Le ka Mohla U se ke Ua “Halefela Jehova”

1, 2. Ke hobane’ng ha re sa lokela ho beha Jehova molato ka mathata ao batho ba thulanang le ’ona? Etsa mohlala.

A RE re u monna ea nang le lilemo tse ngata a nyetse ’me u thabile lenyalong la hao. Empa ka letsatsi le leng ha u khutlela hae u fumana ka tlung ho lubakane. Thepa ea ka tlung e senyehile, lijana li pshoatliloe, k’hapete e malabulabu. Ntlo ea hao e ntle e fetohile lesupi. Na u ne u tla halefa u re, “Ke hobane’ng ha mosali oa ka a entse ntho e tjee?” Kapa u ne u tla botsa u re, “Ke mang ea entseng tjee?” Ha ho pelaelo hore u ne u tla ipotsa potso eo ea bobeli. Hobane’ng? Hobane u oa tseba hore molekane oa hao eo u mo ratang o ne a ke ke a baka tšenyo e joalo ka boomo.

² Kajeno, rea hlokomela hore lehae la batho le sentsoe ke tšilafalo, liketso tse mabifi le boitšoaro bo hlephileng. Kaha re liithuti tsa Bibele, rea tseba hore ho ke ke ha etsahala hore ebe Jehova ke eena ea re bakelang mathata ana ’ohle. Ha a bōpa lefatše o ne a rerile hore e be paradeise eo batho ba tla thabela ho lula ho eona. (Gen. 2:8, 15) Jehova ke Molimo ea lerato. (1 Joh. 4:8) Ho ithuta Mangolo ho re thusitse hore re hlokomele hore na ha e le hantle ke mang ea bakang mathata a mangata a teng lefatšeng. Ke Satane Diabolose, e leng “’musi oa lefatše.”—Joh. 14:30; 2 Bakor. 4:4.

3. Tsela eo re nahanang ka eona e ka ’na ea fosahala ka tsela efe?

³ Leha ho le joalo, re ke ke ra jarisa Satane molato ka mathata ’ohle a rōna. Hobane’ng? Hobane mathata a mang ao re thulanang le ’ona a bakoa ke liphoso tsa rōna. (Bala Deuteronoma 32:4-6.) Le hoja re ka ’na ra lumellana le seo, ho se phethahale ha rōna ho ka ’na ha etsa hore re nahane ka tsela e fosahetseng ka mathata a rōna ’me seo se ka ba kotsi. (Liprov. 14:12) Ka tsela efe? Ho e-na le hore re itjarise molato ka mathata a rōna kapa re o jarise Satane, re ka qala ho beha Jehova molato. Re ka ba ra “halefela Jehova.”—Liprov. 19:3.

4, 5. Mokreste a ka “halefela Jehova” ka tsela efe?

⁴ Na ehlile ho ka etsahala hore re ‘halefele Jehova’? Ka sebele ho etsa joalo ho ke ke ha re tsoela molemo. (Esa. 41:11) Seroki se seng se kile sa re: “Motho e ne e boetse e le eng hore a loantše Molimo?” Ke ’nete hore re ka ’na ra se ke ra bolela hore re halefetse Jehova. Empa Liproverbia 19:3 e bolela hore booatla ba motho bo “khopamisa tsela ea hae, kahoo pelo ea hae e halefela Jehova.” Ka sebele, motho a ka halefela Molimo ka pelong. Boikutlo bona bo ka iponahatsa ka litsela tse poteletseng. Ka tsela e itseng motho a ka hlonamela Jehova. Ka lebaka leo, motho eo a ka ’na a ikhula phuthehong kapa a se ke a tšehetsa litokisetso tsa borapeli ba Jehova ka botlalo.

⁵ Ke’ng e ka etsang hore re ‘halefele Jehova’? Re ka qoba leraba leo joang? Ke habohlokoa hore re tsebe likarabo tsa lipotso tsena. Ha e le hantle, seo se ama kamano ea rōna le Jehova Molimo!

