Rata Molimo ea U Ratang

“U rate Jehova Molimo oa hao ka pelo ea hao eohle le ka moea oa hao oohle le ka kelello ea hao eohle.”—MATHEU 22:37.

1, 2. Ebe mohlomong ke eng e ileng ea tsosa potso e mabapi le taelo e khōlō?

KAMOO ho bonahalang kateng, Bafarisi ba ne ba ngangisana haholo ka potso ena mehleng ea Jesu: Ebe melaong e fetang 600 ea Molao oa Moshe, oa bohlokoahali e ne e le ofe? Na e ne e le molao o laolang mahlabelo? Ha ho pelaelo hore mahlabelo a ne a etsetsoa hore batho ba tšoareloe libe le hore ba lebohe Molimo. Kapa ebe mohlomong molao oa bohlokoahali e ne e ka ba oa lebollo? Le oona e ne e le oa bohlokoa hobane lebollo le ne le bontša hore Jehova o ne a entse selekane le Abrahama.—Genese 17:9-13.

² Ka lehlakoreng le leng, ho hlakile hore ba neng ba khomarela mekhoa e tloaetsoeng ba ne ba nahana hore kaha molao o mong le o mong o fanoeng ke Molimo e ne e le oa bohlokoa, e ne e tla ba phoso ho phahamisa molao o mong ka holim’a e meng, le haeba e meng ho ne ho bonahala e se ea bohlokoa haholo. Bafarisi ba ile ba etsa qeto ea hore ba botse Jesu potso ena e bakang khang. Mohlomong o ne a tla bua ntho e ’ngoe e neng e tla etsa hore batho ba se ke ba mo tšepa. E mong oa bona o ile a tla ho Jesu ’me a mo botsa: “Taelo e khōlō ke efe Molaong?”—Matheu 22:34-36.

3. Jesu o ile a re taelo e khōlō ke efe?

³ Karabo eo Jesu a ileng a fana ka eona ke ea bohlokoa haholo ho rōna kajeno. Karabong ea hae o ile a akaretsa se lutseng e le mokokotlo oa borapeli ba ’nete le se tla tsoela pele e le oona kamehla. Jesu o ile a qotsa Deuteronoma 6:5 eaba o re: “‘U rate Jehova Molimo oa hao ka pelo ea hao eohle le ka moea oa hao oohle le ka kelello ea hao eohle.’ Ena ke eona taelo e khōlō le ea pele.” Le hoja Mofarisi a ile a kōpa taelo e le ’ngoe feela, Jesu o ile a mo bolella e ’ngoe hape. O ile a qotsa Levitike 19:18 ’me a re: “Ea bobeli, e joaloka eona, ke ena, ‘U rate moahelani oa hao joalokaha u ithata.’” Ka mor’a moo Jesu o ile a bontša hore melao ena e ’meli ke eona mokokotlo oa borapeli bo hloekileng. O ile a thibela boiteko bohle ba hore a thathamise melao e meng ka bohlokoa ba eona ka hore a qetele taba ena ka ho re: “Litaelong tsena tse peli ho itšetlehile Molao oohle, le Baprofeta.” (Matheu 22:37-40) Sehloohong sena, re tla tšohla taelo e khōlō ho tsena tse peli. Ke hobane’ng ha re lokela ho rata Molimo? Re bontša joang hore rea mo rata? Hona re ka hōlisa lerato la mofuta oo joang? Ho tseba likarabo tsa lipotso tsena ke ntho ea bohlokoa hobane re ka mo khahlisa ha re mo rata ka pelo eohle, moea oohle le kelello eohle.

Bohlokoa ba Lerato

4, 5. (a) Ke hobane’ng ha Mofarisi a sa ka a makatsoa ke seo Jesu a ileng a se bua? (b) Ntho ea bohlokoa ho feta mahlabelo le linyehelo ke eng ho Molimo?

