Le be Sebete Joaloka Jeremia

“Tšepa Jehova; e-ba sebete ’me pelo ea hao e be matla. E, u tšepe Jehova.”—Pesaleme Ea 27:14.

1. Lipaki Tsa Jehova li thabela tlhohonolofatso efe e enneng?

LIPAKI TSA JEHOVA li lula paradeiseng ea moea. (Esaia 11:6-9) Li thabela ho ba tikolohong e khethehileng ea moea le Bakreste-’moho le tsona, ba nang le khotso le Jehova Molimo ebile ba e-na le khotso bona ka bobona, lefatšeng lena le tletseng likhathatso. (Pesaleme ea 29:11; Esaia 54:13) ’Me paradeise ena ea bona ea moea ea hōla. Bohle ba ‘etsang thato ea Molimo ka moea oohle’ ba thusa hore e hōle. (Baefese 6:6) Ba e hōlisa joang? Ka ho phela tumellanong le melao-motheo ea Bibele le ka ho ruta ba bang hore le bona ba phele ka eona, kahoo ba ba memela hore ba be le karolo litlhohonolofatsong tse enneng tsa paradeise eo.—Matheu 28:19, 20; Johanne 15:8.

2, 3. Bakreste ba ’nete ba lokela ho mamella eng?

² Leha ho le joalo, ho phela ha rōna paradeiseng ea moea ha ho bolele hore ha re hlaheloe ke liteko. Re sa ntse re sa phethahala ’me ka nako e ’ngoe re utloa bohloko ba ho kula, botsofali ’me qetellong rea shoa. Ho feta moo, re bona phethahatso ea boprofeta bo amanang le ‘matsatsi a ho qetela.’ (2 Timothea 3:1) Lintoa, tlōlo ea molao, ho kula, litlala le mathata a mang a maholo li hlasela moloko oohle oa batho, ’me lintho tsena ha li pote Lipaki Tsa Jehova ka thōko.—Mareka 13:3-10; Luka 21:10, 11.

³ Ho phaella linthong tsena tsohle, re tseba hantle hore ka ntle ho tikoloho e mofuthu ea paradeise ea rōna ea moea, ho foka meea e matla ea khanyetso. Jesu o ile a lemosa balateli ba hae a re: “Kahobane ha le karolo ea lefatše, empa ke le khethile lefatšeng, ka lebaka lena lefatše le le hloile. Hopolang lentsoe leo ke ileng ka le bolella lona, Lekhoba ha le leholo ho mong’a lona. Haeba ba ntlhorisitse, le lōna ba tla le hlorisa.” (Johanne 15:18-21) Le rōna rea hlorisoa kajeno. Batho ba bangata ba sa ntse ba sa utloisise kapa ba sa ananele mofuta oa rōna oa borapeli. Ba bang baa re nyatsa, baa re soma kapa—joalokaha Jesu a ile a lemosa—ba re hloile. (Matheu 10:22) Hangata, ho sebelisoa mecha ea litaba ho re hlasela ka boitsebiso bo fosahetseng le ka mashano a lonya. (Pesaleme ea 109:1-3) E, bohle re tobana le mathata, ’me ba bang ba rōna ba ka ’na ba qala ho nyahama. Re ka mamella joang?

4. Re batla thuso ea ho mamella hokae?

⁴ Jehova o tla re thusa. Mopesaleme o ile a bululeloa hore a ngole a re: “Litlokotsi tsa ea lokileng li ngata, empa Jehova o mo lopolla ho tsona kaofela.” (Pesaleme ea 34:19; 1 Bakorinthe 10:13) Ba bangata ba rōna ba ka paka hore ha re beha tšepo e feletseng ho Jehova, o re fa matla a ho mamella bothata bofe kapa bofe. Ho mo rata hammoho le thabo e behiloeng ka pel’a rōna li re thusa ho loantša ho nyahama le tšabo. (Baheberu 12:2) Kahoo, ho sa tsotellehe mathata, re ema re tiile.

Lentsoe la Molimo le Ile la Matlafatsa Jeremia

5, 6. (a) Re na le mehlala efe ea barapeli ba ’nete ba ileng ba khona ho mamella? (b) Jeremia o ile a ikutloa joang ha a fuoa taelo ea hore e be moprofeta?

