Tataiso e Bohlale Bakeng sa Banyalani
“Basali ba ke ba ipehe tlas’a banna ba bona joalokaha ba ipeha tlas’a Morena. Banna, le tsoele pele le rata basali ba lōna.”—BAEFESE 5:22, 25.
1. Pono e nepahetseng ka lenyalo ke efe?
JESU o itse lenyalo ke ha Molimo a kopanya hammoho jokong monna le mosali hore e be “nama e le ’ngoe.” (Matheu 19:5, 6) Le ama batho ba babeli ba nang le botho bo sa tšoaneng, ba ithutang ho ba le lithahasello tse tšoanang le ba tšoarisanang hore ba finyelle lipakane tse tšoanang. Lenyalo ke boitlamo ba bophelo bohle, hase tumellano ea nakoana e ka koeneheloang habonolo feela. Linaheng tse ngata, ha ho thata ho fumana lengolo la tlhalo, empa ho Mokreste, kamano ea lenyalo ea halalela. Le qhaloa feela ka lebaka le tebileng haholo.—Matheu 19:9.
2. (a) Banyalani ba ka fumana thuso hokae? (b) Ke hobane’ng ha e le habohlokoa ho loanela hore lenyalo le atlehe?
2 Moeletsi e mong litabeng tsa lenyalo o ile a re: “Lenyalong le atlehileng ho ba le liphetoho nako le nako kaha ho ba le litaba tse ncha, ho sebetsanoa le mathata a hlahang, ’me ho sebelisoa lithuso tse teng bakeng sa boemo bo bong le bo bong ba bophelo.” Ho balekane ba Bakreste, lithuso tseo li akarelletsa keletso e bohlale e tsoang Bibeleng, thuso e tsoang ho Bakreste ba bang le kamano e haufi-ufi le Jehova ka thapelo. Lenyalo le atlehileng le tsoela pele le har’a mathata, ’me ha lilemo li ntse li feta, monna le mosali ba tleloa ke thabo le khotsofalo. Ha bohlokoa le ho feta, le tlotlisa Jehova Molimo, Moqapi oa lenyalo.—Genese 2:18, 21-24; 1 Bakorinthe 10:31; Baefese 3:15; 1 Bathesalonika 5:17.
Etsisa Jesu le Phutheho ea Hae
3. (a) Bolela ka bokhutšoanyane moko-taba oa keletso ea Pauluse ho banyalani. (b) Jesu o ile a beha mohlala ofe o motle?
3 Lilemong tse likete tse peli tse fetileng, moapostola Pauluse o ile a fa banyalani ba Bakreste keletso e bohlale ha a ngola a re: “Joalokaha phutheho e ipehile tlas’a Kreste, kahoo basali le bona ba ke ba ipehe tlas’a banna ba bona nthong e ’ngoe le e ’ngoe. Banna, le tsoele pele le rata basali ba lōna, feela joalokaha Kreste le eena a ile a rata phutheho ’me a inehela bakeng sa eona.” (Baefese 5:24, 25) Ho etsoa lipapiso tse ntle hakaakang moo! Basali ba Bakreste ba ikokobelletsang banna ba bona kamehla ba etsisa phutheho ha e ela hloko molao-motheo oa bohlooho ebile e o boloka. Banna ba lumelang ba tsoelang pele ho rata basali ba bona, ebang ke linakong tsa ha ho le monate kapa tsa liteko, ba bontša hore ba latela haufi mohlala oa Kreste oa ho rata phutheho le ho e hlokomela.
4. Banna ba ka latela mohlala oa Jesu joang?
4 Banna ba Bakreste ke lihlooho tsa malapa a bona, empa le bona ba na le hlooho, e leng Jesu. (1 Bakorinthe 11:3) Kahoo, feela joalokaha Jesu a ile a hlokomela phutheho ea hae, banna le bona ka lerato ba hlokomela malapa a bona moeeng le nameng, esita le haeba hoo ho hloka boitelo. Ba etelletsa boiketlo ba malapa a bona ka pele ho litakatso tsa bona le thato ea bona. Jesu o ile a re: “Ka hona, lintho tsohle tseo le batlang hore batho ba le etse tsona, le lōna ka ho tšoanang le ba etse tsona.” (Matheu 7:12) Molao-motheo ona o sebetsa ka ho khethehileng lenyalong. Pauluse o bontšitse sena ha a ne a re: “Banna ba tšoanela ho rata basali ba bona joaloka ’mele ea bona. . . . Ha ho motho ea kileng a hloea nama ea hae; empa oa e fepa le ho e baballa.” (Baefese 5:28, 29) Joalokaha monna a iphepa le ho ipaballa ka hloko, o lokela ho fepa le ho baballa mosali oa hae ka hloko joalo.