⁴ Ho bonahala eka Mofarisi eo ea neng a botsa Jesu ha aa ka a khopisoa kapa hona ho makatsoa ke karabo eo a ileng a e fuoa. O ne a tseba hore ho rata Molimo ke karolo ea bohlokoa ea borapeli ba ’nete, le hoja batho ba bangata ba ne ba hlōloa ho bontša lerato leo. Lisynagogeng batho ba ne ba tloaetse ho etsa Shema, kapa thapelo ea Seheberu, e neng e akarelletsa litemana tse ho Deuteronoma 6:4-9, tseo Jesu a ileng a qotsa ho tsona. Ka mor’a moo, tlalehong e lengolong la Mareka e tšoanang le ena, Mofarisi eo o ile a re ho Jesu: “Mosuoe, u boletse hantle tumellanong le ’nete, ‘[Molimo] o Mong, ’me ha ho e mong ntle ho Eena’; ’me ho mo rata ka pelo eohle ea motho le ka kutloisiso eohle ea motho le ka matla ’ohle a motho le ho rata moahelani oa motho joalokaha motho a ithata ke habohlokoa haholo ho feta linyehelo tsohle tse feletseng tsa secheso le mahlabelo ’ohle.”—Mareka 12:32, 33.

⁵ Ka sebele, le hoja Molao o ne o hloka hore ho etsoe licheso le mahlabelo, ntho ea bohlokoa ho Molimo ke lerato le tlohang pelong la bahlanka ba hae. Serobele se neng se nyeheloa ho Molimo ka lerato le boinehelo e ne e le sa bohlokoa ho eena ho feta lipheleu tse sekete tse nyeheloang ka morero o fosahetseng. (Mikea 6:6-8) Hopola tlaleho ea mohlolohali ea hlokang eo Jesu a ileng a mo bona tempeleng ea Jerusalema. Licheletana tse peli tsa tšepe tseo a ileng a li akhela letlōleng li ne li ke ke tsa reka serobele leha se le seng. Leha ho le joalo monehelo oo, o fanoeng ka lebaka la ho rata Jehova ho tloha pelong, e bile oa bohlokoa ho Jesu ho feta menehelo e fanoeng ke barui ba neng ba nka botlallong. (Mareka 12:41-44) Ho khothatsa hakaakang ho tseba hore ntho ea bohlokoa ho Jehova ke lerato la rōna ho eena leo bohle re ka le bontšang ho sa tsotellehe maemo a rōna!

6. Pauluse o ile a ngola eng ka bohlokoa ba lerato?

⁶ Moapostola Pauluse o ile a ngola se latelang ha a hatisa bohlokoa ba lerato borapeling ba ’nete: “Haeba ke bua maleme a batho le a mangeloi empa ke se na lerato, ke fetohile sekotoana sa brase se lumang kapa cymbala e otlanngoang. Haeba ke e-na le mpho ea ho profeta ’me ke tloaelane le liphiri tsohle tse halalelang le tsebo eohle, ’me haeba ke e-na le tumelo eohle hore ke tlose lithaba ho li isa sebakeng se seng, empa ke se na lerato, ha ke letho. Haeba ke fana ka lintho tsohle tsa ka ho fepa ba bang, ’me haeba ke nehelana ka ’mele oa ka, e le hore nka ithorisa, empa ke se na lerato, ha ke rue letho ho hang.” (1 Bakorinthe 13:1-3) Ho hlakile hore lerato ke la bohlokoa e le hore borapeli ba rōna bo khahlise Molimo. Ebe joale re ka bontša joang hore re rata Jehova?

Kamoo re Bontšang Kateng Hore re Rata Jehova

7, 8. Re ka bontša joang hore re rata Jehova?

⁷ Batho ba bangata ba lumela hore lerato ke boikutlo boo re ke keng ra bo laola; batho ba bua ka hore ba ile ba utloa ba rata motho ea itseng. Leha ho le joalo, lerato la sebele hase feela ntho eo motho a e utloang. Le khetholloa ka liketso ebile le bontšoa ka tsona, eseng ka maikutlo. Bibele e re lerato ke “tsela e fetisisang” hape ke ntho eo re e “phehellang.” (1 Bakorinthe 12:31; 14:1) Bakreste ba khothalletsoa hore ba se ke ba rata feela “ka lentsoe kapa ka leleme, empa [ba] rate ka ketso le ’nete.”—1 Johanne 3:18.

⁸ Ho rata Molimo ho re tlama hore re etse se mo khahlisang, re emele bobusi ba hae re be re bo phahamise, ka mantsoe le ka liketso. Ho re susumelletsa hore re qobe ho rata lefatše le litsela tsa lona tsa ho se tšabe Molimo. (1 Johanne 2:15, 16) Ba ratang Molimo ba hloea se sebe. (Pesaleme ea 97:10) Ho rata Molimo ho boetse ho bolela ho rata moahelani, ’me re tla bua ka hona sehloohong se latelang. Ho feta moo, ho rata Molimo ho hloka hore re mamele. Bibele e re: “Se boleloang ke lerato la Molimo ke sena, [ke] hore re boloke litaelo tsa hae.”—1 Johanne 5:3.

