BACHA BAA BOTSA
Nka Hlola Liteko Joang?
Moapostola Pauluse o ile a re: “Ha ke batla ho etsa lintho tse nepahetseng, tse mpe li teng ho ’na.” (Baroma 7:21) Na u kile oa ikutloa ka tsela ee? Haeba ho joalo, sehlooho sena se tl’o u thusa hore na ke joang u ka hlolang teko ea ho etsa lintho tse fosahetseng.
Seo u lokelang ho se tseba
Hangata ha batho ba bang ba u hatella u qetella u batla ho etsa lintho tse mpe. Ha e le hantle Bibele e re “ho tloaelana le batho ba fosahetseng ho senya mekhoa e metle.” (1 Bakorinthe 15:33) Khatello e tsoang ho batho ba bang kapa linthong tseo u li shebellang le ho li bala e ka etsa hore u ipehe tekong oa ba “oa latela bongata hore u etse bobe.”—Exoda 23:2.
Jeremy o re: “Khatello ea ho batla ho ratoa le ho amoheloa ho ka etsa hore u batle ho etsa lintho tseo batho ba bang ba li etsang e le hore feela ba u amohele.”
Nahana ka sena: Ke hobane’ng ha teko e ka ba matla haholo haeba u lula u nahana ka seo batho ba se buang kapa ba se nahanang ka uena?—Liproverbia 29:25.
Taba-taba ke ena: U se ke oa lumella khatello ea lithaka hore e etse hore u sekisetse linthong tseo u li nkang e le tsa bohlokoa.
Seo u ka se etsang
Tseba seo u se lumelang. Haeba u sa tsebe seo u se lumelang, batho ba ka u etsa popae eo ba bapalang ka eona. Ho molemo hore u latele seo Bibele e se buang ha e re: “Etsang bonnete ba hore lintho tsohle li nepahetse, le khomarele tse nepahetseng.” (1 Bathesalonika 5:21) Ha u ntse u utloisisa seo u se lumelang, ho tla ba bonolo hore u phele tumellanong le sona ’me u hlole teko ea ho etsa se fapaneng.
Nahana ka sena: Ke hobane’ng ha u lumela hore melao ea Molimo ea boitšoaro e etselitsoe ho u tsoela molemo?
Kimberly o re: “Ke ithutile hore haeba ke emela seo ke se lumelang ebile ke sa inehele litekong, batho ba bang baa ntlhompha.”
Mohlala oa motho eo re ka mo etsisang ea hlahang ka Bibeleng: Daniele. Ha Daniele e sa le mocha, “o ile a etsa qeto ka pelong ea hae” hore o tla mamela melao ea Molimo.—Daniele 1:8.
Haeba u sa tsebe seo u se lumelang, batho ba ka u etsa popae eo ba bapalang ka eona
Tseba mefokolo ea hao. Ha Bibele e bua ka “litakatso tsa bocha” e bua ka boikutlo bo matla boo u bang le bona ha u sa le mocha. (2 Timothea 2:22) Sena se akarelletsa boikutlo ba ho batla ho amoheloa ke batho ba bang le ba ho iketsetsa liqeto le hoja u e-s’o fihle lilemong tse loketseng eseng feela boikutlo ba ho batla ho etsa thobalano.
Nahana ka sena: Bibele e re “e mong le e mong o lekoa ke ho hoheloa ke litakatso tsa hae.” (Jakobo 1:14) Ke takatso efe’ng eo u loantšanang le eona haholo?
Sylvia o re: “Tseba hore na ke liteko life tseo u iphumanang u tšoasehile ho tsona habonolo ’me u se ke oa ithetsa. Etsa lipatlisiso ka hore na u ka hlola liteko tseo joang ’me u ngole lintlha tseo u ka li sebelisang fatše. Ha u etsa joalo, u tla tseba hore na ke joang u ka hlolang liteko tse joalo nakong e tlang ha u tobana le tsona.”
Mohlala oa motho eo re ka mo etsisang ea hlahang ka Bibeleng: Davida. Ka linako tse ling Davida o ne a itlohella hore a hatelloe ke litakatso tsa hae le ke batho ba bang. Empa o ile a ithuta liphosong tsa hae ’me a leka ho ntlafatsa. O ile a rapela Jehova a re “hloekisa pelo ea ka, u fetole tsela eo ke nahanang ka eona e le hore nka tšepahala.”—Pesaleme ea 51:10.
Tseba seo u lokelang ho se etsa. Bibele e re: “U se ke oa itlohela hore u hloloe ke bobe.” (Baroma 12:21) Sena se bolela hore ha oa lokela ho inehella liteko. Empa u ka khetha ho etsa se nepahetseng.
Nahana ka sena: U ka etsa’ng hore u se ke oa iphumana u entse ntho e fosahetseng ha u lekoa?
Sophia o re: “Ke nahana ka hore na ke tl’o ikutloa joang kamor’a ho itumella ho lekoa. Na ke tl’o utloa ke khotsofetse? Mohlomong ka nakoana. Ho thoe’ng kamor’a nako e telele? Ke tla be ke ikoahlaea. Na ho molemo ho etsa joalo? Che!”
Mohlala oa motho eo re ka mo etsisang ea hlahang ka Bibeleng: Pauluse. Le hoja Pauluse a ile a lumela hore o na le takatso ea ho etsa se fosahetseng, o ile a ema a tiile. O ile a re: “ke tšoara ’mele oa ka ka thata ebile ke o tšoara joaloka lekhoba.”—1 Bakorinthe 9:27.
Taba-taba ke ena: Ho matleng a hao hore na u tla etsa’ng ha u hlaheloa ke liteko.
Hopola hore liteko ke lintho tsa nakoana. Melissa ea lilemo li 20 o re: “Ha ke nahana hore lintho tse ngata tseo e neng e le liteko ho ’na khale, hona joale ha li sa re letho, ke kholisehile hore liteko tse ntlhahelang li tla feta ’me ka le leng ke tla hetla ke hlokomele hore bophelo ba ka bo se bo le molemo hobane ke ile ka li hlola.”