KE’NG E KA ETSANG HORE RE ‘HALEFELE JEHOVA’?

6, 7. Ke hobane’ng ha Baiseraele ba mehleng ea Moshe ba ile ba qala ho tletleba ka Jehova?

⁶ Ke’ng e ka etsang hore pelo ea mohlanka oa Jehova ea tšepahalang e qale ho tletleba ka Molimo oa hae? A re ke re tšohleng lintlha tse hlano ’me re hlahlobe mehlala e hlahang ka Bibeleng e bontšang kamoo batho ba bang ba ileng ba oela lerabeng leo kateng.—1 Bakor. 10:11, 12.

⁷ Lipuo tse fosahetseng tsa batho ba bang li ka re susumetsa. (Bala Deuteronoma 1:26-28.) Baiseraele ba ne ba sa tsoa lopolloa bokhobeng Egepeta. Ka mohlolo Jehova o ne a ile a otla sechaba seo sa bahatelli ka likotlo tse leshome ’me ka mor’a moo a timetsa Faro le lebotho la hae Leoatleng le Lefubelu. (Ex. 12:29-32, 51; 14:29-31; Pes. 136:15) Sechaba sa Molimo se ne se le mothating oa ho kena Naheng e Tšepisitsoeng. Leha ho le joalo, nakong eo ea bohlokoa haholo, Baiseraele ba ile ba qala ho tletleba ka Jehova. Ke’ng e ileng ea etsa hore ba hloke tumelo ka tsela ee? Ba ile ba tšoha haholo ka lebaka la tlaleho e mpe eo ba ileng ba e fuoa ke batho ba neng ba rometsoe hore ba il’o hloela naha. (Num. 14:1-4) Ho ile ha etsahala’ng ka mor’a moo? Moloko oohle ha o oa ka oa lumelloa ho kena ‘naheng eo e ntle.’ (Deut. 1:34, 35) Na ka linako tse ling le rōna re ka lumella lipuo tse fosahetseng tsa batho ba bang hore li fokolise tumelo ea rōna ’me li re susumelletse hore re korotle ka tsela eo Jehova a sebelisanang le rōna ka eona?

8. Ke’ng e ileng ea etsa hore sechaba sa Molimo sa mehleng ea Esaia se qale ho jarisa Jehova molato ka mathata a sona?

⁸ Mathata le litsietsi li ka re nyahamisa. (Bala Esaia 8:21, 22.) Mehleng ea Esaia, sechaba sa Juda se ile sa thulana le boemo bo boima haholo. Se ne se lika-likelitsoe ke lira. Lijo li ne li haella. Batho ba bangata ba ne ba robala ba itsosa. Empa ntho e mpe le ho feta ke hore ho ne ho e-na le tlala ea moea. (Amose 8:11) Leha ho le joalo, ho e-na le hore ba kōpe thuso ho Jehova ea hore ba khone ho hlōla mathata ana, ba ile ba qala ho “rohaka” morena oa bona le Molimo oa bona. Ka sebele, ba ile ba beha Jehova molato ka mathata a bona. Haeba re oeloa ke tlokotsi kapa re e-ba le mathata, na re ka re ka pelong, ‘Jehova o ne a le kae nakong eo ke neng ke mo hloka?’

9. Ke hobane’ng ha Baiseraele ba mehleng ea Ezekiele ba ile ba talima lintho ka tsela e fosahetseng?

⁹ Ha re tsebe lintlha kaofela. Kaha Baiseraele ba mehleng ea Ezekiele ba ne ba sa tsebe lintlha kaofela, ba ne ba bona eka tsela ea Jehova “ha ea loka.” (Ezek. 18:29) Ba ne ba etsa lintho joalokaha eka ba na le tokelo ea ho ahlola Molimo hore na o etsa lintho hantle kapa che, le hoja ba ne ba sa utloisise mabaka a hae kaofela. Haeba ka linako tse ling re sa utloisise tlaleho ea Bibele hantle kapa tsela eo lintho li etsahalang ka eona bophelong ba rōna, na mohlomong ka lipelong tsa rōna re ka bona eka tsela ea Jehova “ha ea loka”?—Jobo 35:2.