9. Jesu o ile a bontša joang hore o rata Molimo?

⁹ Jesu o ile a bontša ka ho phethahetseng hore na ho rata Molimo ho bolela’ng. Lerato le ile la mo susumelletsa hore a tlohe habo leholimong a tl’o lula lefatšeng e le motho. Le ile la mo tlama hore a tlotlise Ntate oa hae ka lintho tseo a ileng a li etsa le ho li ruta. Lerato le ile la mo susumelletsa hore a ‘mamele ho isa lefung.’ (Bafilipi 2:8) Ho mamela hoo ho neng ho bontša lerato la hae, ho ile ha bulela batho ba tšepahalang tsela ea hore e be ba lokileng ka pel’a Molimo. Pauluse o ile a ngola a re: “Ka ho se mamele ha motho a le mong [Adama] ba bangata ba ile ba etsoa baetsalibe, ka ho tšoanang ka ho mamela ha motho a le mong [Kreste Jesu] ba bangata ba tla etsoa ba lokileng.”—Baroma 5:19.

10. Ke hobane’ng ha ho rata Molimo ho akarelletsa ho mamela?

¹⁰ Re bontša lerato la rōna ka ho mamela Molimo, joaloka Jesu. Moapostola Johanne ea neng a ratoa ke Jesu, o ile a ngola a re: “Sena ke seo lerato le se bolelang, hore re tsoele pele ho tsamaea ho ea ka litaelo tsa hae.” (2 Johanne 6) Ba ratang Jehova e le kannete ba labalabela tataiso ea hae. Ha ba hlokomela hore ba ke ke ba atleha ho tsamaisa mehato ea bona, ba tšepa bohlale ba Molimo ebe ba ikokobelletsa tataiso ea hae e lerato. (Jeremia 10:23) Ba tšoana le batho ba Berea ea boholo-holo ba neng ba e-na le likelello tse bulehileng ba ileng ba amohela molaetsa oa Molimo ka ‘tabatabelo ea kelello’ ba lakatsa ka matla hore ba etse thato ea Molimo. (Liketso 17:11) Ba ile ba hlahloba Mangolo ka hloko hore ba utloisise thato ea Molimo haholoanyane, e leng se ileng sa ba thusa hore ba bontše lerato ka ho etsa liketso tse ling tse bontšang hore baa mo mamela.

11. Ho rata Molimo ka lipelo le likelello tsohle tsa rōna, meea eohle ea rōna le matla ’ohle a rōna ho bolela eng?

¹¹ Joalokaha Jesu a ile a bolela, re lokela ho rata Molimo ka lipelo tsohle tsa rōna, likelello tsohle tsa rōna, meea eohle ea rōna le matla ’ohle a rōna. (Mareka 12:30) Lerato leo, le tsoa pelong e akarelletsang maikutlo a rōna, litakatso tsa rōna le menahano ea rōna e tebileng, ’me re labalabela ka tieo ho khahlisa Jehova. Re boetse re mo rata ka menahano ea rōna. Ha rea inehela ka bofofu; re tseba Jehova—litšoaneleho tsa hae, litekanyetso tsa hae le merero ea hae. Re mo sebeletsa le ho mo rorisa ka meea ea rōna, e leng botho bohle ba rōna le ka bophelo ba rōna. Re boetse re mo rorisa le ho mo sebeletsa ka matla a rōna.

Lebaka la Hore re Rate Jehova

12. Ke hobane’ng ha Molimo a hloka hore re mo rate?

¹² Lebaka le leng leo ka lona re lokelang ho rata Jehova ke hobane o hloka hore re bonahatse litšoaneleho tsa hae. Molimo ke mohloli oa lerato le mohlala o phahameng ka ho fetisisa oa lona. Moapostola Johanne ea bululetsoeng o ile a ngola a re: “Molimo ke lerato.” (1 Johanne 4:8) Batho ba ile ba bōptjoa ka setšoantšo sa Molimo; re ne re bōpetsoe ho bontša lerato. Ha e le hantle, lerato ke motheo oa bobusi ba Jehova. O batla ha bafo ba hae e le batho ba mo sebeletsang hobane ba mo rata ebile ba rata tsela e lokileng eo a busang ka eona. Ka sebele, lerato lea hlokahala hore pōpo eohle e be le khotso le kutloano.