5. Basali ba ka etsisa phutheho ea Bokreste joang?
5 Basali ba rapelang Molimo ba etsisa mohlala oa phutheho ea Bokreste. Ha Jesu a ne a le lefatšeng, ka thabo balateli ba hae ba ile ba tlohela mesebetsi eo ba neng ba e etsa eaba baa mo latela. Ka mor’a lefu la hae, ba ile ba tsoela pele ho ipeha tlas’a hae, ’me ka lilemo tse fetileng tse ka bang 2 000, phutheho ea ’nete ea Bokreste e ntse e ipehile tlas’a Jesu le ho latela boeta-pele ba hae linthong tsohle. Ka ho tšoanang basali ba Bakreste ha ba khese banna ba bona ebile ha ba batle ho nyelisa tokisetso ea Mangolo ea bohlooho lenyalong. Ho e-na le hoo, ba thusa banna ba bona ebile ba ikokobelletsa bona, ba sebelisana le bona, ’me kahoo baa ba khothatsa. Ha monna le mosali ba itšoara ka tsela e lerato joalo, lenyalo la bona le tla atleha ’me bobeli ba bona ba tla thaba kamanong ena.
Tsoelang Pele le Lula le Bona
6. Petrose o ile a fa banna keletso efe, ’me ke hobane’ng ha e le ea bohlokoa?
6 Moapostola Petrose le eena o bile le keletso e eang ho banyalani, ’me mantsoe a hae a ne a le matla haholo ho banna. O itse: “Le tsoele pele ho lula le bona [basali ba lōna] ka mokhoa o tšoanang ho ea ka tsebo, le ba abela tlhompho joaloka sejana se fokolang haholo, se setšehali, kaha le boetse le majalefa le bona a mohau o sa tšoanelang oa bophelo, e le hore lithapelo tsa lōna li se ke tsa sitisoa.” (1 Petrose 3:7) Matla a keletso ea Petrose a hlalosoa mantsoeng a ho qetela a temana ena. Haeba monna a hlōleha ho hlompha mosali oa hae, kamano ea hae le Jehova e tla ameha. Lithapelo tsa hae li tla sitisoa.
7. Monna o lokela ho hlompha mosali oa hae joang?
7 Ebe banna ba ka hlompha basali ba bona joang? Monna ea hlomphang mosali oa hae o mo tšoara ka lerato, tlhompho le seriti. Ho tšoara mosali ka mosa joalo ho ne ho tla bonahala ho sa tloaeleha ho batho ba bangata. Setsebi se seng sa Mogerike se ngotse tjena: “Molaong oa Roma mosali o ne a se na litokelo. Litokelo tsa hae tsa molao li ne li tšoana le tsa ngoana. . . . O ne a laoloa ke monna oa hae ka ho feletseng, a bile a le mohaung oa hae kahohle.” See se ne se fapane hakaakang le lithuto tsa Bokreste! Monna oa Mokreste o ne a hlompha mosali oa hae. Litšebelisano tsa hae le eena li ne li laoloa ke melao-motheo ea Bokreste, eseng maikutlo a hae a nakoana. Ho feta moo, o ne a mo nahanela “ho ea ka tsebo,” a hopola hore mosali ke sejana se fokolang.
Ke “Sejana se Fokolang” ka Tsela Efe?
8, 9. Basali ba lekana le banna ka litsela life?
8 Ha Petrose a ne a re mosali ke “sejana se fokolang,” o ne a sa bolele hore basali ba fokola ho feta banna kelellong le moeeng. Ke ’nete hore ka phuthehong banna ba bangata ba Bakreste ba na le litokelo tseo basali ba sa lebellang ho ba le tsona, ’me ka malapeng basali ba ipeha tlas’a banna ba bona. (1 Bakorinthe 14:35; 1 Timothea 2:12) Ho sa tsotellehe seo, ho hlokoa hore bohle, banna hammoho le basali, ba be le tumelo, mamello le litekanyetso tse phahameng tsa boitšoaro. Hape, joalokaha Petrose a boletse, monna hammoho le mosali ke “majalefa . . . a mohau o sa tšoanelang oa bophelo.” Tabeng ea poloko, baa lekana ka pel’a Jehova Molimo. (Bagalata 3:28) Petrose o ne a ngolla Bakreste ba tlotsitsoeng ba lekholong la pele la lilemo. Kahoo, mantsoe a hae a ile a hopotsa banna ba Bakreste hore joaloka “majalefa hammoho le Kreste,” bona le basali ba bona ba ne ba e-na le tšepo e tšoanang ea ho ea phela leholimong. (Baroma 8:17) Ka letsatsi le leng, ba batona le ba batšehali ba ne ba tla sebetsa e le baprista le marena ’Musong oa Molimo oa leholimo!—Tšenolo 5:10.
