Lenaneo le Lecha la Kopano e Khethehileng ea Letsatsi le le Leng
Sehlooho sa lenaneo la kopano e khethehileng ea letsatsi le le leng ea selemo sa tšebeletso sa 2008 se re “Re Letsopa—Jehova ke Sebōpi sa Rōna,” ’me se thehiloe ho Esaia 64:8. Keletso ea Mangolo e tla fanoa ka lenaneo lena e tla eketsa kananelo ea rōna le kutloisiso ea rōna mabapi le bohlale ba Jehova, toka ea hae, matla a hae le lerato la hae e le Sebōpi se Seholo.
Puo ea molebeli oa potoloho e nang le sehlooho se reng, “Ho Sebeletsa re le Lijana Tse Hlomphehang Tšebeletsong ea Tšimo,” e tla bontša kamoo batho ba bangata ba ntseng ba hlohonolofatsoa haholo kateng ka lebaka la ho tseba ’nete le ho e bolella ba bang. Puo e nang le sehlooho se reng “Ho Thuisa ho Tla U Sireletsa” e tla senola kamoo ho nahanisisa ka melao-motheo e lokileng ea Jehova ho re sireletsang kateng. Sebui sa moeti se tla bua le bamameli ka sehlooho se reng “Le se ke la ba ‘ka Sebōpeho sa Tsamaiso Ena ea Lintho’” le se reng “Lumella Sebōpi se Seholo Hore se U Bōpe.” Batsoali le bacha ba tla khothatsoa ke puo e reng “Bacha ba ka Sebelisoang ke Jehova” le e reng “Karolo ea Bohlokoa eo Batsoali ba e Phethang ho Bōpeng.” Re tla thabela lipontšo le lipuisano tseo ho tsona re tla utloa re be re bone seo bara le baralib’abo rōna ba se finyellang tšimong. Ba batlang ho bontša boinehelo ba bona ho Molimo ka ho kolobetsoa metsing ba lokela ho tsebisa molebeli ea okamelang kapele kamoo ho khonehang. Etsa bonnete ba hore u tla le Molula-Qhooa oa hao o tla beng o baloa bekeng ea kopano e khethehileng ea letsatsi le le leng.
Sebōpi se Seholo se phetha eng kapa eng eo se e rerileng. Empa ho sallana le e mong le e mong oa rōna hore na o tla etsa’ng ha se ntse se re bōpa. Batho ba bohlale ba ikokobelletsang litekanyetso tsa Jehova le lintlafatso tsa hae, ho tšoana le letsopa seatleng sa sebōpi, ba ka bōptjoa, ba ntlafatsoa le ho fetoloa hore e be lijana tse ka sebelisoang. Ha re sebelisana le Jehova, re tlotlisa bobusi ba hae ’me re hlohonolofatsoa haholo.