Lipotso Tse Tsoang ho Babali
Na moapostola Pauluse ha aa ka a sekisetsa tumelo ea hae ea Bokreste ha a ne a re ka pel’a Sanhedrine: “Ke Mofarisi”?
Hore re utloisise polelo ea Pauluse, e fumanoang ho Liketso 23:6, re lokela ho hlahloba maemo a potolohileng taba eo.
Ka mor’a ho hlaseloa ke sehlopha sa mahoohoo sa Bajuda Jerusalema, Pauluse o ile a bua le letšoele. O ile a bolela hore ‘o rutetsoe [Jerusalema] maotong a Gamaliele, o rupetsoe ho ea ka ho tiea ha Molao oa baholo-holo.’ Le hoja letšoele le ile la mamela boitšireletso ba hae ka nakoana, qetellong ha le halefa, molaoli oa sesole ea neng a hlokometse Pauluse o ile a mo isa moo masole a lulang teng. Ha a le mothating oa ho shapuoa, Pauluse o ile a re: “Na ho lumelloa ke molao hore le shape motho eo e leng Moroma a bile a sa ahloloa?”—Liketso 21:27–22:29.
Letsatsing le latelang, molaoli eo o ile a isa Pauluse ka pel’a lekhotla le phahameng la Bajuda la Sanhedrine. Pauluse o ile a ba sheba ka hloko ’me a bona hore lekhotla leo la Sanhedrine le ne le entsoe ka Basaduse le Bafarisi. Joale a re: “Banna, barab’eso, ke Mofarisi, mora oa Bafarisi. Ke ntse ke ahloloa mabapi le tšepo ea tsoho ea bafu.” Ka lebaka leo, ha tsoha ho hloka kutloano pakeng tsa Bafarisi le Basaduse, “etsoe Basaduse ba re ha ho na tsoho kapa lengeloi kapa moea, empa Bafarisi ba li bolela kaofela phatlalatsa.” Ba bang bao e neng e le ba mokha oa Bafarisi ba ile ba pheha khang ba halefile ba re: “Ha re fumane letho le fosahetseng ho motho enoa.”—Liketso 23:6-10.
Kaha Pauluse o ne a tsejoa e le Mokreste ea chesehang haholo, o ne a ke ke a kholisa Sanhedrine hore e ne e le setho se mafolofolo sa mokha oa Bafarisi. Bafarisi ba neng ba le teng moo ba ne ba ke ke ba amohela Mofarisi leha e le ofe ea neng a sa lumele lithuto tsohle tsa bona. Kahoo e tlameha ebe polelo ea Pauluse ea hore ke Mofarisi e ne e e-na le moelelo o itseng, ’me e tlameha ebe Bafarisi ba neng ba le teng moo ba ile ba utloisisa mantsoe a Pauluse ka tsela eona eo.
Ka ho bolela hore o ne a ntse a ahloloa mabapi le tšepo ea tsoho ea bafu, ka ho hlakileng Pauluse o ne a bolela hore o tšoana le Bafarisi tabeng ena. Phehisanong leha e le efe e hlahang ha ho buuoa ka taba ena ea tsoho, Pauluse o ne a lokela ho amahanngoa le Bafarisi ho fapana le Basaduse, ba neng ba sa lumele tsoho.
Seo Pauluse a neng a se lumela joaloka Mokreste se ne se sa hanyetsane le litumelo tsa Bafarisi litabeng tse kang tsoho, mangeloi le litabeng tse ling tsa Molao. (Bafilipi 3:5) Kahoo Pauluse o ne a ka ikamahanya le Bafarisi lintlheng tsena feela, ’me litho tsa Sanhedrine tse neng li le teng moo li ile tsa utloisisa mantsoe a hae ka kutloisiso ena e lekanyelitsoeng. Kahoo o ne a sebelisa semelo sa hae hamolemo hore a sebetsane le lekhotla leo le phahameng la Bajuda le neng le ea ka leeme.
Leha ho le joalo, bopaki bo boholo ka ho fetisisa ba hore Pauluse ha aa ka a sekisetsa tumelo ea hae bo bonahala ka hore Jehova o ile a tsoela pele ho mo amohela. Bosiu bo latelang ka mor’a hore Pauluse a bue polelo ea hore ‘ke Mofarisi,’ Jesu o ile a re ho eena: “E-ba sebete! Etsoe joalokaha u ’nile ua fana ka bopaki bo phethahetseng linthong tse mabapi le ’na Jerusalema, kahoo u tla boela u pake Roma.” Kaha Molimo o ile a amohela Pauluse, re lokela ho etsa qeto ea hore Pauluse ha aa ka a sekisetsa tumelo ea hae ea Bokreste.—Liketso 23:11.