HILTON o ne a rata litebele. Ha a le lilemo li supileng, o ne a rata ho loana ha a le papaling ea litebele le ho loantša batho ba bang! Ha a le sekolong se phahameng, eena le metsoalle ea hae ba ne ba lula ba batla bana bao ba ka ba otlang. O re: “Ke ne ke utsoa, ke becha, ke shebella litšoantšo tse litšila tse tsosang takatso, ke hlekefetsa basali ke bile ke rohaka batsoali ba ka. Ke ne ke itšoere hampe hoo batsoali ba ka ba neng ba re ke ba-e-hlōtse. Ke ile ka tloha lapeng ha ke qeta sekolo.”

Ha Hilton a khutlela hae ka mor’a lilemo tse 12, batsoali ba hae ba ne ba sa kholoe hore ke eena! O ne a ikokobelitse, a khona ho laola maikutlo a bile a hlompha. Ke eng e ileng ea etsa hore a fetohe hakaale? Ha a ntse a le hōle le hae, o ile a qala ho nahana ka ho teba ka bophelo ba hae. O ile a boela a hlahloba Bibele ’me a fumana litsela tseo a neng a ka fetola bophelo ba hae ka tsona. Hilton o re: “Ke ile ka latela seo ke neng ke se bala ka Bibeleng, e leng se bolelang hore ke ne ke lokela ho tlohela tsela eo ke neng ke itšoere ka eona ’me ke mamele taelo e ho Baefese 6:2, 3 e reng ke hlomphe batsoali ba ka. Ka lekhetlo la pele bophelong ba ka ke ile ka fumana thabo ea sebele ’me ka thabisa ’Mè le Ntate ho e-na le ho ba utloisa bohloko!”

Pale ea Hilton e bontša hore Bibele e ka re thusa kajeno le hore melao ea eona ea boitšoaro e na le matla a ho fetola bophelo ba batho. (Baheberu 4:12) A re ke re hlahlobe e meng ea melao eo—e leng botšepehi, boitšoaro, ho tšepahala lenyalong le lerato—le kamoo melao ena e ka ntlafatsang bophelo ba rōna kateng.

MOLAO-MOTHEO OA BIBELE: “Ke mang eo e tla ba moeti tenteng ea [Molimo]? . . . Ke ea tsamaeang ka mokhoa o se nang molato ’me a etsa ho loka ebile a bua ’nete ka pelong ea hae.”—Pesaleme ea 15:1, 2.

MELEMO: Batho ba bangata ba nka botšepehi e le ba bohlokoa. Empa ho etsahala’ng ha ho hlaha monyetla oa hore motho a se ke a tšepahala e le hore a fumane ntho e itseng—’me ho se na motho ea ba bonang? Joale ho tla bonahala hore na lipelo tsa bona li sekametse hokae.

Raquel, eo mosebetsi oa hae o akarelletsang ho reka thepa, o re: “Barekisi ba bang ba ne ba batla ho mpha tjotjo. Ba ne ba ntšepisa hore ha nka reka ho bona, ba tla etsa hore chelete e ’ngoe e tle ho ’na ho e-na le hore e ee k’hamphaning. Empa ke ile ka hopola keletso ea Bibele mabapi le botšepehi ’me ka hana. Mohiri oa ka o ile a utloela ka sena ’me seo sa etsa hore a ntšepe le ho feta.”

Hoja Raquel a ile a lekeha ho amohela tjotjo eo, a ka be a ile a thabela ho ba le chelete ka nakoana. Empa ho ne ho tla etsahala’ng ha mohiri oa hae a ne a ka tseba? Na Raquel o ne a tla tsoela pele a mo sebeletsa? Hona na o ne a tla atleha ho fumana mosebetsi o mong nakong e tlang? Ntho e neng e le ea bohlokoa haholo ho Raquel e ne e le ho boloka letsoalo la hae le hloekile le hore a lule a itlhompha. Liproverbia 22:1 e re: “Bitso le letle le molemo ho feta maruo a mangata, ho hlompheha ho melomo ho feta silefera kapa khauta.” (Bibele—Phetolelo e Ncha)

Jessie le eena o ne a tšepahala ’me seo se ile sa etsa hore mohiri oa hae a mo rate. O ile a fumana melemo efe? O ile a fuoa mosebetsi oa ho ba mookameli le bolokolohi ba ho ikhethela lihora tseo a tla sebetsa ka tsona. Kahoo, o ne a khona ho qeta nako e ngata le mosali oa hao le bana hammoho le mesebetsing ea phutheho.

Hangata ha bahiri ba bang ba batla ho hira, ba sheba bathong ba tsebahalang ka botšepehi. Ka mohlala, mookameli e mong oa k’hamphani e Philippines o ile a ngolla ofisi ea Lipaki Tsa Jehova ea sebakeng sa habo a kōpa hore Lipaki li kenye kōpo ea mosebetsi. O ile a re: “Ke batho ba sebetsang ka thata le ba tšepahalang.” Empa tlotla e lokela ho isoa ho Jehova Molimo ea re rutang ho ‘hloea se sebe’ le ho ‘rata se molemo.’—Amose 5:15.

MOLAO-MOTHEO OA BIBELE: “Ea hlokang kelello o hlahatsa moea oohle oa hae, empa ea bohlale o o boloka o khutsitse.”—Liproverbia 29:11.

