Tsamaea ka Tumelo, Eseng ka Pono!
“Re tsamaea ka tumelo, eseng ka pono.”—2 BAKORINTHE 5:7.
1. Ke eng e bontšang hore moapostola Pauluse o ne a tsamaea ka tumelo, eseng ka pono?
SELEMO e ne e le sa 55 C.E. Saule, e leng monna eo pele a neng a hlorisa Bakreste, o ne a se a qetile lilemo tse ka bang 20 e le Mokreste. Ha aa ka a lumella hore tumelo ea hae ho Molimo e fokolisoe ke ho feta ha nako. Le hoja a ne a e-s’o bone lintho tsa leholimo ka mahlo a sebele, o ne a le matla tumelong. Ka hona ha moapostola Pauluse a ne a ngolla Bakreste ba tlotsitsoeng, ba neng ba e-na le tšepo ea ho phela leholimong o ile a re: “Re tsamaea ka tumelo, eseng ka pono.”—2 Bakorinthe 5:7.
2, 3. (a) Re bontša joang hore re tsamaea ka tumelo? (b) Ho tsamaea ka pono ho bolela’ng?
2 E le hore re tsamaee ka tumelo, ho hlokahala hore re be le tšepo e feletseng ea hore Molimo o na le matla a ho re tataisa bophelong. Re lokela ho kholiseha ka botlalo hore ka sebele o tseba lintho tse ka re tsoelang molemo. (Pesaleme ea 119:66) Ha re ntse re etsa liqeto bophelong ’me re li phelela, re nahana ka “lintho tsa sebele tseo re sa li boneng.” (Baheberu 11:1, The New English Bible) Lintho tsena li akarelletsa “maholimo a macha le lefatše le lecha” tse tšepisitsoeng. (2 Petrose 3:13) Empa ho tsamaea ka pono, ho bolela hore bophelo ba rōna bo laoloa feela ke lintho tseo re li bonang ka mahlo. Sena se kotsi hobane se ka etsa hore re hlokomolohe thato ea Molimo ka ho feletseng.—Pesaleme ea 81:12; Moeklesia 11:9.
3 Ho sa tsotellehe hore na re ba “mohlatsoana,” e leng ba bitselitsoeng ho ea phela leholimong, kapa re ba “linku tse ling,” ba nang le tšepo ea ho phela lefatšeng, e mong le e mong oa rōna o lokela ho nka ka botebo keletso ea ho tsamaea ka tumelo eseng ka pono. (Luka 12:32; Johanne 10:16) A re boneng kamoo ho latela keletso ena e bululetsoeng ho ka re sireletsang kateng hore re se lematsoe ke lintho tsena tse latelang: ‘Ho thabela sebe ka nakoana,’ leraba la lintho tse bonahalang le ho fifalloa ke pono ea hore tsamaiso ena ea lintho e haufi le ho fela. Hape, re tla hlahloba le likotsi tsa ho tsamaea ka pono.—Baheberu 11:25.
Ho Hana “ho Thabela Sebe ka Nakoana”
4. Moshe o ile a khetha eng, hona hobane’ng?
4 Nahana feela ka hore na Moshe, mora oa Amrame a ka be a phetse bophelo ba mofuta ofe. Kaha Moshe o ne a ile a hōla le bana ba boreneng ba Egepeta ea boholo-holo, o ne a ka ba le matla, maruo le bolaoli. Moshe a ka be a itse: ‘Ke rupetsoe ka bohlale bo thoholetsoang haholo ba Egepeta, ’me mantsoe a ka le liketso tsa ka li matla. Haeba ke sa tlohe lelapeng la borena, nka sebelisa boemo ba ka molemong oa barab’eso ba Baheberu ba hateletsoeng!’ (Liketso 7:22) Ho e-na le ho nahana joalo, Moshe o ile a khetha “ho tšoaroa hampe hammoho le sechaba sa Molimo.” Hobane’ng? Ke eng e ileng ea susumelletsa Moshe hore a hane sohle seo a neng a ka se fumana Egepeta? Bibele e araba tjena: “Ka tumelo [Moshe] o ile a tloha Egepeta, empa a sa tšabe bohale ba morena, kaha o ile a tsoela pele a tiile joalokaha eka o bona Ea sa bonahaleng.” (Baheberu 11:24-27) Taba ea hore Moshe o ne a e-na le tumelo ea hore ka sebele Jehova o putsa batho ba lokileng e ile ea mo thusa hore a hane sebe le ho se thabele monyaka oa sona oa nakoana.
