“Basali ba Sebetsang ka Thata Moreneng”
1 Ka mantsoe a ka holimo, Pauluse o ile a hlalosa Tryfina le Tryfosa e le baralib’abo rōna ba babeli ba ileng ba sebetsa ka thata phuthehong ea Roma. Ka e mong, e leng Persise, o ile a re: “O ile a etsa mesebetsi e mengata Moreneng.” O boetse a bua hantle ka Fibi e le “mosireletsi oa ba bangata.” (Baroma 16:2, 12) Ka Mangolong, Dorkase o ile a qoolloa e le ea neng “a tletse liketso tse molemo le limpho tsa mohau.” (Lik. 9:36) Basali ba moea ke tlhohonolofatso e kaakang phuthehong!
2 Na re ananela baralib’abo rōna ba sebetsang ka thata phuthehong ea habo rōna? Ba etsa mosebetsi o moholo oa ho bolela, ba khanna boholo ba lithuto tsa Bibele hape ba thusa ba bangata ba bacha. Ba boetse ba qeta nako e ngata ba thusa bana ho tsoela pele moeeng. Basali ba Bakreste ba phetha karolo ea bona ho haheng moea oa lerato, thabo, khotso le cheseho ka phuthehong. Ba tšehetsa ka litsela tse ngata e le hore banna ba bona le litho tse ling tsa lelapa li ka etsa ho eketsehileng tšebeletsong ea Jehova.
3 Baralib’abo Rōna Tšebeletsong ea Nako e Tletseng: Har’a ba sebetsang ka thata haholo Moreneng ke baralib’abo rōna ba baromuoa, bao ba bangata ba bona ba kopanetseng ho ntšetseng pele mosebetsi linaheng lisele. Liphuthehong tseo banna ba bona ba sebeletsang ho tsona, basali ba balebeli ba tsamaeang ba tšoarehile tšebeletsong ea tšimo, ba khothatsa barali ba bangata babo rōna. Ba sa lokelang ho hlokomolohuoa ke baralib’abo rōna ba Bethele, bao ka cheseho ba etsang tšebeletso e halalelang ho tšehetsa mokhatlo o hlophisitsoeng oa Jehova. Le baralib’abo rōna ba bo-pula-maliboho ba kamehla, ba thusa ba likete ho ithuta ’nete ka boiteko ba bona bo tšepahalang ho roriseng Molimo.
4 Basali bana ba tšepahalang ba fumana khotsofalo e khōlō tseleng ea bona ea bophelo ea ho itela. (1 Tim. 6:6, 8) Ba lokeloa ke pabatso le khothatso leha e le efe le tšehetso eo re ka ba fang eona.
5 Basali ba Bakreste ke letlotlo mokhatlong o hlophisitsoeng oa Jehova, ba etsa tšebeletso e tšepahalang eo e leng tlhohonolofatso ho bohle. E se eka re ka tsoela pele re ananela basali ba joalo le ho rapella hore tlhohonolofatso ea Jehova e be le bona ha ba ntse ba tsoela pele ‘ho sebetsa ka thata Moreneng.’