9 Ho hang basali ba tlotsitsoeng ba Bakreste ba ne ba se boemong bo tlaase ho ba banna ba bona ba tlotsitsoeng ba Bakreste. Molao-motheo oona ona oa sebetsa le ho ba nang le tšepo ea ho phela lefatšeng. Banna hammoho le basali ba “bongata bo boholo” ba hlatsoa liaparo tsa bona tse telele tsa ka holimo ’me ba li soeufatsa maling a Konyana. Banna le basali ba kopanela “bosiu le motšehare” thorisong e etsetsoang Jehova lefatšeng ka bophara. (Tšenolo 7:9, 10, 14, 15) Banna hammoho le basali ba lebeletse ho thabela “tokoloho e khanyang ea bana ba Molimo,” e leng nakong eo ka eona ba tla nyakallela “bophelo ba sebele.” (Baroma 8:21; 1 Timothea 6:19) Bakreste bohle ba sebeletsa Jehova hammoho e le “mohlape o le mong” tlas’a “molisa a [le] mong,” ho sa tsotellehe hore na ke ba batlotsuoa kapa ba linku tse ling. (Johanne 10:16) Ke lebaka le matla hakaakang la hore banna le basali ba Bakreste ba hlomphane kamoo ho tšoanetseng!
10. Basali ke ‘lijana tse fokolang’ ka kutloisiso efe?
10 Ebe joale basali ke ‘lijana tse fokolang’ ka tsela efe? Mohlomong Petrose o ne a bolela hore ka kakaretso, banna ba feta basali ka ’mele le ka matla. Ntle ho moo, kaha hona joale ha rea phethahala, monyetla o hlomphehang oa ho beleha bana o sohloka basali. Basali ba lilemong tsa ho beleha ba ka ’na ba kula khafetsa. Ka sebele ba hloka tlhokomelo e khethehileng le ho nahaneloa ha ba kula ka tsela eo kapa ha ba mameletse mokhathala oa boimana le ho beleha. Monna ea hlomphang mosali oa hae, a hlokomela hore mosali o hloka ho khothatsoa, o tla tlatsetsa haholo ho atlehiseng lenyalo leo.
Lelapeng le Arohaneng Tumelong
11. Lenyalo le ka atleha ka kutloisiso efe le haeba monna le mosali ba sa tšoane ka bolumeli?
11 Ho etsahala joang haeba balekane ba lenyalo ba sa tšoane ka bolumeli hobane e mong a ile a amohela ’nete ea Bokreste ka mor’a hore ba nyalane empa e mong eena a sa e amohela? Na lenyalo le joalo le ka atleha? Manyalo a mangata a joalo a atlehile. Lenyalo la monna le mosali ba nang le maikutlo a sa tšoaneng a bolumeli le ka atleha ka kutloisiso ea hore le ka tšoarella ’me la etsa hore ba thabe ka bobeli. Ntle ho moo, lenyalo leo e ntse e le la molao mahlong a Jehova, e sa ntse e le “nama e le ’ngoe.” Kahoo, molekane oa Mokreste o eletsoa hore a lule le molekane ea sa lumelang haeba molekane eo a lumela ho lula le eena. Haeba bana ba le teng, ba rua molemo ka botšepehi ba motsoali oa Mokreste.—1 Bakorinthe 7:12-14.
12, 13. Tumellanong le keletso ea Petrose, basali ba Bakreste ba ka thusa banna ba sa lumelang joang?
12 Petrose o fana ka keletso e mosa ho basali ba Bakreste ba lulang malapeng a arohaneng bolumeling. Mantsoe a hae a ka boela a sebelisoa ke banna ba Bakreste ba boemong bo tšoanang. Petrose oa ngola o re: “Lōna basali, le ipehe tlas’a banna ba lōna, e le hore, haeba leha e le bafe ba sa mamele lentsoe, ba ka hapuoa ka ntle ho lentsoe ka boitšoaro ba basali ba bona, kahobane e bile lipaki tse boneng ka mahlo tsa boitšoaro ba lōna bo hloekileng hammoho le tlhompho e tebileng.”—1 Petrose 3:1, 2.