10. Motho a ka ’na a latela mohlala oa Adama o fosahetseng joang?

¹⁰ Re jarisa ba bang molato ka libe le liphoso tsa rōna. Ho tloha tšimolohong ea histori ea batho, Adama o ile a jarisa Molimo molato ka sebe sa hae. (Gen. 3:12) Le hoja Adama a ne a tseba litholoana tsa ho tlōla molao oa Molimo hantle ’me a ile a o tlōla ka boomo, o ile a jarisa Jehova molato ka seo. Ha e le hantle, o ile a bolela hore Jehova o ne a mo file mosali ea sa lokang. Ho tloha ka nako eo, batho ba bang ba ’nile ba latela mohlala oa Adama oa hore ba jarise Molimo molato ka liphoso tsa bona. E ka ba hantle hore motho a ipotse, ‘Na ho soetseha kapa ho ferekana ka lebaka la liphoso tsa ka ho ka etsa hore ke se ke ka khotsofalla melao ea Jehova?’

11. Re ka ithuta’ng ho Jonase?

¹¹ Re ka inahana borōna ho tlōla tekano. Moprofeta Jonase ha aa ka a thabela qeto eo Jehova a ileng a e etsa ea ho hauhela Baninive. (Jon. 4:1-3) Hobane’ng? Kamoo ho bonahalang kateng, o ne a sa batle hore a tlohe seriti ha timetseo eo a e phatlalalitseng e sa phethahale. Jonase o ile a itumella hore ho tšoenyeha ka botumo ba hae ho pupetse kutloelo-bohloko eo a neng a lokela ho ba le eona ho Baninive ba bakileng. Na le rōna re ka inahana borōna hoo re ka ‘halefelang Jehova’ ka hore ebe ha a e-s’o tlise bofelo? Haeba ka lilemo tse mashome re ’nile ra bolela hore letsatsi la Jehova le atametse, na re ka qala ho fella Jehova pelo ha batho ba re soma ka lebaka la ho phatlalatsa seo Bibele e se bolelang?—2 Pet. 3:3, 4, 9.

RE KA QOBA HO “HALEFELA JEHOVA” JOANG?

12, 13. Re lokela ho etsa’ng haeba re sa lumellane le lintho tseo Jehova a li etsang kapa tseo a lumellang hore li etsahale?

¹² Re ka etsa’ng haeba re sa lumellane le lintho tseo Jehova a li etsang kapa tseo a lumellang hore li etsahale? Hopola hore hase bohlale ho etsa joalo. Phetolelo e ’ngoe ea Bibele e fetolela Liproverbia 19:3 tjena: “Ho hloka tsebo ha motho ho ka etsa hore a ferekanye lintho ebe o halefela Jehova.” (Byington) Re ntse re nahanne ka seo, a re ke re tšohleng lintho tse hlano tse tla re thusa hore re se ke ra itumella hore ho ferakanngoa ke mathata a bophelo ho etse hore re jarise Jehova molato.

¹³ U se ke ua tlohela kamano ea hao le Jehova hore e senyehe. Re ka qoba mokhoa o mobe oa ho halefela Molimo haeba re loanela hore re lule re e-na le kamano e haufi le eena. (Bala Liproverbia 3:5, 6.) Re lokela ho tšepa Jehova. Re boetse re lokela ho qoba ho ipona re le bohlale kapa ho inahana borōna. (Liprov. 3:7; Moek. 7:16) Ka tsela eo, re ke ke ra jarisa Jehova molato ha ho etsahala lintho tse mpe.

14, 15. Ke’ng e tla re thusa hore re se ke ra angoa ke lipuo tse fosahetseng tsa ba bang?