5. Mohlala oa Moshe o re khothatsa joang?
5 Khafetsa le rōna re tlameha ho etsa liqeto tse boima litabeng tse kang tsena: ‘Na ke lokela ho tlohela mekhoa e itseng e sa lumellaneng le melao-motheo ea Bibele ka ho feletseng? Na ke lokela ho amohela mosebetsi oo ho bonahalang o e-na le melemo e itseng ea lintho tse bonahalang empa e le mosebetsi o tla ntšitisa ho tsoela pele moeeng?’ Mohlala oa Moshe o re khothalletsa hore re se khethe lintho tse bonahatsang mokhoa oa lefatše lena oa ho se bonele lintho pele; ho e-na le hoo, re lokela ho ba le tumelo ea hore “Ea sa bonahaleng,” e leng Jehova Molimo, o na le bohlale ba ho bonela lintho pele. Ho tšoana le Moshe, e se eka re ka baballa botsoalle ba rōna le Jehova ho feta ntho leha e le efe eo lefatše lena le ka fanang ka eona.
6, 7. (a) Esau o ile a bontša joang hore o ne a rata ho tsamaea ka pono? (b) Ke ka tsela efe mohlala oa Esau e leng temoso ho rōna?
6 Ak’u bapise Moshe le Esau, e leng mora oa mopatriareka Isaka. Esau o ne a rata ho ikhotsofatsa hang-hang. (Genese 25:30-34) Kaha Esau o ne a sa “[ananele] lintho tse halalelang” o ile a fana ka litokelo tsa hae joaloka letsibolo “e le phapanyetsano bakeng sa sejo se le seng.” (Baheberu 12:16) Ha aa ka a nahana kamoo qeto ea hae ea ho rekisa tokelo ea hae ea tsoalo e neng e tla ama kamano ea hae le Jehova kateng kapa kamoo ketso eo ea hae e neng e tla ama bana ba hae kateng. O ne a fifaletsoe ke pono ea lintho tsa moea. Esau o ile a hlokomoloha litšepiso tsa bohlokoa tsa Molimo, ka ho li nka e se tsa bohlokoa. O ne a tsamaea ka pono, eseng ka tumelo.
7 Mohlala oa Esau ke temoso ho rōna kajeno. (1 Bakorinthe 10:11) Ha re tlameha ho etsa liqeto, ebang ke tse nyenyane kapa tse khōlō, ha rea lokela ho khelosoa ke mashano a lefatše la Satane, le buellang khopolo ea hore ha u batla ntho e itseng u lokela ho loanela ho e fumana hona joale, eseng hosasane. Re lokela ho ipotsa: ‘Na liqeto tseo ke li etsang li bontša hore ke na le mekhoa e kang ea Esau? Na ho hahamalla lintho tseo ke li batlang hona joale ho tla etsa hore ke behelle ka thōko lintho tsa moea? Na lintho tseo ke li khethang li ka senya setsoalle sa ka le Molimo le ho etsa hore ke se fumane moputso oo ke o lebeletseng? Ke behela ba bang mohlala oa mofuta ofe?’ Haeba lintho tseo re li khethang li bontša hore re ananela lintho tse halalelang, Jehova o tla re hlohonolofatsa.—Liproverbia 10:22.
