Sireletsa Letsoalo la Hao
1. Sehlooho sa kopano e khethehileng ea letsatsi ea selemong sa tšebeletso sa 2013 se re’ng, hona morero oa lenaneo ke ofe?
1 Letsatsi le letsatsi re thulana le maemo a ka etsang hore re silafatse matsoalo a rōna. Ke ka lebaka leo lenaneo la rōna la kopano e khethehileng ea letsatsi ea selemo sa tšebeletso sa 2013, se qalang ka la 1 September, 2012 le nang le sehlooho se reng, “Sireletsa Letsoalo la Hao.” (1 Tim. 1:19) Morero oa lenaneo lena ke ho thusa e mong le e mong oa rōna hore a nahanisise ka tsela eo ka eona a sebelisang mpho ena e hlollang e tsoang ho ’Mōpi oa rōna.
2. Ho tla arajoa lipotso life tsa bohlokoa lenaneong la kopano?
2 Ela Hloko Lintlha Tsena: Lenaneong la kopano ho tla arajoa lipotso tsena tse supileng tse ka sehloohong mabapi le letsoalo:
• Ke’ng e ka lematsang matsoalo a rōna?
• Re ka koetlisa matsoalo a rōna joang?
• Ho ka khoneha joang hore re hloeke maling a batho bohle?
• Ha re nahana ka melao-motheo ea Bibele re bile re etsa lintho tumellanong le eona, hoo ho senola eng ka rōna?
• Re ka qoba ho lematsa ba bang joang litabeng tse amang letsoalo?
• Bacha, le ka ema le tiile joang ha le hatelloa hore le se ke la tšepahala?
• Ba latelang matsoalo a bona a tataisoang ke moea ba fumana melemo efe?
3. Lenaneo la kopano le ka re tsoela molemo joang?
3 Jehova a ka re thusa ho hanyetsa boiteko ba Satane ba ho silafatsa matsoalo a rōna. Ntate oa rōna ea lerato ea leholimong o bua le rōna ka Lentsoe la hae le mokhatlo oa hae o re: “Tsela ke eona ena. Tsamaeang ho eona.” (Esa. 30:21) Lenaneo lena ke tsela e ’ngoe eo ka eona Jehova a re fang tataiso eo. Ka lebaka leo, etsa litokisetso tsa ho mamela lenaneo lohle. Mamelisisa, ’me u bone hore na u ka sebelisa boitsebiso boo joang. Buisanang ka lenaneo le le lelapa. Ho sebelisa litaelo tseo re li fuoang ho tla re matlafalletsa hore re tsoele pele ho ba “le letsoalo le molemo” ho be ho re thuse ho qoba ho khelosoa ke menate ea lefatše la Satane.—1 Pet. 3:16.