Bo-rasaense ba Isa Pele Lenaka la Oache e Bontšang Hore na Lefatše le Fela Neng—Bibele e Re’ng ka Taba Ee?

Ka la 24 January 2023, bo-rasaense ba isa pele lenaka la oache e bontšang hore na lefatše le fela nenga hore e ee pel’a har’a mpa ea bosiu e leng se bolelang hore lefatše le haufi le ho fela.

• “‘Oache e bontšang hore na lefatše le fela neng’ e tšoantšetsa maemo a kotsi a akarelletsang ntoa ea Ukraine, lintoa tsa libomo tsa nuclear le maemo a hlobaetsang a leholimo e leng lintho tse atametsang ho fela ha lefatše. Lenaka lena le ile la atametsoa hore le be haufi le har’a mpa ea bosiu ka Labobeli leo.”—AFP International Text Wire.

• Ka Labobeli, bo-rasaense ba ile ba bontša hore ‘lenaka la oache e bontšang hore na lefatše le fela neng’ le isitsoe pele ’me ho se ho setse metsotsoana e 90 pele e e-ba har’a mpa ea bosiu e leng se bolelang hore armagedone e haufi haholo.”—ABC News.

• “Sehlopha sa bo-rasaense lefatšeng lohle se lemositse hore batho ba ka ’na ba timela neng kapa neng.”—The Guardian.

Na ho fela ha lefatše le batho ho haufi? Na re lokela ho tšoha hore na bokamoso bo tla ba joang? Bibele e re’ng ka taba ee?

Bokamoso bo re tšoaretse’ng?

Bibele e re: “Lefatše le lula le le teng ho ea ho ile” hape batho ba tla “phela ho lona ka ho sa feleng.” (Moeklesia 1:4; Pesaleme ea 37:29) Kahoo, batho ba ke ke ba khona ho senya lefatše kapa ho felisa bophelo bo ho lona.

Leha ho le joalo, Bibele e bua ka bofelo ba lefatše. Mohlala, e re ‘lefatše . . . le tla fela.’—1 Johanne 2:17.

• E le ho fumana hore na Bibele e re’ng ka ho fela ha lefatše, bala sehlooho se reng “Is the World Coming to an End? What Is the Apocalypse?” (“Na Lefatše Lea Fela? Ho Fela ha Lefatše Ke’ng?”)

• Ho ithuta hore na Bibele e re’ng ka liketsahalo tse tlang tsa ho fela ha lefatše, bala sehlooho se reng “When Will the World End?” (“Lefatše le Tla Fela Neng?”)

Lula u e-na le maikutlo a nepahetseng

Ke joang Bibele e ka re thusang hore re tsoele pele re e-na le maikutlo a nepahetseng ho sa tsotellehe mathata a teng lefatšeng?

• Bibele e re fa keletso e ka re thusang. (2 Timothea 3:16, 17) Mohlala, bala sehlooho se reng “How to Control Worry” (“U ka Hlola ho Tšoenyeha Joang?”) ho bona hore na Bibele e ka u thusa joang hore u tsoele pele u e-na le maikutlo a nepahetseng ho sa tsotellehe mathata a bophelo.

• Bibele e re fa tšepo e tiileng bakeng sa bokamoso. (Baroma 15:4) E hlalosa hore na re ka lebella’ng hona joale le nakong e tlang e leng ntho e re thusang ho tsoela pele re le sebete ha re ntse re sebetsana le maemo a lefatše.

E le hore Bibele e u tsoele molemo, re u mema hore u ithute eona mahala kajeno u sebelisa lenaneo la ho ithuta Bibele.