Le se ke la Tšaba—Jehova o na le Lōna!

LILEMONG tse fetang 50 tse fetileng, nakoana ka mor’a ho qhoma ha bomo ea pele ea nyutlelie, rasaense Harold C. Urey, ea ileng a hapa Khau ea Nobel, o ile a re ka bokamoso: “Re tla ja tšabo, re robale ka tšabo, re phele ka tšabo ’me re shoe ka tšabo.” Ka sebele, kajeno ho tletse tšabo lefatšeng la rōna, ’me ha ho thata ho utloisisa lebaka! Letsatsi le leng le le leng, likoranta li tlaleha liketso tse tšosang tsa bokhukhuni, liketso tse mabifi tsa tlōlo ea molao le maloetse a tsietsang.

Joaloka Bakreste, rea tseba hore na maemo ana a bolela eng. A bontša hore re phela “matsatsing a ho qetela” a tsamaiso ena e khopo, ao Bibele e boletseng esale pele hore a ne a tla tšoauoa ka “linako tse mahlonoko tseo ho leng thata ho sebetsana le tsona.” (2 Timothea 3:1) Sena se matlafatsa tšepo ea rōna ea hore haufinyane Jehova Molimo o tla tlisa lefatše le lecha leo ho loka ho tla aha ho lona. (2 Petrose 3:13) Leha ho le joalo, na see se bolela hore hona joale rōna joaloka Bakreste ha re na tšabo?

Kamoo Bahlanka ba Jehova ba Talimang Tšabo Kateng

Jakobo, Davida le Elia ba ne ba le har’a bahlanka ba Jehova ba ileng ba e-ba le tšabo e itseng ha ba talimane le maemo a kotsi. (Genese 32:6, 7; 1 Samuele 21:11, 12; 1 Marena 19:2, 3) Hase hore banna bana ba ne ba se na tumelo. Ho fapana le moo, ba ile ba bontša hore ba ne ba tšepile Jehova ka tieo. Leha ho le joalo, Jakobo, Davida le Elia e ne e le batho; kahoo, ba ne ba e-ba le tšabo. Morutuoa Jakobo o ile a ngola a re: “Elia e ne e le motho ea nang le maikutlo a joaloka a rōna.”—Jakobo 5:17.

Le rōna re ka ’na ra ikutloa re e-na le tšabo ha re nahana ka bothata boo re talimaneng le bona hona joale kapa boo re ka ’nang ra talimana le bona nakong e tlang. Hoa utloahala hore motho a be le tšabo e joalo. Re hopole hore Bibele e re Satane Diabolose o ikemiselitse ho “loantša . . . ba bolokang litaelo tsa Molimo ’me ba e-na le mosebetsi oa ho paka ka Jesu.” (Tšenolo 12:17) Le hoja mantsoe ana a lebisitsoe ka ho toba ho Bakreste ba tlotsitsoeng, Pauluse o ile a ngola a re: “Bohle ba lakatsang ho phela ka boinehelo ba bomolimo kamanong le Kreste Jesu le bona ba tla hlorisoa.” (2 Timothea 3:12) Leha ho le joalo, ha rea lokela ho sithabetsoa ke tšabo ha re thulana le mathata. Hobane’ng?

“Molimo oa Liketso Tse Pholosang”

Mopesaleme Davida o ile a ngola a re: “Molimo oa ’nete ke Molimo oa liketso tse pholosang.” (Pesaleme ea 68:20) Khafetsa Jehova o ile a bontša matla a hae a ho pholosa batho ba hae, ka ho ba pholosa maemong a kotsi kapa ka ho ba fa matla a ho mamella. (Pesaleme ea 34:17; Daniele 6:22; 1 Bakorinthe 10:13) Ho latela seo u ithutileng sona ka Bibeleng, ke ‘liketso tse kae tse pholosang’ tseo u li hopolang?

Ke hobane’ng ha u sa sebelise Watch Tower Publications Indexa ho batlisisa ka liketsahalo tsa sebele tse kang Moroallo oa lefatše lohle oa mehleng ea Noe, ho pholosoa ha Lota le barali ba hae Sodoma le Gomora, ho falla ha Baiseraele Egepeta le leeto la bona le fetang Leoatleng le Lefubelu, kapa ka morero oa bolotsana oa Hamane oa ho bolaea Bajuda o ileng oa nyopa? Ho bala le ho thuisa ka litlaleho tsena tse thabisang ho tla matlafatsa tumelo ea hao hore Jehova ke Molimo oa liketso tse pholosang. ’Me sena se tla u thusa hore u talimane le liteko tsa tumelo ea hao u sa tšabe letho.