⁵ Ho theosa le histori, bahlanka ba tšepahalang ba Jehova ba ’nile ba fumana thabo ho sa natsoe maemo a thata. Ba bang ba ile ba phela linakong tsa kahlolo ha Jehova a ne a tšollela bohale ba hae ho ba sa tšepahaleng. Ba bang ba barapeli bao ba tšepahalang e ne e le Jeremia le bo-mphato ba hae ba seng ba kae, hammoho le Bakreste ba lekholong la pele la lilemo. Mehlala eo ea bohlokoa e tlalehiloe ka Bibeleng hore e re khothatse, ’me re ka tseba ho hongata ha re ithuta ka eona. (Baroma 15:4) Ka mohlala, nahana ka Jeremia.

⁶ Jeremia o ile a fuoa taelo a sa le monyenyane hore a sebetse e le moprofeta oa Juda. Kabelo ena e ne e se bonolo. Batho ba bangata ba ne ba rapela melimo ea bohata. Le hoja ha Jeremia a ne a qala tšebeletso ea hae, Josiase e ne e le morena ea tšepahalang, marena ’ohle a ileng a mo hlahlama a ne a sa tšepahale, ’me bohle ba neng ba lokela ho ruta sechaba—e leng baprofeta le baprista—ba ne ba sa emele ’nete. (Jeremia 1:1, 2; 6:13; 23:11) Ebe joale Jeremia o ile a ikutloa joang ha Jehova a mo fa taelo ea hore e be moprofeta? O ile a ikutloa a tšaba! (Jeremia 1:8, 17) Jeremia o ile a hopola boikutlo ba pele boo a ileng a ba le bona: “Ka re: ‘Oho, ’Musi Morena Jehova! Bona! ha ke tsebe ho bua, etsoe ke sa le moshanyana.’”—Jeremia 1:6.

7. Jeremia o ile a tobana le boitšoaro bofe tšimong ea hae, ’me o ile a nka khato efe?

⁷ Batho ba bangata ba neng ba le tšimong ea Jeremia ba ne ba sa thabele molaetsa oa hae, ’me hangata o ne a tobana le khanyetso e matla. Ka lekhetlo le leng moprista ea bitsoang Pashkure o ile a mo otla a ba a mo kenya metšoasong. Jeremia o ile a tlaleha hore na o ile a ikutloa joang ka nako eo: “Ka re: ‘Nke ke ka bua ka eena [Jehova], ’me ha ke sa tla hlola ke bua ka lebitso la hae.’” Mohlomong ka linako tse ling u ee u ikutloe ka tsela eo—u batle ho beha meja fatše. Hlokomela hore na ke eng e ileng ea thusa Jeremia hore a mamelle. O ile a re: “Ka pelong ea ka [lentsoe la Molimo, kapa molaetsa oa hae] la e-ba joaloka mollo o tukang o koaletsoeng masapong a ka; ka khathala ke ho le tiisetsa, ’me ke ne ke sa khone ho le mamella.” (Jeremia 20:9) Na mantsoe a Molimo a u ama ka tsela eo?

Bo-mphato ba Jeremia

8, 9. (a) Moprofeta Uria o ile a bontša bofokoli bofe, ka phello efe? (b) Ke hobane’ng ha Baruke a ile a nyahama, ’me o ile a thusoa joang?

⁸ Jeremia o ne a se mong mosebetsing oa hae oa boprofeta. O ne a e-na le bo-mphato, ’me e tlameha ebe seo se ne se mo khothatsa. Leha ho le joalo, ka linako tse ling bo-mphato ba hae ba ne ba etsa lintho ka booatla. Ka mohlala, moprofeta-’moho le eena ea bitsoang Uria o ne a phathahane a bolela litemoso tse khahlanong le Jerusalema le Juda ‘tumellanong le mantsoe ’ohle a Jeremia.’ Leha ho le joalo, ha Morena Jojakime a laela hore Uria a bolaoe, moprofeta enoa o ile a balehela Egepeta ka lebaka la tšabo. Sena ha sea ka sa mo pholosa. Banna ba morena ba ile ba mo lelekisa, ba mo tšoara, eaba ba mo khutlisetsa Jerusalema, moo a ileng a bolaeloa teng. E tlameha ebe see se ile sa ferekanya Jeremia hakaakang!—Jeremia 26:20-23.

