’Musi ea Ruileng o Etsa Qeto e Booatla
’MUSI e mocha ea ruileng o ne a lokile, a hlompha molao, a rata bolumeli. O ile a tla ho Jesu eaba o oa ka mangole ’me oa mo botsa: “Mosuoe ea Molemo, ke etse’ng hore ke rue bophelo bo sa feleng?”
Ha a mo araba, Jesu o ile a bontša hore haeba motho a batla ho fumana bophelo o lokela ho mamela melao ea Molimo. Ha ’musi enoa a mo kōpa hore a tobe taba, Jesu o ile a re: “U se ke ua bolaea, u se ke ua feba, u se ke ua utsoa, u se ke ua beha bopaki ba bohata, hlompha ntat’ao le ’m’ao, hape, u rate moahelani oa hao joalokaha u ithata.” Ena e ne e le melao ea bohlokoahali e neng e fumanoa Molaong o neng o filoe Moshe. Joale monna eo o ile a re: “Ke bolokile tsena tsohle; ke sa ntse ke haelloa ke eng?”—Matheu 19:16-20.
Jesu o ile a mo sheba, “a ikutloa a mo rata” eaba o re: “Ho haella ntho e le ’ngoe ho uena: E-ea, u rekise lintho tseo u nang le tsona ’me u fe mafutsana, ’me u tla ba le letlotlo leholimong, u tle ’me u be molateli oa ka.”—Mareka 10:17-21.
Ka tšohanyetso ’musi enoa e mocha o ile a tlameha ho etsa qeto e boima. O ne a tla etsa’ng? Na o ne a tla ikhethela ho tlohela lintho tse bonahalang ebe e ba molateli oa Jesu, kapa o ne a tla khomarela maruo a hae? Na o ne a tla batla matlotlo lefatšeng kapa o ne a tla batla matlotlo leholimong? E tlameha ebe o ile a thatafalloa ke ho etsa qeto. Ho hlakile hore o ne a nka kamano ea hae le Molimo e le ea bohlokoa kaha o ne a boloka Molao ebile ke moo o ile a botsa hore na o ne a lokela ho etsa’ng hape e le hore a tsebe ho amoheloa ke Molimo. O ile a etsa qeto efe? O ile “a tloha a saretsoe, kaha o ne a e-na le matlotlo a mangata.”—Mareka 10:22.
Qeto eo ’musi enoa e mocha a ileng a e etsa e ne e se bohlale. Haeba e ne e ile ea e-ba molateli oa Jesu ea tšepahalang, a ka be a ile a fumana seo a neng a se batla—bophelo bo sa feleng. Ha re bolelloe hore na ho ile ha etsahala’ng ka mohlankana eo. Leha ho le joalo, rea tseba hore lilemo tse mashome a mane hamorao, mabotho a Roma a ile a timetsa Jerusalema le karolo e khōlō ea Judea. Bajuda ba bangata ba ile ba lahleheloa ke maruo a bona hammoho le bophelo ba bona.
Moapostola Petrose le barutuoa ba bang ha baa ka ba etsa qeto e tšoanang le ea ’musi eo e mocha, ba ile ba etsa qeto e nepahetseng. Ba ile ba ‘siea lintho tsohle’ eaba ba latela Jesu. Ruri qeto eo e ile ea ba tsoela molemo! Jesu o ile a ba bolella hore ba ne ba tla fumana lintho tse ngata haholo ho feta tseo ba neng ba li siile. Ho feta moo, ba ne ba tla fumana bophelo bo sa feleng. Ha baa ka ba ikoahlaela qeto eo ba e entseng.—Matheu 19:27-29.
Kaofela ha rōna re tlameha ho etsa liqeto bophelong—tse ling ke tse nyenyane, tse ling ke tse khōlō. Jesu o ile a re’ng ka liqeto tsa mofuta oo? Na u tla mamela keletso ea hae? Ha u khetha ho e mamela u tla putsoa haholo. Joale a re ke re hlahlobeng hore na re ka latela Jesu joang le hore na re ka rua molemo joang ho seo a se buileng.