Ho Phelela Boinehelo ba Rōna
1 Ebang u sa tsoa kolobetsoa kapa ke khale u kolobelitsoe, e ka ’na eaba u sa hopola ketsahalo eo ea bohlokoa bophelong ba hao. Kolobetso ea rōna hase qetello empa, ho e-na le hoo, ke qalo ea tšebeletso ea boinehelo ea bophelo bohle e ka tsoelang pele ka ho sa feleng. (1 Joh. 2:17) Ho akarelletsa eng ho phelela boinehelo ba rōna?
2 Latela Mohlala oa Kreste: Ka mor’a hore a kolobetsoe, Jesu o ile “a qala mosebetsi oa hae,” a phatlalatsa “litaba tse molemo tsa ’muso oa Molimo.” (Luka 3:23; 4:43) Ka ho tšoanang, ka mor’a hore re tšoantšetse boinehelo ba rōna ho Jehova ka kolobetso, re ile ra fetoha basebeletsi ba khethiloeng ba litaba tse molemo. Le hoja ho ka ’na ha hlokahala nako e ngata le boiteko bo matla hore re fumana lintho tse hlokahalang bophelong, mosebetsi oa rōna o ka sehloohong ke tšebeletso ea Bokreste. (Mat. 6:33) Ho e-na le ho hahamalla leruo kapa botumo, ba inehetseng ho Molimo ba batla ho ‘tlotlisa bosebeletsi ba bona,’ joalokaha moapostola Pauluse a ile a etsa. (Bar. 11:13) Na u ananela tokelo ea hao ea ho sebeletsa Jehova le ho etsa sohle se matleng a hao ho etsa seo?
3 Joaloka tabeng ea Jesu, re lokela ho ‘hanyetsa Diabolose.’ (Jak. 4:7) Satane o ile a leka Jesu ka mor’a hore A kolobetsoe, ’me le kajeno o ntse a hlasela bahlanka ba Jehova ba inehetseng. (Luka 4:1-13) Kaha re pota-potiloe ke lefatše la Satane, re lokela ho sebelisa boitšoaro, ho qoba ntho leha e le efe e ka silafatsang likelello tsa rōna kapa ea bolisa lipelo tsa rōna. (Liprov. 4:23; Mat. 5:29, 30) Bakreste ba hlokomelisoa hore ‘ba ke ke ba ja “tafoleng ea Jehova” le tafoleng ea bademona.’ (1 Bakor. 10:21) Sena se hloka hore re itebele khahlanong le boithabiso bo sa hloekang, metsoalle e mebe le likotsi tse ho Internet. Ho boetse ho hloka hore re qobe boitsebiso ba bakoenehi. Ho ela hloko lintho tsena le maqiti a mang a Satane ho tla re thusa ho phelela boinehelo ba rōna.
4 Sebelisa Litokisetso Tsa Molimo: Jehova o fane ka thuso ka Lentsoe la hae le ka phutheho ea Bokreste, ho re thusa ho phelela boinehelo ba rōna. Etsa hore ho bala Bibele le ho rapela Jehova e be karolo ea kemiso ea hao ea letsatsi le letsatsi. (Josh. 1:8; 1 Bathes. 5:17) Thabela liboka tsa phutheho. (Pes. 122:1) Kopanela le ba tšabang Jehova ’me u boloke litaelo tsa hae.—Pes. 119:63.
5 Ka tšehetso ea Molimo, u ka phelela boinehelo ba hao ho Jehova ’me ua thabela ho mo sebeletsa ka ho sa feleng.—Pes. 22:26, 27; Bafil. 4:13.