Na U sa Hopola?

Na u thabetse ho bala limakasine tsa morao-rao tjee tsa Molula-Qhooa? Joale, ak’u bone hore na u ka araba lipotso tse latelang:

• Ke eng se ka thusang Mokreste oa ’nete haeba motho eo a mo ratang a khaotsa ho sebeletsa Jehova?

U lokela ho ikaha moeeng u be u hahe le litho tse ling tsa lelapa tse ntseng li tšepahala. Ikakhele ka setotsoana mesebetsing ea moea. Iphe nako ea ho thusa ba bang. Le ka mohla u se ke ua tela hore motho eo u mo ratang a ka ’na a khutla. Se ke ua ipeha molato. Hlompha tokisetso ea Molimo ea taeo, ’me u tšollele maikutlo a hao ho metsoalle.—9/1, leqepheng la 18-21.

• Ke ka litsela life tse peli Mangolo a re thusang ho lemoha “matsatsi a ho qetela”?

Bibele e bolela esale pele liketsahalo tse neng li tla etsahala nakong ea “qetello ea tsamaiso ea lintho.” (Matheu 24:3, 7, 8; Luka 21:11) E boetse e hlalosa kamoo mekhoa le liketso tsa batho ba phelang “matsatsing a ho qetela” li neng li tla fetoha kateng. (2 Timothea 3:1-5) Ho hlokomelehang haholo ke hore ho ne ho tla boleloa litaba tse molemo tsa ’muso nakong ena.—9/15, leqepheng la 4-6.

• Boikarabelo ba phutheho ke bofe haeba Mokreste ea khannang koloi a baka kotsi e qetellang e bolaile batho ba bang?

Baholo ba batlisisang taba ba ka ’na ba fumana hore ha ho molato oa mali hobane ho ne ho se seo mokhanni a neng a ka se etsa ho laola maemo a qeteletseng a bakile lefu. Empa haeba ho e-na le molato oa mali ’me motho ea molato a bakile, o tla fuoa khalemelo ea Mangolo a be a beheloe lithibelo mabapi le litokelo ka phuthehong.—9/15, leqepheng la 30.

• Ke hobane’ng ha bophelo bo sa feleng bo sa itšetleha ka khatelo-pele litabeng tsa saense?

Bo-rasaense ba etsa boiteko ba ho lelefatsa bophelo, ba sebelisa mekhoa e kang ea ho leka ho eketsa makhetlo ao lisele li inchafatsang ka ’ona kapa ka ho phekola maloetse ka mokhoa oa ho etsa lisele tse ncha ka lisele tse ling e le hore ba ka etsetsa bakuli litho tse ncha tseo ’mele ea bona e li amohelang hantle. Empa Bibele e bontša hore batho ba ka fumana bophelo bo sa feleng ka thekollo ea Jesu feela.—10/1, leqepheng la 3-5.

• Na moetlo oa Bajuda oa ho itlhatsoa e ne e le selelekela sa kolobetso ea Bokreste?

E ne e se sona. Bajuda ke bona ba neng ba itlhatsoa ho latela moetlo oo oa bona, e leng ho neng ho sa hlokahale kolobetsong ea Johanne. Ho itlhoekisa ho neng ho laeloa ke Molao oa Moshe ho ne ho lokela hore ho ’ne ho phetoe, empa kolobetso ea Bokreste e etsoa hanngoe feela.—10/15, leqepheng la 12-13.

• Sekolo sa ho Koetlisetsoa Bosebeletsi ke eng?

Ke thupelo ea libeke tse robeli e tšoareloang baholo le bahlanka ba sebeletsang ba phutheho bao e leng masoha ba boemong ba hore ba abeloe ho sebeletsa moo tlhokahalo e leng khōlō. Ba ka ’na ba abeloa ho sebeletsa liphuthehong tsa habo bona, kapa sebakeng se seng linaheng tsa habo bona kapa ba abeloa ho sebeletsa linaheng tse ling.—11/15, leqepheng la 10-11.

• Mohanyetsi oa Kreste ea boleloang ho 1 Johanne 2:18; 4:3 ke eng kapa ke mang?

Ha lentsoe lena “mohanyetsi oa Kreste” le sebelisoa ka mokhoa o pharaletseng, le bolela batho bohle ba hanyetsang kapa bao ka leshano ba ipolelang hore ke bona Kreste kapa ke baemeli ba hae. Mantsoe a Jesu le Johanne a bontša hore mohanyetsi oa Kreste ke sehlopha se entsoeng ka bahanyetsi ba bangata ba Kreste ba jalang leshano la bolumeli le ba hanang ’Muso oa Molimo.—12/1, leqepheng la 4-6.