¹⁴ U se ke ua lumella lipuo tse fosahetseng hore li u ame. Baiseraele ba mehleng ea Moshe ba ne ba e-na le mabaka a mangata a ho lumela hore Jehova o ne a tla ba kenya Naheng e Tšepisitsoeng. (Pes. 78:43-53) Empa ha ba se ba utloa tlaleho e mpe ea lihloela tse leshome tse sa tšepahaleng, ha baa ka ba “hopola letsoho la hae.” (Pes. 78:42) Haeba re nahanisisa ka mesebetsi ea Jehova, re hopola lintho tsohle tse ntle tseo a re etselitseng tsona, kamano ea rōna le eena e tla matlafala. Ka lebaka leo, re ke ke ra lumella maikutlo a fosahetseng ho senya kamano ea rōna le Jehova.—Pes. 77:11, 12.

¹⁵ Ho thoe’ng haeba re e-na le maikutlo a fosahetseng ka balumeli-’moho le rōna? Seo se ka ama kamano ea rōna le Jehova. (1 Joh. 4:20) Ha Baiseraele ba ne ba belaela ka ho khethoa ha Arone, Jehova o ile a nka hore ha e le hantle ba ne ba korotlela Eena. (Num. 17:10) Ka tsela e tšoanang, haeba re qala ho korotla le ho tletleba ka batho bao Jehova a ba sebelisang ho tsamaisa karolo e lefatšeng ea mokhatlo oa hae, ha e le hantle re tla be re tletleba ka Jehova.—Baheb. 13:7, 17.

16, 17. Ke’ng eo re lokelang ho e hopola ha re thulana le mathata?

¹⁶ Hopola hore hase Jehova ea re bakelang mathata. Le hoja Baiseraele ba mehleng ea Esaia ba ne ba furaletse Jehova, O ne a ntse a batla ho ba thusa. (Esa. 1:16-19) Ho sa tsotellehe hore na re thulana le bothata bofe, re ka tšelisoa ke ho tseba hore Jehova o oa re tsotella ebile o batla ho re thusa. (1 Pet. 5:7) Ha e le hantle, o tšepisa hore o tla re fa matla ao re a hlokang hore re tsoele pele re mamella.—1 Bakor. 10:13.

¹⁷ Haeba ka tsela e itseng re tšoaroa ka ho hloka toka—joaloka Jobo ea tšepahalang—re lokela ho hopola hore hase Jehova ea bakang ho hloka toka hoo. Jehova o hloile ho hloka toka; o rata ho loka. (Pes. 33:5) E se eka re ka lumellana le mantsoe a motsoalle oa Jobo e leng Elihu, ea ileng a re: “Ho ke ho be hōle le Molimo oa ’nete hore a sebetse bokhopo, le hore Ea Matla ’Ohle a sebetse ka mokhoa o hlokang toka!” (Jobo 34:10) Ho e-na le hore Jehova a re bakele mathata, o re fa “mpho e ’ngoe le e ’ngoe e molemo le neo e ’ngoe le e ’ngoe e phethahetseng.”—Jak. 1:13, 17.

18, 19. Ke hobane’ng ha le ka mohla re sa lokela ho bontša ho se tšepe Jehova? Fana ka mohlala.

¹⁸ Le ka mohla u se ke ua bontša ho se tšepe Jehova. Molimo o phethahetse, ’me menahano ea hae e phahametse ea rōna. (Esa. 55:8, 9) Kahoo, boikokobetso bo lokela ho re thusa hore re amohele hore re ke ke ra utloisisa lintho kaofela. (Bar. 9:20) Hase kamehla re tsebang lintlha kaofela tse mabapi le taba e itseng. Ha ho pelaelo hore u hlokometse bonnete ba maele ana: “Moqōsi ha a bua ka khotla e ee ke o bua ’nete, ho fihlela ha moqōsuoa a mo hloma lipotso.”—Liprov. 18:17, Bibele—Phetolelo e Ncha.

¹⁹ Haeba u e-na le motsoalle eo u mo tšepang ’me a etsa ntho eo qalong u sa e utloisiseng kapa e sa tloaelehang, na u ka potlakela ho mo qosa ka ho re ho na le ntho e mpe eo a e entseng? Che. Ho e-na le hoo, u ka ’na ua nahana hore ha u tsebe lintlha kaofela mabapi le se etsahetseng. Haeba re ikemiselitse ho sebetsana le metsoalle ea rōna e sa phethahalang ka tsela e lerato joalo, ruri re tlameha ho tšepa Ntate oa rōna ea leholimong eo litsela tsa hae le menahano ea hae e phahametseng ea rōna!

