Lipotso Tse Tsoang ho Babali
Kaha sechaba se ne se qala ho kotula ha banna bohle ba Baiseraele ba ne ba ile Moketeng oa Mahobe a sa Lomosoang, ke bo-mang ba neng ba kotula litholoana tsa pele tsa harese tse neng li tlisoa sehalalelong?
Molao oa Moshe o ile oa laela Baiseraele hore: “Hararo ka selemo e mong le e mong e motona ho uena o lokela ho hlaha ka pel’a Jehova Molimo oa hao sebakeng seo a tla se khetha: moketeng oa mahobe a sa lomosoang le moketeng oa libeke le moketeng oa maphephe.” (Deuteronoma 16:16) Ho tloha mehleng ea Morena Solomone ho ea pele, sebaka seo Molimo a neng a se khethile e ne e le tempele e Jerusalema.
Mokete oa pele ho ena e meraro o ne o ketekoa mathoasong a nako ea selemo. Mokete ona o neng o bitsoa Mokete oa Mahobe a sa Lomosoang o ne o qala letsatsi ka mor’a mokete oa Paseka ea la 14 Nisane ’me o tsoela pele ka matsatsi a supileng ho fihlela ka la 21 Nisane. Ho latela almanaka e halalelang, ho ne ho qaloa kotulo ea pele ea selemo ka letsatsi la bobeli la mokete oo, e leng la la 16 Nisane. Letsatsing leo, moprista ea phahameng o ne a lokela ho nka “ngata ea litholoana tsa pele” tsa harese e kotutsoeng ’me a e tsokele “koana le koana ka pel’a Jehova” a le sehalalelong. (Levitike 23:5-12) Kaha banna bohle ba ne ba lokela ho ba teng Moketeng oa Mahobe a sa Lomosoang, ke bo-mang ba neng ba kotula nyehelo ee?
Taelo ea ho tlisetsa Jehova nyehelo ea litholoana tsa pele tsa kotulo nakong ea Mokete oa Mahobe a sa Lomosoang e ne e filoe sechaba sohle. Ho ne ho sa hlokahale hore motho ka mong a qale ho kotula ebe o tlisa litholoana tsa hae tsa pele sehalalelong. Ho e-na le hoo, taelo eo e ne e phethoa ke baemeli ba sechaba. Kahoo, ngata ea Mokete oa Mahobe a sa Lomosoang e ne e ka heloa ke moifo o rometsoeng tšimong ea harese e haufi. Ha Encyclopaedia Judaica e bua ka taba ena e re: “Ha harese e ne e butsoitse, e ne e latoa haufi le Jerusalema; ho seng joalo, e ne e ka latoa kae kapa kae naheng ea Iseraele. E ne e heloa ke banna ba bararo, e mong le e mong oa bona a tšoere sekele ea hae e telele le baskete.” Joale ngata ea harese e ne e ka tlisoa ho moprista ea phahameng e le hore a e nyehele ho Jehova.
Molao oa ho nyehela litholoana tsa pele tse kotutsoeng o ne o fa Baiseraele monyetla o babatsehang oa ho bontša hore ba ananela kamoo Molimo a neng a hlohonolofalitse naha le kotulo ea bona kateng. (Deuteronoma 8:6-10) Leha ho le joalo, ntho ea bohlokoa ho feta eo ke hore nyehelo eo e neng e etsoa moketeng e ne e “le seriti sa lintho tse molemo tse tlang ho tla.” (Baheberu 10:1) Ho thahasellisang ke hore Jesu Kreste o ile a tsosoa ka la 16 Nisane, 33 C.E., e leng letsatsi leo ka lona ho neng ho nyeheloa litholoana tsa pele tsa kotulo ho Jehova. Moapostola Pauluse o ile a ngola tjena ka Jesu: “Kreste o tsositsoe bafung, litholoana tsa pele ho ba robetseng lefung. . . . Empa e mong le e mong boemong ba hae: Kreste ke litholoana tsa pele, ka mor’a moo bao e leng ba Kreste nakong ea ho ba teng ha hae.” (1 Bakorinthe 15:20-23) Ngata ea litholoana tsa pele eo moprista ea phahameng a neng a e tsokela koana le koana ka pel’a Jehova e ne e tšoantšetsa Jesu Kreste ea tsositsoeng—e leng eena oa pele ea kileng a tsosoa bafung e le hore a phele ka ho sa feleng. Ka tsela eo, Jesu o ile a betla tsela ea hore moloko oa batho o lopolloe sebeng le lefung.
[Tlhaloso ea Moo Setšoantšo se Nkiloeng Teng e leqepheng la 26]
© 2003 BiblePlaces.com