⁹ Motsoalle e mong oa Jeremia e ne e le mongoli oa hae, Baruke. Baruke e ne e le motšehetsi ea molemo oa Jeremia, empa ka lekhetlo le leng le eena o ile a fifalloa ke pono ea moea. O ile a qala ho belaela, a re: “Joale ho malimabe ’na, etsoe Jehova o ekelitse mesarelo bohlokong ba ka! Ke tepeletse ka lebaka la ho feheloa ha ka, ’me ha kea fumana sebaka sa phomolo.” Ka lebaka la ho nyahama, Baruke o ile a qala ho felloa ke kananelo ea lintho tsa moea. Leha ho le joalo, ka mosa Jehova o ile a fa Baruke keletso e bohlale, ’me pono ea hae e ile ea lokisoa. Joale o ile a tiisetsoa hore o tla pholoha ha Jerusalema e timetsoa. (Jeremia 45:1-5) E tlameha ebe Jeremia o ile a khothala hakaakang ha Baruke a tsitsa hape moeeng!

Jehova o Ile a Tšehetsa Moprofeta oa Hae

10. Jehova o ile a etsa litšepiso life tsa ho tšehetsa Jeremia?

¹⁰ Habohlokoa ka ho fetisisa, Jehova ha aa ka a lahla Jeremia. O ne a utloisisa hore na moprofeta enoa oa hae o ikutloa joang ’me o ile a mo fa matla le thuso eo a neng a e hloka. Ka mohlala, ha Jeremia a qala tšebeletso ’me a bontša ho ikhalala, Jehova o ile a re ho eena: “U se ke ua tšosoa ke lifahleho tsa bona, etsoe ‘ke na le uena ho u lopolla,’ ho bolela Jehova.” Joale, ha Jehova a qeta ho fa moprofeta oa hae boitsebiso bo mabapi le kabelo ea hae, o ile a re: “Ka sebele ba tla u loantša, empa ba ke ke ba u hlōla, etsoe ‘ke na le uena ho u lopolla,’ ho bolela Jehova.’” (Jeremia 1:8, 19) Tšepiso eo e ne e tšelisa hakaakang! ’Me Jehova o ile a phethahatsa tšepiso ea hae.

11. Re tseba joang hore Jehova o ile a phethahatsa tšepiso ea hae ea ho tšehetsa Jeremia?

¹¹ Kahoo, ka mor’a hore Jeremia a kenngoe metšoasong le ho pepesetsoa hore batho ba mo some, ka kholiseho o ile a re: “Jehova o ne a e-na le ’na joaloka senatla se tšabehang. Ke ka lebaka leo ba ntlhorisang ba tla khoptjoa ’me ba se ke ba hlōla. Ka sebele ba tla hlabisoa lihlong haholo.” (Jeremia 20:11) Lilemo hamorao ha ho ne ho etsoa boiteko ba ho bolaea Jeremia, Jehova o ’nile a ba le eena, ’me joaloka Baruke, Jeremia o ile a pholoha e le motho ea lokolohileng ha ho timetsoa Jerusalema, empa bahlorisi ba hae le batho ba ileng ba hlokomoloha litemoso tsa hae ba ile ba timetsoa kapa ba isoa Babylona e le baholehuoa.

12. Ho sa tsotellehe mabaka a ho nyahama, ke eng eo re lokelang ho e hopola?

¹² Kajeno, Lipaki Tsa Jehova tse ngata li mamella mahlomola joaloka Jeremia. Joalokaha ho boletsoe pejana, a mang a mahlomola ana a bakoa ke hore ha rea phethahala, a mang a bakoa ke moferefere oo lefatše le leng ho oona, ’me a mang hape a bakoa ke ba hanyetsang mosebetsi oa rōna. Mahlomola ana a ka re nyahamisa. Joaloka Jeremia, re ka ’na ra qala ho ipotsa hore na re tla ’ne re tsoele pele ka tšebeletso ea rōna. Ka sebele, re ka lebella hore re tla nyahama nako le nako. Ho nyahama ho leka botebo ba lerato la rōna ho Jehova. Kahoo, a re ikemisetseng hore ho nyahama ho se ke ha re tlohelisa tšebeletso ea Jehova joaloka Uria. Ho e-na le hoo, a re etsiseng Jeremia ’me re kholisehe hore Jehova o tla re tšehetsa.