Ho Qoba Leraba la ho Rata Lintho Tse Bonahalang
8. Bakreste ba Laodicea ba ile ba lemosoa ka eng, hona ke hobane’ng ha temoso eo e re ama?
8 Tšenolong eo a ileng a e fa moapostola Johanne ho elella bofelong ba lekholo la pele la lilemo, Jesu Kreste ea tlotlisitsoeng o ile a romela molaetsa phuthehong ea Laodicea, e Asia Minor. E ne e le molaetsa o e lemosang hore e se ke ea rata lintho tse bonahalang. Le hoja Bakreste ba Laodicea ba ne ba ruile linthong tse bonahalang, moeeng teng ba ne ba futsanehile. Ho e-na le ho tsoela pele ba tsamaea ka tumelo, ba ile ba lumella lintho tse bonahalang hore li fifatse pono ea bona ea lintho tsa moea. (Tšenolo 3:14-18) Ho rata lintho tse bonahalang ho etsa joalo kajeno. Ho fokolisa tumelo ea rōna ebile ho etsa hore re khaotse ho ‘matha ka mamello peisong’ ea bophelo. (Baheberu 12:1) Haeba re sa hlokomele, “menyaka ea bophelo bona” e ka pupetsa lintho tsa moea hoo li ka “[bipetsoang] ka ho feletseng.”—Luka 8:14.
9. Ho khotsofalla lijo tsa moea le ho li ananela ho ka re sireletsa joang?
9 Ntho e tla re thusa hore re sireletsehe moeeng ke ho khotsofala eseng ho sebelisa lefatše lena ka botlalo e le hore re be le maruo a lintho tse bonahalang. (1 Bakorinthe 7:31; 1 Timothea 6:6-8) Ha re tsamaea ka tumelo eseng ka pono, seo se etsa hore re thabele ho ba paradeiseng ea hona joale ea moea. Ha re ntse re e-ja lijo tsa moea tse nang le phepo, na seo ha se re susumelletse ho “hoeletsa ka thabo ka lebaka la boemo bo botle ba pelo”? (Esaia 65:13, 14) Ho phaella moo, re thabela ho tloaelana le batho ba bonahatsang litholoana tsa moea oa Molimo. (Bagalata 5:22, 23) Ka sebele ke habohlokoa hore re ithute ho khotsofatsoa le ho khatholloa ke lintho tsa moea tseo Jehova a re fang tsona!
10. Ke lipotso life tseo re lokelang ho ipotsa tsona?
10 Tse ling tsa lipotso tseo re lokelang ho ipotsa tsona ke tse latelang: ‘Lintho tse bonahalang ke tsa bohlokoa hakae bophelong ba ka? Na lintho tsa ka tse bonahalang ke li sebelisetsa ho phelela menyaka kapa ho ntšetsa pele borapeli ba ’nete? Ke lintho life tse nkhotsofatsang haholo? Na ke ho ithuta Bibele le ho kopana le ba bang libokeng tsa Bokreste, kapa ke ho intša ka mafelo-beke ke sa etse mesebetsi ea Bokreste? Na ke qeta mafelo-beke a mangata ke le boithabisong ho e-na le ho sebelisa nako eo ke le tšimong kapa ke etsa mesebetsi e meng e amanang le borapeli bo hloekileng?’ Ho tsamaea ka tumelo ho bolela hore re lokela ho lula re le maphatha-phathe mosebetsing oa ’Muso, re tšepe litšepiso tsa Jehova ka ho feletseng.—1 Bakorinthe 15:58.
