linku tse ngata le monna ea futsanehileng ea neng a e-na le konyana e le ’ngoe feela e tšehali eo a neng a e hōlisa ka tlhokomelo e khōlō. Davida ka boeena e ne e kile ea e-ba molisa, kahoo o ne a ka khona ho utloisisa maikutlo a mong’a konyana eo. Davida o ile a arabela ka khalefo e lokileng khahlanong le monna eo ea ruileng ea ileng a nka konyana e ratehang ea monna eo ea futsanehileng. Eaba Nathane o bolella Davida sefahla-mahlo o re: “Monna eo ke uena!” Pelo ea Davida e ile ea finyelloa ’me o ile a bontša pako ea sebele. (2 Sam. 12:1-14) Haeba u itlhakisa, le uena u ka ithuta ho sebetsana le litaba tse amang maikutlo ka mokhoa o ipiletsang.

Mehlala e mengata ea bohlokoa bakeng sa ho ruta e ka nkoa liketsahalong tse tlalehiloeng ka Mangolong. Jesu o ile a etsa sena a sebelisa mantsoe a seng makae ha a ne a re: “Hopolang mosali oa Lota.” (Luka 17:32) Ha a qaqisa pontšo ea ho ba teng ha hae, Jesu o ile a bua ka “matsatsi a Noe.” (Mat. 24:37-39) Ho Baheberu khaolo ea 11, moapostola Pauluse o ile a bua ka mabitso a banna le basali ba 16 e le mehlala ea tumelo. Ha u ntse u tloaelana le Bibele hamolemonyana, u tla khona ho fumana mehlala e matla ho seo Mangolo a se bolelang ka liketsahalo le batho ba boletsoeng ka har’a eona.—Bar. 15:4; 1 Bakor. 10:11.

Ka linako tse ling ho ka ba molemo hore u hatise ntlha ea thuto ka phihlelo ea sebele, ea mehleng ena. Leha ho le joalo, ha u etsa sena, u be seli hore u sebelise feela liphihlelo tse netefalitsoeng le ho qoba tse ka hlabisang leha e le mang har’a bamameli ba hao lihlong ho sa hlokahale kapa tse ka tsosang khang ka taba e sa amaneng le seo u buang ka sona. Hape, hopola hore phihlelo e lokela ho ba le morero. U se ke ua pheta makolopetso a sa hlokahaleng a ka ’nang a tlosa tlhokomelo ho seo u rerileng ho se finyella ka nehelano ea hao.

Na e Tla Utloisisoa? Ho sa tsotellehe hore na u sebelisa papiso kapa mohlala ofe, o lokela ho finyella pakane e itseng e tobileng. Na o tla finyella pakane eo haeba u sa bontše hore na o sebetsa joang tabeng e ntseng e tšohloa?

Hoba a bue ka barutuoa ba hae e le “leseli la lefatše,” Jesu o ile a fana ka litlhaloso tse seng kae tse eketsehileng tse bontšang kamoo lebone le sebelisoang kateng le hore na sena se ne se ba jarisa boikarabelo bofe. (Mat. 5:15, 16) O ile a phaella papiso ea hae ea nku e lahlehileng ka ho bua ka thabo e bang teng leholimong ka lebaka la moetsalibe ea bakang. (Luka 15:7) ’Me ka mor’a ho pheta pale ea hae ea Mosamaria ea nang le moea oa boahelani, Jesu o ile a botsa motho ea neng a mo mametse potso e tobileng eaba o phaella ka ho fana ka keletso e tobileng. (Luka 10:36, 37) Ho fapana le moo, Jesu o ile a hlalosetsa feela ba neng ba botsa ka boikokobetso ka papiso ea hae ea mefuta e sa tšoaneng ea mobu le ka papiso ea mofoka tšimong, empa ha aa ka a hlalosetsa matšoele. (Mat. 13:1-30, 36-43) Matsatsi a mararo pele ho lefu la hae, Jesu o ile a bua ka papiso ea balemi ba tšimo ea morara ba tletseng moea oa polao. Ha aa ka a bontša hore na e ne e sebetsa joang; ho ne ho sa hlokahale hore a etse joalo. “Baprista ba ka sehloohong le Bafarisi . . . ba elelloa hore o ne a bua ka bona.” (Mat. 21:33-45) Kahoo, mofuta oa papiso, boikutlo ba bamameli le pakane ea hao, kaofela ha tsona li lekanyetsa hore na hoa hlokahala hore u bontše hore na taba e sebetsa joang le hore, haeba ho hlokahala, u lokela ho etsa joalo ho isa bohōleng bofe.

