Na Ruri re ka Fumana Bophelo bo Nang le Morero?

MANTSOE ao ke ʼnete hakaakang! Lefatšeng lena bophelo bo tletse “mathata le masoabi.” Mohlomong u ʼnile ua ipotsa, ‘Na ruri re ka fumana bophelo bo nang le morero hona joale?’

Ka mohlala, nahana ka Maria. E ne e le motho ea mahlahahlaha empa hona joale, ha a le lilemo li 84, ha a sa khona ho tloha lapeng a le mong. Kelello ea hae e ntse e le chatsi, empa ’mele oa hae oona o se o hana. Na a ka ikutloa eka bophelo ba hae bo na le morero le tlas’a maemo a joalo?

Ho thoe’ng ka uena? Mohlomong ka nako e ʼngoe u kile ua ipotsa hore na ebe bophelo ba hao bo na le morero kapa che. E ka ’na eaba mosebetsing oa hao u etsa ntho e le ʼngoe, e tenang le e khathatsang. Mohlomong batho ba bangata ha ba tsotelle kapa ha ba hlokomele kamoo u sebetsang ka thata kateng. Le haeba u atlehile ka tsela e itseng, u ka ’na ua ikutloa u tšoenyehile ka bokamoso. Hape, ka linako tse ling u ka ʼna ua ikutloa u hlorile kapa u imetsoe. E ka ’na eaba lelapa la hao kapa leno le tletse likhohlano le lintoa. Mohlomong u shoetsoe ke motho eo u mo ratang. Monna e mong ea bitsoang André o ne a rata ntate oa hae haholo, empa ntate oa hae o ile a kula ka tšohanyetso a ba a hlokahala. Andrè o ne a nahana hore bohloko boo a bo utloileng bo ke ke ba fela le ka mohla.

Ho sa tsotellehe mahlomola a ka ʼnang a re hlahela, potso ea bohlokoa eo re lokelang ho fumana karabo ea eona ke e reng: Na ruri re ka fumana bophelo bo nang le morero? Re ka fumana karabo tseleng eo Jesu Kreste a ileng a phela ka eona, e leng monna ea ileng a phela mona lefatšeng lilemong tse ka bang 2 000 tse fetileng. Ho sa tsotellehe mathata ao Jesu a ileng a tobana le ’ona, kannete o phetse bophelo bo nang le morero. Le rōna bophelo ba rōna bo ka ba le morero haeba re latela mohlala oa hae.