Hopola Hore Bofelo bo Atametse
11. Ho tsamaea ka tumelo ho re thusa joang hore re hopole hore bofelo bo atametse?
11 Ho tsamaea ka tumelo ho re thusa ho qoba likhopolo tsa lefatše tsa hore bofelo bo sa le hōle kapa hore ho hang bo ke ke ba tla. Ho fapana le batho ba belaellang lintho ba somang boprofeta ba Bibele, re lemoha kamoo liketsahalo tsa lefatše li phethahatsang seo Lentsoe la Molimo le se profetileng ka mehla ea rōna. (2 Petrose 3:3, 4) Ka mohlala, na boikutlo le boitšoaro ba batho ka kakaretso ha bo bontše hore re phela “matsatsing a ho qetela”? (2 Timothea 3:1-5) Re bona ka mahlo a tumelo hore liketsahalo tsa hona joale tsa lefatše hase feela hore ke lintho tse kileng tsa etsahala. Ho e-na le hoo, ke “pontšo . . . ea ho ba teng ha [Kreste] le ea qetello ea tsamaiso ea lintho.”—Matheu 24:1-14.
12. Mantsoe a Jesu a tlalehiloeng ho Luka 21:20, 21 a ile a phethahala joang lekholong la pele la lilemo?
12 Nahana ka se ileng sa etsahala lekholong la pele la lilemo la Mehla ea rōna e Tloaelehileng se tšoanang le se etsahalang mehleng ea rōna. Ha Jesu Kreste a ne a le lefatšeng, o ile a lemosa barutuoa ba hae a re: “Ha le bona Jerusalema e lika-likelitsoe ke mabotho a liahelong, joale le tsebe hore ho etsoa lesupi ha eona ho atametse. Joale ba leng Judea ba ke ba qale ho balehela lithabeng, ’me ba ka hare ho eona ba tlohe.” (Luka 21:20, 21) E le ho phethahatsa boprofeta bona, mabotho a Baroma a neng a laoloa ke Cestius Gallus a ile a thibella Jerusalema ka 66 C.E. Empa mabotho ao a ile a tloha ka tšohanyetso, ’me seo se ile sa thusa Bakreste hore ba bone hore oo e ne e le monyetla oa hore ba ‘balehele lithabeng.’ Ka 70 C.E., mabotho a Baroma a ile a boea sekoele, a hlasela motse oa Jerusalema, a ba a timetsa tempele ea oona. Josephus o tlaleha hore ho ile ha shoa Bajuda ba ka holimo ho milione, ’me ba 97 000 ba isoa botlamuoeng. Molimo o ile a ahlola tsamaiso eo ea lintho ea Sejuda. Ba ileng ba tsamaea ka tumelo ba ile ba mamela temoso ea Jesu ea hore ba balehe tlokotsi eo.
13, 14. (a) Ke lintho life tse tla etsahala haufinyane? (b) Ke hobane’ng ha re lokela ho lula re falimehetse ho phethahala ha boprofeta ba Bibele?
13 Haufinyane ho tla etsahala se tšoanang mehleng ea rōna. Likarolo tse itseng tsa Machaba a Kopaneng li tla ba le seabo ho lihuoeng ha kahlolo ea Molimo. Feela joalokaha lekholong la pele la lilemo mabotho a Baroma a ne a reretsoe ho boloka Pax Romana (Khotso ea Baroma), morero oa Machaba a Kopaneng kajeno ke ho boloka khotso. Le hoja mabotho a Baroma a ile a leka ho tiisa hore ho ba le tšireletseho e itseng lefatšeng ka nako eo, a ile a etsa Jerusalema lesupi. Ho joalo le kajeno, boprofeta ba Bibele bo bontša hore linaha tse nang le sesole se matla tseo e leng karolo ea Machaba a Kopaneng li tla nka bolumeli e le tšitiso e khathatsang ’me li tla timetsa Jerusalema ea kajeno—e leng Bokreste-’mōtoana—hammoho le Babylona e Moholo kaofela. (Tšenolo 17:12-17) Ka sebele ’muso oa bolumeli ba bohata o laolang lefatše lohle o lintšing tsa ho timetsoa.