13. (a) Ke hobane’ng ha Baiseraele ba ile ba bolelloa mantsoe aa: “U rate Jehova Molimo oa hao”? (b) Ke hobane’ng ha ho utloahala hore ebe Jehova o lebeletse hore re mo rate?

¹³ Lebaka le leng la ho rata Jehova ke hore re leboha seo a re etselitseng sona. Hopola seo Jesu a ileng a se bua ho Bajuda ha a ne a re: “U rate Jehova Molimo oa hao.” Ho ne ho sa lebelloa hore ba rate molimo ea se nang thahasello le eo ba sa mo tsebeng. Ba ne ba lokela ho rata Molimo ea ba senoletseng lerato la hae. Jehova e ne e le Molimo oa bona. Ke Eena ea neng a ba ntšitse Egepeta ho ba kenya Naheng e Tšepisitsoeng, A ba sireletsa, A ba boloka, A ba rata le ho ba khalemela ka lerato. Kajeno, Jehova ke Molimo oa rōna, ea faneng ka Mora oa hae e le thekollo e le hore re ka ba le bophelo bo sa feleng. Ho utloahala hakaakang hore ebe Jehova o lebeletse hore le rōna re mo rate! Re kōptjoa ho rata Molimo hobane a re rata. Re rata Ea ileng a “re rata pele.”—1 Johanne 4:19.

14. Lerato la Jehova le tšoana le la motsoali ea lerato ka tsela efe?

¹⁴ Lerato leo Jehova a ratang moloko oa batho ka lona le tšoana le leo motsoali ea lerato a ratang bana ba hae ka lona. Le hoja ba sa phethahala, batsoali ba lerato ba sehla ka thata ka lilemo ba sebelisa chelete e ngata le lintho tse ling hore ba hlokomele bana ba bona. Kaha batsoali ba batla hore bana ba bona ba thabe le hore ba atlehe, baa ba laea, baa ba khothatsa, baa ba tšehetsa le ho ba khalemela. Batsoali ba rata hore bana ba bona ba ba etsetse’ng? Ba batla hore bana ba bona ba ba rate le hore ba nke ka botebo molemo oo ba ba etselitseng oona. Na hase ho utloahalang hore ebe Ntate oa rōna ea phethahetseng oa leholimo o lebeletse hore re mo lebohe ka lerato bakeng sa sohle seo a re etselitseng sona?

Ho Hlaolela ho Rata Molimo

15. Mohato oa pele oa ho hlaolela ho rata Molimo ke ofe?

¹⁵ Ha re e-s’o bone Molimo kapa hona ho utloa lentsoe la hae. (Johanne 1:18) Empa, o re kōpa hore re kene kamanong e lerato le eena. (Jakobo 4:8) Re ka ho etsa joang? Bohato ba pele ba ho rata motho ofe kapa ofe ke hore re mo tsebe; ho thata ho rata motho eo re sa mo tsebeng. Jehova o fane ka Lentsoe la hae, Bibele, e le hore re ka ithuta ka eena. Ke ka lebaka leo Jehova, a sebelisang mokhatlo oa hae o hlophisitsoeng hore a re khothaletse ho bala Bibele kamehla. Bibele ke eona e re rutang ka Molimo, ka litšoaneleho tsa hae, ka botho ba hae, hammoho le litsela tseo a sebelisaneng le batho ka tsona ka lilemo tse makholo. Ha re ntse re nahanisisa ka litlaleho tsena, tsela eo re mo utloisisang ka eona le eo re mo ratang ka eona e tla hōla.—Baroma 15:4.

16. Ho nahana ka tšebeletso ea Jesu ho ntlafatsa lerato leo re ratang Molimo ka lona joang?

¹⁶ Tsela ea bohlokoa eo re ka hōlisang lerato leo re ratang Jehova ka lona ke ka ho nahana ka bophelo ba Jesu le ka tšebeletso ea hae. Ha e le hantle, Jesu o ne a etsisa Ntate oa hae ka ho phethahetseng hoo a neng a ka re: “Ea mponeng o bone le Ntate.” (Johanne 14:9) Na ha u angoe maikutlo ke qenehelo eo Jesu a ileng a e bontša ha a ne a tsosa mora ea ’notši oa mosali oa mohlolohali? (Luka 7:11-15) Na ha ho khahlise ho tseba hore ka boikokobetso, le hoja Jesu e le Mora oa Molimo ebile e le Motho e moholo ka ho fetisisa ea kileng a phela, o ile a hlatsoa maoto a barutuoa ba hae? (Johanne 13:3-5) Na ha u susumetsoe ke ho tseba hore leha a ne a le moholo ebile a le bohlale ho feta batho bohle, o ne a atameloa ke bohle, esita le bana? (Mareka 10:13, 14) Ha re ntse re thuisa ka kananelo ka lintho tsena, re tšoana le Bakreste bao Petrose a ileng a ngola ka bona, a re: ‘Le hoja ho se mohla le kileng la bona [Jesu], lea mo rata.’ (1 Petrose 1:8) Ha lerato leo re ratang Jesu ka lona le ntse le hōla, le leo re ratang Jehova ka lona lea hōla.

