho le joalo, phephetso eo e ile ea qalisa nako e telele ea masisa-pelo le mahlomola e neng e tla baka pherekano e khōlō mabapi le hore na thato ea Molimo ke eng ka moloko oa batho. Kaofela re ’nile ra angoa ke masisa-pelo le mahlomola ana. E ile ea phephetsoa joang?

Thato ea Molimo Nakong ea Borabele

E mong oa “bara ba Molimo” ba moea o ile a bona monyetla oa ho sitisa hore thato ea Molimo ka moloko oa batho e etsoe, morero oa hae e le hore a rue melemo e itseng. Ha sebōpuoa sena sa moea se ntse se nahanisisa ka taba ena, e ile ea bonahala e le ntho e bonolo ’me ea e-ba e khahlisang haholoanyane. (Jakobo 1:14, 15) Mohlomong se ile sa nahana hore haeba se ne se ka atleha ho etsa hore banyalani ba pele ba se mamele ho e-na le hore ba mamele Molimo, joale Molimo o ne a tla tlameha ho lumella puso ea bohanyetsi. E ka ’na eaba se ile sa nahana hore Molimo o ne a ke ke a ba bolaea, kaha seo se ne se tla bolela hore morero oa Molimo o nyopile. Ho e-na le ho ba bolaea, Jehova Molimo o ne a tla tlameha ho fetola morero oa hae, a lumelle Satane—eo joale batho bao Jehova a ba bōpileng ba neng ba tla be ba mo mamela—hore a be le matla a itseng. Ho loketse hore ebe hamorao lerabele leo le ile la bitsoa Satane, e bolelang “Mohanyetsi.”—Jobo 1:6.

Takatso ea Satane e ile ea mo susumelletsa hore a ee ho mosali. O ile a mo khothalletsa hore a se natse thato ea Molimo le hore a itšoare ka tsela eo a ratang ka eona, a re: “Ka sebele le ke ke la shoa. . . . Le tla ba joaloka Molimo, le tsebe botle le bobe.” (Genese 3:1-5) Ho mosali, seo Satane a ileng a se bua se ile sa bonahala e le ntho e neng e ka mo fa tokoloho, eaba o nahana hore ho mo mamela ho ka fella ka tsela e molemo ea bophelo. Hamorao, o ile a susumetsa monna oa hae ho kopanela le eena ketsong eo.—Genese 3:6.

Ena e ne e se thato ea Molimo ka Adama le Eva. E ne e le thato ea bona. ’Me e ne e tla tlisa liphello tse bohloko. Molimo o ne a se a ba bolelletse hore tsela eo e ne e tla fella ka hore ba shoe. (Genese 3:3) Ba ne ba sa bōpeloa ho atleha ntle ho Molimo. (Jeremia 10:23) Ho phaella moo, e ne e tla ba batho ba sa phethahalang, ’me ho se phethahale le lefu li ne li tla fetela baneng ba bona. (Baroma 5:12) Satane o ne a ke ke a etsolla liphello tsena.

Na liphetoho tsee li ile tsa fetola morero oa Molimo, kapa thato ea hae ka moloko oa batho le ka lefatše ka ho sa feleng? Che. (Esaia 55:9-11) Leha ho le joalo, li ile tsa hlahisa lipotso tse neng li lokela ho arajoa: Na moloko oa batho o ka ‘ba joaloka Molimo, oa tseba botle le bobe,’ ho latela mantsoe a Satane? Ka mantsoe a mang, haeba re ka fuoa nako e lekaneng, na maemong ’ohle a bophelo re ka iketsetsa liqeto tsa hore na ho hotle ke hofe ’me ho hobe ke hofe, hore na ke sefe se molemo le hore na se kotsi ke sefe? Na Molimo o tšoaneloa ke hore re mo mamele ka ho feletseng hobane tsela ea hae ea ho busa e le e molemohali. Na ehlile batho ba lokela ho iphaphatha le thato ea hae ka ho feletseng? U ne u ka araba lipotso tsee joang?