14 Ho ripitloa ha bolumeli ba bohata e tla ba pontšo ea ho qaleha ha matšoenyeho a maholo. Karolong ea ho qetela ea matšoenyeho a maholo, ho tla timetsoa mesaletsa ea tsamaiso ena e khopo ea lintho. (Matheu 24:29, 30; Tšenolo 16:14, 16) Ho tsamaea ka tumelo ho re thusa ho lula re falimehetse ho phethahala ha boprofeta ba Bibele. Ha re qhekelloe hore re nahane hore mokhatlo leha e le ofe oa batho o kang Machaba a Kopaneng ke kofuto ea Molimo ea ho tlisa khotso ea ’nete le tšireletseho. Kahoo, na tsela eo re phelang ka eona ha ea lokela ho bontša hore re kholisehile hore “letsatsi le leholo la Jehova le haufi”?—Sofonia 1:14.
Ho Tsamaea ka Pono ho Kotsi Hakae?
15. Le hoja sechaba sa Iseraele se ile sa bona ha Molimo a se hlohonolofatsa, se ile sa oela lerabeng lefe?
15 Se ileng sa etsahalla Baiseraele ba boholo-holo se bontša likotsi tsa hore motho a fokolise tumelo ea hae ka ho tsamaea ka pono. Le hoja Baiseraele ba ile ba bona likotlo tse leshome tse ileng tsa tlotlolla melimo ea bohata ea Egepeta le ho bona ha ba lopolloa ka mohlolo Leoatleng le Lefubelu, ka ho se mamele, ba ile ba etsa namane ea khauta eaba ba qala ho e rapela. Ba ile ba qala ho fela pelo eaba ba khathala ke ho letela Moshe, ea neng a “nka nako e telele ho theoha thabeng.” (Exoda 32:1-4) Ho fela pelo ho ile ha etsa hore ba rapele setšoantšo seo ba neng ba se bona ka mahlo. Ho tsamaea ha bona ka pono ho ile ha halefisa Jehova ’me ha etsa hore “banna ba ka bang likete tse tharo” ba bolaoe. (Exoda 32:25-29) Ruri ho utloisa bohloko ha morapeli oa Jehova kajeno a etsa liqeto tse bontšang hore o belaella Jehova le hore ha a tšepe hore o na le matla a ho phethahatsa litšepiso tsa hae!
16. Lintho tseo Baiseraele ba neng ba li bona ka mahlo li ile tsa ba ama joang?
16 Lintho tseo Baiseraele ba neng ba li bona ka mahlo li ile tsa ba ama hampe ka litsela tse ling. Ho tsamaea ka pono ho ile ha etsa hore ba thothomele ka lebaka la ho tšaba lira tsa bona. (Numere 13:28, 32; Deuteronoma 1:28) Ho ile ha etsa hore ba belaelle bolaoli boo Moshe a neng a bo filoe ke Molimo le ho tletleba ka bophelo ba bona. Ho hloka tumelo hona ho ile ha etsa hore ba rate Egepeta e neng e laoloa ke bademona ho e-na le ho rata Naha e Tšepisitsoeng. (Numere 14:1-4; Pesaleme ea 106:24) E tlameha ebe Jehova o ile a utloa bohloko hakaakang ha a bona kamoo sechaba sa hae se neng se bontša ho hloka tlhompho ho feteletseng bakeng sa Morena oa sona ea sa bonahaleng!
17. Ke eng e ileng ea etsa hore Baiseraele ba hane keletso ea Jehova mehleng ea Samuele?
17 Le mehleng ea moprofeta Samuele, sechaba se ratoang sa Iseraele se ile sa boela sa oela lerabeng la ho tsamaea ka pono. Sechaba seo se ile sa qala ho labalabela ho ba le morena eo se neng se ka mo bona ka mahlo. Le hoja Jehova a ne a bontšitse hore e ne e le eena Morena oa sona, seo ha sea ka sa kholisa sechaba sena hore se tsamaee ka tumelo. (1 Samuele 8:4-9) Ka booatla se ile sa hana keletso e phethahetseng ea Jehova, sa khetha ho tšoana le lichaba tse se pota-potileng, ’me seo se ile sa se lematsa.—1 Samuele 8:19, 20.