Kamoo U ka Loantšang ho Nyahama Kateng

13. Re ka latela mohlala oa Jeremia le oa Davida joang?

¹³ Jeremia o ne a buisana le Jehova Molimo kamehla, a mo bolella maikutlo a hae a tebileng ’me a kōpa matla ho eena. Ona ke mohlala o motle o ka lateloang. Davida oa boholo-holo le eena o ne a kōpa Mohloling o tšoanang oa matla, ’me o ile a ngola a re: “Jehova, u mamele lipolelo tsa ka; u utloisise ho feheloa ha ka. U ele hloko molumo oa mohoo oa ka o kōpang thuso, Morena oa ka le Molimo oa ka, hobane kea u rapela.” (Pesaleme ea 5:1, 2) Tlaleho e bululetsoeng ea bophelo ba Davida e bontša hore khafetsa Jehova o ne a araba lithapelo tsa Davida ha a kōpa thuso. (Pesaleme ea 18:1, 2; 21:1-5) Ka tsela e tšoanang, ha likhatello li le matla kapa ha ho bonahala mathata a rōna e le a ke keng a hlōloa, ho tšelisa haholo ho ea ho Jehova ka thapelo ebe re mo ntšetsa se ka lipelong tsa rōna. (Bafilipi 4:6, 7; 1 Bathesalonika 5:16-18) Jehova ha a hane ho re mamela. Ho e-na le hoo, o re tiisetsa hore ‘oa re tsotella.’ (1 Petrose 5:6, 7) Leha ho le joalo, e ka ba ho sa utloahaleng hore re rapele Jehova ebe ka mor’a moo ha re mamele seo a se buang, na ha ho joalo?

14. Mantsoe a Jehova a ile a ama Jeremia joang?

¹⁴ Jehova o bua joang le rōna? Nahana ka Jeremia hape. Kaha Jeremia e ne e le moprofeta, Jehova o ne a bua le eena ka ho toba. Jeremia o hlalosa hore na mantsoe a Molimo a ile a mo ama pelo joang: “Mantsoe a hao a ile a fumanoa, eaba kea a ja; ’me lentsoe la hao ho ’na e ba thabo e khaphatsehang le ho nyakalla ha pelo ea ka; etsoe ke ’nile ka bitsoa ka lebitso la hao, Jehova Molimo oa mabotho.” (Jeremia 15:16) E, Jeremia o ne a thabela hore o bitsoa ka lebitso la Molimo, ’me mantsoe a Hae e ne e le a bohlokoa ho moprofeta enoa. Kahoo, joaloka moapostola Pauluse, Jeremia o ne a chesehela ho bolela molaetsa o neng o behiloe boikarabelong ba hae.—Baroma 1:15, 16.

15. Re ka kenya mantsoe a Jehova joang lipelong tsa rōna, ’me ke ho nahana ka eng ho tla etsa hore re ikemisetse hore re tla ’ne re bue ka lebitso la Jehova le ’Muso oa hae?

¹⁵ Ha ho na motho eo Jehova a buang le eena ka ho toba kajeno. Leha ho le joalo, re na le mantsoe a Molimo ka Bibeleng. Kahoo, haeba re ithuta Bibele ka tieo re bile re thuisa ka botebo ka seo re ithutang sona, le rōna lipelong tsa rōna mantsoe a Molimo e tla ba “thabo e khaphatsehang le ho nyakalla.” ’Me re ka thabela hore ebe re jere lebitso la Jehova ha re il’o bolella batho ba bang mantsoe ao. Le ka mohla re se ke ra lebala hore lefatšeng kajeno ke rōna feela ba bolelang lebitso la Jehova. Ke Lipaki tsa hae feela tse phatlalatsang litaba tse molemo tsa ’Muso oa Molimo o thehiloeng le tse rutang ba bonolo hore e be barutuoa ba Jesu Kreste. (Matheu 28:19, 20) Re lehlohonolo hakaakang! Ha re nahana ka kabelo eo Jehova a e behileng boikarabelong ba rōna ka lerato, re ikutloa re tlamehile ho bua ka lebitso la hae le ’Muso oa hae?

A re Itebeleng Hore na re Tloaelana le Bo-mang

16, 17. Jeremia o ne a e-na le pono efe ka litloaelano, ’me re ka mo etsisa joang?

¹⁶ Jeremia o tlaleha ntho e ’ngoe e ileng ea mo thusa hore a be sebete. O itse: “Ha kea lula le sehlopha sa metsoalle e haufi-ufi sa ba etsang mesoaso eaba ke qala ho thaba. Ke lutse ke le mong ka lebaka la letsoho la hao, etsoe u ntlatsitse ka nyatso.” (Jeremia 15:17) Jeremia o ne a ka mpa a lula a le mong ho e-na le hore a silafatsoe ke metsoalle e mebe. Le rōna re bona litaba ka tsela e tšoanang. Ho hang ha re lebale temoso ea moapostola Pauluse e reng “litloaelano tse mpe li senya mekhoa e metle,” esita le mekhoa e metle eo re bileng le eona ka lilemo tse ngata.—1 Bakorinthe 15:33.

