Lipotso Tse Tsoang Ho Babali
Na mopesaleme Davida o ne a feteletsa lintho ha a ne a re o tla rorisa lebitso la Molimo “ka ho sa feleng” ho Pesaleme ea 61:8?
Ha ho joalo. Seo Davida a ileng a se ngola se ne se nepahetse.
Nahana ka seo a ileng a se ngola temaneng eo le tse ling tse tšoanang le eona. O ile a re: “Ke tla binela lebitso la hao lithoriso ka ho sa feleng ha ke ntse ke phetha likano tsa ka letsatsi le letsatsi.” “Jehova Molimo oa ka, ke u rorisa ka pelo ea ka eohle, ke tla tlotlisa lebitso la hao ka ho sa feleng.” “Ke tla rorisa lebitso la hao ka ho sa feleng.”—Pes. 61:8; 86:12; 145:1, 2.
Davida o ne a sa feteletse lintho kapa hona ho nahana hore a ke ke a shoa. O ne a tseba hore Jehova o ile a re batho ba tla shoa hobane e le baetsalibe ’me o ne a boetse a tseba hore le eena o etsa libe. (Gen. 3:3, 17-19; Pes. 51:4, 5) Hape o ne a tseba hore banna ba neng ba thabisa Molimo ba kang Abrahama, Isaka le Jakobo ba ile ba shoa. Davida o ne a tseba hore le eena o tl’o shoa. (Pes. 37:25; 39:4) Seo Davida a se ngotseng ho Pesaleme ea 61:8 se bontša hore o ne a ikemiselitse ho rorisa Molimo ka ho sa feleng hafeela a ntse a phela.—2 Sam. 7:12.
Davida o ile a ngola lintho tse ling tse ileng tsa mo etsahalla bophelong, joalokaha re bona lihloohong tse ho Pesaleme ea 18, 51 le ea 52. Ho Pesaleme ea 23, Davida o ile a re Jehova ke molisa ea tataisang, ea khathollang le ea sireletsang. Davida le eena e ne e le molisa ea joalo ’me o ne a batla ho sebeletsa Molimo ‘ka matsatsi ’ohle a bophelo ba hae.’—Pes. 23:6.
Re lokela ho hopola hore Jehova ke eena ea bolelletseng Davida hore a ngole lintho tsohle tseo a li ngotseng. O ile a ngola lintho tse neng li tla etsahala nakong e tlang. Ka mohlala, ho Pesaleme ea 110 Davida o ile a ngola ka nako eo ka eona Morena oa hae a neng a tla “lula ka letsohong la [Molimo] le letona” leholimong ’me a fuoe matla. Morena eo o tla etsa’ng? O tla hlola lira tsa Molimo le ho “ahlola lichaba.” Davida e ne e le moholo-holo oa Jesu e leng Mesia ’me Mesia o ne a tla busa a le leholimong e le “moprista ka ho sa feleng.” (Pes. 110:1-6) Jesu o ile a re boprofeta bo ho Pesaleme ea 110 bo ne bo bua ka eena ’me bo ne bo tla phethahala nakong e tlang.—Mat. 22:41-45.
Jehova o ile a re Davida a ngole ka lintho tse neng li etsahala mehleng ea hae le tse neng li tla etsahala nakong e tlang ha a se a tsositsoe ’me a khona ho mo rorisa ka ho sa feleng. Kahoo, Pesaleme ea 37:10, 11, 29 e bua ka lintho tse etsahetseng ha e ne e ngoloa le tse tla etsahala nakong e tlang. Litemana tseo li bua ka lintho tse ileng tsa etsahala mehleng ea Iseraele le tse tla etsahala nakong e tlang ha Molimo a phethahatsa litšepiso tsa hae.—Sheba serapa sa 8 sehloohong se reng “U Tla ba le ’Na Paradeiseng” se makasineng ena.
Pesaleme ea 61:8 le litemana tse ling tse tšoanang le eona li bontša hore Davida o ne a batla ho rorisa Jehova mehleng ea Iseraele ho fihlela a hlokahala. Hape li bontša seo Davida a tla se etsa nakong e tlang ha Jehova a mo tsosa.