13 Haeba ka bohlale mosali a ka hlalosetsa monna oa hae tumelo ea hae, eo ke ntho e babatsehang. Ebe joale ho etsahala joang haeba monna a sa batle ho mamela. Ho ho eena. Leha ho le joalo, hase mara hase ho fela, kahobane boitšoaro ba Bokreste le bona bo fana ka bopaki bo matla. Banna ba bangata ba Bakreste ba neng ba sa thahaselle kapa ba neng ba bile ba hanyetsa tumelo ea basali ba bona, ba ile ba ‘ba le tšekamelo e nepahetseng bakeng sa bophelo bo sa feleng’ ka mor’a ho bona boitšoaro bo botle ba basali ba bona. (Liketso 13:48) Esita le haeba monna a sa amohele ’nete ea Bokreste, a ka ’na a khahloa ke boitšoaro ba mosali oa hae, e leng se ka bang le liphello tse ntle lenyalong. Monna e mong eo mosali oa hae e leng e mong oa Lipaki Tsa Jehova o ile a lumela hore ha ho mohla a ka finyellang litekanyetso tse phahameng tsa Lipaki. Leha ho le joalo, o ile a ipitsa “monna ea thabileng oa mosali ea khahlehang” eaba ka tieo o rorisa mosali oa hae le Lipaki tse ling lengolong leo a ileng a le ngolla koranta e ’ngoe.
14. Banna ba ka thusa basali ba sa lumelang joang?
14 Banna ba Bakreste ba sebelisitseng melao-motheo ea mantsoe a Petrose, le bona ba hapile basali ba bona ka boitšoaro ba bona. Basali ba sa lumelang ba bone banna ba bona ba jara boikarabelo, ba tlohela ho senya chelete ka ho tsuba, ho noa le ho becha ba bile ba sa hlole ba bua lipuo tse mpe. Basali ba bang ba sa lumelang ba tloaelane le litho tse ling tsa phutheho ea Bokreste. Ba ile ba khahloa ke mokhatlo oa Bokreste oa bara ba motho o lerato, ’me seo ba ileng ba se bona har’a barab’abo rōna se ile sa ba atametsa ho Jehova.—Johanne 13:34, 35.
“Motho ea ka Sephiring oa Pelo”
15, 16. Ke boitšoaro ba mofuta ofe ba mosali oa Mokreste bo ka ’nang ba hapa monna ea sa lumelang?
15 Ke boitšoaro ba mofuta ofe bo ka hapang monna? Ha e le hantle, ke boitšoaro boo basali ba Bakreste ba bang le bona ka tlhaho. Petrose o re: “Le se ke la lumella mokhabo oa lōna hore e be oa ho lohuoa ha moriri ha ka ntle le oa ho roala mekhabiso ea khauta kapa ho apara liaparo tsa ka ntle, empa e ke e be motho ea ka sephiring oa pelo ka seaparo se ke keng sa bola sa moea o thōtseng le o bonolo, oo e leng oa bohlokoa haholo mahlong a Molimo. Etsoe, le pele basali ba halalelang ba neng ba tšepile Molimo ba ne ba ikhabisa joalo, ba ipeha tlas’a banna ba bona, joalokaha Sara a ne a mamela Abrahama, a mo bitsa ‘morena.’ Le fetohile bana ba hae, hafeela le ntse le etsa se molemo ’me le sa tšabe ntho leha e le efe e bakang tšabo.”—1 Petrose 3:3-6.
16 Petrose o eletsa mosali oa Mokreste hore a se ke a tšepa ponahalo. Ho e-na le hoo, a tlohele monna oa hae hore a bone kamoo lithuto tsa Bibele li amang botho ba hae ka teng. O lokela ho tlohela monna oa hae hore a bone ha a sebelisa botho bo bocha. Mohlomong o tla bo bapisa le botho ba khale boo mosali oa hae a neng a e-na le bona. (Baefese 4:22-24) Ka sebele o tla fumana “moea [oa hae] o thōtseng le o bonolo” e le o khathollang le o ratehang. Moea oa mofuta ona ha o thabise monna feela empa hape ke “oa bohlokoa haholo mahlong a Molimo.”—Bakolose 3:12.
