Ke Hobane’ng ha ho E-na le Malumeli a Bokreste a Mangata Hakaale?
Karabo ea Bibele
Batho ba ’nile ba sebelisa lithuto tsa Jesu Kreste e le hore ba ithehele lihlopha tsa bona tsa “Bokreste”. Leha ho le joalo, Bibele e bontša hore ho na le Bokreste bo le bong feela ba ’nete. Nahana ka mabaka a mararo a etsang hore re fihlele qeto ena.
Jesu o ile a re o rutile “’nete,” hape Bakreste ba pele ba ne ba re bolumeli ba bona ke ba “’nete.” (Johanne 8:32; 2 Petrose 2:2; 2 Johanne 4; 3 Johanne 3) Mantsoe ana a bontša hore batho ba buellang lithuto tse hananang le tsa Jesu ha ba Bokresteng ba ’nete.
Bibele e ruta hore Bakreste ba lokela ho ‘bua ka tumellano.’ (1 Bakorinthe 1:10) Leha ho le joalo, malumeli a mangata a Bokreste ha a lumellane, esita le lithutong tsa bohlokoa joaloka hore na ho ba Mokreste ho bolela’ng. Ho ke ke ha etsahala hore ebe a nepahetse kaofela.—1 Petrose 2:21.
Jesu o ile a bolela esale pele hore batho ba bangata ba tla ipolela hore ke Bakreste empa ba tla hlōleha ho mamela litaelo tsa hae, kahoo a ke ke a ba amohela. (Matheu 7:21-23; Luka 6:46) Batho ba bang ba ne ba tla thetsoa ke baeta-pele ba bolumeli ba senyang bolumeli ba ’nete e le hore feela ba ithuise molemo. (Matheu 7:15) Leha ho le joalo, batho ba bang ba tla ikhethela ho latela Bokreste ba bohata hobane bo ba bolella lintho tseo ba batlang ho li utloa ho e-na le hore ba utloe ’nete ea Bibele.—2 Timothea 4:3, 4.
Papisong ea hae ea koro le mofoka, Jesu o ile a bolela esale pele hore batho ba bangata ba ne ba tla koenehela Bokreste ba ’nete. (Matheu 13:24-30, 36-43) Ka nako e telele, ho ne ho ke ke ha khoneha ho khetholla Bokreste ba ’nete ho ba bohata. Feela joalokaha Jesu a ile a bolela, bakoenehi ba ile ba eketseha ka mor’a lefu la baapostola. (Liketso 20:29, 30) Le hoja lithuto tsa bakoenehi li sa tšoane, mefuta eohle ea Bokreste e “khelohile ’neteng.”—2 Timothea 2:18.
Jesu o ile a bolela esale pele hore qetellong phapang pakeng tsa Bokreste ba bohata le ba ’nete e tla hlaka. Sena se etsahala mehleng ena ea rōna, e leng nakong ea “qetello ea tsamaiso ea lintho.”—Matheu 13:30, 39.