¹⁷ Litloaelano tse mpe li ka bula monyetla oa hore moea oa lefatše o silafatse monahano oa rōna. (1 Bakorinthe 2:12; Baefese 2:2; Jakobo 4:4) Kahoo, a re koetliseng matla a rōna a ho lemoha hore a lemohe litloaelano tse kotsi ’me re li qobe ka ho feletseng. (Baheberu 5:14) Haeba Pauluse a ne a phela lefatšeng kajeno, u nahana hore o ne a tla re’ng ho Mokreste ea shebellang libaesekopo tse mabifi kapa tsa boitšoaro bo bobe kapa lipapali tse mabifi? O ne a tla re’ng ha a eletsa mor’abo ea phehellang setsoalle Interneteng le batho bao a sa ba tsebeng ho hang? O ne a tla nahana’ng ka Mokreste ea nkang lihora tse ngata a bapala lipapali tsa video kapa a shebeletse thelevishene empa a se na tloaelo e ntle ea thuto ea botho?—2 Bakorinthe 6:14b; Baefese 5:3-5, 15, 16.

Lula Paradeiseng ea Moea

18. Ke eng e tla re thusa ho lula re le matla moeeng?

¹⁸ Re nka paradeise ea rōna ea moea e le ea bohlokoa. Ha ho letho kajeno le tšoanang le eona lefatšeng. Esita le ba sa lumelang ba bua hantle ka lerato, ho nahanela le mosa tseo Bakreste ba li bontšanang. (Baefese 4:31, 32) Leha ho le joalo, hona joale ho hlokahala hore re loantše ho nyahama, ho feta neng kapa neng. Litloaelano tse molemo, thapelo le mekhoa e metle ea ho ithuta li ka re thusa hore re lule re le matla moeeng. Li tla re matlafatsa hore re tobane le teko efe kapa efe re tšepile Jehova ka ho feletseng.—2 Bakorinthe 4:7, 8.

19, 20. (a) Ke eng se tla re thusa ho mamella? (b) Sehlooho se latelang se ngoletsoe bo-mang, ’me se ka khahla le bo-mang hape?

¹⁹ Le ka mohla re se ke ra lumella batho ba hloileng molaetsa oa rōna oa Bibele hore ba re tšose kapa ba fokolise tumelo ea rōna. Joaloka lira tse ileng tsa hlorisa Jeremia, ba re loantšang ba loantša Molimo. Ba ke ke ba hlōla. Jehova ea matla haholo ho feta bahanyetsi ba rōna, o re ho rōna: “Tšepa Jehova; e-ba sebete ’me pelo ea hao e be matla. E, u tšepe Jehova.” (Pesaleme ea 27:14) Re e-na le tšepo e tiileng ka lipelong tsa rōna ho Jehova, e se eka re ka ikemisetsa ho se tele ho etsa se molemo. E se eka re ka kholiseha hore, joaloka Jeremia le Baruke, re tla kotula haeba re sa khathale.—Bagalata 6:9.

²⁰ Bakreste ba bangata ha ba phetse ho loantša ho nyahama. Leha ho le joalo, bacha ba tobana le liteko tse khethehileng. Empa ba boetse ba na le menyetla e metle haholo. Sehlooho se latelang se ngoletsoe bacha ba ka har’a rōna ka ho toba. Se tla khahla le batsoali hammoho le batho bohle ba baholo ba inehetseng ba ka phuthehong bao ka lipolelo, ka mohlala le ka ho tšehetsa ka ho toba, ba ka khonang ho thusa bacha ba ka phuthehong.

U ka Araba Joang?

• Ke hobane’ng ha re ka lebella maemo a nyahamisang, ’me re ka batla thuso ho mang?

• Jeremia o ile a hlōla ho nyahama joang ho sa tsotellehe kabelo e thata?

• Ke eng se tla etsa hore le har’a mathata a fetisisang lipelo tsa rōna li ‘be le thabo e khaphatsehang le ho nyakalla’?

[Setšoantšo se leqepheng la 9]

Jeremia o ile a nahana hore o sa le monyenyane haholo le hore ha a na tsebo ea ho ba moprofeta

[Setšoantšo se leqepheng la 10]

Esita leha a ne a hlorisoa, Jeremia o ne a tseba hore Jehova o na le eena “joaloka senatla se tšabehang”