17, 18. Lerato leo re ratang Jehova ka lona le ka hōla ha re thuisa ka litokisetso life tsa hae tse lerato?

¹⁷ Tsela e ’ngoe eo ka eona re ka hōlisang lerato leo re ratang Molimo ka lona, ke ka ho thuisa ka litokisetso tse ngata tse lerato tseo a li entseng hore re thabele bophelo, tse kang pōpo e ntle, limenyemenye tse ngata tse jeoang, setsoalle se setle sa metsoalle e molemo, hammoho le lintho tse ngata tse re thabisang le tse re khotsofatsang. (Liketso 14:17) Ha re ntse re ithuta haholo ka Molimo oa rōna, re ba le mabaka a eketsehileng a ho leboha molemo oa hae o sa feleng le ho fana ha hae. Nahana ka lintho tsohle tseo Jehova a u etselitseng tsona uena ka bouena. Na ha u lumele hore ho loketse hore u mo rate?

¹⁸ E ’ngoe ea limpho tseo Molimo a re fileng tsona ke monyetla oa ho bua le eena ka thapelo neng kapa neng, re tseba hore “Ea Utloang thapelo” oa re mamela. (Pesaleme ea 65:2) Jehova o abetse Mora ea ratoang oa hae matla a ho busa le a ho ahlola. Leha ho le joalo, ho utloa lithapelo, ha a ho abele mang kapa mang, esita le eena Mora oa hae. O mamela lithapelo tsa rōna ka boeena. Kameho ena e lerato eo Jehova a re bontšang eona ka boeena e re atametsa ho eena.

19. Ke litšepiso life tsa Jehova tse re atametsang ho eena?

¹⁹ Re boetse re atamela Jehova ha re nahana ka seo a tla se etsetsa moloko oa batho. O tšepisitse hore o tla felisa ho kula, masoabi le lefu. (Tšenolo 21:3, 4) Ha batho ba se ba phethahetse, ha ho na motho ea tla imeloa kelellong, ea tla nyahama, kapa ea tla oeloa ke koluoa. Tlala, bofutsana le lintoa li tla fela. (Pesaleme ea 46:9; 72:16) Lefatše le tla etsoa Paradeise. (Luka 23:43) Jehova o tla re hlohonolofatsa ka lintho tsena hobane a re rata, eseng hobane a tlamehile.

20. Moshe o ile a re’ng ka melemo ea ho rata Jehova?

²⁰ Kahoo, ho na le mabaka a matla a ho rata Molimo oa rōna le a ho hōlisa lerato leo. Na u tla tsoela pele ho hōlisa lerato leo u ratang Molimo ka lona, u mo lumella hore a u tataise? Ho ho uena. Moshe o ile a hlokomela melemo ea ho rata Jehova le ea ho tsoela pele re mo rata. Moshe o ile a bua mantsoe ana ho Baiseraele ba boholo-holo: “Le khethe bophelo e le hore le tsoele pele le phela, lōna le bana ba lōna, ka hore le rate Jehova Molimo oa lōna, le mamele lentsoe la hae ’me le mo khomarele; etsoe ke eena bophelo ba lōna le bolelele ba matsatsi a lōna.”—Deuteronoma 30:19, 20.

Na U sa Hopola?

• Ke hobane’ng ha e le habohlokoa hore re rate Jehova?

• Re ka bontša joang hore re rata Molimo?

• Re na le mabaka afe a ho rata Jehova?

• Re ka hōlisa lerato la ho rata Jehova joang?

[Setšoantšo se leqepheng la 20]

Ntho ea bohlokoa ho Jehova ke lerato la rōna ho eena leo bohle re ka le bontšang

[Litšoantšo tse leqepheng la 23]

“Ea mponeng o bone le Ntate.”—Johanne 14:9.