Ho ba le bokhoni ba ho sebelisa lipapiso le mehlala ka katleho ho nka nako, empa seo se tšoanela boiteko. Lipapiso tse khethiloeng hantle li ipiletsa kelellong le maikutlong. Seo se fella ka ho etsa hore molaetsa o fetisoe ka tsela e matla eo hangata e ke keng ea finyelloa ka ho bua lintlha ka tsela e tloaelehileng feela.

Thuto 46

Lipapiso Tse Nkiloeng Maemong a Tloaelehileng

Ke eng seo u lokelang ho se etsa?

Sebelisa lipapiso tse akarelletsang mesebetsi eo bamameli ba hao ba e etsang kapa litaba tseo ba li tsebang hantle.

Ke Hobane’ng ha e le Tsa Bohlokoa?

Lipapiso tse nkiloeng maemong a tloaelehileng li tla ama lipelo tsa bamameli.

KA HO hlakileng, ke habohlokoa hore lipapiso leha e le life tseo u li sebelisang li tšoanele boitsebiso boo u bo tšohlang. Leha ho le joalo, hore li atlehe haholo, ka ho tšoanang ke habohlokoa hore li tšoanele bamameli ba hao.

Mofuta o itseng oa bamameli o ka susumetsa lipapiso tseo u li khethang tseo u tla li sebelisa ha u bua le sehlopha sa batho joang? Jesu Kreste o ile a etsa joang? Ho sa tsotellehe hore na o ne a bua le matšoele kapa le barutuoa ba hae, Jesu ha aa ka a nka mehlala ea hae mekhoeng ea bophelo ba batho ba ka ntle ho linaha tsa Iseraele. Mehlala e joalo e ne e tla utloahala e sa tloaeleha ho bamameli ba hae. Ka mohlala, Jesu ha aa ka a bua ka bophelo ba boreneng ba Egepeta kapa ka mekhoa ea bolumeli ea India. Ho ntse ho le joalo, lipapiso tsa hae li ne li bua ka lintho tseo batho ba li tloaetseng linaheng tsohle. O ile a bua ka ho rōka liphahlo, ho ntšetsa khoebo pele, ho lahleheloa ke ntho e itseng ea bohlokoa le ho ea meketeng ea manyalo. O ne a utloisisa kamoo batho ba itšoarang kateng tlas’a maemo a sa tšoaneng ’me o ile a sebelisa tsebo ena. (Mar. 2:21; Luka 14:7-11; 15:8, 9; 19:15-23) Kaha boboleli ba hae ba phatlalatsa bo ne bo lebisitsoe ho sechaba sa Iseraele ka ho khetheha, hangata lipapiso tsa Jesu li ne li bua ka lintho le mesebetsi eo e neng e le karolo ea bophelo ba sona ba letsatsi le letsatsi. Kahoo, o ile a bua ka lintho tse kang temo, tsela eo linku li arabelang ho molisa oa tsona ka eona le ho bolokoa ha veine ka har’a makuka. (Mar. 2:22; 4:2-9; Joh. 10:1-5) Hape o ile a bua ka mehlala e tloaelehileng ea histori—ho bōptjoa ha banyalani ba pele ba batho, Moroallo oa mehleng ea Noe, ho timetsoa ha Sodoma le Gomora, ho shoa ha mosali oa Lota, ha re bua ka mehlala e seng mekae feela. (Mat. 10:15; 19:4-6; 24:37-39; Luka 17:32) Ha u khetha lipapiso, na le uena u nahana ka hloko ka lintho tseo bamameli ba hao ba li tloaetseng le tse tloaelehileng setsong sa bona?