20, 21. Ke hobane’ng ha e le habohlokoa hore re behe molato moo ho loketseng?

²⁰ Beha molato moo ho loketseng. Ke hobane’ng ha re lokela ho etsa joalo? Hobane ho ka etsahala hore ebe ka tsela e itseng re jara molato ka mathata a mang ao re thulanang le ’ona. Haeba ho le joalo, re lokela ho amohela seo. (Bagal. 6:7) U se ke ua leka ho jarisa Jehova molato ka mathata ao. Ke hobane’ng ha e ke ke ea e-ba ho utloahalang hore motho a etse seo? Nahana ka mohlala ona: Koloi e ka ’na ea khona ho tsamaea ka lebelo le holimo haholo. A re re mokhanni o feta moeli o behiloeng oa lebelo haholo ha a fihla mothinyeng o bohale, ebe koloi e ea phethoha. Na baetsi ba koloi eo ba lokela ho jarisoa molato ka kotsi eo? Che, ha baa lokela! Ka tsela e tšoanang, Jehova o re bōpile re e-na le bolokolohi ba ho ikhethela. Empa o boetse o re rutile hore na re ka etsa liqeto tse molemo joang. Kahoo, ha rea lokela ho jarisa Jehova molato haeba re etsa liphoso.

²¹ ’Nete ke hore hase mathata ’ohle a rōna a bakoang ke liphoso tsa rōna kapa ho etsa lintho tse fosahetseng. Lintho tse ling li etsahala ka lebaka la “nako le ketsahalo e sa lebelloang.” (Moek. 9:11) Ho feta moo, ha rea lokela ho lebala hore Satane Diabolose ke eena ea bakang bokhopo bohle bo teng lefatšeng. (1 Joh. 5:19; Tšen. 12:9) Ke eena sera—eseng Jehova!—1 Pet. 5:8.

ANANELA KAMANO EA HAO EA BOHLOKOA LE JEHOVA

22, 23. Ke sefe seo re lokelang ho se hopola haeba re nyahama ka lebaka la mathata ao re thulanang le ’ona?

²² Ha u thulana le mathata, hopola mohlala oa Joshua le Kalebe. Ho fapana le lihloela tse ling tse leshome, banna bao ba babeli ba tšepahalang ba ile tlisa tlaleho e ntle. (Num. 14:6-9) Ba ile ba bontša hore ba na le tumelo ho Jehova. Leha ho le joalo, ba ile ba tlameha ho lelera lefeelleng ka lilemo tse 40 hammoho le Baiseraele ba bang. Na Joshua le Kalebe ba ile tletleba kapa ba halefa, ba nka hore ba sebelitsoe ka ho hloka toka? Che. Ba ile ba tšepa Jehova. Na ba ile ba hlohonolofatsoa ka lebaka la seo? Hantle haholo! Le hoja moloko oohle o ile oa shoella lefeelleng, qetellong banna bao ka bobeli ba ile ba kena Naheng e Tšepisitsoeng. (Num. 14:30) Ka tsela e tšoanang, Jehova o tla re hlohonolofatsa haeba re sa “khathale” ho etsa thato ea hae.—Bagal. 6:9; Baheb. 6:10.

²³ Haeba u nyahamisitsoe ke mathata kapa ho se phethahale ha hao kapa ha batho ba bang, ke sefe seo u lokelang ho se etsa? Tsepamisa kelello litšobotsing tsa Jehova tse hlollang. Nahanisisa ka tšepo eo Jehova a u fileng eona. Ipotse, ‘Nka be ke le eng ha e ne e se ka Jehova?’ Kamehla lula u le haufi le eena, ’me le ka mohla u se ke ua lumella pelo ea hao hore e mo halefele!