E-ba ’Moleli ea Hatelang Pele
1 Ntate oa rōna ea leholimong oa thaba ha bahlanka ba hae ba hatela pele moeeng. Sena se akarelletsa ho hatela pele u le ’moleli oa litaba tse molemo ea butsoitseng le ea atlehang. Pauluse o ile a khothalletsa Timothea eo e neng e le molebeli hore a tsoele pele a ikitlaetsa e le hore tsoelo-pele ea hae e ka bonahala. (1 Tim. 4:13-15) Kaofela re lokela ho leka ho ntlafatsa boleng ba tšebeletso ea rōna, le haeba re se re le bahoeletsi bao e leng khale ba li bona.
2 Ipehele Lipakane: Ho hlokahala hore re ipehele lipakane e le hore re khone ho hatela pele. Re ka ipehela lipakane life? Re ka ’na ra leka ho ntlafatsa tsebo ea rōna ea ho sebelisa lerumo la moea, e leng Bibele. (Baef. 6:17) Mohlomong ho na le mofuta o mong oa tšebeletso oo re lokelang ho ntlafatsa ho oona, ebang ke bopaki ba seterateng, ho paka ka thelefono, kapa ho sebetsa tšimo ea mabenkele. Mohlomong re ka ntlafatsa tabeng ea ho etsa maeto a ho boela a atlehang. Pakane e ’ngoe ea bohlokoa e ka ’na ea ba ho ntlafatsa bokhoni ba rōna ba ho qalisa lithuto tsa Bibele le ho li khanna.
3 Se ka re Thusang: Liboka tsa phutheho, haholo-holo Sekolo sa Tšebeletso sa Puso ea Molimo le Seboka sa Tšebeletso, li etselitsoe ho re thusa hore re be baboleli ba hatelang pele. Ha re ikitlaetsa ho lokisetsa liboka tsena le ho ba teng ho tsona re bile re sebelisa likeletso tse fanoang ho tsona, ka sebele re tla rua melemo e meholo.—2 Bakor. 9:6.
4 Ho boetse ho hlokahala hore re thusane ho hatela pele. (Liprov. 27:17) Ho mamela ka hloko ha bao re sebetsang le bona tšimong ba bolela litaba tse molemo ho tla re thusa hore re ntlafatse tsela eo re buang ka eona. Ho feta moo, molebeli oa rōna oa thuto ea buka a ka ’na a lokisetsa hore re thusoe ka ho toba. Ke tlhohonolofatso e kaakang ha pula-maliboho eo e leng khale a li bona kapa mohoeletsi e mong a re thusa hore re atlehe haholoanyane re be re thabele tšimo haholoanyane! Na thutong ea rōna ea buka ho na le mohoeletsi e mocha? Mohlomong re ka mo kōpa hore a sebetse le rōna.
5 Mosebetsi oa bohlokoa ka ho fetisisa o etsoang kajeno ke oa ho bolela litaba tse molemo. Ha re ntse re nyehela ho Jehova “sehlabelo sa thoriso,” re lokela ho mo fa sohle seo re ka se khonang. (Baheb. 13:15) Haeba re ikitlaetsa hore re be baboleli ba hatelang pele, re tla ba basebetsi bao “ho seng letho leo [ba] ka hlajoang ke lihlong ka lona, [ba] tšoarang lentsoe la ’nete ka nepo.”—2 Tim. 2:15.