Sebelisa Livideo Tse Rutang
1. Jehova o ile a sebelisa lipono joang ha a ruta bahlanka ba hae ba mehleng ea boholo-holo, ’me seo se ile sa ba ama joang?
1 Ka linako tse ling Jehova o ne a sebelisa lipono le litoro hore a bolelle bahlanka ba hae ba mehleng ea boholo-holo melaetsa ea bohlokoa. Nahana ka pono ea Ezekiele ea koloi ea Jehova ea leholimo. (Ezek. 1:1-28) Nahana hore na ebe Daniele o ile a ikutloa joang ha a qeta ho lora toro ea boprofeta bo bontšang tatellano ea mebuso ea lefatše. (Dan. 7:1-15, 28) ’Me ho thoe’ng ka tšenolo e hlollang e ileng ea hlahisetsoa moapostola Johanne “ka lipontšo” tse mabapi le lintho tse neng li tla etsahala “letsatsing la Morena”? (Tšen. 1:1, 10) Jehova o ile a ba ruta ka ho ba bontša lipono tse mebala e hlakileng le liketsahalo tse matla, ’me ha baa ka ba li lebala.
2. Ke likofuto life tseo re ka li sebelisang ho ruta ba bang ’nete ea Bibele?
2 Haeba re batla ho hlalosetsa ba bang linnete tsa Bibele ka tsela eo ba ke keng ba li lebala habonolo, le rōna re ka sebelisa li-video ka tsela e tšoanang ha re ba ruta. Livideo tsa rōna li bua ka lihlooho tse ngata haholo ebile li matlafatsa tšepo ea batho Bibeleng, mokhatlong o hlophisitsoeng oa Jehova le melao-motheong e ntlafatsang bophelo ba rōna ba Bokreste. Nahana ka litsela tse seng kae tseo ka tsona re ka sebelisang livideo tsa rōna ha re ruta ba bang. Livideo tse latelang ke mehlala ea tseo re ka ’nang ra li sebelisa.
3. U ka sebelisa’ng hore u lebise seithuti sa Bibele ka mokhatlong o hlophisitsoeng?
3 Tšebeletsong: Na u ’nile ua bolella seithuti sa Bibele ka mokhatlo oa lefatše lohle oa bara ba motho oa Bakreste? Se bontše seo u sebelisa video ea Our Whole Association of Brothers. Mohlomong u ka se alima eona hore se e shebelle pele ho thuto e latelang kapa la e shebella ’moho ha le tl’o ithuta lekhetlong le latelang. Ka mor’a moo le tšohle lipotso tsa tlhahlobo tse fumanoang Tšebeletsong ea Rōna ea ’Muso ea October 2002.
4. Mohlomong mocha oa Paki a ka sebelisa likofuto life tsa ho ruta ha a le sekolong?
4 Bacha, mohlomong le ka bua le matichere a lōna ka menyetla ea ho bontša bana bao le kenang le bona ka tlelaseng video ea Jehovah’s Witnesses Stand Firm Against Nazi Assault kapa ea Faithful Under Trials—Jehovah’s Witnesses in the Soviet Union. Ithaopeleng ho lokisetsa leqephe la lipotso, ’me le etse hore lipotso tse Tšebeletsong ea Rōna ea ’Muso ea February 2003 li lokele boemo ba ha le buisana le tlelase.
5. Batsoali ba ka sebelisa eng bakeng sa thuto ea lelapa?
5 Ha U E-na le Litho Tsa Lelapa le Metsoalle: Batsoali, ipotseng hore na bana ba lōna ba qetetse neng ho shebella video ea Young People Ask—How Can I Make Real Friends? ha esale e lokolloa. Ke hobane’ng ha le sa e shebelle hape nakong e tlang ha le etsa thuto ea lelapa? Tšebeletso ea Rōna ea ’Muso ea April 2002 e thathamisa lipotso tsa puisano tse hlakileng le tse utloahalang.
6. U ka lokisetsa joang hore nako eo u e qetang le metsoalle ea hao e be e matlafatsang?
6 Na phuthehong ho na le metsoalle eo esale u batla ho e memela lapeng? Ho shebella video ea Respect Jehovah’s Authority le le hammoho ho tla etsa hore mantsiboeeng ao le ikutloe le matlafetse, haholo haeba ka mor’a moo le tla sebelisa lipotso tse thathamisitsoeng Tšebeletsong ea Rōna ea ’Muso ea September 2004 ha le tšohla lithuto tseo le ithutileng tsona.
7. U nahana hore ho ka hlaha menyetla efe eo ka eona u ka sebelisang livideo tsa rōna?
7 Menyetla e Meng: Ke litsela life tse ling tseo ka tsona u ka sebelisang livideo tsa rōna tse 20 tse sa tšoaneng? Na li ka thusa motho eo u mo etelang khafetsa hore a hatele pele moeeng haeba u ka mo bontša e le ’ngoe ea tsona kapa tse peli? Na u ka kōpa ho li bapala lehaeng la batho ba hlokang tlhokomelo kapa libakeng tsa boikhathollo tsa batho ba baholo? Na livideo tsee li ka hohela litho tsa lelapa tseo e seng Lipaki, baahelani le basebetsi-’moho le uena? Motho a ka shebella lintho tse khahlisang, tse rutang le tse molemo livideong tsa rōna. Li sebelise ha u ruta ba bang.