Ho thoe’ng haeba u sa bue le sehlopha se seholo sa batho, empa u bua le motho a le mong kapa ba seng bakae feela? Leka ho khetha papiso e loketseng bamameli bao ba seng bakae ka ho khetheha. Ha Jesu a ne a pakela mosali oa Mosamaria selibeng haufi le Sikare, o ile a bua ka “metsi a phelang,” ‘ho se hlole u nyoroa le ka mohla’ le “seliba sa metsi a tšikhunyang ho fana ka bophelo bo sa feleng”—tseo kaofela e leng mekhabo-puo e neng e amana ka ho toba le mosebetsi oa mosali eo. (Joh. 4:7-15) ’Me ha a ne a bua le banna ba neng ba hlatsoa matlooa a bona a ho tšoasa litlhapi, mokhabo-puo oo a ileng a o khetha o ne o amana le mosebetsi oo oa ho tšoasa litlhapi. (Luka 5:2-11) Boemong leha e le bofe, a ka be a buile ka temo, kaha ba ne ba phela sebakeng sa temo, empa ho bua ha hae ka mosebetsi oa bona ho ile ha atleha hakaakang kaha o ile a etsa hore ba bone hoo ka mahlo a kelello! Na u leka ho etsa joalo?

Le hoja Jesu a ile a lebisa tlhokomelo “ho linku tse lahlehileng tsa ntlo ea Iseraele,” moapostola Pauluse o ne a sa romeloa ho Baiseraele feela empa o ne a rometsoe le ho Balichaba. (Mat. 15:24; Lik. 9:15) Na see se ile sa etsa phapang mokhoeng oo Pauluse a neng a bua ka oona? E. Ha a ngolla Bakreste Korinthe, o ile a bua ka lipeiso tsa maoto, a bua ka tloaelo ea ho ja lijo litempeleng tsa litšoantšo ’me a bua ka mekoloko ea tlhōlo, lintho tseo Balichaba bao ba neng ba li tloaetse.—1 Bakor. 8:1-10; 9:24, 25; 2 Bakor. 2:14-16.

Na u hlokolosi joaloka Jesu le Pauluse ha u khetha lipapiso le mehlala eo u ka e sebelisang ha u ruta? Na u nahana ka semelo le lintho tseo bamameli ba hao ba li etsang letsatsi le letsatsi? Ke ’nete hore ho bile le liphetoho lefatšeng haesale ho tloha lekholong la pele la lilemo. Batho ba bangata ba khona ho tseba litaba tsa lefatše ka thelevishene. Hangata baa tseba hore na maemo a joang linaheng tse ling. Haeba boemo bo joalo sebakeng sa heno, ka sebele ha ho phoso ho etsa lipapiso ka boitsebiso bo joalo bo hlahang litabeng. Leha ho le joalo, hangata lintho tse amang batho ka ho teba ke tse amanang le bophelo ba bona ba botho—mahae a bona, malapa a bona, mesebetsi ea bona, lijo tseo ba li jang le boemo ba leholimo sebakeng seo ba phelang ho sona.

Haeba papiso ea hao e hloka hore u e hlalose haholo, e ka ’na eaba u bua ka ntho eo bamameli ba hao ba sa e tloaelang. Papiso e joalo e ka pupetsa morero oa thuto habonolo. Ka lebaka leo, bamameli ba ka ’na ba hopola papiso ea hao eseng ’nete ea Mangolo eo u neng u leka ho e fetisa.

Ho e-na le ho etsa lipapiso tse rarahaneng, Jesu o ile a sebelisa lintho tse bonolo tsa letsatsi le letsatsi. O ile a sebelisa lintho tse nyenyane ho hlalosa lintho tse khōlō le ho sebelisa lintho tse bonolo ho hlakisa lintho tse thata. Ka ho hokahanya liketsahalo tsa letsatsi le letsatsi le linnete tsa moea, Jesu o ile a thusa batho hore ba utloisise habonolo linnete tsa moea tseo a neng a li ruta ’me ba li hopole. Oo ke mohlala o motle hakaakang oo re ka o latelang!