Ho Buoa Ntle ho Mali—“Phetoho e Khōlō ho Tsa Bongaka”
TLAS’A sehlooho se reng “Ho Buoa ‘Ntle ho Mali,’” makasine ea Maclean’s e ile ea tlaleha hore lingaka ho pholletsa le Canada li ’nile tsa “qapa mekhoa e mecha, eo lilemong tse hlano tse fetileng, e entseng hore seo ho thoeng ke ho buoa ntle ho mali e be phetoho ea khōlō ho tsa bongaka.” Brian Muirhead, ngaka e robatsang ka lithethefatsi Setsing sa Saense ea Bophelo bo Botle sa Winnipeg, ke e ’ngoe ea tsona. Ke eng se ileng sa mo susumelletsa hore a etse phuputso ka phekolo ea mofuta o mong ea ho buoa ntle ho mali?
Ka 1986, Dr. Muirhead o ile a etsa mosebetsi o thata oa ho buoa monna ea lilemo li 70 ea neng a e-na le seso sa ka maleng se lutlang mali, eo ka lebaka la litumelo tsa hae tse thehiloeng Bibeleng e le e mong oa Lipaki tsa Jehova, a neng a kōpile hore a phekoloe a sa tšeloe mali. (Liketso 15:28, 29) Maclean’s e tlaleha hore Dr. Muirhead “o ile a sebelisa mokhoa o sebelisoang seoelo oa ho tšela mokuli enoa lero la motsoako oa letsoai hore matla ao mali a hae a phallang ka ’ona a lule a phahame. Mokhoa ona o ile oa atleha, ’me o ile oa matlafatsa tumelo ea Muirhead e ntseng e hōla ea hore ‘re ne re tšela batho ba bangata haholo mali. Ke ile ka nahana hore ke nako ea ho batla mefuta e meng ea phekolo.’”
Letšolo la ho batla ho buuoa ntle ho mali le ile la “susumetsoa ke ho ameha ka phepelo ea nako e tlang ea mali a fanoang—le ke tšabo eo bakuli ba bangata ba nang le eona ea ho tšoaetsoa kokoana-hloko ea boloetse bo itseng ka ho tšeloa mali.” Ka thuso ea patlisiso ea lingaka tse khonang ho qapa lintho tse ncha, hase Lipaki tsa Jehova feela tse ruileng molemo empa le ba bang ba bangata ba ruile molemo. Maclean’s e re: “Ntle le ho fokotsa palo ea bakuli ba tšeloang mali, ho buoa ntle ho mali ho fokotsa kotsi—ho sa tsotellehe hore na e fokola hakae—ea ho tšoaetsoa ka mali a silafetseng.” Empa esita le mali a “hloekileng” a ka ba le kotsi ea hore mokuli a tšoaetsoe hobane ka nakoana a hatella matla a ’mele oa hae a ho itšireletsa mafung.
Ke eng e etsang hore tumelo ea Lipaki tsa Jehova e tiee tabeng ea ho buuoa ntle ho mali? U ka ’na ua thahasella ho bala bukana e bitsoang, Mali a ka Boloka Bophelo ba Hao Joang? Lipaki tsa Jehova li tla thabela ho u abela eona.