17. Sara ke mohlala o motle joang ho basali ba Bakreste?
17 Ho boleloa hore Sara ke mohlala, ’me ke mohlala o motle oo basali ba Bakreste ba lokelang ho o etsisa ebang banna ba bona ke balumeli kapa che. Ha ho pelaelo hore Sara o ne a nka Abrahama e le hlooho ea hae. Esita le pelong ea hae, o ne a mo bitsa “morena” oa hae. (Genese 18:12) Leha ho le joalo, seo se ne se sa mo nyenyefatse. Ho totobetse hore e ne e le mosali ea matla moeeng ka tumelo ea hae e matla ho Jehova. Ka sebele, ke e mong oa “leru le leholo . . . la lipaki” eo mohlala oa hae oa tumelo o lokelang ho re susumeletsa ho ‘matha ka mamello peisong e behiloeng ka pel’a rōna.’ (Baheberu 11:11; 12:1) Mosali oa Mokreste ha a nyenyefatsoe ke ho ba ea tšoanang le Sara.
18. Ke melao-motheo efe e lokelang ho hopoloa lelapeng le arohaneng tumelong?
18 Lelapeng le arohaneng bolumeling, monna e ntse e le hlooho. Ha e le monna ea ’neteng, o tla nahanela tumelo ea mosali oa hae empa a ntse a sa sekisetse tumelong ea hae. Haeba mosali e le eena ea ’neteng, le eena a ke ke a sekisetsa tumelo ea hae. (Liketso 5:29) Leha ho le joalo, a ke ke a qholotsa bohlooho ba monna oa hae. O tla hlompha boemo ba monna ’me a be “molaong oa monna oa hae.”—Baroma 7:2.
Tataiso e Bohlale ea Bibele
19. Ke lintho life tse ka bakang mathata lenyalong, empa likhatello tseo li ka thibeloa joang?
19 Kajeno, lintho tse ngata li ka baka mathata lenyalong. Banna ba bang ba hlōloa ho jara boikarabelo ba bona. Basali ba bang ba hana ho amohela bohlooho ba banna ba bona. Manyalong a mang, molekane e mong o tlatlapa e mong. Ho Bakreste, botšepehi bo ka lekoa ke likhatello tsa moruo, ho se phethahale ha batho le moea oa lefatše o tsamaeang le boitšoaro bo bobe le litekanyetso tse sothehileng. Leha ho le joalo, Jehova o hlohonolofatsa banna le basali ba Bakreste ba latelang melao-motheo ea Bibele, ho sa tsotellehe hore na maemo a bona ke afe. Esita le haeba ke molekane a le mong feela oa lenyalo ea sebelisang melao-motheo ea Bibele, ho ba molemo ho feta ha ho ne ho se ea e sebelisang. Ho feta moo, Jehova o rata bahlanka ba hae ba tšepahallang likano tsa bona tsa lenyalo leha maemo a le thata, ebile oa ba thusa. Ha a lebale botšepehi ba bona.—Pesaleme ea 18:25; Baheberu 6:10; 1 Petrose 3:12.
20. Keletso ea Petrose ke efe bakeng sa Bakreste bohle?
20 Ka mor’a hore moapostola Petrose a eletse banna le basali ba nyalaneng, o ile a lihela likhala ka mantsoe a mosa a khothatso. O ile a re: “Qetellong, kaofela ha lōna le be le kelello e joalo, le bontša ho utloelana bohloko, le e-na le boikutlo bo mofuthu ba bara ba motho, le e-na le qenehelo e bonolo, le ikokobelitse kelellong, le sa phetetse bobe ka bobe kapa ho hlapaola ka ho hlapaola, empa, ho fapana le hoo, le hlohonolofatsa, hobane le bitselitsoe tsela ena, e le hore le ka rua tlhohonolofatso.” (1 Petrose 3:8, 9) Ka sebele keletso ena ke e bohlale bakeng sa bohle, haholo-holo bakeng sa banyalani!
Na U sa Hopola?
• Banna ba Bakreste ba etsisa Jesu joang?
• Basali ba Bakreste ba etsisa phutheho joang?
• Banna ba ka hlompha basali ba bona ka tsela efe?
• Ke eng se molemohali seo mosali oa Mokreste ea nang le monna ea sa lumelang a ka se etsang?
[Setšoantšo se leqepheng la 16]
Monna oa Mokreste o rata mosali oa hae ebile oa mo hlokomela
Mosali oa Mokreste o hlompha monna oa hae ebile oa mo tlotla
[Setšoantšo se leqepheng la 17]
Ho fapana le molao oa Roma, lithuto tsa Bokreste li ne li laela monna hore a hlomphe mosali oa hae
[Setšoantšo se leqepheng la 18]
Banna le basali ba “bongata bo boholo” ba lebeletse bophelo bo sa feleng Paradeiseng
[Setšoantšo se leqepheng la 20]
Sara o ne a nka Abrahama e le morena oa hae