MELEMO: Haeba u ne u lokela ho ngola ka melemo eohle ea ho bontša boitšoaro, u ne u tla hloka maqephe a mangata! Ntho ea bohlokoa le ho feta ke hore re tla phela hantle ha re bontša tšobotsi ena. Bibele e re: “Pelo e nang le khutso ke bophelo ba sebōpuoa sa nama.” Hape e re, “pelo e thabileng ke moriana o motle.” (Liproverbia 14:30; 17:22) Ka lehlakoreng le leng, liphuputso li bontša hore batho ba ratang ho halefa le ba tletseng lehloeo, ba ipeha kotsing ea ho kula, haholo-holo ea ho tšoaroa ke lefu la pelo. Ha e le hantle, ho na le molemo e meng eo motho a tla e fumana ha a bontša boitšoaro.

Cassius, ea lilemo li ka holimo ho 30, o re: “Ke ne ke rata ho ngangisana le batho, ke halefa lefeela ebile ke rata ho loana. Ke ne ke sa itlhomphe ho hang. Empa seo sohle se ile sa fetoha ha ke qala ho sebelisa melao-motheo ea Bibele. Ke ile ka ithuta ho laola maikutlo, ho ikokobetsa le ho tšoarela ba bang. Ho seng joalo, nka be ke ile ka qetella ke tšoeroe. Ruri ke ikutloa eka ke pholositsoe lefung!”

MOLAO-MOTHEO OA BIBELE: “Lenyalo le ke le hlomphehe har’a bohle, le liphate tsa lenyalo li hloke litšila.”—Baheberu 13:4.

MELEMO: Batho ba bang ba nahana hore mantsoe ao a siiloe ke nako. Empa ba fositse haholo! Ho se tšepahale kajeno ho utloisa bohloko ka tsela e tšoanang le mehleng ea ha ho ne ho ngoloa Bibele.—Liproverbia 6:34, 35.

Jessie, ea nang le mosali le bana, o ile a re: “Ho tšepahala ho entse hore re atamelane haholo le mosali oa ka le hore re thabe. Ka sebele, ke habohlokoa ho tšepana lenyalong. Ho se tšepahale lenyalong ho etsa hore le se ke la tšepana”—re se re sa re letho ka tsela eo ho tla ama bana ka eona!

Ligayaa o ile a beha lenyalo la hae kotsing. O re: “Ke ile ka qala ho tloaelana le batho ba mekhoa e mebe. Eaba ke qala ho ea liphathing tsa bosiu le ho se tšepahalle monna oa ka.” Na ho phela ka tsela ee ho ile ha thabisa Ligaya? Eena le monna oa hae ba ne ba lula ba tjolietsana ’me o ne a sa thaba. O re: “Ha ke nahana ka tsela e soabisang eo ke neng ke phela ka eona, ke ile ka hlokomela hore batsoali ba ka ba ne ba nepile ha ba re, ‘Litloaelano tse mpe li senya mekhoa e metle.’”—1 Bakorinthe 15:33.

Ligaya o phaella ka ho re: “Pele lintho li senyeha le ho feta, ke ile ka etsa qeto ea ho fetola bophelo ba ka ’me ka ithuta Bibele—khetlong lena ke sebelisa seo e se rutang.” Liphello e bile life? O ile a sireletsa lenyalo la hae ’me monna oa hae a qala ho mo tšoara ka mosa le ka tlhompho. O re: “Bibele e fetotse bophelo ba ka ’me ha ke ikoahlaele ho tlohela tsela eo ke neng ke phela ka eona pele le batho ba neng ba iketsa eka ke metsoalle ea ka.”

MOLAO-MOTHEO OA BIBELE: “Le ikapese lerato, etsoe ke tlamo e phethahetseng ea bonngoe.”—Bakolose 3:14.

MELEMO: Lerato leo ho buuoang haholo ka lona ka Bibeleng, hase la baratani kapa la ho batla ho kopanela liphate. Ho e-na le hoo, ke mofuta oa lerato o bonahalang ka litšobotsi tse kang kutloelo-bohloko, ho tšoarela, boikokobetso, botšepehi, mosa le mamello. (Mikea 6:8; Bakolose 3:12, 13) Ho fapana le ho nkeha maikutlo, hoo hangata ho felang ha nako e ntse e ea, lerato le lula le ntse le hōla ka ho sa feleng.

Brenda, eo a seng a e-na le lilemo tse ka bang 30 a nyetsoe, o re: “Lerato la banyalani ba bacha hase letho ha le bapisoa le lerato la motho ea seng a e-na le lilemo a le lenyalong.”

Sam, ea seng a e-na le lilemo tse fetang 12 a nyetse, o ile a re: “Kamehla ’na le mosali oa ka re ne re makatsoa le ho hlolloa ke kamoo likeletso tsa Bibele li re thusang kateng le kamoo li leng bonolo kateng! Ha re li latela, lintho li re tsamaela hantle. Leha ho le joalo, hase kamehla ke li latelang, seo se etsahala ha ke halefile, ke nahanetse ’na feela, kapa ke khathetse. Ka linako tseo ke kōpa Jehova hore a nthuse ho tlosa maikutlo ao. Ebe ke haka mosali oa ka ’me ho e-s’o ee kae, lintho li khutlela setloaeling!”

Jesu Kreste o ile a re, “bohlale bo pakoa ke mesebetsi ea bona.” (Matheu 11:19) Tumellanong le mantsoe ao, Bibele e na le mehlala e mengata ea bohlale ba sebele. Lithuto le melao ea eona e ea sebetsa. Ha e siuoe ke nako. Ha e ee ka setso kapa morabe. Hape e totobatsa hore e tsoa ho Motho ea tsebang sebōpeho sa batho hantle, e leng ’Mōpi oa rōna Jehova Molimo. Leha ho le joalo, re ka bona seo ha re e sebelisa. Ke kahoo, Bibele e re memang hore re ‘latsoe ’me re bone hore Jehova o molemo.’ (Pesaleme ea 34:8) Na u tla amohela memo eo?