Lipotso Tsa Bibele Lia Arajoa
Na mangeloi a ka re thusa?
Feela joalokaha mangeloi a ile a thusa Daniele mohlanka oa Molimo ea tšepahalang, kajeno a thusa batho hore ba fumane litaba tse molemo
Jehova Molimo o bōpile mangeloi a limilione lilemo tse ngata pele a bōpa batho. (Jobo 38:4, 7) Mangeloi ana ke libōpuoa tsa moea tse matla tse etsang tšebeletso ea Hae. Ka linako tse ling o a romela hore a tataise a be a sireletse bahlanka ba hae ba lefatšeng. (Pesaleme ea 91:10, 11) Kajeno mangeloi a thusa batho hore ba fumane litaba tse molemo tseo balateli ba Jesu ba li bolelang, ’me li ba tsoela molemo.—Bala Tšenolo 14:6, 7.
Na re lokela ho rapela mangeloi hore a re thuse? Che. Thapelo ke ketso ea borapeli, ’me bo lokela ho lebisoa ho Molimo feela. (Tšenolo 19:10) Kaha mangeloi ke bahlanka ba Molimo, a mamela litaelo tsa hae eseng tsa batho. Kahoo, kamehla ha re rapela re lokela ho lebisa lithapelo tsa rōna ho Molimo ka lebitso la Jesu.—Bala Pesaleme ea 103:20, 21; Matheu 26:53.
Na ho na le mangeloi a khopo?
Feela joaloka batho, mangeloi a bōpiloe a e-na le bolokolohi ba ho ikhethela, ’me a ka khetha ho etsa se nepahetseng kapa se fosahetseng. Ka masoabi, mangeloi a mangata a ile a fetohela Molimo. (2 Petrose 2:4) La pele le ileng la etsa seo ke Satane eaba a mang aa mo latela ’me a fetoha bademona. Morao tjena, Satane le bademona ba hae ba ile ba lelekoa leholimong ’me ba lahleloa lefatšeng.—Bala Tšenolo 12:7-9.
Ho eketseha ha bokhopo le pefo ho tloha ka 1914 ho bontša hore haufinyane Molimo o tla felisa Satane le bademona ba hae. Joale Molimo o tla tsosolosa lefatše hore le be boemong bo loketseng.—Bala Tšenolo 12:12; 21:3, 4.