Mehlala ea Mehleng ea Kajeno

Na ho na le mehlala ea mehleng ea kajeno eo u e tsebang ea batho ba ileng ba bontša mamello sebakeng sa heno? E ka ’na ea e-ba mohlala oa motho ea ileng a koalloa chankaneng ka lebaka la ho tšepahala ha hae ho Molimo. Mohlomong u tseba Mokreste ea hōlileng ea sebeletsang Jehova empa a ntse a kula. Kapa nahana ka bacha ba ikarolang lefatšeng ho sa tsotellehe khatello e matla ea bao ba kenang sekolo le bona. Ho phaella moo, ho na le batsoali ba se nang balekane, ba hōlisang bana ba le bang, kapa masoha a sebeletsang Jehova ho sa tsotellehe maikutlo a ho hlora. U ithuta’ng ho batho ba joalo? Ho nahana ka ho tšepahala ha bona ho ka u thusa hore u mamelle ho sa tsotellehe liteko leha e le life tse u hlahelang le hore u thulane le tsona u sa tšabe letho.

Ha rea lokela ho ba sebete feela ha re hanyetsoa le ha re hlorisoa empa re lokela ho ba sebete le ha re qala ho belaella hore Jehova oa re rata. Re lokela ho ba le tšepo ea hore thekollo ea Kreste e sebetsa ho rōna re le batho ka bomong. (Bagalata 2:20) Ha ho le joalo, re ka atamela Jehova re sa tšabe letho. Haeba re ikutloa re sa tšoaneloe ke lerato la Jehova, re ka nahana ka seo Jesu a ileng a se bolella balateli ba hae ha a ne a re: “Na lirobele tse peli ha li rekisoe ka chelete ea tšepe ea bohlokoa bo bonyenyane? Empa leha ho le joalo, ha ho le se seng sa tsona se tla oela fatše kantle le hore Ntat’a lōna a tsebe. Empa moriri oa lihlooho tsa lōna o baliloe kaofela. Ka hona le se ke la tšaba: le ba bohlokoa ho feta lirobele tse ngata.”—Matheu 10:29-31.

Hangata limakasine tsa Molula-Qhooa le Tsoha! li hatisa liphihlelo tsa Lipaki Tsa Jehova tsa mehleng ea kajeno tse ileng tsa thulana le mathata li sa tšabe letho. Sena ha se bolele hore boemo ba tsona bo ne bo sa li utloise bohloko. Leha ho le joalo, ha lia ka tsa lumella boemo boo ho li etsa hore li khaotse ho sebeletsa Jehova. Litlaleho tsa tsona tse hatisitsoeng li ka u thusa hore le uena u mamelle u sa tšabe letho. Nahana ka mehlala e latelang e ’meli.

Ho Holofala ho Ile ha Fetola Bophelo ba Hae

Tsoha! ea May 8, 2003, e ile ea e-ba le sehlooho se reng “Kamoo ho Holofala ho Fetotseng Bophelo ba ka Kateng.” Tsoheng! ena, Stanley Ombeva, e mong oa Lipaki Tsa Jehova naheng ea Kenya, o bolela mathata ao a ileng a thulana le ’ona ka lebaka la ho chaisoa ke koloi e neng e le lebelong. Ha bophelo ba hae bo ntse bo mpefala, o ile a felloa ke mosebetsi ’me ha aa ka a fumana le sente mosebetsing. Tlalehong ea hae, Mor’abo rōna Ombeva oa lumela: “Ha boemo ba ka bo ntlhakela hantle, ke ile ka nyahama, ka ba moithati le ho teneha feela. Ka linako tse ling ke ne ke e-ba bohale le ho ikutloa ke tlalellane.” Ho sa tsotellehe ketsahalo ena e bohloko, monna enoa oa Mokreste o ile a lula a sa tšabe. Ha aa ka a lumella masoabi hore a mo sithabetse le ho mo etsa hore a tele. Ho e-na le hoo, o ile a itšetleha ka Jehova. Mor’abo rōna Ombeva o re: “Kamehla [Jehova] o ne a ntšehetsa ho sohle se ntlhahelang—’me o ne a ntšehetsa haholo hoo ka linako tse ling ke neng ke itšoabela. Ke ile ka etsa qeto e tiileng ea ho bala le ho thuisa ka mangolo ao ke neng ke tseba hore aa ntšelisa boemong ba ka.”

Litlhaloso tse builoeng ka botšepehi tsa Mor’abo rōna Ombeva li thusitse ba bangata hore ba mamelle liteko ba sa tšabe letho. Morali e mong oabo rōna oa Mokreste o ile a ngola a re: “Ke ile ka lla ha ke bala sehlooho sena. Ke ile ka bona hore Jehova o ne a sebelisa sehlooho sena ho bontša tlhokomelo ea hae e mofuthu le e lerato le hore oa ntšelisa.” Paki e ’ngoe e ile ea ngola ea re: “Lihlooho tsa mofuta ona li khothatsa haholo rōna ba talimaneng le maemo a tšoanang le ao le ba llelang ka hare.”

