Lipaki Tsa Jehova—Li Bontša Tumelo e Matla, Karolo ea 2: Li Khantša Leseli
Ka mor’a hore Mor’abo rōna Rutherford le basebetsi-’moho le eena ba lokolloe chankaneng ka 1919, Liithuti Tsa Bibele li ne li tobane le mosebetsi o moholo. Joalokaha ho bontšitsoe videong ea Lipaki Tsa Jehova—Li Bontša Tumelo e Matla, Karolo ea 2: Li Khantša Leseli, Liithuti Tsa Bibele li ne li tla ba le bahanyetsi ba bangata, kutloisiso ea tsona ea Mangolo e ne e tla ’ne e eketsehe, ’me tumelo ea tsona e ne e tla hloekisoa. (Liprov. 4:18; Mal. 3:1-3; Joh. 15:20) Ha u qeta ho shebella video ena, na u ka araba lipotso tsee?
(1) Liithuti Tsa Bibele li ne li sebelisa mekhoa efe ha li bolela litaba tse molemo? (2) Ho ile ha phatlalatsoa eng kopanong e ikhethang ea 1931 le ea 1935? (3) Molula-Qhooa oa November 1, 1939 o ile oa tšohla ntlha efe ea bohlokoa? (4) Bolela se etsahetseng Madison Square Garden puong ea Mor’abo rōna Rutherford e nang le sehlooho se reng “’Muso le Khotso.” (5) Mor’abo rōna Knorr o ile a tšohla ntlha efe ea bohlokoa puong ea hae e reng “Khotso—Na e ka Tšoarella?” (6) Ka 1942, Lipaki Tsa Jehova li ile tsa etsa litokisetso life tsa ho atolosa mosebetsi oa tsona oa boboleli? (7) Hlalosa se etsahetseng linyeoeng tse ling tse ileng tsa ea makhotleng a United States, Canada le Greece. (8) Sekolo sa Gileade se bile le phello efe khōlong ea mosebetsi oa boboleli? (9) Ke mosebetsi ofe oa bohlokoa o qalileng ka 1946, hona hobane’ng? (10) Lipaki Tsa Jehova li nkile mehato efe ho tiisa hore boitšoaro ba tsona bo lumellana le melao e ka Bibeleng? (11) Bolela liphetoho tse entsoeng ka bo-1970 e le hore mokhatlo o tsamaisoe ka tsela e batlang e tšoana haholo le e ka Bibeleng. (12) Ho shebella video ee ho u thusitse joang hore u utloisise haholoanyane hore Jehova ke eena ea tsamaisang mokhatlo oo le hore ke oa hae? (13) Video ee e u thusitse joang hore u ikemisetse ho tsoela pele u bolela ka cheseho ho sa tsotellehe litšitiso? (14) Re ka sebelisa video ee joang ho thusa beng ka rōna, liithuti tsa Bibele le ba bang?
Letsatsi ka leng ho etsahala lintho tse tlatsetsang paleng ea Lipaki Tsa Jehova. Tlaleho e tla bontša’ng ka seo re se etsang tšebeletsong? Joalokaha barab’abo rōna ba entse nakong e fetileng, e se eka ka cheseho re ka tsoela pele ‘ho khantša leseli’!—2 Bakor. 4:6.