Ho ne ho e-na le tsela e le ’ngoe feela ea ho arabela lipotso tsena ka pel’a libōpuoa tse bohlale: Ho tlohella ba batlang ho ipusa hore ba bone hore na ba tla hle ba atlehe. Ho ba bolaea feela ho ne ho ke ke ha araba lipotso tsena tse ileng tsa hlaha. Ho lumella moloko oa batho hore o ipuse ka nako e lekaneng ho ne ho tla rarolla pharela ena hobane liphello li ne li tla bonahala ka ho hlakileng. Molimo o ile a bontša hore o ne a tla sebetsa litaba ka tsela eo ha a ne a bolella mosali hore o ne a tla ba le bana. Kahoo, moloko oa batho o ne o tla qala. Rea phela kajeno ka lebaka la qeto eo!—Genese 3:16, 20.

Leha ho le joalo, sena se ne se sa bolele hore Molimo o ne a tla tlohela batho le mora eo oa lerabele oa moea hore ba iketsetse ka hohle kamoo ba ratang kateng. Molimo ha aa ka a tlohela bobusi ba hae, ebile ha aa ka a nyahlatsa morero oa hae. (Pesaleme ea 83:18) O ile a hlakisa ntlha ena ka ho bolela esale pele hore mohlohlelletsi oa borabele bona o ne a tla silakanngoa hamorao le hore liphello tsohle tsa bona tse mpe li ne li tla hlakoloa. (Genese 3:15) Kahoo, ho tloha qalong feela lelapa la batho le ile la fuoa tšepiso ea ho imolloa mathateng.

Khabareng, batsoali ba rōna ba pele ba ne ba itokolotse pusong ea Molimo, ba bile ba lokolotse le bana ba bona ba neng ba tla tsoaloa. E le hore Molimo a thibele liphello tsohle tse bohloko tse bakiloeng ke qeto ea bona, ho ne ho tla mo hloka hore a ba qobelle ho etsa thato ea hae maemong ’ohle. Ho ne ho tla tšoana le hore o ba hanela ho leka ho ipusa.

Ke ’nete hore batho ba bang ba ne ba ka khetha puso ea Molimo. Ba ne ba ka ithuta hore na thato ea Molimo ke eng nakong ena ’me ba phele tumellanong le eona ka hohle kamoo ho neng ho ka khoneha. (Pesaleme ea 143:10) Leha ho le joalo, ba ne ba ke ke ba tsoa mathateng hafeela taba ea ho ipusa ha moloko oa batho ka ho feletseng e ne e ntse e e-s’o rarolloe.

Li sa tloha feela, liphello tsa ho ikhethela ha batho li ile tsa bonahala. Kaine, letsibolo la moloko oa batho, o ile a bolaea moen’ae Abele hobane “mesebetsi ea hae e ne e le khopo, empa ea mor’abo e ne e lokile.” (1 Johanne 3:12) Ena e ne e se thato ea Molimo, hobane Molimo o ne a ile a hlokomelisa Kaine eaba hamorao oa mo ahlola. (Genese 4:3-12) Kaine o ne a latetse tlhahiso ea Satane ea hore a itšoare ka tsela eo a ratang ka eona; kahoo o ne ‘a simolohile ho ea khopo.’ Ba bang ba ile ba etsa se tšoanang.

Ka mor’a lilemo tse ka holimo ho 1 500 batho ba le teng lefatšeng, “lefatše le ne le senyehile mahlong a Molimo oa ’nete ’me lefatše le ne le tletse pefo.” (Genese 6:11) Ho ne ho hlokahala hore ho nkoe bohato bo matla ho boloka lefatše hore le se ke la senyeha. Molimo o ile a nka khato ka ho tlisa moroallo oa lefatše lohle le ka ho sireletsa lelapa le leng le lokileng hore le ’ne le phele—Noe, mosali oa hae, bara ba hae le basali ba bona. (Genese 7:1) Kaofela ha rōna re litloholo-tloholoana tsa bona.

Haesale ho tloha mehleng ea Noe, Molimo o ’nile a tataisa bao ka sebele ba neng ba lakatsa ho tseba thato ea hae. O ile a bululela banna ba tšepahalang hore ba tlalehe melaetsa ea hae bakeng sa mang kapa mang ea neng a batla ho tataisoa ke eena. Melaetsa ena e tlalehiloe ka Bibeleng. (2 Timothea 3:16) Ka lerato o ile a lumella batho ba tšepahalang hore ba be le kamano le eena, esita le ho ba metsoalle ea hae. (Esaia 41:8) O ile a boela a ba fa matla ao ba neng ba a hloka e le hore ba mamelle liteko tse boima tse ileng tsa ama moloko oa batho lilemong tsena tse likete tsa boipuso. (Pesaleme ea 46:1; Bafilipi 4:13) Re motlotlo hakaakang ka tšehetso ee eohle!