Ho Sebetsana le Khatello ea Maikutlo

Phihlelo e ’ngoe e amang maikutlo ke ea Herbert Jennings, e boletsoeng sehloohong se reng, “Ha le Tsebe Hore na Bophelo ba Lōna bo Tla ba Joang Hosasane.”b Mor’abo rōna Jennings o tšoeroe ke lefu la ho loantšana ha maikutlo ho ferekanyang kelello. Ha a nahana ka nako ea ha a ne a qala ho kula, o re: “Ke ne ke loana ntoa hore ke ee libokeng tsa Bokreste. Leha ho le joalo, ke ne ke kholisehile ka ho feletseng hore botsoalle ba moea ke ba bohlokoa. Ntho e neng e nthusa e ne e le hore ke kene ka Holong ea ’Muso ka mor’a hore batho ba bangata ba lule ’me ke tlohe pelenyana ba qala ho phethesela ka mor’a lenaneo.”

Ho bolela litaba tse molemo le hona ho ne ho le thata. Mor’abo rōna Jennings o re: “Ka linako tse ling, esita le ka mor’a hore ke fihle ntlong, ke ne ke se na sebete sa ho kokota monyako. Leha ho le joalo, ke ne ke sitoa ho lesa hobane ke ne ke hlokomela hore tšebeletso ea rōna e bolela poloko ea rōna le ea ba arabelang hantle. (1 Timothea 4:16) Ka mor’a nakoana, ke ne ke khona ho laola maikutlo a ka, ke ee ntlong e latelang, ebe ke leka hape. Ka ho tsoela pele ke kopanela tšebeletsong, ke ile ka ipoloka ke phela hantle moeeng ka tsela e itseng ’me seo se ile sa nkekeletsa matla a hore ke loane ka katleho.”

Pale ena e builoeng ka botšepehi ea Mor’abo rōna Jennings e thusitse babali ba bangata hore le bona ba tobane le matšoenyeho a bona ba sa tšabe letho. Ka mohlala, morali e mong oabo rōna oa Mokreste o ile a ngola a re: “Lilemo tsena tse 28 tseo ke li qetileng ke bala limakasine tsa Molula-Qhooa le Tsoha!, ha ho mohla nkileng ka ameha maikutlo ho tšoana leha ke ne ke bala sehlooho sena. Ke ile ka tlameha ho tlohela tšebeletso ea nako e tletseng ’me ka ikutloa ke le molato haholo. Ke nahana hore haeba ke ne ke e-na le tumelo e eketsehileng, nkabe ke ile ka tsoela pele. Ho bala kamoo Mor’abo rōna Jennings a ileng a tlameha ho tlohela kabelo ea hae e le hore a e’o ikoka ho ile ha etsa hore ke be le pono e nepahetseng ka boemo ba ka. Ka sebele ena e bile karabelo ea lithapelo tsa ka!”

Mora e mong oabo rōna oa Mokreste le eena o ile a ngola a re: “Ka mor’a ho sebeletsa phutheho ke le moholo ka lilemo tse leshome, ke ile ka tlameha ho tlohela kabelo ena ea bohlokoa ka lebaka la lefu la kelello. Maikutlo a hore ke hlōlehile a ne a le matla haholo hoo hangata ke neng ke tepella haholo ha ke bala lipale tsa bophelo, tseo khafetsa li buang ka lintho tse hlollang tse etsoang ke batho ba Jehova. Empa mamello ea Mor’abo rōna Jennings e ile ea ’matlafatsa. Ke balile sehlooho sena ka makhetlo a mangata.”

Ho Hatela Pele ka Kholiseho

Joaloka Mor’abo rōna Ombeva le Mor’abo rōna Jennings, Lipaki Tsa Jehova tse ngata li tsoela pele ho rapela Jehova Molimo li sa tšabe letho ho sa tsotellehe litšitiso tse nyahamisang. Haeba le uena u boemong bo tšoanang, rea u babatsa. Kholiseha hore: ‘Molimo hase ea sa lokang hoo a ka lebalang mosebetsi oa hao le lerato leo u ileng ua le bontša bakeng sa lebitso la hae, ka hore u sebelelitse bahalaleli ’me u tsoela pele ho sebeletsa.’—Baheberu 6:10.

Feela joalokaha Jehova a ile a thusa batho ba hae ba tšepahalang ba mehleng ea boholo-holo hore ba hlōle lira tsa bona, le uena a ka u thusa hore u hlōle bothata leha e le bofe boo u ka thulanang le bona. Kahoo, nahana ka ho teba ka mantsoe ao Jehova a ileng a a bua ka moprofeta Esaia: “U se ke ua tšoha, kaha ke na le uena. U se ke ua talima koana le koana, etsoe ke ’na Molimo oa hao. Ke tla u matlafatsa. Ka sebele ke tla u thusa. Ke tla u tšoara ka tieo ka letsoho la ka le letona la ho loka.”—Esaia 41:10.

[Mongolo o botlaaseng ba leqephe]

[Litšoantšo tse leqepheng la 16]

Joaloka Stanley Ombeva (ea ka holimo) le Herbert Jennings (ea ka ho le letona), ba bangata ba ile ba sebeletsa Jehova ba sa tšabe letho

[Tlhaloso ea Moo Setšoantšo se Nkiloeng Teng e leqepheng la 14]

USAF photo