Lipotso Tse Tsoang ho Babali
Ke monahano ofe oo Jehova a tla etsa hore mebuso e be le oona haufinyane?
Ha Tšenolo 17:16, 17 e bua ka ho qala ha mahlomola a maholo, e re: “Manaka a leshome ao u a boneng le sebata li tla hloea letekatse, li le nkele sohle li be li le hlobolise. Li tla ja linama tsa lona li le chese lore! Lebaka ke hore Molimo o entse hore manaka ao a nahane ho etsa ntho eo Molimo a e batlang. Kaofela a nahanne ntho e tšoanang e leng ho fa sebata matla a ’ona a ho busa.” Nakong e fetileng, lingoloa tsa rona li ’nile tsa re monahano oo Jehova a tla etsa hore mebuso e be le oona ke ho felisa bolumeli ba bohata.
Leha ho le joalo, re lokela ho ntlafatsa kutloisiso ea rona. Monahano oo Jehova a tla etsa hore mebuso e be le oona ke “ho fa sebata matla a ’ona a ho busa.” E le hore re utloisise hore na sena se tla phethahala joang, a re arabeng lipotso tse latelang.
Ho buuoa ka bo-mang boprofeteng boo? “Letekatse” le boetse le bitsoa “Babilona e Moholo.” Le emela ’muso oa lefatše oa bolumeli ba bohata. “Sebata se sefubelu” se emela Machaba a Kopaneng. Mokhatlo ona o ile oa thehoa ka 1919 e le ho etsa hore ho lule ho e-na le khotso lefatšeng, ’me o ne o bitsoa Selekane sa Lichaba. (Tšen. 17:3-5) “Manaka a leshome” ’ona a emela mebuso eohle ea lefatše e tšehetsang sebata.
Ho na le kamano efe pakeng tsa letekatse le sebata se sefubelu? Haesale letekatse le ‘lutse holim’a’ sebata, e leng se bolelang hore lea se tšehetsa le ho leka ho se laola.
Ho tla etsahala’ng ka letekatse? Sebata le manaka a leshome “li tla hloea letekatse.” Li tla le hloea hoo li tla le nkela ntho e ’ngoe le e ’ngoe eo le nang le eona le ho pepesa bokhopo ba lona. Hape sebata le manaka a leshome li tla le felisa, e leng seo Jehova a itseng se tla etsahala. (Tšen. 17:1; 18:8) Hoo e tla be e le ho fela ha mekhatlo ea bolumeli ba bohata. Leha ho le joalo, pele seo se etsahala, Jehova o tla etsa hore mebuso e etse ntho eo ho seng mohla e kileng ea etsahala molokong oa batho.
Jehova o tla etsa hore mebuso e etse’ng? O tla etsa hore manaka a leshome a be le monahano oa hae oa ho “fa sebata [se sefubelu] matla a ’ona a ho busa.” Sebata seo ke Machaba a Kopaneng. (Tšen. 17:13) Nahana hore na sena se bolela’ng. Na mebuso ea batho e tla iketsetsa qeto ea ho fa sebata matla a eona a ho busa joalo feela? Che! Boprofeta bo bontša hore Molimo ke eena ea tla etsa hore seo se etsahale. (Liprov. 21:1; bapisa le Esaia 44:28.) Na see se tla etsahala butle-butle? Che! Ho bonahala eka phetoho ena e tla etsahala ka tšohanyetso. Ka mor’a moo, sebata se seng se e-na le matla a eketsehileng, se tla phethahatsa kahlolo ea Jehova ea ho felisa mekhatlo ea bolumeli ba bohata hanngoe le ka ho ke keng ha phethoa.
Kahoo, re ka lebella eng? Ha rea lokela ho lebella ho bona litabeng mebuso e qala ho tšehetsa Machaba a Kopaneng hanyane ka hanyane. Re ka lebella sena: Ka ho panya ha leihlo, Jehova o tla etsa hore mebuso e fane ka matla a eona ho sebata. Ha seo se etsahala, re tla be re tseba hore mahlomola a maholo a tla tloha a qala. Hona joale, ‘a re luleng re falimehile ebile re e-na le likelello tse hlaphohetsoeng’ hobane ho tla etsahala liphetoho ka tšohanyetso haufinyane.—1 Bathes. 5:6.