‘Thato ea Hao e Etsoe’—Ka ho Feletseng

Seo Molimo a seng a se entse ho tla fihlela mothating ona, hase sona phetho seo a batlang ho se etsetsa moloko oa batho. Moapostola oa Mokreste Petrose o ile a ngola tjena: “Ho na le maholimo a macha le lefatše le lecha tseo re li letetseng ho ea ka tšepiso ea hae, ’me ho loka ho tla aha ho tsona.” (2 Petrose 3:13) Puo ena ea tšoantšetso e bua ka ’muso o mocha o tla busa moloko oa batho le ka mokhatlo oa batho o mocha o tla beng o busoa ke ’muso oo.

A sebelisa puo e hlakileng, moprofeta Daniele o ile a ngola tjena: “Matsatsing a marena ao Molimo oa leholimo o tla emisa ’muso o ke keng oa senngoa le ka mohla. . . . O tla silakanya o felise mebuso ena kaofela, ’me o tla ema ho isa linakong tse sa lekanyetsoang.” (Daniele 2:44) Boprofeta bona bo bolela esale pele ka ho felisoa ha tsamaiso ea lintho ea kajeno e ke keng ea atleha le ka ho nkeloa sebaka ha eona ke ’Muso oa Molimo kapa puso ea hae. Ruri tsena ke litaba tse molemo! Likhohlano le boithati tse etsang hore lefatše la kajeno le be mabifi le tse boetseng li beha lefatše lena kotsing ea ho timetsoa, ka letsatsi le leng ho tla lebaloa ka tsona.

Lintho tsee li tla etsahala neng? Barutuoa ba Jesu ba ile ba botsa potso e reng: “Lintho tsee li tla etsahala neng, ’me pontšo e tla ba efe ea ho ba teng ha hao le ea qetello ea tsamaiso ea lintho?” E ’ngoe ea likarabo tseo Jesu a ileng a ba araba ka tsona, e bile e reng: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo bo tla tla.”—Matheu 24:3, 14.

Ke ntho e tsebahalang hohle hore mosebetsi ona oa ho bolela o etsoa lefatšeng lohle hona joale. Mohlomong u se u kile ua bona o etsoa sebakeng sa heno. Bukeng ea hae ea These Also Believe, Moprofesa Charles S. Braden o ile a ngola tjena: “Lipaki Tsa Jehova li koahetse lefatše ka bopaki ba tsona. . . . Lefatšeng ha ho na sehlopha sa bolumeli se bontšitseng cheseho le phehello ho feta Lipaki Tsa Jehova boitekong ba ho hasa litaba tse molemo tsa ’Muso.” Lipaki li bolela litaba tse molemo ka mafolofolo linaheng tse fetang 230 ka lipuo tse ka bang 400. Mosebetsi ona oo ho ileng ha boleloa esale pele ka oona, ha ho mohla o kileng oa phethoa ka tsela ena lefatšeng lohle. Ke bo bong ba bopaki bo bongata bo teng ba hore hona joale, nako e se e atametse ea hore ’Muso oo o nkele mebuso ea batho sebaka.

’Muso oo Jesu a itseng o ne o tla boleloa ke oona ’Muso oo a re rutileng ho o rapella thapelong ea hae ea mohlala e reng: “’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.” (Matheu 6:10) E, ’Muso oo ke kofuto eo Molimo a tlang ho e sebelisa hore a phethahatse morero oa hae, e leng thato ea hae, ka moloko oa batho le ka lefatše.

See se bolela’ng? E re Tšenolo 21:3, 4 e arabele. E re: ‘Ka utloa lentsoe le phahameng le tsoa teroneng le re: Bonang! Tente ea Molimo e ho moloko oa batho, o tla lula le bona, ’me e tla ba batho ba hae. Molimo o tla ba le bona. O tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.’ Ka nako eo, ka sebele thato ea Molimo e tla etsoa lefatšeng le leholimong—ka ho feletseng.a Na u tla rata ho ba teng moo?

[Mongolo o botlaaseng ba leqephe]

[Setšoantšo se leqepheng la 5]

Ho ipusa ka ntle ho Molimo ho ile ha fella ka mahlomola