18. Re ka ithuta eng ka likotsi tsa ho tsamaea ka pono?
18 Rōna joaloka bahlanka ba Jehova kajeno, re ananela kamano ea rōna e ntle le Molimo. Re ikemiselitse ho ithuta lintho tsa bohlokoa liketsahalong tsa nako e fetileng le ho li sebelisa bophelong ba rōna. (Baroma 15:4) Ha Baiseraele ba ne ba tsamaea ka pono, ba ile ba lebala hore Molimo ke eena ea neng a ba tataisa ka Moshe. Le rōna haeba re sa hlokomele, re ka lebala hore Jehova Molimo le Moshe e Moholoanyane, e leng Jesu Kreste, ke bona ba tsamaisang phutheho ea Bokreste kajeno. (Tšenolo 1:12-16) Re lokela ho itebela hore re se ke ra nka hore karolo e lefatšeng ea mokhatlo o hlophisitsoeng oa Jehova ke ea batho. Seo se ka etsa hore re be le moea oa ho tletleba le ho se hlomphe baemeli ba Jehova le ho felloa ke thahasello ea lijo tsa moea tse fanoang ke “lekhoba le tšepahalang le le masene.”—Matheu 24:45.
Ikemisetse ho Tsamaea ka Tumelo
19, 20. U ikemiselitse ho etsa’ng, hona hobane’ng?
19 Bibele e re: “Ha re loane le nama le mali, empa re loana le mebuso, le balaoli, le babusi ba lefatše ba lefifi lena, le makhotla a moea a khopo a leng libakeng tsa leholimo.” (Baefese 6:12) Sera sa rōna se seholo ke Satane Diabolose. O ikemiselitse ho senya tumelo ea rōna ho Jehova. O tla sebelisa ntho leha e le efe ho re susumelletsa hore re koenehele qeto eo re e entseng ea ho sebeletsa Molimo. (1 Petrose 5:8) Ke eng e tla re sireletsa hore re se thetsoe ke ponahalo ea tsamaiso ea Satane? Re tla sireletsoa ke ho tsamaea ka tumelo, eseng ka pono! Ho tšepa litšepiso tsa Jehova ho tla re sireletsa hore re se “[senyeheloe] ke tumelo joaloka sekepe se soahlamaneng.” (1 Timothea 1:19) Kahoo, a re ikemisetseng ka hohle-hohle ho tsoela pele re tsamaea ka tumelo, re kholisehile ka ho feletseng hore Jehova o tla re hlohonolofatsa. ’Me e se eka re ka lula re rapela e le hore re ka phonyoha lintho tsohle tse reretsoeng hore li etsahale haufinyane.—Luka 21:36.
20 Ha re ntse re tsamaea ka tumelo, eseng ka pono, re na le Mohlala o motlehali. Bibele e re: “Kreste o ile a utloa bohloko a le siela mohlala hore le latele mehato ea hae haufi-ufi.” (1 Petrose 2:21) Sehloohong se latelang re tla tšohla kamoo re ka tsoelang pele ho tsamaea kamoo a ileng a tsamaea kateng.
Na U sa Hopola?
• U ithutile eng mohlaleng oa Moshe le oa Esau mabapi le ho tsamaea ka tumelo, eseng ka pono?
• Ke eng e tla re thusa ho qoba ho rata lintho tse bonahalang?
• Ho tsamaea ka tumelo ho re thusa joang hore re qobe ho ba le boikutlo ba hore bofelo bo sa le hōle?
• Ke hobane’ng ha ho tsamaea ka pono ho le kotsi?
[Setšoantšo se leqepheng la 17]
Moshe o ile a tsamaea ka tumelo
[Setšoantšo se leqepheng la 18]
Na hangata boithabiso bo u thibela ho etsa mesebetsi ea moea?
[Setšoantšo se leqepheng la 20]
Ho ela hloko Lentsoe la Molimo ho u sireletsa joang?