Letša la Mollo Ke’ng? Na ke Ntho e le ’Ngoe le Lihele Kapa Gehenna?
Karabo ea Bibele
Letša la mollo le tšoantšetsa timetso ea ka ho sa feleng. Ke ntho e le ’ngoe le Gehenna, empa hase lihele, kaha lihele ke lebitla.
Hase letša la sebele
Litemana tse hlano tsa Bibele tse buang ka “letša la mollo” li bontša hore hase ntho ea sebele empa ke letša la tšoantšetso. (Tšenolo 19:20; 20:10, 14, 15; 21:8) Lintho tse latelang li tla akheloa letšeng la mollo:
Diabolose. (Tšenolo 20:10) Kaha Diabolose ke sebōpuoa sa moea, a ke ke a ntšoa kotsi ke mollo oa sebele.—Exoda 3:2; Baahloli 13:20.
Lefu. (Tšenolo 20:14) Lefu hase ntho e tšoarehang empa ke boemo ba ho se phele. (Moeklesia 9:10) Lefu le ke ke la chesoa ka tsela ea sebele.
“Sebata” le “moprofeta oa bohata.” (Tšenolo 19:20) Kaha lintho tsena ke tsa tšoantšetso, na hase ntho e utloahalang ho lumela hore letša leo li akheloang ho lona ke la tšoantšetso?—Tšenolo 13:11, 12; 16:13.
Ke tšoantšetso ea timetso ea ka ho sa feleng
Bibele e bolela hore letša la mollo le “bolela lefu la bobeli.” (Tšenolo 20:14; 21:8) Lefu la pele le boleloang ka Bibeleng le bile teng ka lebaka la sebe sa Adama. Lefu lena le ka felisoa ka ho tsosoa ha bafu ’me qetellong Molimo o tla le felisa.—1 Bakorinthe 15:21, 22, 26.
Ha ho na ba lokolloang letšeng la mollo la tšoantšetso
Letša la mollo le bolela mofuta o fapaneng oa lefu kapa lefu la bobeli. Le hoja ba lahleloang ka letšeng lena le bona ba le boemong ba ho se phele, le fapane kaha ha ho moo Bibele e bolelang hore ho tla ba le tsoho lefung la bobeli. Ka mohlala, Bibele e bolela hore Jesu o na le “linotlolo tsa ngalo ea bafu le tsa lefu,” e leng se bontšang hore o na le matla a ho lokolla batho lefung le bakiloeng ke sebe sa Adama. (Tšenolo 1:18; 20:13, Bibele ea Sesotho) Leha ho le joalo, ha ho na motho ea nang le senotlolo sa letša la mollo, ho akaretsa le Jesu. Ba lahleloang letšeng leo la tšoantšetso ba hlokofatsoa ka ho sa feleng e leng se bolelang hore ba tla felisoa ka ho feletseng.—2 Bathesalonika 1:9.
Le tšoana le Gehena le Phula ea Hinome
Bibele e bua ka Gehena (geʹen·na ka Segerike) ka makhetlo a 12. Joaloka letša la mollo, le eona e tšoantšetsa pheliso ea ka ho sa feleng. Le hoja Libibele tse ling li re lentsoe lena le bolela “lihele,” Gehena hase lihele (sheʼohlʹ ka Seheberu, haiʹdes ka Segerike).
Phula ea Hinome
Lentsoe “Gehena” le bolela “Phula ea Hinome,” e leng phula e neng e le ka thōko ho Jerusalema. Mehleng eo baahi ba Jerusalema ba ne ba lahlela lithōle phuleng ena. Ho ne ho lula ho tuka mollo moo e le hore o chese lithole tseo; tšenyane e ne e ja ntho leha e le efe e sa chesoang ke mollo.
Jesu o ile a bolela hore Gehena e tšoantšetsa pheliso ea ka ho sa feleng. (Matheu 23:33) O ile a re Gehena ke “moo tšenyane ea bona e sa shoeng le mollo o sa tingoeng.” (Mareka 9:47, 48) Ka mokhoa o sa tobang, o ile a bua ka se etsahalang Phuleng ea Hinome le ka boprofeta bo ho Esaia 66:24, bo reng: “Ba tla tsamaea ’me ba talime litopo tsa batho ba neng ba ntšiteloa; etsoe libōkō tse holim’a bona li ke ke tsa shoa le mollo oa bona o ke ke oa tima.” Papiso ea Jesu ha e bue ka ho hlokofatsoa empa e bua ka ho felisoa ka ho feletseng. Tšenyane le mollo li felisa litopo, eseng batho ba phelang.
Bibele ha e bolele hore ho na le ba tla khutla Gehena. “Letša la mollo” le “Gehena ea mollo,” ka bobeli li tšoantšetsa pheliso ea ka ho sa feleng.—Tšenolo 20:14, 15; 21:8; Matheu 18:9.
“Ba tla hlokofatsoa bosiu le motšehare ka ho sa feleng le kamehla,” joang?
Haeba letša la mollo le tšoantšetsa pheliso, ke hobane’ng ha Bibele e bolela hore Diabolose, sebata le moprofeta oa bohata “ba tla hlokofatsoa bosiu le motšehare ka ho sa feleng le kamehla”? (Tšenolo 20:10) Hlokomela mabaka a mane a hore na ke hobane’ng ha ho hlokofatsoa hona e se hoa sebele:
E le hore Diabolose a hlokofatsoe ka ho sa feleng, o tla lokela ho lula a phela ka ho sa feleng. Leha ho le joalo, Bibele e re o tla etsoa lefeela, kapa a ke ke a hlola a e-ba teng.—Baheberu 2:14.
Bophelo bo sa feleng ke mpho e tsoang ho Molimo, hase kotlo.—Baroma 6:23.
Sebata le moprofeta oa bohata hase lintho tsa sebele ’me li ke ke tsa hlokofatsoa ka tsela ea sebele.
Bibele e fana ka moelelo oa hore ho hlokofatsoa ha Diabolose ke ho mo felisa kapa ho mo thibela ka ho sa feleng.
Ka Bibeleng lentsoe “ho hlokofatsa” le ka boela la bolela “ho thibeloa.” Ka mohlala, lentsoe la Segerike le bolelang “ba hlokofatsang” le sebelisitsoeng ho Matheu 18:34, Libibeleng tse ngata le bolela “balebeli ba teronko,” e leng se bontšang kamano e teng pakeng tsa mantsoe “ho hlokofatsa” le “ho thibeloa.” Ka ho tšoanang, litlaleho tse ho Matheu 8:29 le Luka 8:30, 31 li bontša hore “ho hlokofatsa” ke ntho e le ’ngoe le ‘mohohlo,’ e leng sebaka sa tšoantšetso se tšoantšetsang lefu. (Baroma 10:7; Tšenolo 20:1, 3) Ha e le hantle, ka makhetlo a ’maloa buka ea Tšenolo e sebelisa lentsoe “ho hlokofatsa” ka tsela ea tšoantšetso.—Tšenolo 9:5; 11:10; 18:7, 10.