Sebelisa Boinehelo ba Bomolimo Joaloka Kreste
1 Poleloana ea Bibele e reng “boinehelo ba bomolimo” e bolela tlhompho e tebileng e eang ho Jehova Molimo le ho mo sebeletsa ka botšepehi. Mohlala o ka sehloohong oa boinehelo ba bomolimo ke Morena oa rōna Jesu Kreste.
2 Jesu o ile a ikhetholla e le monna oa boinehelo ba bomolimo bo phethahetseng ka tsela ea hae ea bophelo ha a le lefatšeng. Ka hona, re tla be re etsa hantle ha re hlahloba lintho tse ling tse mabapi le bophelo ba hae, haholo-holo tse amanang le karolo ea hae e le ’muelli ea ka sehloohong oa Jehova Molimo.
E-BA EA CHESEHANG ’ME U BE SEBETE
3 Jesu o ne a cheseha ha a bolela seo Esaia 61:2 e se hlalosang e le “ngoaha oa mehauhelo ea Jehova.” Re lokela ho etsisa mohlala oa Jesu ka ho kopanela mosebetsing ona o pholosang bophelo ka cheseho mehleng ea qetello ea tsamaiso ena ea lintho e khopo. Re boetse re tlameha ho ba sebete joaloka Jesu. Hobane’ng? Hobane ho ba bang molaetsa oa ’Muso oo re o bolelang oa khopisa ebile ha o monate, haholo-holo ha re bolela ka letsatsi la Jehova la phetetso.
4 Re hloka moea le tataiso ea Jehova ho re thusa ho bua ka sebete le ho bonahatsa boinehelo ba bomolimo. Ho Luka 4:18, Jesu o itse: ‘Moea oa Jehova o ho ’na.’ Hape re ka sebelisa boinehelo ba bomolimo le ho khahlisa Jehova ka tšehetso ea moea le tlhohonolofatso ea Jehova. Ho sebelisa ntho ho bolela ho e etsa ka tsela eo e seng e fetohile mokhoa. Ho bolela hore ntho e itseng e fetohile tsela eo re phelang ka eona letsatsi le letsatsi. Boinehelo ba bomolimo bo tlameha ho fetoha tsela eo bahlanka ba Molimo ba phelang ka eona. Moapostola Pauluse o itse: “Empa leha le e-ja, leha le e-noa, leha le etsa ntho efe le efe, etsang tsohle ho tlotlisa Molimo ka tsona.”—1 Ba-Kor. 10:31.
BOINEHELO BA BOMOLIMO, KE TSELA EA RŌNA EA BOPHELO
5 Ha rea tlameha ho lebala tlhokahalo e sa khaotseng ea ho etsisa Kreste ka ho sebelisa hamolemo menyetla ea ho kopanela litaba tse molemo le ba bang. Ha re ntse re etsa sena khoeling ea June, re khothalletsoa hore re buelle buka ea Moloko oa Batho o Batla Molimo.
6 Tšebeletsong ea rōna, batho ba bang ba tla ipolela hore ke litho tsa sehlopha se itseng se seholo sa bolumeli. Ka mosa re ka amohela sena, ’me mohlomong re re: “Hoa thahasellisa ho teana le batho ba malumeli a fapaneng. Batho ba ’nile ba leba nģeng tse fapaneng ha ba ntse ba batla Molimo. [Mothating ona, ha ho loketse u ka bala Liketso 17:26, 27.] Na ha u lumele hore ka tloaelo batho ba latela bolumeli ba batsoali ba bona, ho fapana le ho ipatlela Molimo ka bobona? Ka mantsoe a mang, ba tsoaletsoe bolumeling bo itseng. Sena ke sona se boleloang khaolong ea pele bukeng ea Moloko oa Batho o Batla Molimo. [’Montše leqephe 8, serapa 12.] Ho ithuta ho hongata ka malumeli a mang ho fana ka tsebo ebile hoa ruta. Buka ena e hlalosa tšimoloho, mekhoa, le lithuto tsa malumeli a maholo a lefatše.”
7 Tsela eo re phelang ka eona ha e hloke feela hore re bolele letsatsi la Jehova la phetetso le selemo sa mehauhelo empa hape e re hloka ho bontša boinehelo ba bomolimo bophelong ba rōna ka bomong le bophelong ba lelapa. Re tlameha ho etsisa Jesu, re rute ba bang ka ho beha mohlala oa seo boinehelo ba bomolimo bo hlileng bo se bolelang. Ka ho latela mohlala oa Kreste oa boinehelo ba bomolimo, ka mehla re loanela ho ba le merero e nepahetseng linthong tsohle tseo re li etsang, re rorisa Jehova le ho paka hore re bahlanka ba hae ba tšepahalang. E se eka ho sebelisa ha rōna boinehelo ba bomolimo ho ka thusa ba bang ha ba ntse ba batla Molimo le ho lebisa ba tšepahalang tsebong ea Molimo oa ’nete, Jehova.